الطريقة :

تحكمي التمر لي ماشي شباب يعني شفتي مرات نشرو تمر و ما يعجبوناش شي حبات

او تشري التمر الرخيص في السوق

خاطش هو الرب ما يندارش بالتمر المعسل

نقيه من العلف و اغسليه و حطيه يغلي حتى تتحصلي على الماء يولي لونو احمر داكن

وحد 2 سا ولا 3 سا فوق النار هادية

تحكمي تصفيه و تخليه يقطر بعقلو

تحكمي هذاك السائل الاحمر الداكن و ديريه في كسرونة و تخليه يزيد يطيب لكن بشرط تكون النار قليلة حتى يعقد خاطش لوكان تزيدي 

للنار راح يولي كاراميل و تروح بنة التمر

كاين لي يديروه جاري بزاف يوصل لدرجة غليان 105° و كاين لي يديروه عاقد يوصلوه حتى 108° او 110°

 

و هذا طيبيه كي يكون موسم التمر باش نهار يخرج التمر في جانفي، فيفري، مارس و افريل هاذو كامل ما فيهمش التمر تاكلي الرُبْ

مع الطعام

مع الخبز

ديرو بيه الشربات زيديلو الماء البارد عليه

 

 

التنبيه :   حبيت نبه تاني لحاجة هو ماشي دواء هو فقط مادة غذائية مليحة للجسم اذا ردو بالكم يخدعوكم

و الرُبْ تقدري تديريه بأي فاكهة بنفسك الطريقة

مثلا الرمان

التفاح

الايجاص

العنب

 

 

…شمس ساطعة

 

الطريقة :

قطعي المانجا مربعات صغيرة حتى تتحصلي على 4 أكواب من المانجا المقطعة

من بعد حطي كل كوب في كيس خاص بالتجميد و حطيها في المجمّد حتى تجمدا كامل و مليح

ضرك روحي جيبي كسرونة

حطي فيها 1 كوب من السكر + 2 كوب ماء + 1 ملعقة شاي +عصير الليمون

حطي الكسرونة فوق النار و حركي بملعقة لي ناكلو بيها ماشي الحطب خاطش تاع الحطب هي لي مرات تسبب تسكار العسيلة

و ابقاي تحركي حتى تغلي الشربات

بعد ما يغلي عاودي نقصي كامل للنار و خليها تغلي 7 دقائق من بعد طفي النار

كي تجمد المانجا خرجيها و خليها تقعد في حرارة المطبخ حتى تقدري تفكيها على بعضاها

حطي نصف الكمية في الخلاط

ملاحظة : ردو بالكم يتكسر الخلاط و تحصلو فيا  لازم يكون عندك خلاط صحيح ماشي تاع الطايوان

الان احكمي نصف كمية العسيلة لي طيبتيها و خليتيها تبرد خارج الثلاجة من بعد دخلتيها تبرد في الثلاجة

باش تستعمليها


حطي نصف الكمية على المانجا المربعات لي راهي داخل الخلاط و اشعلي الخلاط

و ابقاي طفي و تشعلي حتى تترحى كامل كمية المانجا لي استعملتيها

الان جيبي حاجة و حطي فيها المانجا المرحية

بعد ما ترحي الدفعة الثانية خلطي مليح مليح الدفعتين بالخلاط اليدوي حتا يتجانسو مليح

غلفي الوعاء بغشاء النايلون و حطيه في المجمد ليلة كاملة.

 

 

…شمس ساطعة

 

المقادير:

6 حبات بيض

14 مغرف كبيرة سكر خشن

14 مغرف كبيرة زيت

14 مغرف حليب

14 مغرف فرينة

2 بكيات خميرة

لافاني

قشور قارص

التزيين:

2 علب شكولا

كمية من المكسرات

الطريقة:

نضع البيض في اناء + 14 ملعقة سكر + لافاني ثم نخلط بالخلاط لمدة 5 دقائق

نضيف 14 ملعقة زيت ونعاود نخلط بالخلاط +14 ملعقة حليب بالخلاط ايضا حتى يصبح الخليط  على شكل رغوة +14 ملعقة فرينة + 2 بكيات خميرة + قشور قارص

يخلط بالمغرفة ثم نضعه في ايناء مدهون بالزيت ومرشوشة فيه فرينة

يطهى في الفرن 20 دقيقة بدرجة حرارة 160° (لا نفتح الفرن 10 دقائق الاولى)

نذوب الشكولا في حمام مائي  ,نطليها فوق المسكوتة ثم نضيف المكسرات من فوق

 

…شمس دافئة

 

بريوش الوردة

 

المدة : 55 دقيقة

العدد : 8 اشخاص

الصعوبة : متوسط

التكلفة : اقتصادي

 

المكونات

350غ فرينة

4 مغارف كبار سكر

3 بيضات

150غ كريمة طازجة crème fraîche  

     قرصة ملح

2 مغارف كبار خميرة الخبز

نص كاس زبدة

 

الأدوات

مغرف خشب

قالب

فرشاة

 

التحضير :

المرحلة الأولى:(في الليلة السابقة أي قبل يوم واحد )

خلّطي الفرينة و السكر و البيض و الكريمة و الملح و الخميرة (المحلولة في الما) حتى الحصول على عجينة طرية (اذا كانت العجينة لينة بزاف زيدي الفرينة )

المرحلة الثانية :

خلِّي العجينة تريح في مكان دافي و غطِّيها بمنديل نظيف

المرحلة الثالثة: (في الغد) :

رشِّي الفرينة على سطح العمل و على العجينة و حلِّي العجينة على شكل مستطيل( 40*60 سم) حطي في وسطها القطع الصغيرة نتاع الزبدة و طبقي على 2 بحيث تغلقي على الزبدة ؛ ثم عاودي حلِّي العجينة بالحلَّال في الجهة المعاكسة و طبّقي العجينة على 3 ؛ ثم زيدي حلِّي بالحلَّال في الجهة المخالفة و طبّقي مجددا على 2 ؛

العملية السابقة كاملة عاوديها مرتين ؛ و زيدي حلي المرة الأخيرة مستطيل تع 60*40سم .

 

المرحلة الرابعة :

دوّري المستطيل على عرضو كيما القاتو الملفوف roulé

المرحلة الخامسة :

قطّعي الغولي تاعك لقطع صغيرة عرضها حوالي 5 سم (حوالي 8 قطع) و حطِّيهم واقفين على الجهة المورقة في القالب اللي دهنتيه بالزّبدة و رشِّيتي الفرينة و خلّي المسافة بين القطع 2 سم

المرحلة السادسة:

إذا حبيتي تزيّني أضيفي رقائق اللوز او حبّات زبيب و خلّيها تريّح حتان تملا القالب و ادهني الوجه بصفار البيض مع القهوة ثمّ طيّبيها على نار متوسطة لمدة 20 دقيقة

 

brioche feuilletée2

 

 

…شمس هنية

 

 

بريوش الرخامة

 

المدة : 1 ساعة و 20 قيقة

العدد : 8 اشخاص

الصعوبة : سهل

التكلفة : متوسط

 

المكونات

كاس زبدة

كاس سكر

4 بيضات

ثلث كاس حليب

300غ فرينة

قرصة ملح

كيس خميرة القاتو

1 مغرفة كبيرة خميرة

1 ليمونة

2 مغارف كبار كاكاو

 

الأدوات

خفاقة يدوية fouet

صفايّة

سكرفاج

 

التحضير

 

المرحلة الأولى

اخدمي الزبدة بيديك مع السكر زيدي البيضات و الخميرة و اخفقي الخليط بالخفاقة اليدوية  ؛ الخليط لازم يكون قوامو رغوي

المرحلة الثانية

أضيفي الحليب ثم ادمجي الفرينة و معاها الخميرة الكيميائية

المرحلة الثالثة

قسّمي العجينة لقسمين متساويين ؛ أحد القسمين زيديلو مبشور الليمون الناعم ؛ و القسم الآخر أضيفيلو الكاكاو .

المرحلة الرابعة

حلِّي عجينة الليمون بالحلاَّل و حطِّي فوقها عجينة الشوكولا لي تكوني حلِّيتيها ثم لفِّي العجينتين على بعضهم للحصول على الشكل الرولي roulée ؛ خليها ترتاح ساعة

المرحلة الخامسة

حطي العجينة في قالب مدهون بالزبدة و مرشوش بالفرينة و ادهنيها بصفار البيض المخلوط بالحليب و طيبيها على درجة حرارة 180 لمدة 25 دقيقة .

 

 

…شمس هنية

 

 

بريوش التاج

 

المدة : ساعة

العدد : بريوشة واحدة

الصعوبة : سهل جدا

التكلفة : اقتصادي

 

المكونات

 

كاس زبدة

250غ فرينة

1 مغرفة كبيرة خميرة الخبز

2 مغارف كبار سكر

1/4 كاس حليب

4 بيضات

الملح

 

الأدوات

قالب البريوش

خفَّاقة يدوية

صفَّاية

ورق طهو

مغرف خشب

فرشاة طبخ

 

التحضير

المرحلة الأولى

حضّري الخمّارة ..حلّي مغرفة كبيرة تع الخميرة في الحليب يكون في حرارة الغرفة  زيديلهم مغيرفة فرينة (اختياري)

المرحلة الثانية

حطِّي باقي الفرينة المغربلة في وعاء ؛ واخدمي نص كاس زبدة مليح حتى تولي ليّنة تحت يديك ثم أضيفيها للفرينة و زيدي 3 بيضات كاملين و الملح و السكر و الخميرة لي وْجّدتيها خلّطيهم بلعقل باليد حتى الحصول على كرة عجين غطِّيها بقماشة نظيفة و خلِّيها تطلع في حرارة الغرفة لمدة 3 ساعات يعني حتى العجينة يتضاعف حجمها

المرحلة الثالثة

هبّطي العجينة على حواشي الوعاء و عاودي حطِّيها تطلع ساعة أخرى

المرحلة الرابعة

في ورق الطَّهو قطّعي دائرة بقياس قاعدة القالب و زيدي عليه 10 سم إضافية على حواشي القالب ديريلها الزبدة و رشي بالفرينة

المرحلة الخامسة

احكمي العجينة بصباعتيك نقّصي منها حوالي مغرفة كبيرة و حطِّي الباقي في قاعدة القالب …و القطعة الصغيرة لي خليتيها شكليها كرة بسرعة و بعناية باش ماتفسّديش الطّلوع و حطِّيها فوق لعجينة لي في القالب …خليها ترتاح ساعتين

المرحلة السادسة

حضّري الفرن بتسخينه على درجة 210 مئوية لمدة 10 دقايق قبل ما تبداي الطياب تكوني طليتي العجينة بصفار البيض وحطيها تطيب 40 دقيقة

ملاحظة : ماتفتحيش الفرن اثناء طياب الخبز و الا ما يتنفخش …وماشي تجعدي البريوش و تعاودي تدلكيه ..هبطي لجوانب و اجبدي بصباعتيك باش تديريلها الشكل و تحطيها في المول.

 

…شمس هنية

 

بريوش الظفيرة

 

المدة : 30 دقيقة

العدد : 6 اشخاص

الصعوبة : متوسط

التكلفة : اقتصادي

 

المكونات:

 

500غ فرينة

1 مغرفة كبيرة خميرة الخبز

     2 مغارف صغار ملح

1 ملعقة صغيرة سكر

4 مغارف كبار زبدة

كاس و ربع حليب دافي

 

الادوات:

ملعقة خشب

ورق الطهو

فرشاة طبخ

فرن

 

التحضير

 

المرحلة الأولى

حلِّي الخميرة في الما الدافي ؛ حطي الفرينة في وعاء عميق ؛ زيدي الملح و السكر و الزبدة مقطعة قطع صغيرة و الخميرة .

المرحلة الثانية

خلّطي كلّشي بيدك و زيدي الحليب مرّة على مرّة ؛ ابقاي تخدمي الفرينة و تدلكيها 10 دقايق و خليها ترتاح لمدة ساعتين ؛غطيها بقماشة نظيفة .

المرحلة الثالثة

قطّعي العجينة ل 2 حربوشات و انتبهي على الطلوع ما تفسديهش :

 

ديري تقاطع بين الحربوشين بحيث تحصلي على العلامة +   يعني يكونو متعامدين ..

ثم هبطي الطرف العلوي في جهة  الطرف السفلي و طلعي السفلي لجهة العلوي (تاع الحربوش اللي من تحت)

و جيبي الطرف اليمين نحو اليسار و الطرف اليسار جيبيه لليمين (في الحربوش اللي من فوق)  

و عاودي العملية حتى الوصول لنهايات الأطراف ‘اجمعي النهايات تاع الحربوشين مع بعض و عدلي الشكل برفق بحيث تحصلي مباشرة على ظفيرة .

 ..اذا جاتك الفكرة صعيبة ديري ظفيرة عادية بثلاث أجزاء من العجينة .

المرحلة الرابعة

خليها تريّح نص ساعة ثم بالفرشاة اطلي البريوش بصفار البيض من أجل الحصول على اللون الذهبي ..حطِّي الظفيرة فوق ورق الطّهو في القالب

المرحلة الخامسة

طيبيها نص ساعة على درجة 180 مئوية .الفرن يكون بارد ما تسخنيهش مُسبقًا

 

…..شمس هنية

-مقادير  الكيكة :

زوج حبات بيض+علبة ياغوورت  بنكهة الليمون +عبار  زيت +عبار سكر +2باكي  خمارة  الحلوى+مغرف كبيرة

خل+فاني +3عبارات  فرينة

العبار:هو  نفس  علبة  الياغوورت

-مقادير كريمة الليمون :

150ملل عصير  ليمون +150غرام سكر +2حبات بيض كاملين +زوج مغارف كبار  مايزينة +مغرف كبيرة زبدة

تحضير  الكيكة  نخلطو  كل  المقادير   ماعدى  الفرينة  في  الميكسور   اومبعد   نحطو  الخليط  في   اناء  ونحط

 الخمار  والفرينة  بالصفاية  ونخلط  غير  بالمغرف  نحطوه  في  سنيوة  تكون  مدهونة  بزبدة ومرشوشة

بالفرينة والى  الفرن  كل  فرن  وعلى  حساب  حرارتو

والكريمة نخلط  كل  المكونات مع  بعض  بارد في  بارد   ونحط  فوق  النار  ونخلط    كي  تعقد   نزيدو  مغرف زبدة

-التزيين :

نحط  الطبقة  الاولى  ونشربها  بعصير  البرتقال  المحلى  الطبيعي   ثم  نحط  طبقة  من  كريمة   الشانتيي(عبار

 شانتيي  بنفس  العبار  ماء  او حليب)ثم  نحط  الطبقة الثانية  ونفس  العملية  نشربها  ونحط  كريمة

الشانتي  والطبقة  الاخيرة  نشربها   ونغلف كل  الكيكة بكريمة الشانتيي وندير  فوقها  كريمة  الليمون  ونغلف

الاطراف بالكاوكاو مرحي خشين  ونزينها  بخطوط   الشيكولاطة.

. . . شمس حبيبة

-المقادير:

كاس متوسط حليب حوالي150ملل  +نفس الكاس زيت +نفس العبار سكر+زوج خمارة القاطو+فانيتفاح مقشر ومقطع صغير +3فرينة نفس العبار +معجون

-الطريقة:

نحكم التفاح  المقطع والحليب والزيت والسكر والفاني نديروه في الميكسور و نخلط  لما  يتجانس ويترحى على

شكل سائل  نفرغ  الخليط  في اناء وندير الفرينة والخمار بالصفاية ونخلط  يديلك  قريب 3كيسان  فرينة  على

حساب  الثقل  تع  الخليط نفرغو الخليط في  مول مدهون  بزبدة ومرشوش بالفرينة  ونكون  قطعت شرائح تفاح

 

نوضعها من فوق  كل وحدة  وتزيينها و الى الفرن  كل  فرن  وعلى حساب حرارتو  المهم  منفتحش في  الاول

تخافي يهبط  وماينتفخش ونخلوه  يحمار مليح لما يطيب نخرجو  وندهنو بكمية  مليحة من المعجون  قريب  فنجان

ونرجعو  للفرن  يتشرب  قريب  5دقايق  ونخرجو  وشهية  طيبة …

 

…شمس حبيبة

 

 

عادي او مزين برقائق الشوكولا، على شكل تاج او براس ..خبزة كاملة او شرائح ….البريوش… هو ذوق رفيع يستجيب برقَّة  للريحة الطَّيبة و عنوان حيوي لجودة براعم التذوق

 

عجينة البريوش ظهرت في فرنسا في العصور الوسطى وين كانو يخدمو بيها حلويات متشابهة… …..ومع ان المصطلح في اللغة الفرنسية يحمل معنى عكسي إلَّا انَّ التسمية ليست مهمة قدّ أهمية المظهر المفشفش و اللون الذهبي ..

البريوش من المخبوزات اللي تُصنَع  بعجينة طالعة و مهويَّة ، أساسها …”الزبدة ..الفرينة ..الملح …البيض …السكر …الخميرة …” و عندو دائما تاثيرلذيذ من خلال شكلو و قوامو الهش …”المفشفش.”..و على حسب العجينة كيفاش  تطلع في وقت طويل او قصير يكون القوام اللي نحبو نحصلو عليه ..كاين اللي يحب يزيدلها الزبيب ..أو رقائق الشوكولا …ولا يذرذر السكر … و مع كل اشكالها (الظفيرة ..التاج …الوردة ..الراس )…و مع روايحها …و مع تحريفاتها …ماكانش اللي ما يحبش البريوش ..

 

وصفة البريوش ..                          

 

المدة : 50 دقيقة

العدد : 5 اشخاص

الصعوبة : متوسط

التكلفة : اقتصادي

 

المكونات ..

 

350غ فرينة .

كاس زبدة

1 ملعقة صغيرة ملح

2 ملعقة كبيرة خميرة الخبز

4 بيضات

 4 مغارف كبار سكر  ..

 

الأدوات ..

قالب (مول)

حلّال

التحضير:

 

المرحلة الأولى ..

الاعداد في الليلة السابقة ..

خلطي الفرينة ،الملح ،السكر،البيض ؛ الزبدة ،الخميرة الذي ذوبتيها مع 2 مغارف ماء..دلكي العجينة مليح ..اذا جاتك جارية بزاف زيديلها الفرينة ..لازم تبقى طرية..حطيها في اناء غطيه مليح ..اغلقي و ضعيها في الثلاجة ..

المرحلة الثانية ..

في صباح الغد ..رشي الفرينة على سطح العمل …اخدمي العجينة على شكل كرة و حليها بواسطة الحلال

المرحلة الثالثة ..

باش تشكلي مربع ..طبقي العجينة على 4 و عاودي حليها …ثم دوري على شكل حربوش و قسميها 8 قطع ..حطيهم في قالب فرن كبير تكوني دهنتيه بالزبدة و رشيتي عليه الفرينة ..و خليها تطلع في مكان دافي لمدة ساعة ..

المرحلة الرابعة ..

كي تكبر العجينة و تملا القالب و تدهنيها بصفار البيض طيبيها في فرن ساخن ..(سخنيه مسبقا عشردقايق )على درجة حرارة 250 ..كي يتحول البريوش للون الذهبي خرجيه من الفرن ..

تحبي تتناولي هذا البريوش مع موس الشوكولا يكون لذيذ جدا  ..اذا حبيتي تحصلي على شكل الدب قسمي العجينة لعدة كويرات ..الكبيرة في الوسط للجسم ..الاقل قليلا للراس ..و اربع كويرات اصغر للقوائم ..زينيها بالزبيب و رقائق الشكولا شكلي بيهم العيون و الانف و الفم ..

 

وصفات كلاسيكية للبريوش:

بريوش الظفيرة

بريوش الوردة

بريوش التاج

كرات البريوش المملحة

بريوش الرخامة

 

…….شمس هنية