اليوم حبيت نحكو على وحد الموضوع انا متأكدة انو كامل مرّينا بهذا الامر اذا لم يحصل مرتين فمرّة على الأقل
و هي التعلق بشخص من الوهلة الاولى..
كل وحدة منا صراتلها هذي الحاجة و هي انها تتلاقا مع وحدة في مجلس او في عرس او في مطعم او في المدرسة او في الطريق او في الحافلة او عند الطبيب أو … أو… أو ،تبدى تحكي معاها و تدخلو في مواضيع عميقة جدا و انتي في قلبك تقولي يا كان غير كل يوم نتلاقى بيها و تبداي ترتبي للأمر باش تتقربي اكثر منها.
مثلا تطلبي رقم الهاتف و تبداي تلحي على ان تتلاقاو مرة اخرى ….و سبحان الله كي تتلاقاو و تبداو تهدرو ولا كأنها نفس المرأة لي هدرتي معاها من قبل !! ..الجلسة تولي باردة و الكلام سطحي
التفسير لهذا الأمر هو انو الشغف الذي كان مرتّب في اللقاء الأول مع هذيك الشخص مدته ساعة او نصف ساعة فقط
و ليس اكثر ابدا …. لذلك مرة اخرى لما تحدث لكي حاجة كيما هاذي لا تحاولي تصري على اعادة الامر ، طبعا انا ما نيش نقول قاطعي الناس و ما تحاوليش التواصل لكن كوني رزينة شوية و حاولي تخلي الامور على الله
ربما تعاودو تتلاقاو في وقت مناسب و راح يكون موجود الشغف في الحديث مثل اللقاء الأوّل ، و يمكن ما تزيدوش تتلاقاو كامل
لذلك لا تتعلّقي بانسان لمجرّد انك تلاقيتي معاه مرة وحدة و تفاهمتو في الحديث و عجبك الحال ووووو حتى تولي ارتباطاتك مرضية
طبعا انا علابالي انو الانسانة هذيك انسانة جميلة و رائعة و كان مذابيك تبقاي على تواصل معاها ، ولكن مدام خرجت من حياتك فهذا معناه انها دخلت في وقت مناسب و خرجت في وقت مناسب
لازم نتعلّم نترك الجيد من اجل الأجود ، و نترك الاجود من اجل الاحسن منه
لذلك لحظات الشعف ديالك لازم تخليها حرّة طليقة ….خليها هي تعرف وقتاش تجي و وقتاش تروح
و كي تلحقي لهذا الايمان راح تولي أهدأ و تتعلمي التريّث في العلاقات و لن تقعي في التعلق بأشخاص هم اصلا كان ربي سبحانه كاتب انو تتلاقاي معاهم لفترة وجيزة
في الاخير نتمنى نكون شاركتكم حاجة انا شخصيا كانت تصرالي لكن بعد ما غيرت تفكيري اصبحت علاقاتي احلى
جربو طريقتي و ان شاء الله انتم ثاني تولي علاقاتكم أحلى
…شمس ساطعة
