زهري مسود، زهري معوج، ما عنديش الزهر كلها عبارات نقولوها بزاف حنا النسا كي متصلحناش الحاجة و لا كي نشوفو وحدة احسن منا،حتى اصبح الزهر هادا هاجس يقلقنا و يمرضنا، و الحاجة لي تصرا نحصلوها فالزهر ، كاين لي صح يأمنوا بهاذ المعتقد تاع الزهر بصح كاش مرة وحدة فينا خمت مليح في هذا الامر،صح كاين منو هادا الزهر وصح كاين ناس عندهم و ناس ما عندهمش و لي ماعندهمش واش لازم يديرو و هل يستاهل هذا الموضوع كل هاد الاهتمام؟ اذا حاسة روحك ماعندكش الزهر و سعدك خاينك اقراي الموضوع راح نقولك نقاط مهمة بزاف.

اولا اختي لازم تعرفي انو الانسان في هذا الدنيا لازم يتعب و يجتهد باه ينال واش راهو حاب و يوصل لواش متمني، حتى ربي أمرنا بالسعي و بالاجتهاد في الدنيا باه ننال في الاخرة ، يعني لي تضل قاعدة و مربعة يديها محال تلحق و يجيها واش حابة، مدام راكي تشكي من زهرك لي ماهوش عاجبك تحركتي ، بذلتي جهد، سعيتي محال الواحد يسعى و ماينالش و لو حاجة قليلة، من الاسباب لي تخليك ما تلحقيش او مايكونش عندك الزهر كيما فسرتيها نتيا هو انك ماسعيتيش وما تعبتيش او ما طرقتيش كل الابواب و ماأخذتيش الاسباب فإذن كيفاه تقولي ماعندي زهر و نتي مابذلتيش جهد اصلا او كرهتي واستسلمتي و ما كملتيش.

ثانيا الحاجة لي نغفلو عليها كي ما تصدقناش واش حبينا و تغلق الابواب في وجوهنا و نحسو بالهم و الغم هو علاقتك مع ربي بالاك عندك ذنوك راهي معكرتلك حياتك، بالاك مقصرة مع والديك او ماتوصليش رحمك خاصة صلة الرحم ،المعاصي تجيب البلاء و الغم و تبعد البركة و السعادة، اذن قادر زهرك المسود سببه تفريطك في دينك، راجعي واجباتك الدينية و حاسبي نفسك عليها.

ثالثا كي تقولي فلانة عندها الزهر عليا و انا ماعنديش، مالا نتي ما تأمنيش بالعدالة الإلهية و بالنسبة ليك ربي سبحانو غير عادل مدام اعطاها و ما عطاكش اذن نتي مراكيش راضية بقضاء الله وقدره و نفسك ماشي مطمئنة، لازم تقتنعي انو كل واحد و رزقو و كل واحد ربي مقدرلو الخير في حياتو و لازم تكوني راضية و سعيدة بالشئ لي عندك و تحمدي ربي و ربي يقول ” ولإن شكرتم لأزيدنكم”.

رابعا خمي مليح نتي من نهار زدتي ماصراتلكش حتى حاجة مليحة في حياتك و لو تكون صغيرة محال! اكيد تكون احداث جيدة صراتلك و فرحتي ،هذاك الوقت كان عندك الزهر و كي تصرالك حاجة سلبية يولي ماعندكش، و هذا الزهر رايح جاي ، راهو جا راهو راح، هذا تفكير غير منطقي، كلنا جازو علينا احداث جيدة بصح المشكلة لي فينا انا مانركزوش عليها و ماننتبهولهاش و بالتالي ننساوها، و السلبية كي تصرا ماننساوهاش و نركزو معاها بزاف على هذيك نتفكروها غير هي ، من المفروض نديروا العكس، الحاجة الي المليحة هي لي نفرحوا بيها و نحكوها للمقربين لينا باه نحسوا بيها جيدا و تقعد ديما فالذاكرة تاعنا.

شوفو حبباتي ربي قسم ارزاق العباد و اعطى لكل واحد فينا حقو و كل واحد عندوا ميزة معينة، و كل وحدة زهرها وين ، مكاش وحدة معندهاش الزهر بصح هاد الزهر متفاوت من وحدة لاخرى كاين عندها الزهر فالزواج وراجلها مهنيها و كاين لي زهرها فالاولاد و خرجولها صالحين و كاين لي فالخدمة و لي في صحتها و حتى كاين فالنفس الطيبة و الصالحة و لي فالاخلاق الرفيعة و لي فالعلم و القراية و كاين لي محبوبين عند الناس و ملايكتهم خفاف كيما نقولو يعني كل وحدة فينا و عندها و لو حاجة ايجابية في حياتها محال تكون حياتك كاملة كحلة و مسودة ماعليك غير تحوسي و تركزي مليح راح تلقاي امور كثيرة غافلة عليهم، المشكلة انو ما نعرفوش ايجابياتنا و ادا عرفناها ما نقدروهاش و نشوفو لواش عند غيرنا على هديك نتقلقو و نبقاو ديما في دائرة السلبية و نولو نقولو الزهر مكانش.
نتي دركا و قتاش تبقاي تحصلي كل حاجة فالزهر و متحاوليش تلقاي حلول اخرى و ماتغتنميش الفرص الجديدة لي تجيك بحجة “مكلاه راني عارفة معنديش الزهر” الزهر هادا ماهو الا سبب نتعلقو بيه و نعلقو فيه اخطاءنا و التفنيين تاعنا نتي بهذا التفكير تاع ماعنديش زهر راح تغرسي هذت المعتقد في رأسك و تولي تأمني صح بليك زهرك قليل او مكانش كامل و تولي ما تبذليش حتى جهد و ماتحاوليش على خاطر قانعة بفكرة الزهر مكانش هكذا راكي تقتلي كل الفرص لي تجيك و تبعديها عليك مثلا ماتشاركيش في مسابقة لي ممكن تكون فرصتك لانك علابالك مراحش تنجحي لانو معندكش الزهر، الزهر فالحقيقة هو فرصة جاتنا لازم نغتنموها و الفرص تصنع ماتجيش باطل كاش نهار تلاقيتي بواحد قالك هاكي مبلغ تاع درتهم او قالك الا راكي تحوسي على خدمة ارواحي نديرك مديرة في مؤسسة محال تصرا، إذن خمي مليح ختيتي و حللي علاه  ما وصلتيش و علاه مصلحتلكش الحاجة اقعدي مع روحك و خمي مليح و القاي الحلول بدل ما تقولي “خلي برك زهري و نعرفو”.

الحل لي نعطيهولك هو انك تقعدي مع روحك و تديري جلسة مصارحة مع نفسك و فهمي روحك انو هذا الزهر هو مجرد تبريرات برك و امحي من مخك المعتقد تاع الزهر نهائيا، اعرفي روحك واش حابة اديري في هاد الدنيا اولا، مثلا حابة تقراي، تخدمي، تقعدي فالدار و تستثمري في تربية أبناءك، ثانيا ديري خطة انجاز تمشي عليها باه تحققي هاذ الهدف سواء برنامج تاع قراية باه تنجحي، او تعلم طرق و اساليب جديدة تعرضي بيها عملك و خدماتك على الشركات اذا كنتي تحوسي على خدمة تزيد من فرص حصولك على عمل، طالعي كتب و تطوري اكثر في تربية الأطفال هاذي امثلة برك المهم ديري خطة لتحقيق هدفك و راك توصلي بأذن الله و راح تعرفي انك ضيعتي من عمرك سنين و نتي تبكي على زهرك و اذا فشلتي حاولي من جديد و جربي طرق جديدة اكتشفي نقاط قوتك و طوريها راح تنجحي صدقيني ما تبقايش غير قاعدة و عمرك يضيع  و تتحسري على زهرك، زهرك هادا نتي لي ديريه نتي لي تخلقيه ما تستنايش يطيح عليك من السماء ، و في حالة انك سعيتي و طرقتي كل الابواب و هذيك الحاجة لي حبيتيها ماجاتكش تأكدي انها ماشي مكتوبك و انو راهو جايك ما خير منها بإذن الله ، و ماتقارنيش روحك بأخريات.

فالاخير حبباتي نقولكم الزهر مكانش منو كاين لي خدمت و تعبت تنجح لي عرفت ايجابياتها و قدرتها راح تعيش السعادة و لي ديما متشائمة و سلبية و تقارن روحها بالاخريات تعيش في حزن و دمار ونتي ما عليك غير تختاري الخيارات الصح و تبداي تطبقيها.

الشمس المشرقة