الوالدين هما نعمة و هدية لينا من عند ربي و هما تاج فوق رؤسنا و مصدر الامان و الحنان، طاعتنا لوالدينا واجبة علينا و قد ما نطيعوهم و نحسن اليهم مراحش نرجعولهم و لو القليل من خيرهم يكفي انهم سبب وجودنا في هاذ الدنيا، بر الوالدين حاجة بديهية يعرفها الكبير و الصغير و أصلاً حنا معروفين بطاعة والدينا و ما عنديش شك في انكم تسعاو خواتاتي لطلب رضا والديكم بأي طريقة على هذا جبتلكم بعض النقاط تأخذيها بعين الاعتبار باه تزيدي في بر والديك اكثر و اكثر و تدخلي الفرحة و السعادة لقلوبهم.

أول حاجة، الذكريات الكبار في السن يحبو بزاف يحكو على بكري و على ناس زمان و تقاليد زمان و على مغامراتهم تاع الصغر، على هذا كي تقعدي مع والديك فكريهم في بكري باه يبداو يحكيو من قلبهم و يفرحو و بيني انك مهتمة بحكياتهم و اذا لاحظتي انهم يعاودو الحكايات هذا الشئ عادي لأنو الكبار ينساو شوية و تولي عندهم مشاكل في الذاكرة، لهذا اسمعي بإهتمام ماشي تقولي خليني ما عندي ما ندير بحكايات بكري، لا اعطي كل اهتمامك للقصص تاوعهم و اتفاعلي و سقسي راح تحسيهم بأنك مهتمة بحكاياتهم و لي يعني انك مهتمة بيهم.

ثانيا دائما شاوري والديك حبيبتي حتى وكنتي علابالك و متأكدة بقرارك بصح خذي رأيهم لأنو هذا يحسسهم بأهميتهم عندك و ما يقولوش كبرت و استغنات علينا و ولات ما تشاورناش، و تأكدي انو الكبير دايما يعرف و عندو التجربة أكثر و يقولك لي فاتك بليلة فاتك بحيلة و اذا كانو هذوا الكبار هما الوالدين فأكيد راح يحبولنا مصلحتنا و يتمناولنا غير الخير، اذن ماتستهزايش باه تأخذي رايهم و مشورتهم و خمي فيها مليح على خاطر ممكن تكون صحيحة.

ثالثا اجبدي لهم اخطاءك كي كنتي صغيرة و اعتذري منهم عالتعب و القلق لي سببتيلهم و الطوايش لي درتيهم و قوليلهم أنو كان عندهم الحق في كل حاجة داروهالك أو منعوك منها، و بينيلهم انك كنتي ماتعرفيش صلاحك و لوكان ماشي هوما لوكان مراكيش فالمكانة لي راكي فيها اليوم، و هذاك هو الصح والدينا هما اصحاب الخير و الفضل علينا و الشئ لي منعونا منو او لزمونا بيه هو لمصلحتنا.

رابعا اذا تقدري اديهم يزوروا اصدقاءهم تاع بكري أو جيرانهم تاع زمان ، هكذا راح يجبدوا كل الحكايات القديمة و يتفكروا الذكريات لي كانت تجمعهم مع بعضهم و يفكروا بعصهم بالتفاصيل لي راهم شافيين عليها، صدقيني هاذي حاجة تفرحهم بزاف، بلا ماننساو انو هذا راح ينفعهم في صحتهم و في ذاكرتهم.

خامسا أرضي فضولهم و جاوبيهم على اسئلتهم، اذا حبو يفهموا كاش حاجة فهميهالهم، مثلا فالتكنولوجيا اذا سقساتك امك أو ابوك على هذا الفيسبوك لي راكي تضلي معاه؟ فهميهم غير بالعقل ماشي تقولي نتوما تاع بكري و خاطيكم هذا الصوالح لا اشرحيلهم و فهميهم غير بالعقل و ماتخليهمش فالغموض.

سادسا حاولي ما دخليش والديك في مشاكل الخاصة مع زوجك و حليها بيناتكم، لأنو كي تشكيلهم راح تمرضيهم و يبقاو غير يخمو فيك و ممكن نتي تكوني تصالحتي مع زوجك لكن هما يبقاو دائما خايفين عليك على هذا مشاكلك الشخصية بين زوجك ما تحكيلهم عليها ماتبينلهم واش كاين و ماتشكيلهم.

سابعا ناديهم بأحب الاسماء عندهم اذا تعرفي اسماء معينة يحبوها ناديهم بيها و نوعي و تفنني: يما، ميمتي لحنينة، امي، لحبيبة، الغالية عليا، و بابا، أبي، تاجر راسي لازم اللسان تاعنا يكون حلو مع الناس لي جابونا لهاذ الدنيا، كيما نتفننو في البحث عن تسميات جميلة لأزواجنا باه نفرحوهم بيها، وعلاه لا نتفنن في إختيار أسماء محبوبة و جميلة لوالدينا، و صراحة بعض الاحيان ننساو والدينا و نركزو اما علىالزوج او الابناء :كيف تسعدين زوجك، كيف تتعاملبن مع زوجك، كيف نجعليه يحبك و قليل فينا لي تحوس على كيف ابر والديا للاسف، مرانيش نقول اهملو رجالكم و ماتتهلاوش فيهم لا ابدا ، و انما اعطوا لوالديكم شوية من وقتكم، من جهدكم من مالكم وعلاش لالا.

ثامنا امدحي والديك و افتخري بيهم قدام الناس و العائلة و أحكي على التربية الجيدة لي عطاوهالك وعلى نصائحهم و على القيم لي زرعوها فيك و بكل حاجة كبيرة او صغيرة داروهالك، هكذا راح يحسوا أنو تعبهم مراحش في باطل و يقولو ربينا و اليوم لقينا علىهذا استغلي اي فرصة باه تشكري والديك و تمدحيهم و تزوخي بيهم امام الناس.

تاسعا اذا كنتي خدامة و لا عندك اي مدخول مادي ماتنسايش تكرمي والديك و ماتسنايش حتى يطلبوا منك اعطيهم مالخير لي عندك و نقصي عليهم من مصاريف مثلا تاع الطبيب او تاع الدواء او…، و مين داك اعطي ليماك مصروف تتحمم بيه او تشري بيه حاجة تحبها، و ماتنسايش باباك لي راح عمرو كامل و هو يخدم باه يصرف عليك و يكبرك نقصي عليه مثلا فاتورة الكهرباء او الماءاو الكراء، و اذا تخلصيلهم تحويسة الله الله يرتاحو و يزهاو فيها علاش لالا اذا عندك دخل مليح و تبقى افضل مكان يحبو يروحولو طبعا هو مكة المكرمة هاذي راح تكون فرحة حياتهم لانو من جهة زارو بيت ربي و من جهة اخرى بنتهم لي رباوها وكبروها
و تعبو عليها مانساتهمش و هي لي داتهم تصوري معايا هذاك الاحساس بالفرحة و الفخر ببنتهم.

حبباتي حنا نحبوا والدينا و متأكدة اننا نقدرو نزيدوا نبذلوا جهد أكبر و أكثر في بر والدينا و نخدموهم و نسعدوهم لأنهم أصحاب فضل و خير كبيرعلينا، اذن اختي ماتخليش طاعتك لوالديك بطريقة عادية، لا بل ابدعي و تميزي و فكري في أمور خاصة و مميزةتفرحيهم بيها، سقسيهم واش يحبو ادريلهم واش يحبو تطيبي لهم، واش يحبو تناديهم، مدامهم مزالو معاك في هذا الدنيا استغلي كل ثانية معاهم، شفتي الشئ لي راكي ديريه لولديك زيدي و زيدي تقدري تديري ما كثر ابدعي يا ختي ابدعي جيبي افكار جديدة مفاجأت مكانوش يستناوها، اخرجي لهم خرجة جديدة و فرحيهم بيها.

اخواتي الوالدين حاجة عظيمة ما يعرف قيمتهم غير لي فقدهم لهذا اغتنمي فرصة وجودهم معك و اتهلاي فيهم و فرحيهم و ديريلهم كل حاجة تسعدهم و افتاخري بيهم امام الناس، ونتي حبيبتي لي فقدتي واحد من والديك أو الإثنين نقولك تقدري تديري فيهم الخير، صدقي عليهم و ادعيلهم و ديري الخير و احسني إلى الناس هكذا باه يقولوا يرحم الكرش لي جابتك، و ماتنساوش كيما نعاملوا والدينا كيما يعاملونا ولادنا.
بر الوالدين قيمة كبيرة وصانا عليها ربي فالقرآن و الرسول صلى الله عليه وسلم في الاحاديث النبوية و ربي سبحانو جعل رضاه في رضاية الوالدين يعني لي والديه ماشي راضيين عليه ربي مايرضاش عليه، اذن و علاش نستهزاو و نستناو حتى واحد فيهم تغيب عينو تحت الارض و امبعد نندمو و نتحسروا و نقولو يالوكان..و هذاك الوقت ماتنفع لا ندامة لا حسرة و يكون فات الوقت و راح الحال.

الشمس المشرقة