ساعات و دقائق قليلة تفرقنا عن نهاية السنة و بداية سنة جديدة،
٢٠١٩ لي راحت تجري و ما حسينالهاش كامل و هايليكم سنة جديدة راهي جاية و عمر جديد لينا ان شاء آلله ، يا درا كيفاش جازت عليكم مليحة ، شوية شوية، و لا كارثية، مهما كانت الاحداث لي فاتت عليك خلاص راهي جازت و ولات من الماضي و درك راهي بدات سنة جديدة، عام جديد يعني فرص جديدة، معنتها 365 فرصة جديدة و على هذا حبيت نعطيكم نقاط الي انا فادتني بزاف فالعام الي فات بالاك نتوما تاني تستفادو منها و راح نجاوب على الاسئلة لي تقدر تجي في بالكم.
اولا شوفي اختي اول حاجة لازملك تنساي كل حاجة عيانة فاتت عليك راني عارفة صعيب النسيان لكن حاولي الاحداث السلبية ما تبقاش عندها تأثير عليك و ماتبقايش تتحسسي منها ماذا بينا نبداو عام جديد بنفسية جديدة و مورال جديد بإيجاببة و تفاؤل ” تفاءلوا خيرا تجدوه”، و خلي الي فات مات اتعلمي منو و خوذي منو دروس و خلاص، و ابداي اعرفي اهدافك و خططك للعام الجديد.

و تاني حبيت نقولكم تحقيق الاهداف ماشي شرط ديما يكون مع بداية العام الجديد هاذي عادة برك تقدري تبداي في اي شهر و في اي يوم حنا برك لي جرات العادة عندنا اننا نبداو من بداية العام الجديد، ماشي مهم الزمن المهم الانسان في هاذ الدنيا يبدا يسعى و يجتهد .
ثانيا: قبل ما تبداي عام جديد نقترح عليك تقيمي العام الي فات تشوفي واش الحاجات الي نجحتي في تحقيقها و تشوفي تاني الاهداف الي فشلتي فيها ، و تعرفي علاه و شنو هما الاسباب لي فشلاتك هكذا تكون عندك فكرة شاملة على واش درتي و واش راكي حابة تديري، قيمي كل جوانب حياتك (الدينية، المالية، العائلة، الذاتية..)،حلي كل ملفاتك و حطيهم فوق الطابلة و ابداي بالحاجة ، الحاجة لي مليحة و لي ماشي مليحة، و لي فشلتي فيها و علاه فشلتي فيها، اهم حاجة تعرفي علاه، لماذا فشلتي في هذيك الحاجة و شنو هما الاسباب و الصعوبات لي جاوك في طريقك،حوسي على الخطأ وين و ألقايلو الحلول باه كي تلقايلهم حل راكي حليتي المشكل و وعرفتي الطريق الصحيح لتحقيق هدفك، و اعرفي انو فشلك في تحقيق هدف ما يخليكش تستسلمي و تيأسي بالعكس لتم وين لازم تشغلي مخك اكثر باه تلقاي الحلول.

ندورو الان للاهداف،لازم تعرفي انو الاهداف عندها طابع شخصي يعني كل واحد و الهدف نتاعو و ماشي لازم كامل نسعاو على نفس الاهداف ، معنتها ما تعانديش صديقتك و لا قريبتك كي شفتيها حققت الهدف حبيتي نتي تاني تجري مورا نفس الهدف لا شوفي مع نفسك الا صح هذا الهدف راكي حاباتو اذا يضيفلك حاجة معينة اذا يساعدك ، يقدر البنات لي د ايرين بيك يجريو مور هدف لي نتي مايخرجش عليك و تلقاي روحك ضيعتي وقتك معاه يعني ما تتأثريش برأي الناس اعرفي نتي واش حابة و انو صح راكي محتاجة تحققي هاذ الهدف.
كذلك لازم تقيمي روحك كل فترة و فترة معنتها من الخطأ نستناو حتى السنة تخلاص و نبداو نديرو تقييم لرواحنا هكذا راح نخسروا بزاف الوقت ،التقييم هذا يندار دوريا يعني كل فصل الي هو تقييم فصلي، و كاين تقييم شهري تديريه كل شهر، و كاين تقييم اسبوعي تعمليه كل نهاية الاسبوع بهاذ الطريقة ما تتودريش و ما تنسايش خطتك لي تمشي عليها.
الحاجة الاخرى نحكو على الاهداف نفسها و شنو هوما الاهداف ، كاين بزاف لي تقولك ماعندي حتى هدف، نقولك الاهداف رانا نعيشوها و نحققوها كا يوم بر ك ماراناش حاسين، كي تبذلي مجهودك في تربية ولادك هذا هدف، كي تحافظي عل نظافة و ترتيب بيتك هذا هدف، كي تقعدي مع ولادك و تتقربي منهم هذا هدف كي تجيبي العام الدراسي و تطلعي لعام جديد هذا هدف، ديما نقولكم ماتخلعكمش كلمة هدف ماشي معنتها حاجة تاع اصحاب الدراهم و المشاريع الكبيرة قادر يكون هدف بسيط بزاف انك تبتسمي غير تنوضي فالصباح، و كاين لي العكس تعمل قائمة كبيرة من الاهداف و تحب تحقق هادي و هادي و كل حاجة و تنسى انها انسانة طاقتها محدودة و تنسى ترحم نفسها و تروح بلعقل مع روحها و كي ماتحققش هذيك القائمة الطويلة و العريضة من الاهداف تحكمها الفشلة و يهبطلها المورال، اذا كنتي منهم نقولك كوني عقلانية ختي و واقعية نتي عارفة روحك تقدري تديري زوج و لا ثلاثة حاجات فاليوم بصح تروحي تزيري روحك بقائمة تاع عشر حاجات و امبعد تخرجي من عقلك علاه عليك! كي تحبي تديري كلش ضربة وحدة راح تفشلي فيهم كامل.

ثالثا في ميزكم و علاش نديروا اهداف و نسعاو باه نحققوهم، يعني واشنو هو الهدف من الهدف ؟ ببساطة باه نحسنو حياتنا باه نتطورو، باه نعيشو حياة كريمة، لطيفة، يعني كي نعمل على تحقيق هدف النتيجة تاعو راح تزيد لك حاجة إيجابية في حياتك ، و راح يبقى يمشي معاك طول حياتك ، ماشي فات العام عليه حققناه خلاص اطوي عليه الصفحة، مثلا انا كان من بين اهدافي هو شرب الماء بزاف فالنهار، انا كي نلحق لهذا الهدف و نحققو ماشي خلاص ننساه و نقول خلاص راني حققتو و نجوز لحاجة اخرى، و انما باه يروح معايا حياتي كاملة و يبقى ديما ماشي معايا على هذيك الهدف نتاعكم اذا ما حققتوهش فالعام الاول ما تيأسوش و ما تستسلموش و تقولو خلاص، ابقاو معاه انشالله حتى يديلكم كامل وقتكم حاولو غيروا الاساليب و الخطط، هاذي حياتكم ماعندكمش حاجة أهم منها و لا خير منها، علاه تستعجلي و اذا ما وصلتيش في عام تستلمي و تحسي بالاحباط المهم النتيجة و ليس الوقت و الاستعجال، بالعقل و بخطوات بسيطة و سهلة باه ماتخلعيش روحك و ما تكرهيش، حياتك هي اغلى ماعندك و نتي عايشة باه تحسنيها اذن بلعقل بلعقل حتى تلحقي وين راكي حابة.

ممكن تتسأءلي هل لازم نكتب الاهداف تاعي؟
اخواتي كتابة الاهداف و الخطط و معرفتها الهدف منو هو التنظيم باه نظمو حياتنا باه كي تتلفلك تحلي الكراس و لا المفكرة تاعك و تعرفي واش تديري و اش لازم تكوني تعملي في هذا الوقت و ما تبقايش مودرة و مبحرة، باه كي نظمو حياتنا تسهال و تولي بسيطة و واضحة امامنا، و كل ما كانت الامور بسيطة كانت سهلة و مفهومة.
و الحاجة لي تعلمتها مؤخرا ولي كامل نغفلوا عليها هي الاستمتاع بحياتنا، حنا طول اليوم نجروا و مشغولين باه نقوموا بمهامنا و نحققوا اهدافنا و ننساو نعيشو الدقيقة هذيك، ماننتبهوش باه نحسو باللحظة و نتمتعوا بيها و هاذي بزاف مهمة، حاولي و نتي مع شغالاتك تستمعي بحياتك و تعيشي هذيك اللحظة و تشوفي الامور الايجابية لي دايرة بيك، ولادك، والديك، صحتك حسي بكل ايجابية راهي قدامك و استمتعي بيها ماشي حتى تفقديها باه تفيقي لروحك و على هذا ماتعمريش كل وقتك خلي وقت فراغ تقضيه مع نفسك او اسرتك او احبابك.
في الاخير نقولك هذا العام راح يجوز كما العوام لي فاتو اذا ما قررتيش تغيري نفسك و افكارك، اذا بقيتي غير قاعدة و تحلمي و ماتديري والو، اذا مابذلتي حتى مجهود مكلاه تستناي نتائج مختلفة في حياتك، و هاذي حياتك و نتي لي تقرري كيفاش تكون.

اذن اخواتي ماتنساوش اننا نصنعوا واقعنا بأفكارنا و سلوكنا، كي نغيروا افكارنا راح تتغير سلوكياتنا و يتغير واقعنا، نقولكم استمتعوا بتحقيق اهدافكم ، ما تثقلوش على رواحكم “ماقل و نفع خير مما كثر و ألهى”، بسطي حياتك و سهليها على قد ماتقدري و كوني واقعية و صريحة في اهدافك و نتمنى لكم خياتي الخير و الهنا و راحة البال.

الشمس المشرقة