الطريقة :

حضري زيت في قارورة حطي فيها رند + سنات ثوم ماشي مفرومين + زعيترة + اكليل الجبل و خليها حتى يجي رمضان ان شاء الله باش تخدمي بالزيت الصلصة التالية : صفي كاس زيت منها لاستعماله في الوصفة

كاس ممزوج بين زيت و زيت الزيتون

ربع كاس خل أو ليمون

 نص كاس ماء دافي

 شوية معدنوس حب

 2 فص ثوم

 زعيترة

 ملعقة قهوة معمرة تاع خردل

 القليل من العسل

 ملح

 فلفل ابيض

خلطي كل شي في الخلاّط الكهربائي و بعدها حطي الخليط في قارورة زجاجية محكمة الغلق لازم ما يدخلش الهواء ليها راهي تفسد

اذا خفتو ديرو ورق الاكل لحمايتها من الهواء قبل وضع الغلاق

…شمس ساطعة

الطريقة :

في اناء حطي عدد البيضات لي حابة

زيدي عليها بصل مقطع مربعات صغيرة جدا

ملح

فلفل اسود

كمون

زعيترة حسب الرغبة

خلطي الكل

في مقلات ديري ملعقة مارغارين حتى ذوب

ارمي عليها الخليط

و نقسي للنار و غطي المقلات حتى يطيب من التحت اقلبيها و لديك الاختيار في عدم القلب

زينيها بورق المعدنوس

…شمس ساطعة

الطريقة :
تقلي البصل في الزيت حتى يذبال مليييييييح و يولي لونو ذهبي+ 2 ملاعق كبيرة طماطم مصبرة تخليها تتقلى شوية+ ملح
+ قرصة سكر صغييييرة باش ما تبقاش الحموضية+ كركم

فلفل اسود 

+ ملعقة صغيرة زعيترة 

+ ورقة صغييييييييرة رند 

تخليهم يتقلاو شوية

من بعد تمرقي بالماء بحيث ما ترجعيهاش شربة شورورو

لازم تبقى ثقيلة كيما باين في الصورة

تخليها تعقد مليح لمدة 15د على الكانون الصغير و يكون في درجة متوسطة

من بعد طفيها و خليها ترتاح 15د الى 30د

 
 
…شمس ساطعة
 
 

 

كرات البريوش المملحة

 

المدة : 45 دقيقة

العدد : 4 اشخاص

الصعوبة : سهل جدا

التكلفة : اقتصادي

 

المكونات

300غ فرينة

3 بيضات مضرّبين

كاس حليب

3 مغارف كبار قطع زبدة

1 مغرفة كبيرة خميرة الخبز

1 مغيرفة كبيرة سكر

250غ لحم مرحي

200غ شرائح الجبن او جبن مثلثات

100غ جبن مبشور (غرويير)

1 مغرفة صغيرة ملح

الأدوات

خفَّاقة يدوية

اداة قطع او صحن

مغرفة خشب

قالب فرن

فرشاة

 

التحضير :

 

المرحلة الأولى:

في وعاء خلّطي الحليب و السكر و الفرينة و البيض و الزّبدة ثم أضيفي الملح و الفرينة  حتّى الحصول على عجينة طريّة و متجانسة

المرحلة الثانية :

خلِّي العجينة ترتاح لمدّة نصف ساعة ؛ غطِّيها بمنديل نظيف في مكان دافي

المرحلة الثالثة :

في هذا الوقت طيّبي اللّحم المرحي في شويّة زيت و ملح و فلفل اكحل و قطّعي الجبن

المرحلة الرابعة :

بعدما ترتاح العجينة رشِّيها و رشِّي  سطح العمل بالفرينة و حلِّيها بالحلاّل ؛ مدّديها مليح حتى لسُمْك 1 سم ثم قطّعي مجموعة من الدّوائر باستعمال أداة تقطيع أو صحن .

المرحلة الخامسة :

في كلّ دائرة حطِّي مغرفة لحم مرحي و شريحة جبن و مغرفة صغيرة جبن مبشور ثم أغلقي الكرة و قلّبيها و حطّيها في القالب المدهون بالزبدة و الفرينة .

 

المرحلة السادسة :

خلّيها تريّح في مكان سخون (سخّني الفرن لمدة 5 دقايق و طفِّيه و حطي القالب فيه لمدة 15 دقيقة)

 

 

المرحلة السابعة :

سخّني الفرن لمدة 10 دقايق على درجة حرارة 180 مئوية و ضرّبي صفار بيضة مع مغرفة صغيرة حليب و ادهني وجه الكريّات بفرشاة المطبخ و رشّي سينوج للزينة إذا حبيتي و طيّبي البريوش لحوالي 15 دقيقة الى 20 دقيقة

 

ملاحظة :يمكن الاستغناء عن اللحم المرحي و الاكتفاء بالجبن

تُقدَّم كرات البريوش ساخنة مع سلطة خضرا لذيذ جدا .

 

…شمس هنية

 

 

طريقتي في تحضير الأرز الأبيض سهلة جدا جدا

تقدري ديري بيه سلطة …. تزيديلو صوص أحمر …. او في أي طبق يحتاج الى أرز أبيض طايب

السر هو : غسله بالماء حتى يولي الماء شفاف

يعني تحطيه في اناء و تولي تعمري الماء و تحكي فيه بين صباعتيك كي يولي الماء ابيض ارميه

و عاودي عمري واحد جديد و اغسلي كي يولي ابيض عاودي الماء جديد

هييييييييييييك حتى يولي الماء شفاف

المكونات :

كوب كبير أرز

3 كوب ماء

4 ملاعق زيت

ملح

فلفل اسود

2 سنات ثوم بدون برش

ورقة صغييييييييرة رند

الطريقة :

تحطي قدر فوق النار يسخن

كي يسخن حطي الزيت

بعدها ب 30 ثانية حطي الارز

قليه مليييييييييح حتى تشوفي لونو بدا يروح للبني لكن ماشي بني

بعدها اضيفي الماء + ملح + رند + ثوم + فلفل اسود قليييييييل

بعد ما يطيب

ديريه في كسكاس و ارمي عليه ماء بارد باش ما يزيدش يكمل طياب

خاطش كان يبقى سخون راح يولي معجّن

…شمس ساطعة

المقادير:

سميد دقيق جدا تاع المحاجب

فرينة

ملح

خميرة الخبز

زيت زيتون

ماء دافئ

poireau بورو 4 حبات


طماطم 4 حبات

رند ورقة صغيرة

زعيترة كمية صغييييرة

فلفل اسود

طماطم مصبرة او فلفل أحمر لكي الاختيار

تونة

الطريقة:

العجينة:

تحطي 250غ سميد + 100غ فرينة + ملح + ملعقة صغيرة خميرة الخبز + ملعقة كبيرة زيت الزيتون

تخلطيهم و هوما ناشفين

من بعد تضيفي ماء دافئ حتى تنطم فقط

تخليها 15د ترتاح

تولي ليها تضيفي ماء دافئ برش الاصابع و تعجني بالدبزة كي تحليها كامل عاودي طميها و أعركيها كي تشوفيها شربت الماء لي درتيه زيدي رشي بصباعتيك

حذاري تزيدي بزاف راح تضطري تزيدي السميد و هذا ماشي مليح …. فقط رشي الماء بصباعتيك

هكذا جتى تتحصلي على عجينة ايلاستيكية …. يعني طي تشديها باش تقطعيها بأصابعك تكون كيما العلكة الممضوغة

بعدها جيبي سنيوة كبيرة ادهنيها بالزيت

جيبي طاسة و حطي فيها زيت و ادهني يديك مليح بالزيت و العجينة تاعك و كل مرة استعملي الزيت باش ديري كريات و حطيهم قدام بعضاهم لكن ماشي لاصقين

كي تخلاص العجينة زيدي ادهني الكرات بالزيت و غطي عليهم باش ما يقيسهمش الريح مثلا حطي سنيوة أخرى فوقها و غطيهم بالطرشونة

المهم العجينة ما تنقاسش كامل بكاش حاجة

خليها ترتاح 45دقيقة

في تلك الاثناء راح توجدي الحشو و لازم حتى يطيب و يبرد باش تخدمي بيه

و لازم مايكونش فيه الماء كامل

طريقة الحشو:

في طنجرة حطي زيت و اشعلي نار

قطعي البورو poireau دوائؤ و حطيه يتذبل في الزيت …. كي يتذبل كااااااااامل

جيبي طماطم منزوعة البذور كامل مقطعة مربعات صغييييرة … حطيها مع البصل

اضيفي : ملح + ورقة رند صغيرة + زعيترة شوية برك + فلفل اسود + ملعقة كبيرة ماشي معبرة بزاف طماطم مصبرة و خلطيهم + تونة

غطي الطنجرة لكن اتركيها مشقوقة يعني مالازمش البخار يولي للطنجرة و تتعمر ماء لازم البخار يروح برا عليها

بعد ما تشوفي الطماطم ذبلت كاااااااامل و المكونات دخلو في بعضاهم طفي عليها

ضروري تنحيها من الطنجرة و تحطيها في حاجة مسطحة و كبيرة باش تفرشيها فيها و تبردلك تم تم

بعد ما تبرد الحشو

وجدي الطاجين أو الطاوة او المقلاة تسخن فوق النار متوسطة

في سطح العمل امسحيه بالزيت باش كي تحلي فوقو العجينة متلصقش فيه

و جيبي طاسة و حطي فيها زيت باش تستعمليها في حل العجينة

الآن جيبي أول كورة خدمتيها و حطيها على سطح العمل المزيت و غطسي أسابع يديك فيزوج في الطاسة تاع الزيت و ابداي في حل العجينة

ملاحظة : الغلطة الي تخلي العجينة تتقطعلك هي أنك تستعملي الكف ديالك باش تحلي او تدركي كثيرا عليها

الطريقة الصحيحة هي أنك تستعملي فقط اطراف الأصابع و بحركة المسح السريع على العجينة تحليها حتى ترجعيها رقيقة جدا

بعدها … عادة العجينة تتفتح دائرية … جيبي الطرف لي مقابلك و أطويه حتى وسط الدائرة

حطي فوقو كمية من الحشو


الآن اطوي الطرف لي من جهتك فوق الحشو

الآن رشي العجينة بالزيت

و جيبي الطرف الأيمن فوق الحشو

رشيه بالزيت

ثم جيبي الطرف الأيسر فوقو

ملاحظة : ردي بالك الآن تعبزيها بيدك راح دخليهم في بعضاهم و ما تجيكش مورقة

فقط ادركي بأطراف الأصابع على أطراف الحبة باش مايجوش معجنين و يجو مقرمشين

الآن حطي الحبة طيب

راح تاخذ معاك 40 ثانية أضن و طيب من الجهتين على حسب السخانة

جيبي طبشي و فرشيه بطرشونة باش تشرب الزيت

حطي كل حبة على حدى حتى تبرد شوية باش تحطيهم فوق بعضاهم وإلاّ راح يعرقولك و يولو معجنين

…شمس ساطعة

الطريقة :

في قدر حطي كمية من الماء و خليها حتى تغلي باش تقوي فوقها :

في كسكاس قطعي الباذنجال مربعات و حطي فوقها البصل مقطع ذرذري الملح و غطيه و خليهم يفورو

في اناء اسكرفجي الطماطم بدون زريعة

زيديلها طماطم العلبة + ملح + فلفل اسود + كركم + كمون + زعيترة + زعتر + رند + اكليل الجبل + زيت الزيتون + خل

خلطيهم و خليهم على جنب

جيبي البطاطا نقيها و اسكرفجيها و شليها مليح للتخلص من النشاء حتى يولي الماء نقي

جيبي خبز يابس و اسكرفجيه باش يولي مبشور

الان كي كلش يكون واجد

جيبي طبق الفرن

ستفي البطاطا من التحت

فوقها الباذنجال بالبصل

فوقهم الطماطم

و فوقهم الخبز المبشور

و الى الفرن لي تكوني سخنتيه كي تشوفي انو الماء نشف يعني تحسي دخلو الطياب طفي من تحت و اشعلي من الفوق باش تتحمر شوية الخبز المبشور

و يقدم دافي ماشي سخون و ماشي بارد

يعني طبق صيفي هايل

 …شمس ساطعة

المقادير:

سردين 

حبيبات ليمون 

 زيتون  اسود 

 بصل

 فلفل الحلو اخضر (طرشي )

 زيت الزيتون 

 

الطريقة:

انقي  السردين من  الاحشاء والراس  نحطو في سنيوة ونرش عليه ملح و الفلفل الاكحل  ونعاود نقلبو ونعاود نرش ملح والفلفل الاكحل ونرش فوقهم كمية من زيت الزيتون ونخليه  يترقد

 

في هاداك الوقت نقشر الليمون ونقطعو مكعبات صغار ونغمرو في كمية من زيت الزيتون

 

 

نفس الشي مع البصل نقطعو اجنحة ونغمروا في زيت زيتون

 

 

 ونكمل  نقطع الفلفل الحلو ونغمرو في  اناء وحدو

ونفس الشي مع الزيتون الاسود  انقطعو صغير ونرقدو في زيت زيتون

لحقنا لوقت القلي  نحط  المقلة تسخن مليح ونحط  السردين  وماندير والو لانو هو فيه زيت الزيتون ومتبل وثواني ونقلب ونعصر ليمون  نكمل كامل السردين لي عندنا بنفس الطريقة

في التقديم نحط  السردين  ونحط فوقو الفلفل الاخضر  والبصل  والليمون  والزيتون الاسود  و نخلط  هاديك الزيت  تع كامل  المكونات  ونرها فوق السردين الكمية لي بغيناها وفي الاخير رشة معدنوس

. . . شمس حبيبة

 

الطريقة :

في طنجرة حطي الزيت + بصل مفروم

كي يذبال البصل + حطي بطاطا مقطعة دوائر شوية خشينة باش ما تتحرحرش + كمية من الحميصة المشمخة

و ضيفي البهارات : الملح + فلفل ابيض او اسود + كركم + شوية من عود القرفة + راس الحانوت + زوج سنات ثوم صغااار بالقشور تكوني غسلتيهم

خلطي الكل و خليه 2 د يدخلو التوابل في البطاطا

بعدها مرقي بالماء حتى تتغطى البطاطا

انا طيبت على الكانون الصغير و كان زايد كامل طابت في 30د

كي طيب طفي النار و جيبي معدنوس و افرميه و ذرذريه من الفوق و اغلقي الطنجرة و خليه يذبال في السخانة تاعها

اما الباتنجال :

قطعيها دوائر خشينة

في اناء معمر ماء ديري كمية من الملح و حطي فيها الدوائر تاع الباتنجال

خليها حتى تشوفي الماء ولى لونه بني

عادة الامر يأخذ 15د

بعدها نحيها من الماء وقطريها منو

جيبي طبق يدخل الفرن

حطي فيه الباتنجال و ادهنيها بالزيت مليح مليح

ستفيها في الطبق مليح

اشعلي الفرن من الفوق و حطي الطبق ماشي بعيد بزاف على النار و ماشي قريب بزاف

خليها حتى تتحمر من الفوق

طفي من الفوق و اشعلي من التحت خليها 15د

بعدما يمر الوقت طفي الفرن و ذرذري عليها الملح الان و غطي الطبق بالفيلم الغذائي باش تذبال في سخانتها

بعد ما يمر 30د تقدري تستعمليها

طريقة التقديم :

جيبي طبسي ستفي من التحت الدوائر تاع الباتنجال

و سقي من الفوق المرق و البطاطا بطريقة جميلة ماشي خلط جلط

…شمس ساطعة

الطريقة :

في قدر تحطي قيس ما تتعمر 3 سم ماء

تخليه يغلي

كي يغلي الماء

في كسكاس تحطي ازهار الشفلور و ذرذري عليهم الملح

و تغطي الكسكاس

و تخليه يفور حتى يطيب تماما

بعدها نحيه و حطيه في طبسي كبير باش يبرد تماما في الهواء الطلق حطيه قريب للتاقة

بعدها جيبي الطماطم و قطعيها على شكل هلال

و جيبي بصل و قطعيه رقيق اذا كان طويل و اذا كان بصل الحبة المدورة قطعيه هلال هو تان

اما التتبيلة :

ديري في اناء : زيت + ملح + خل + فلفل اسود و خلطيهم مليح حتى يتجانسو

بعدها حطيها على البقية و خلطي

و شبحي الطبسي كيما تحبي

…شمس ساطعة