المزاج و لا المورال كيما نعرفوه هو هذيك الحالة النفسية لي تكوني فيهامثلا سعيدة، حزينة، مقلقة، ،مديقوتية،كارهة حياتك و حنا النسا نعانيو بزاف من هد المشكل تاع المورال هاو طلع هاو هبط و عادة يهبطلنا المورال بزاف بحكم اننا عاطفيين و حساسين بزاف،و هذا الشئ يأثر علينا بالبزاف يخلينا نحسو بديقة الخاطر و الحزن و نلحقو حتى نبكيو و المشكلة انو هذا الشعور يأثر حتى على عايلتنا و الناس المحيطين يينا و ولادنا مساكن .
لازم تعرفي اختي بلي المورال هذا تقدري انك تتحكمي فيه و تسيطري عليه،صح يجونا ظروف اقوى منا تخلينا نعياو و نفشلو لكن كل ما تدربتي على السيطرة على مزاجك و التحكم فيه راح تتجنبي المشاعر السلبية او  على الأقل تنقصي منها،
باه تتعلمي تتحكمي في مزاجك او تعدليه لازم تعرفي الامور لي تطلعلك المورال و ديريها درك ماتقوليش نسافر حول العالم او نشري سيارة اخر طراز، لا نقصد الامور لي تقدري تديريها الان و حالا و تطلعلك المورال ، الامور لي مافيهاش جهد و لا مال و انما درك تقدري تنوضي تديريها فهمتيني مهما كانت امور تافهة مدامها تسعدك ديريها مثلا تأخذي حمام ساخن او تشربي قهيوة تعدلك المورال، تماكيي وجهك، تحكي مع امك او صديقتك، تشطحي او تسوطي، تنوضي تطيبي، تسمعي اغنية و لا قرآن، تتفرجي فيديو يضحك …….
يعني تكوني علابالك بالحاجة لي كي تنوضي تديريها تطلعلك شوية المورال و تسقملك النفسية تاعك، و لو كان تكتبي قأئمة بالاشياء البسيطة لي كي ديرها تفرحي و تزهاي هكذا كي تحسي المورال تاعك بدا شوية يولي للور يكون عندك الحل و السلاح الفعال.
يعني ماتخليش روحك تزيدي تدخلي في حالة حزن كبيرة او مبعد تحصلي بروحك و ماتلقاي كيفاه تديري لا، عالجي هذا المشكل من الاول غير يبدا يظهر و تشوفي روحك و مورولك بدا يرجع للوراء روحي ديري ولو حاجة من القائمة هذيك.

و تانيك من بين الحاجات لي تعونك باه تعدلي مزاجك و تطلعي مورالك كاين:

*الضحك: نعم حاولي تضحكي و لو كنتي في قمة حزنك حاولي تضحكي و الا مقدرتيش اضحكي تاع بسيف و لو فوق قلبك، صدقيني هذيك الضحكة السامطة الصفرة تاع فوق القلب عندها تأثير و تساعدك باه تولي متوازنة في مشاعرك.

*لا تعيشي في الماضي: كامل عندنا ذكريات سلبية فاتت علينا و كي نتفكروها نحزنو و يهبط المورال نقولو “يا لوكان ما صراليش هكذا” حبيبتي خلي الماضي يروح  على روحو و عيشي الحاضر و تأكدي بلي التجارب السابقة هي لي علماتك بزاف أمور و لوكان منغلطوش منتعلموش، اذن هذيك التجارب العيانة لي تتفكريها تهبطلك المورال ولي اعتبربها دروس ليك جات تعلمك و تربيك و تفهمك، افهمي الخطأ لي درتيه و ماتزيديش تعاوديه و خلاص انساي و ارمي الماضي و عيشي يومك.

*مساعدة الاخرين: علابالك مساعدة الناس فيها خير كبير ليك كي تعاوني الناس و توقفي معاهم و   لو بالنصيحة تحسي روحك درتي حاجة مليحة في انسان هدا راح يعطيك طاقة إيجابية و سعادة وخاصة كي تشوفي هداك لي عاونتيه سعيد و فرحان و استفاد منك مورالك راح يطلع كي الفليشة
المشي: ادا قدرتي تخرجي اخرجي امشي و استنشقي الهواء و لا اخرجي للبالكون و شمي شوية هواء نقي و ديري تنفس عميق راح تحسي براحة كبيرة.
*اهتمي بالغذاء الروحي: يعني العبادات و التقرب الى الله سبحانه ، صلي ركعتين او اقرأي شوية قرآن او اقعدي على سجادتك سبحي و استغفري هذا افضل علاج للنفسية الهابطة لانو يعطيك ثقة كبيرة في ربي و في نفسك، راح تعاونك بزاف و تحسسك بالسكينة و الطمأنينة.
*مارسي الرياضة: و لو في دارك قومي بحركات رياضية و كوني نشيطة، الرياضة تطلع المورال و تزهي البال و تخليك تباني ديما صغيرة و زاهية.
*الغذاء الصحي و الطبيعي : حاولي تأكلي صحة و تأكلي الخضر و الفواكه نية ،لان الاغدية المصنعة و الغير صحية تصيب الجسم بحالة السموم و الخمول و هد راح ياثر على مزاجك كيما كاين ماكلة تدير القلقة، و كاين ماكلة ترقد، كاين تاني اكل لي يسبب الحزن و يهبط المورال و متنسايش تشربي بزاف الماء،
*اكسري الروتين لي موالفة بيه غيري احيانا في نشاطاتك ، على خاطر الروتين و تكرار نفس المهام كل يوم يخليك تملي و تكرهي ،جربي أمور جديدة نوعي نظامك و نوعي مهامك ،مثلا بدلي ديكور دارك، او شكلك، او بدلي الطريقة لي موالفة بيها في شغلك اخرجي خرجة جديدة و ماتخليش الملل ينال منك.
*اسعدي الاخرين: كوني نتي مصدر سعادة ناس وحدوخرين و لو بإبتسامة او نكتة و دخلي الفرحة و الامل لقوبهم، كوني نتي الانسانة لي كي تدخل تدخل معاها الضحكة و الابتسامة و الامل و الخير ، بمجرد ما تشوفي السعادة و الفرحة في عيون الناس و لي كنتي ساهمتي فيها راح يخليك تسعدي لسعادتهم.
*الفراغ: الحاجة المهمة بزاف في هذا الموضوع و لي هي تدخلنا الوسواس و التقلاق و تهبطلنا المورال هو الفراغ، كي تكوني نهار كامل فارغة شغل ماعندك ماديري و ما تعملي هنا الشيطان اكيد مراحش يخليك في حالك راح يوسوسلك و يفكرك بكل حاجة سلبية تهبطلك المورال و يزيد يعطيك توقعات سلبية للمستقبل و نتي مدامك فارغة شغل راح تستجيبي للوساوس تاعو و تتأثري، اذن الفراغ اكبر عدو لينا لازملك يكون عندك امور تشغلي بيها نفسك، و تنتفعي بيها، املأي يومك بمهام ديري ليك اهداف و حاولي تحققيها ادخلي في جمعيات و لا اي حاجة تنفعك المهم ماتقعديش فارغة شغل.
*بعدي على المقارنة: من الاسباب الرئيسية لي تخليك حزينة و مكتئبة هو كي تقارني روحك بوحدة اخرى و راح تكتشفي انو ماعندكش واش عندها و هنا الصدمة لكبيرة تولي تكرهي روحك تكرهي زهرك و مورالك لتحت كامل و خاصة الان مع اليوتوب و لات ديار تاع الناس مكشوفة و تقدري ببساطة انك تقارني روحك بيها، حبيبة قلبي هذيك الانسانة لي تحسي روحك ناقصة قدامها معلابالكش واش راهي عايشة بالفعل بالاك راهي في ميزيرية كحلة بصح ماتبينش بالاك مريضة ما تقدريش ياختي لي تشوفيها تقارني روحك بيها اقتنعي بلي الشئ لي راكي فيه راهو خير ليك اقتنعي بلي كل واحد و رزقو في هاد الدنيا ، ماتشوفيش لي فوق عليك و انما شوفي الناس لي تحتك لي مراض و لي عايشين فالشارع و لي عايشين فالهم و الغم راح تعرفي قيمة الحياة لي راكي عايشتها و راح تحمدي ربي و ترضاي برزقك.
ديري في بالك بلي مكانش منا لي ميهبطلهاش المورال و ماتكرهش روحها، لكن المرأة الذكية هي لي تعرف كيفاه تخرج من هده الحالة و متخليهاش تأثر عليها بزاف، على هذا حاولي تفهمي و علاش اصلا راهو هابطلك المورال و السبب تاعو هل بسبب فكرة جاتك و لا انتقاد عطاوهولك، او ربما روتين القاتل لي راكي عايشةفيه، حاولي تتصداي هاذ المشكلة بأنك تنوعي نمط معيشتك و تعدليه بأنك تعدلي ماكلتك، تديري رياضة او المشي، تكون عندك علاقات اجتماعية مليحة و تكوني تعاوني لي يطلب منك المساعدة، و خاصة تكوني منشغلة بنفسك بتطوير روحك، بتعلم حاجات جديدة بتحقيق اهدافك هكذا راح تكوني سعيدة طول الوقت و تكوني انسانة نافعة لروحك بالدرجة الاولى و تنفعي الاخرين.
تذكري اختي مزاجك يؤثر على صحتك و على مردوديتك و اكثر من هذا راح يؤثر على ولادك و كل افراد الاسرة لهذا حاولي تخلي ديما مورالك طالع لأنك تستحقي تعيشي سعيدة و فرحانة كامل حياتك.
الشمس المشرقة