حُسْنُ التَعَامُلْ

 

   اكتشفي مكانك من الممارسات المتحضرة المثالية …و دافعي على حضورك
المتميز في تشكيل مجتمع انساني راقي و كريم …

 اسمحيلي نوضع تحت خدمتك نوع من الادب الاجتماعي الرفيع اللي يرسخ المبادئ
المدنية و يتقدم بالذوق العام …و يشكل سلوك يسهَّل التعايش مع الناس و
يرفع القيمة الفردية للاشخاص ..

التصرف مع ادوات الاكل

*السكين ..احكميه مليح ” تشبثي بيه” …عمرك ما تجيبي الشفرة lame لفمك
…و ما تمسحيهاش ..

*الملعقة  ..استعمليها بدون اصدار اصوات و ما تملايش المغرفة .

*الشوكة ..دائما على يسار الصحن ..حطيها على اسنانها ..

*الكاس ..ما تملايهش حتى يسيح …اشربي بجرعات صغيرة ..

*المنشفة ..حليلها التطباق على ركايبك ..و حطيها قدام الصحن …و كي
تنوضي خليها مش مطبقة ..

*كي تخلصي الماكلة حطي ادوات الاكل متوازية في الصحن ..

-ثانيا ..اسمعي ..

*ابقاي في موقف متيقظ مع الشخص اللي يتكلم ..
*ما تبدليش عينيك حتى اذا كان الكلام ممل ..
*ما تشوفيش في ساعتك .
*ما تثاوبيش ..
*ما تقاطعيش المتحدث المسترسل ..
*ما تتدخليش كي تكوني تعرفي القصة مسبقا ..

 

 

-ثالثا ..تكلمي ..

*انك تعرفي تهدري معنتها انك تنجحي في جعل الاخرين يسمعوك و يفهموك و
يتحاورو معاك ..

*الصوت اداة رائعة كي نمرنوه و ننعموه باش يكون اكثر تعبيرا ..

*شكلي تركيبة جيدة من الكلمات باش يكون حديثك اكثر وضوحا ..

*اعتني باسلوبك في المحادثة لانو رابط اجتماعي يجب المحافظة عليه ..

*باش تخلي الاخرين يسمعوك لازم تكون عندك حاجة مهمة تقوليها ..

*حاولي تجبدي روحك اذا دار بين شخصين احاديث ثقة ..

.-رابعا..استعمال الهاتف ..

*عمرك ما تتصلي بلا ما تشوفي الساعة ..و دائما خلي قلم تحت يدك في حال
احتجتي تسجلي عنوان او ارقام او معلومات …

*حضري الرسالة اللي راح تقوليها مسبقا و راقبيها بحيث تكون كاملة و موجزة ..

*شكلي الرقم بدقة باش ما تزعجيش اشخاص ما تعرفيهمش اذا اخطاتي ..

*بعدما تذكري الرقم و الاسم ..قدمي نفسك قبل ما تبداي المحادثة الهاتفية ..

*تكلمي بوضوح …بدون ما تزيدي في النغمة ..او تسرعي الوتيرة …و بلاما
تضيفي تعليقات غير مفيدة ..

-خامسا ..المجاملة ..

*يمكن تقديم المجاملات الاجتماعية بالشكل المباشر او بالهاتف او بالمراسلة …
*اذا وصلاتك رسائل لازم تردي عليها مباشرة ..
*اذا استعملتي بطاقة ..( معايدة ..دعوة ..بريد …الخ ) وين مكتوب عبارات
مسجلة من الافضل تزيدي كلمات باش تعطي للرسالة طابع شخصي ..

 

 

 

-سادسا …الشكر ..

*تقدري تقدمي الشكر بشكل مباشر او بالهاتف او برسالة ..

*كلمة ” شكرا “ لازم تنقال بسرعة ..بصراحة ..بدون تمتمة محيرة ..و بلا حرج ..

*تقدري تقولي “شكرا “ باش تعبري ايضا على المفاجاة او السعادة او الاعتراف …

*قولي “شكرا “ حتى في اللحظة اللي تقولي فيها “لا” باش الرفض ديالك  يكون اقل حدة ..

*قولي دائما “شكرا “ للاطفال باش تعلميهم يكتشفو الكلمة و رنتها و سحرها و قوتها ..

-سابعا ..الاعتذار..

*قدمي اعتذارك في نفس لحظة الحادثة باستعمال عبارة اسف ..“عفوا “،“اسمحلي“، “اعتذر “ ، ” pardon “

*الحوادث الحقيقية تتطلب رد فعل مناسب و مهلة باش تلقاي عبارة الاعتذار المناسبة ..

*اذا كنتي مذنبة عبري على ندمك بلاما تكوني ذليلة ..

*من الافضل دائما تقديم تفسير بسيط ..

*اذا كنتي انتي اللي تعرضتي للهجوم اظهري بعض التساهل ..

-ثامنا ..الزيارات ..

*ديري زيارات من اجل التعارف..زيارات مجاملة …“زواج” ..“ولادة”… “مباركة” … “تعزية” … و زيارات من اجل لقاء الاهل و الاحبة

*مهما كان الناس اللي راح تزوريهم قراب لازم تعلميهم مسبقا بزيارتك ..

*بالنسبة للمرضى الزيارة لازم تكون قصيرة ..تجنبي رفع الصوت …و اختاري
هدية لائقة …

*اعرفي تختاري الوقت المناسب للزيارة باش ما تقلقيش راحة المضيفين…

-تاسعا …تقديم الهدية ..

*نقدمو هدايا بداعي الواجب …و حسب الرغبة …و في الحالات الخاصة

*اختاري الهدية حسب الذوق و الاحتياج تاع الناس اللي راح تهديلهم

*نوعية الهدية تكون …هدايا عزيزة…او هدايا كلاسيكية …او هدايا جماعية او هدايا عملية و مفيدة ..

*خلي الهدايا الشخصية ” ملابس …عطور …الخ ” للاشخاص اللي تعرفيهم مليح …

-عاشرا …الجلوس الى المائدة ..

*التصرف الصحيح على مائدة الطعام..يمثل اعطاء علامة تقدير لنفسك امام الاخرين ..

*التصرف السيء يكون بسبب الاختلاف ..او الاستهزاء …او الجهل …

*اجلسي في وسط المقعد …ادعمي بيه ظهرك في استقامة بدون تصلب ..

 

 

-حادي عشر …التصرف امام الناس ..

تجنبي :

*مضغ العلكة بدون توقف ..

*تديري بعض التنظيفات الشخصية من نوع تواليت مثل …تقصي ظفارك او
تهذبيهم …تمشطي شعرك مدة طويلة …تنشغلي بانفك او وذنيك ..

*تثاوبي ..تتكسلي ..تهدري بصوت مرتفع …

*تعلقي بصوت عالي …

*تضحكي في الوقت الخاطئ ..

*تفتحي اوراق الحلوى بصوت فوضوي ..

 

-ثاني عشر …الضيافة ..

*قدمي لزوارك ترحيب مضياف …و لكن بدون المبالغة باظهار المشاعر …

*وفري الظروف لضيافك بتامين اوضاع و قعدات مريحة ..

*احصلي على اهتمامهم باختيار مواضيع جيدة للمحادثة ..

*ما تبينيش ” قلة صبرك “ كي تطول الزيارة ..

 

-ثالث عشر …احترام المواعيد ..

*لازم تحضري في الموعد المتفق عليه …بدون تقديم ولا تاخير ..

*التاخر على الموعد ممكن يسبب للاخرين القلق…

*في حالة التاخير غير المتوقع …حاولي تخطري الاشخاص اللي راهم ينتظرو فيك ..

 

-رابع عشر …تعريف الاشخاص ..

*تقديم الاشخاص و تعريفهم مع بعضهم يتم بالواقفية ” واقفين ” …و بصوت
واضح …و بدون اخطاء …او تغيير للاسماء ..

*نقدمو الصغار للكبار …و الرجال للنسا …و الاقارب للاباعد …

* ينصح باضافة تحديد بخصوص المهنة او الوظيفة تاع الشخص اللي تقدميه

 

… شمس هنية