شهر رمضان هو محطة ايمانية هامة نتعلمو منها و نطورو انفسنا و نحسنو سلوكنا و عاداتنا و نتدربوا على الصبر، لهذا نحبو نستفادو منو و نستغله احسن استغلال بصح للاسف عاد يجوز بلخف و مانحسوش كامل بيه حتى يخلاص و مانحققوش فيه واش كنا حابين و السبب خواتاتي هو بعض الامور لي تسرقنا وقتنا في رمضان انا نسميها سارقوا الوقت في رمضان، لانو صح تسرقنا وقتنا بلا ما نفيقو و بعدها نحسو بالندم و تأنيب الضمير حبيتو تعرفو واشنو هوما هاد اللصوص لي تسرقنا الوقت في رمضان اقراو الموضوع للاخير.

خواتاتي لصوص الوقت كثرت و في رمضان تزيد و تكثر و عاد الوقت مافيهش كامل البركة هذا اذا خططنا و عرفنا واش حابين نديرو و نظمنا وقتنا و مايكفيش فما بالك اذا بقى وقتنا مهمل و ماشي منظم و ماشي مدروس من بين هذه اللصوص لي تديلنا الوقت عندنا :السوق، في رمضان تحكملنا على المارشيات و القضيان و تغيرنا هديك السلع المعروضة و الروايح الله الله، تخرجي على حاجة تلقاي روحك جوزتي نص النهار فالسوق و اكيد راح تدخلي تعبانة و بعدها نص النهار لي قعد يجوز كامل تقريبا فالمطبخ و فالليل تطيحي عيانة و هكذا كل يوم حتى يضيع الوقت منك، حبيبتي لكي تتجنبي هاذ المشكل نقولك حضري من قبل قائمة المشتريات باه كي تخرجي تروحي مباشرة لواش راكي حابة و ماتبقايش تدوري و تخممي هاذي نشريها،هاذي مانشريهاش، هاذي واقيلا خلاصتلي،هاذي عندي، و حاولي تخرجي صباح بكري باه تجتنبي الغاشي و ترجعي بلخف لدارك و انتبهي ختي تبقاي غير ادوري فالسوق بلا فايدة راح تضيعي وقتك و تبذلي مجهود زايد و اتعبي روحك، اذن فالتسوق الكثير هو واحد من لصوص الوقت في رمضان.

و كي نقولو السوق و القضيان نقولو الطياب، الطياب يسرق بزاف وقت في رمضان، خاصة لي يطيبو عدة اطباق و عدة مقبلات و عدة تحليات، و اكيد راكي لاحظتي انو بعد هاد الوقوف الطويل جدا فالمطبخ و فالاخير تأكلو زوج لقمات و تشبعو، على هذا انتبهي اختي من المطبخ في رمضان راهو يأخذ وقت كبير بزاف و تتعبي بزاف، نقولك ختي حضري من قبل واش راح تطيبي و اسألي افراد عائلتك واش حابين ياكلو هكذا تعرفي واش راح تحضري ولي يتشرطو و يتوحمو نقولك كوني ذكية تقدري طبق تاع البارح تبدليه و يرجع يبان جديد، و كاين لي يجربو وصفات جديدة و اذا مانجحتش تولي حالة طوارئ فالبيت و تولي تجري تحضري حاجة جديدة في اخر لحظة و تتقلقي و ترتبكي، اجتنبي هذا الفوضى و كوني ذكية و اعرفي كيفاه تتحكمي فالوقت تاع المطبخ باه مايديش وقت مهام اخرى تستنى فيك، واستعيني بالتحضير المسبق و التخطيط قبل بيوم.

التلفاز و ماادراك مالتلفاز، و لوكان نعرفو شحال يضيعلنا وقت في رمضان، هاذو مسلسلات، و هاذو وصفات، و هاذو برامج، و بلا ماننساو الوقت لي يضيع و حنا نستناو فالاشهار يجوز، و اكيد القنوات عادو يستغلو شهر رمضان في اطلاق برامج جديدة وعادو يعتبروه السباق الرمضاني، ياسلام هما يتسابقو و الخاسر الاكيد هو حنا لي نقعدو نتبعو فيهم،حذاري ثم حذاري ختي من هذه الخدع الإعلامية و ماتستسلميش ليهم اذا حبيتي اتفرجي حاجة و لا ثنين و الباقي راهم يعاودوه عالعام و كي نجو للصح كل البرامج و المسلسلات متشابهة و موضوعها واحد و هدفها شد انتباهنا في رمضان، انتبهي يجوزو الايام و ينتهي شهر رمضان و تندمي على الوقت الكثير لي ضاعلك و نتي مقابلة التلفزيون.

و كذلك الانترنت ختي يضيع بزاف الوقت في رمضان و في غير رمضان، و حنا النساء عادة نقعدو نبحثو على الوصفات و الاكلات، او ربما مجرد تضييع الوقت كيما نقولو نجيب فالوقت بالأنترنت ،حبيبتي قلصي من وقت الانترنت خاصة في رمضان راهو يلهيك و ماتفيقيش للوقت كيفاه يضيعلك، و خصصي وقت معين للإنترنت مثلا نص ساعة فالصباح و نص ساعة فالعشية او أقل او أكثر، المهم يكون الوقت محدد و معروف، و غير يخلاص الوقت حبسي النت مباشرة و نوضي ديري مهام اخرى.

و الحاجة لي ولات مشهورة و معروفة هو النوم الكثير في رمضان، للاسف عاد شهر رمضان مخصص للنوم و الرقاد و الكسل، اذا كنتي ختي من الناس لي ترقد نهار كامل في رمضان نقولك مراكيش مستفادة من فضائل و قيم هذا الشهر العظيم لهذا غيري هذه العادة السيئة و نوضي تخدمي على روحك رمضان عمرو ما كان تاع رقاد و كسل و انما هو شهر العمل و النشاط و المثابرة و الجهاد.
وكاين تاني عوامل اخرى مثل المكالمات الطويلة و الطويلة جدا و خاصة كي عادت المكالمات باطل و ولات لاتنتهي و القصرة و الهدرة بلا فايدة، و القعدة مع الجارة او الصديقة لوقت مطول، و السهر لوقت متأخر من الليل و كاين حتى لي يجوزو ليالي بيضاء مايرقدوش كامل حتى مور الفجر و يرقدوا نهار كامل .

كذلك كاين عامل ضمان الوقت و هو كي نشوفو النهار طويل في رمضان و عندنا متسع كبير نطمعو و نأجلو مهامنا و نقولو مزال الحال ، مزال المغرب درك شوية و نبدا العمل كي شغل نضمنو انو مزال كاين الوقت حتى يطير يجري بلا ما نحسولو.
اختي مرانيش نقول ما تتفرجيش التليفزيون او ما ترقديش او ماتخرجيش كامل او ماتستعمليش الانترنت لا، و انما كوني معتدلة و متوازنة و اعطي لكل حق حقه ما تخليش حاجة تدي وقت حاجة أخرى، واستعيني بقائمة المهام لي تكوني وجدتيها نهار من قبل و لي تحددي فيها المهام تاعك تاع اليوم و كذلك حددي فيها المهام المهمة ولي لازم تندار و الغير مهمة، هي قضية تنظيم و ترتيب الوقت بين المهام و الراحة و الترفيه، باه في اخر الشهر الفضيل تلقاي روحك خصصتي وقت و انجزتي اهدافك و استفدتي من مدرسة رمضان.
كانوا الصالحين و الأتقياء مايضيعوش و لا ثانية في هذا الشهر الفضيل لانهم يعرفولو قدرو و قيمتو لدرجة انهم كانو يحبسوا قراءة الكتب و يتفرغوا للعبادات و قراءة القرآن و حنا ليوم للاسف نضيعوا وقتنا في امور تافهة و ماتنفعناش و السبب عدم وعينا و عدم استشعارنا لهاذ النعمة العظيمة علينا.

احذري يا اختي العزيزة من لصوص الوقت و من تضييع الوقت الثمين في رمضان كل دقيقة بحقها صدقيني لو تعرفي تسيري وقتك راكي تنجزي مهام كثيرة و متعددة و تحققي اهدافك و تحسي بالرضا و السعادة عن نفسك خير ما تحسي بشعور الندم و التأنيب و تقولي لوكان غير درت كاش حاجة، وقتناحنا مسؤولين عليه و راح نتحاسبو عليه، وكيما نقولو شعارنا في كل موضوع لازم نعيشو صح و نستغلو الشهر الكريم بذكاء.

الشمس المشرقة.