الحديث على النساء التي تمشي بمثال “ديري النية و باتي مع الحية”

هذا خطأ كبير في حياتنا هاذي صحيح لازم نمشو بالنية لكن من الاحسن نمشو بقوله تعالى ولا تلقوا بأنفسكم الى التهلكة بحيث تقدري تكوني نية لكن ليس بالضرورة تتمشاي مع ناس خطرين
لأنو النية و قليل النية ما يتلاقاوش.

نعطيك مثال : انتي عندك صديقة جديدة ما تعرفيهاش في زمان تقولك ارواحي نروحي مكان فلاني و انتي تعرفي انو مكان خطر… تروحي معاها من بعد كي يصرالك مشكل تقولي انا مشيت بنيتي
آسفة لكن هذا اسمو غباء و ليس نيّة.

لذلك نصيحة الى كل البنات ديري نية لكن الاحتياط واجب

النصيحة الثانية لي تخليك دايما انتي متحكمة في زمام امور حياتك هي انك ما تعطيش اسرارك كلها لشخص ما … تعرفي علاش ؟ لأنو السر اذا خرج من اثنين ما ولاش سر
و تعرفي واش حب يقول اثنين ؟ القصد ماهوش شخصان و انّما شفتيك اذا خرج السر من بين شفتيك اعرفي انو راح لي قلتيهولو يقولو سر لواحد اخر و هذا الاخير يزيد يمدو سر لشخص آخر حتى تلقاي البلدة كلها تعرف سرّك.
و نزيدو نهدرو على الناس لي تبعث فيك الطاقة السلبية و يسرقولك احلامك
كيفاش ؟
كاين شي ناس و ماشي بالضرورة يكونو ناس ماشي ملاح مرات يكونو ناس من الاقرباء يسرقولك احلامك عن طريق تحطيمها
مثلا : تقولي راني حابة ندير الحاجة الفلانية يبداو يقولولك اخطيك من هذي الحاجة وراحي ماشي مليحة و ردي بالك من المخاطر و راكي مليحة وين راكي

    و هذا يجعلك دايما في نفس المكان و نفس السيرة اذ هذا النوع من الناس ما يحبش يشوفك ناجحة يحبو دايما تبقاي على واش عرفوك عليه من هذا شحال و ما تزيدي في حتى حاجة مليحة
اذا من الان فصاعدا حاولي تحكي هذا النوع من الناس في مكانهم يا اما تبعدي عليهم اذا ما كانوش من الاقارب، يا اما تشرحي ليهم انك ما تحبيش تسمعي هذا النوع من النصائح لي تفشّل الانسان و ما تخليهش ينطلق في الحياة.
و من اهم النقاط لي تبعد عليك المشاكل و تخليك ناجحة في حياتك و مكاش واحد يقدر يستغلك و تكوني ضحية هي كلمة “لا”
ايه اختي لازم تتعلمي تقولي “لا” في بعد المواقف بحيث هذه الكلمة سلكت شحال من واحد من مصيبة كانت حطيح على راسو
لذلك حتى و تكوني تحبي هذيك الشخص لي تطلب منك حاجة ربما تكون النتيجة تاعها ليست في صالحك تقوليلها “لا” طبعا اذا تستاهل توضيح لماذا قلتي “لا” وضحي ليها باش تبقى العلاقة مليحة بيناتكم و الامور شفافة.
بقولك “لا” راح تربحي كرامتك، تربحي شخصيتك، و تربحي عزّت نفسك
و ربما اذا قلتي “نعم” راح تخسري بزاااااااف الحوايج.

 

… الشمس الساطعة