انتشر ألم الظَّهر عند الكثير من الناس في الآونة الأخيرة وخاصَّة النِّساء ؛بسبب التعب أو مشاكل عضلات الظهر،أو الإصابة لي تشمل الفقرات أو الأعصاب الشوكية و عدوى الكِلى…و غيرها.
إذا ماعالجتيش آلام أسفل الظَّهر الحادَّة أو المزمنة(اللي عندها فترة طويلة) يمكن أنُّو تؤدي بيك إلى الاكتئاب و مشاكل في النوم و ربما صعوبة في الاعمال البدنية او التمارين الرياضية وحركة التمدد ؛ الشي لي راح ينتج عنو تفاقم وإطالة آلام الظهر. 
يوجد العديد من أنواع الأدوية لآلام الظَّهر: حسب شدَّة الأعراض ومدّتها وموضع الألم والآثار الجانبيَّة اللِّي يقدر المريض يتحمّلها ؛هذي الأدوية  تساعد في تخفيف الألم وإزالة الأعراض المرتبطة بيه ؛و تسهّل علاجات أساسية أخرى كالعلاج الفيزيائي .
تتوفّر هذه الأدوية بصفة عامَّةً في ثلاثة أشكال:

-أدوية تؤخَذ عن طريق الفم .

-أدوية موضعيَّة(ديريها على موضع الألم)أسفل الظَّهر طبعا.

-الحُقن.
علاج الألم عن طريق الفم: هناك العديد من أشكال أدوية الألم اللي تؤخذ عن طريق الفم – و تجي في صورة حبوب أو مشروب(سائل)- ويعمل كلّ نوع منها بشكل مختلف ؛وعندو فوائد ومخاطر متباينة؛ و كاين البعض منها اللي نقدرو نستعملوه فقط بوصفة طبيَّة. وتصنَّف حسب دورها إلى: مسكِّنات للألم ؛ومضادَّات للإلتهاب ؛ومضادَّات تريسكليك.

1- مُسكِّنات للألم: 
هدفها تخلِّي المريض يقدر يتحمّل الألم،وتنقسم الى ثلاث مستويات من حيث قوة التأثير اللي عندها :
المستوى الاول: يشمل الباراسيتامول والاسبرين والعقاقير غير الستيرويدية المضادة للإلتهاب
المستوى الثاني: مشتقَّات الموروفين من الكوديين codiéne والدكستروبروبوكسيفان dextroppoxyphéne
المستوى الثالث: يشمل المورفين ومشتقَّات الموروفنيك وهي الأقوى في التأثير.
يوصي الأطبَّاء بتحديد جرعة المسكِّنات من “المستوى الأول” في حدود 4 غرامات في اليوم كحدّ أقصى ؛على شكل 4 جرعات متتالية(اربع مرات)، يقدر يتم إستهلاكها في كثير من الأحيان بدون وصفة طبية.
أمَّا المسكِّنات من “المستوى الثَّاني والثَّالث” ، اللِّي تتميّز بفعاليتها الكبيرة في تخفيف الألم ،ماينبغيش ناخذوها إلَّا بوصفة طبية، كذلك كاين دواوات تجمع بين الباراسيتامول والكوديين (المستوى الأول والثاني) اللي عدنا مانستغناوش عليها ونستعملوها دون وصفة طبية ، لأنُّو فيها جرعة الكوديين(العامل المؤثر من “المستوى الثاني” و اللِّي هو قوي) منخفضة، ونستعملوها لعلاج أعراض الألم المعتدل والشَّديد كي تكون ماعالجاتهمش المسكِّنات من المستوى الأول وحدها. 
2-مضادَّات الإلتهابات LES ANTI-INFLAMMATOIRES:
تعمل على تقليل الألم القوي الناتج عن الإلتهاب وتعتبر أكثر فعالية من المسكِّنات عند بعض الناس. ونلقاو فيها ثلاثة أنواع:
* مضادَّات الإلتهاب غير الستيرويد: كيما الأسبرين ، ايبوبروفين …
* الكورتيزون: ما ننصحوش بالكورتيزون لعلاج طويل الأجل من آلام أسفل الظهر المزمنة. يجب استخدامو فقط لمدة قصيرة .
* مُرخيَّات العضلات: مفيدة عندما يكون التقلُّص(أحد أعراض ألم الظَّهر) متكرِّر ومدتّو طويلة بزّاف. يساعدو هذو الأدوية على استرخاء العضلات. يجب الحرص على أنّها تؤخذ فقط لفترة محدودة من الوقت ، باش نتجنّبو الإدمان الجسدي عليها ، و كي  راهي ممكن تسبب النّعاس من المستحسن  نأخذوها في وقت النوم. يوصي باستخدامها لمدة أقصاها أسبوعين ويفَضَّل نحصرو استعمالها في الفترات اللي يكون فيها عودة الألم.
3-مضادات تريسكليك LES ANTIDEPRESSEURS TRICYCLIQUES:
هذي الفئة من الأدوية عندهم تأثير متواضع في تسكين و التَّخفيف من آلام أسفل الظَّهر. يساعد عملهم “المضاد للاكتئاب” على تقليل جانب “عدم تحمُّل الألم”. وهي لاتُصرَف إلَّا بوصفة طبيَّة يقيِّم فيها الطبيب نسبة فائدة أو مخاطر تناولها بصرف النظر عن حالة الاكتئاب؛نعالجوا بيهم ألم الظَّهر سواء رافقو اكتئاب أو لا.
علاج الألم الموضعي:نقومو بوضع هادي المنتجات الدَّوائيَّة على الجلد باش نحبّسو الألم الموضعي :مثل الألم في “العضلات” أو “المفصل” أو “إلتهاب المفاصل”؛ وتتوفّر على شكل مراهم Pommade ومواد هلامية GEL معظمها متاح بدون وصفة طبية.
علاج الألم بالحَقن:

يمكن حقن المسكِّنات و العلاجات المضادَّة للإلتهابات مباشرة في موضع الألم.

أخيرا و كعلاج مبدئي و رئيسي لكلّ آلام الظَّهر، حتى لو كنتي تأخذي المسكِّنات ، ينصح دائما بممارسة الرِّياضة البدنيَّة.
كاين مخاطر وآثار جانبية وتفاعلات كيميائية بين جميع الأدوية. لذلك ، ينبغي دائما أن يتم إخطار الطبيب قبل تناول أي علاجات دوائية. و يبقى على المرضى  يكونوا حذرين بشكل خاص إذا كانوا يتناولو أدوية أخرى أو لديهم أمراض مزمنة (مثل مرض السكري).ولابدّ من الأشارة هنا إلى أنَّ هذي الأدوية تعمل على تخفيف الألم وليس معالجتو أو معالجة أسبابو.

…شمس الامل

ضمن السَّعي الدَّؤوب لمؤثِّرات العصر من أجل تحقيق الرَّاحة و الوصول إلى الرَّفاهية أصبح المطبخ النَّظيف اللي كان في الزَّمن الماضي يتطلّب مجهود جبَّار و عمل حثيث مَهمَّة سهلة للغاية ؛ما تحتاجش أكثر من بعض الحركات البسيطة و الوسائل القليلة ؛بامكانيات صناعية  و بفضل الذَّكاء البشري مجدًّدا حيث تمَّ استعمال الطَّبيعة في تسهيل الحياة.

المطبخ النَّظيف اليوم لا يحتاج إلَّا لبعض التَّنظيم ؛و القليل من تنسيق الوظائف؛ و شيء من المتابعة و الرِّعاية ؛لقد أصبح أقرب لآلة توجّهيلها أوامر يدوية و توزّعي المهام على الأجهزة لتقدِّم أعمالا مريحة جدًّا ؛كلّ هذا ضمن التَّصاميم المعاصرة اللِّي خلَّات المعجزة تتحقّق ؛فبضغطة على الحنفيَّة فوق الحوض و بأدوات صغيرة تغسلي حوايجك بسهولة :أواني ؛خضر؛ فواكه …؛و زر غسَّالة الأواني هو “افتح يا سمسم” تاع كنز الاواني النظيفة اللي قضى على “بعبع” الماعن اللي ما يخلاصوش؛أمَّا المنظِّفات البخَّاخة على أنواعها هنَّاتنا من تزرزيق الما لساعات متواصلة في محاولة يائسة لتنظيف محيطنا ؛ و يا سلام على أنظمة التَّخزين العصرية شحال وفّرت علينا أوقات من الطَّبخ و النَّفخ و الإعداد؛ و هذيك الصُّخور الجميلة اللِّي لبّسناها لحيوط مطابخنا و غرف جلوسنا عاونتنا على الأوساخ و البقع الدُّهنية العنيدة اللي كانت تأخذ في ما مضى أيام من العمل؛ مانهدروش على غسَّالة الملابس اللي هي بكل امتنان اليد اليمنى لنا جميعا ؛و كي  نوصلو للأسطح الرُّطبة الجميلة اللي نقومو فيها بمجمَل عمليَّاتنا المطبخية طبخ و تنظيف و حتى أكل و جلوس نتساءلوا كيفاش كانوا جداتنا يحضرو وجباتهم؟

الرائع أنُّو مع القيمة الجمالية العالية لهذي الأسطح و إحساس النظافة المتميِّز اللي نتمتعو بيه كي نقتنيوها ؛ما نتعبوش بزاف في عمليَّات التَّنظيف ؛”بركات الصُّخور الملساء”.

كلّ شي جميل نحصلو عليه في الحياة يحتاج لصيانة لجمالو ؛و الغالي يتطلّب دلال و عناية عمرك ماتخاطري بالحالة الصِّحيَّة الكاملة للبوتاجي نتاعك بعد الشَّقاء تاع الأزمنة الغابرة و الاعمال الكادحة ؛يكفيك في أيامنا هذي تملكي المعرفة باش تحقّقي الحفاظ على الصورة المضيئة للمواد الجميلة اللِّي صنعت منها الأسطح اللي رانا نخدمو عليها.

كيفاش تنظفي البوتاجي؟؛

تتحدّد طريقة تنظيف سطح العمل من خلال تمييز نوع المادَّة المصنوع منها ؛كلّ مكوِّن يحتاج لعناية تناسبو؛ اعرفيها باش ماترتكبيش أخطاء تكلّفك كثمن ليها  التَّنظيف السهل و الآمن اللي راكي تستمتعي بيهم؛ العنصر المشترَك بين كلّ الأسطح مهما كانت المادة المصنوع منها هو ضرورة تجنُّب استخدام المواد القويَّة اللي تأثّر على البنية و المظهر :سواء مواد تنظيف ؛ابتعدي كليًّا على المنظِّفات الكاشطة منها مهما كانت درجة الإتِّساخ؛ و عمرك ماتغسلي البوتاجي باسفنجة خشِنة (الاجاكس كيما نقولو)؛ يجرحلك السطح و بالتَّالي يَتلَف ؛هذي الجروح هي الخدوش اللي يستوطن فيها الوسخ و يولِّي منظر البوتاجي مقرف مهما نظفتيه ؛هنا تحتاجي لعناية عميقة هذا هو مفهوم “التَّلَف” ؛حفاظك على أصل المادة للسطح نتاعك و عنايتك بيها يجنّبك هذا النَّوع من الخسائر.

المُميَّز فعلًا في أسطح العمل خصوصًا الصَّخرية هو قابليّتها التَّامة للَّتنظيف ؛و ممانعتها الكاملة للبكتيريا ؛أيْ أنَّها سطوح طبيعيَّة آمنة قدّ ما تمدّ جمال و بهاء توفّر السَّلامة و النّقاء.

التَّنظيف اليومي للبوتاجي مهما كان النوع تقدري ببساطة تستخدمي الماء الساخن و سائل الأواني ؛الأفضل تحضّري دائمًا بخَّاخة فيها سائل الأواني المخفَّف بالماء و تمسحي بشيفونة ميكروفيبر و تجفّفي بمنشفة.

للتَّنظيف العميق أضيفي الجافيل المخفَّف في الماء ؛اغسلي بيه السطح بواسطة شيفونة و جفّفي بمنشفة .  

لإزالة البقع الأفضل هو كي ديري عجينة ببكربونات الصوديوم و الماء ؛أو بالطلك و الجافيل و تطلي بيها سطح العمل؛ تقدري تبيّتيها طول اللّيل ؛و الصباح تمسحيها بشيفونة ميكروفيبر أو تحُكّيها عند الضرورة بفرشاة أسنان قديمة و ليِّنة .

كلّ مسارات التَّنظيف السابقة كرّريها عند الضرورة؛  تبقاي تعاودي حتى الحصول على النتيجة المطلوبة ؛ماشي تروحي تلجئي للحلول الاستعجالية اللي تلحق الضَّرر بجسم السَّطح نتاعك.

تبقى كاينة فروق طفيفة بين المواد المصنِّعة لمختلف أسطح العمل ؛ضروري تعرفيها باش تحددي بدقة نظام التنظيف اللي تعتمديه في البوتاجي:

الأسطح الرُّخامية:

الرُّخام هو حجر كربوني كلسي يتفاعل مع الأحماض بشدَّة؛ اللِّي حرفيًّا تاكل جزء منُّو في كلّ مرَّة يتلاقاو ؛هذا اللي يفسّر علاش السَّطح الرخامي يتحفّر كي تستعملي فيه مطهِّر بالخل او عصير الليمون ؛تجنّبيهم كليًّا على سطح الرخامة و اكتفي بالماء و الصابون ؛و الجافيل عند الضرورة ؛الرخامة كذلك يبقى عليها بسهولة أثر قطرة الماء يجدر بيك مسحها و تجفيفها بعد التَّنظيف أو التعرُّض لقطرات الماء هذا مُهِم في المظهر الجميل الكامل لسطح عملك ؛كما أنّ الحرارة العالية تضرّ بالسَّطح ماتحطِّيش الحوايج السّخونة فوق الرّخامة تاع البوتاجي ؛راكي تغامري بالمادة اللي فيه.

أسطح الغرانيت:

الغرانيت قيمتو فيه؛ خاتش أداؤو عالي جدًّا ؛فهو فعليًّا في التنظيف لا يحتاج إلَّا إلى الماء و الصابون و هو مقاوِم جيّد للأوساخ و البقع ؛و لكن اذا انزعجتي من أي بقعة تاع الزيت ديريلها عجينة بالبكربونات و الماء اطليها بيها ثم حُكِّي بميكروفيبر ؛أما البقع بأساس مائي استعملي عجينة بالتالك و الجافيل ناعمة على المادة و قويَّة على البقعة ؛و لكن جرّبي عيِّنة أولا على قطعة من السَّطح قبل ما تعمميها على كل السطح باش تتأكدي بلي مايأثرش على اللون.

 أسطح الكوارتز و الأحجار الكلسية:

هذا النوع من الاسطح الملساء عندو خاصية الممانعة ضدّ الأحماض يعني ما يضرُّوش الخلّ أو الليمون ؛و ميزة  المقاومة للحرارة لأنها مصنوعة من الكريستالات المضمومة للصخور ؛ماتحتاجش في الحفاظ على مظهرها لأكثر من الماء و الصَّابون و لكن في حالة متطرِّفة لوجود بقع ديري سائل منظِّف للزُّجاج و اسفنجة غير خشنة راهي تكفيك.

أسطح السِّيراميك:

السيراميك مادة نظيفة ممانِعة للبقع و مقاوِمة للبكتيريا و سهلة للتنظيف و لكن عند غسلها بالماء و الصابون تبقى تبان هذيك الخطوط تاع الصابون ؛هنا استعملي بخاخ فيه محلول الخل لإزالتها ؛المشكل الحقيقي يكمن في خطوط التَّجصيص اللي تربط مربعات السيراميك هي اللي تجمع الوسخ و السَّواد ؛عند تنظيفها استخدمي محلول فيه جافيل و فرشاة أسنان ليِّنة .   

أسطح الستاينستيل:

بمظهرها الصِّناعي المتقدِّم تمدّ صفة عصريَّة للمطبخ ؛ تُستعمل على نطاق واسع في المطابخ التِّجارية و المطاعم ؛مشكلة آثار الأصابع يمكن حلّها باستعمال الماء و الصابون و شيفونة ميكروفيبر إجمالا ؛كما يمكن الاستعانة بمنظِّفات متخصصة لمادة الستاينستيل تعمل على تلميعها و تسهّل التخلص من البقع ؛ عمرك ماتحُكِّيها باسفنجة خشنة و اعملي دائما على تجفيفها من أثر الماء .

…شمس هنية

ارتبطت كلمة حصّالة (شقاقة)، بجمع النقود وقت الرخاء والوفرة باش نستخدموها في وقت الشدّة والحاجة، وتقريبا ما يخلو حتى بيت من حصّالة النقود، بحيث نلقاوها عند الكبار كيما نلقاوها عند الصغار.

فكرة حصّالة الحبّ مقتبسة من فكرة حصّالة النقود، يعني أنتي لما تخصصّي لنفسك حصّالة باش تجمعي فيها النقود إلي تكون زايدة عليك الآن أو تخبّي النقود في الحصّالة باش نهار تحتاجيها تلقايها قريبة ليك، نفس الشيء بالنسبة لحصّالة الحبّ وهي أنك تجمعي فيها كل صفات الحب الجميلة باش النهار إلي تحتاجيها تلقايها.

باش نوضحلّك الفكرة أكثر لازم تفهمي في البداية أنو رصيدك العاطفي عند الآخرين أنتي إلي تحددّيه شحال، من خلال تصرفاتك مع الناس، لخاتش تصورات الناس علينا أحنا إلي نشكّلوها، إذا كنتي في كل مرة تقابلي زوجك بوجه مشرق وبشوش راح تترسم في مخيلتو أنو أنتي زوجة مبتهجة ومسرورة في حياتك معاه، أما إذا كنتي في كل مرة تقابليه بوجه عبوس ودائم الشكوى والتذمّر راح تترسم في المخيلة تاعو عليك أنو أنتي زوجة نكديّة.

واش معناها رصيدك العاطفي؟

رصيدك العاطفي في أبسط معانيه هو أنك تفتحي في قلب انسان معيّن حساب جاري ( مش حساب بريدي)، بل حساب عاطفي، وتبداي في ايداع صفاتك الجميلة في هذا الحساب، مع الوقت هذا الايداع  راح يظهرلك في محبة هذا الانسان واحترامو ليك، ومع الوقت ثاني أنتي يا إما راح تتوّلاي زيادة رصيدك العاطفي عندو أو راح تبقاي غير تسحبي واش اودعتي فيه من قبل.

وباش تفهمي أكثر  أعرفي أنو كل ما يصرالك موقف جميل وطيّب مع انسان معيّن، رايحة تضيفي ذكرى جميلة عليك في سجّل ذكرياتو، وبالتالي راكي تقومي بعمليّة ايداع في حسابك العاطفي عندو.

كيفاش تزيدي رصيدك العاطفي ّ؟

بعد ما عرفتي وشنهي هو الرصيد العاطفي أرواحي نقلك كيفاش تقدري تعمرّي حصّالة الحب وتزيدي رصيدك العاطفي عند الآخرين:

– أفهمي الطرف الآخر:

يعني أنك تعرفي الأشياء إلي يحبّها هذا الشخص والأشياء إلي يكرهها، بحيث أنو لما تقولي كلمة ولا تقومي بتصرّف لازم يعمّرلك حصّالتك في قلبو مش يسحب منها، وباش تفهمي أكثر نقلك أنو كاين أشخاص مايزعفوش من المزاح معاهم حتى ولو تعرضتّي ليهم شخصيا راح ياخذو الأمر ببساطة ويمرّ الموقف معاهم بشكل فكاهي، في حين كاين ناس آخرين إذا تكلمتّي معاهم دايما عندهم احساس أنو راكي تقصديهم في التنكيت وحابة تستهزأي بيهم، على الرغم أنو ماهوش هذاك قصدك بتاتا. على هذا كي تفهمي الطرف الآخر راح تعرفي مليح كيفاش تتعاملي معاه.

– كوني حسب التوقعات:

يعني كي تكوني عارفة أنو الطرف الثاني يتوقع منك أمر أو فعل معين لازمك تلبيّه، راح نعطيك بعض الأمثلة باش تفهمي أكثر، مثلا جاتك صديقة تشكي من سوء معاملة زوجها هي تتوقع منك المواساة و النصيحة، جاء ابنك يبكي من الخارج لأنو ابن الجيران ضربو أو اخذ منو لعبتو هو يتوقع منك تجيبيلو حقو، قعد زوجك بجنبك وبدا يتشهى ويتوحّم على أكلة شعبية هو يتوقع منك أنك تقومي وتطيبيهالو، رحتي باش تزوري مريضة وكانت حالتها مزرية هي تتوقع منك تساعديها في تنظيف بيتها أو أنك تعطيها المال باش تشري بيه الدواء.

– كوني مستمعة جيدة:

بحيث أنك إذا أحسنتي الاستماع وشاركتي المتحدث في التعبير عن عواطفه، خاصة اذا كان يحكيلك في مشكلته وغُصتي معاه مليح في حكايتو، هذا الفعل راح يزيد لك من رصيدك العاطفي عندو لأنك اهتميتي لأمرو وسمعتيلو ونبّهتيه لأخطاءو ونصحتيه باش يتجاوز مشكلتو، احيانا كاين اشخاص يحتاجو الفضفضة عن مشاكلهم باش يرتاحو، يعني ما يطلبوش منك حتى مساعدة فقط أنك تسمعيه، كيما الزوج مثلا ساعات يجي يفضفض لزوجتو على مشكلة تكون صرات عندهم في العمل، وتبدأ الزوجة في التحليل باش توصل لحل، وهو أصلا ماطلبش منها المساعدة فقط أنها تسمعلو وتعطيه شوية وقت واهتمام.

– انتبهي للأمور الصغيرة ذات التأثيرات العظيمة:

كاين أمور وتصرفات صغيرة ما تدّي لا وقت ولا جهد إذا قمتي بيها راح تزيدلك من رصيدك العاطفي عند الآخرين كيما المجاملات، حسن الاستقبال، بشاشة وجهك وابتسامتك، الملاطفات والكلام الطيّب، نعطيك مثال لو تكوني مستدعية ضيوف عندك في البيت، وتعبتي واجتهدتي أنك تحضريلهم كل واش يلزم، نظفتي المنزل، طبختي ما لذّ وطاب من الأطعمة، شريتي الحلويات والفواكه كل هذا باش تسعدي ضيافك، وفرضّا أنو ابن واحد من الضيوف كان يلعب وتكسّرت أغلى وأثمن وأحبّ قطعة ديكور في بيتك وما تمالكتيش أعصابك ونضتي تعيطّي ودرتي حالة من شدة الغضب والحزن في نفس الوقت. علابالك بالتصرّف هذا وردّ الفعل هذا  راح يسحب من رصيدك العاطفي عند الضيوف وإلي كانو ضافوه في حسابك كي لبّاو الدعوة بالحضور واستمتاعهم بالضيافة تاعك حتى الساعة إلي انفجرتي فيها. يعني كيما الأمور الصغيرة الجميلة راح  تزيدلك في رصيدك العاطفي، الأمور الصغيرة السيئة راح تسحب وتنقصّ منو ثاني. وعلى هذا نلقاو كثير من الناس يركزّو فقط في الأمور الكبيرة أملا في زيادة رصيدهم ويغفلو على الصغائر وإلي أحيانا هي إلي تعمّر رصيدهم بشكل كبير.

– كوني خلوقة:

يعني أنك تتحلاي بالصفات الأخلاقية الحسنة، وتتجنبّي الكذب والغيبة والنميمة وغيرها من الصفات السيئة وإلي ديننا الاسلامي يحذّرنا منها، هاذ الأخلاقيات راح تزيد ثقة الناس فيك وترفعلك من رصيدك العاطفي عندهم، فتخيلي أنك جالسة مع صديقة وتبدأ تغتب وتتكلم عن صديقة أخرى بالسوء، وبمجرّد ما تتلاقى مع الصديقة هاذي إلي كانت تتكلّم عليها راح ترحبّ بيها وتفرح بيها وتسقسي على أخبارها، وكأنها مش هاذيك الصديقة إلي كانت بكل هذاك السوء من شوية، هنا راح تتزعزع ثقتك في الصديقة المغتابة وتشوفي فيها كأنها بزوج وجوه ومنافقة وراح تسحب من رصيدها العاطفي إلي عندك، كذلك افشاء الأسرار من الكبائر إلي تلهف وتسحب بقوة من رصيدنا العاطفي، يعني لو إأتمنتي وحدة على سر وفضحت سرّك راح تكون سحبت كثير  اذا ماقلناش رصيدها العاطفي إلي عندك رجع للصفر.

– إذا قطعتي وعد لشخص معين لازمك توفيه: 

لازم تعرفي أنو الاخلاء بالوعود من أكبر الأعمال إلي تسحبلك سحب كبير من رصيدك العاطفي عند الطرف الآخر، يعني إذا وعدتي أبنائك أنك راح تكافئيهم اذا قعدو عاقلين لازمك توفّي وعدك، إذا وعدتي صديقة أو جارة بزيارتها أو مكالمتها هاتفيا لازم عليك تزوريها أو تتصلّي بيها وما تخليهاش تستنى فيك، لأنها هي تدّي عليك فكرة أنو ماعندكش كلمة.

– إذا سحبتي من رصيدك العاطفي أعتذري مباشرة وعوضيّه:

الناس كامل تغلط، مكانش إلي معصوم من الخطأ وبطبيعة الحال كي تغلطي في حق انسان مهما كان نوع الخطأ راح تكوني سحبتي من رصيدك العاطفي عندو، وإذا بقيتي غير تسحبي بلا ما تقومي بعملية الايداع من جديد، راح رصيدك يرجع صفر ومع الوقت يقفلولك حسابك عندهم، على هذا كاين الاعتذار، اعتذري لأي انسان غلطتي في حقو وصححّي الخطأ تاعك وحاولي تعوضيّه بحاجة ترضيه، وعمرك لا تقولي أنو الاعتذار مذلة ومهانة،  هذا خطأ كبير لخاتش الاعتذار هو قمة الشجاعة والثقة بالنفس وبالشخصية القوية، لازم تعترفي بالخطأ بشكل عادي لأنو ماهيش نهاية الدنيا كامل الناس تغلط وتصحح أخطائها.

حصّالة الحبّ بين الزوجين:

الحاجة إلي لازم نأكدو عليها هي ضرورة وجود حصّالة حبّ بين الزوجين يجمعو فيها رصيدهم العاطفي لبعضاهم، باش يلقاوه ويسحبو منو وقت الشدّة والخلافات، وعلى هذا لازم على الزوجين في اثنين أنهم يحرصو على الايداع الدائم في حصّالة الحبّ إلي بيناتهم،

لأنو لو بقاو غير يسحبو منها بلا ايداع راح يجي النهار وين يلقاوها فارغة خلاص، وبالتالي يوصلو لمرحلة اللاعودة، لخاتش في حالة المشاكل والخلافات الزوجية،  باش يرجعو الزوجين لبعضاهم لازم عليهم يتذكّرو كل اللحظات الجميلة إلي جمعتهم مع بعض، والكلمات الطبية والحلوة إلي كانو يسمعوها من بعض، والمواقف الفكاهية إلي فرحو بيها وغيّرت من روتين حياتهم، بلا ما ننساو التضحيات والتنازلات إلي كان يقدمها كل طرف للطرف الثاني،

يعني أنو الرصيد العاطفي هو إلي يغطي النفقات والسحوبات  إلي  تحتاجها توترات الحياة الزوجية اليومية، وعلى هذا لازم ينتبهو الزوجين بضرورة الايداع المستمر في حصّالة الحبّ تاعهم.

… شمس راقية

رُوي عن عبد الله بن عمر رضي الله عنهما، أن رجلاً جاء إلى النبي صلى الله عليه وسلم فقال: يا رسول الله أي الناس أحب إلى الله، فقال عليه الصلاة والسلام:

” أحب الناس إلى الله أنفعهم للناس، وأحب الأعمال إلى الله عزَّ وجل سرورٌ تدخله على مسلم تكشف عنه كربةً، أو تقضي عنه ديناً، أو تطرد عنه جوعاً، ولأن أمشي مع أخٍ في حاجةٍ أحب إلى الله من أن أعتكف في هذا المسجد شهراً، ومن كظم غيظه ولو شاء أن يمضيه أمضاه، ملأ الله قلبه يوم القيامة رضاً، ومَن مشى مع أخيه في حاجةٍ حتى يقضيها له ثبت الله قدميه يوم تزول الأقدام “.

إذا يا أختي الكريمة فإنه كُلما أدخلتي على اخواتك المؤمنات واخوانك المؤمنين السرور فهذا العمل يعتبر من أرقى العبادات.

كيفاش تقدري تدخلي السُرور على القلوب؟

السرور عندو طرق كثيرة ومتنوعة إذا حبينا نعملوه من بينها:

–  قد تسُرّين أخواتك بكلمة طيبة

بحيث أنك حاولي تعودّي لسانك على الكلام الطيب والجميل إلي يسعد ويفرّح متلقيّه.

– قد تسرين أخواتك بابتسامة

نعرفو كامل الأثر الكبير إلي تخليّه الابتسامة والوجه البشوش في نفوس الناس.

–  قد تسّرين أخواتك بعطاء، خاصة لو كانو في حاجة لهذا العطاء

تقدري تعطيهم لباس أو فراش أو غطاء أو أواني منزلية، تقدري تعطيهم نقود أو دواء وغيرها.

– قد تسّرين أخواتك بهدية

فالرسول صلى الله عليه وسلم يقول ” تهادو تحابو“، ونعرفو كامل الاثر الجميل إلي تخليّه الهدية في نفوس الصغار والكبار مهما كان نوع الهدية الممنوحة.

– قد تسّرين أخواتك بقرض هم في أمّس الحاجة إليه

ما يخفاش عليك المقولة الشعبية المعروفة” إلي سلّفلك (أقرضك المال) وقت الشدّة كِلّي (كأنه) عطاك“، هذا القرض راح يسّهل ليهم أمور كثيرة كانت صعيبة أو عسيرة عليهم.

– قد تسّرين أخواتك بإطعامهم الطعام، اطعام الطعام يفرّح كثير من الناس

لما تعملي عزيمة في دارك وتتفننّي في طبخ أشهى المأكولات خاصة الأكلات إلي تعرفي أنو ضيوفك يحبّوها، راح تسعديهم، ابعثي لجارتك كي تطيبّي حاجة مليحة أو تعرفي أنها تحبّها، أصنعي كعكة شهيّة فرحّي بيها أبناءك وياريت لو تشكليها وتلونيّها حسب أذواقهم.

– قد تسّرين أخواتك بتلبية دعوتهم لبيتهم ولو كان بيتهم بعيد

هذا الفعل راح يقربّك منهم أكثر، لأنو إذا بالغتي في رفض الدعوات خاصة إذا ماكانش عندك سبب قوي، راح يعطي انطباع عنك أنك متكبّرة أو ماتحبيهمش.

– قد تسّرين أخواتك بعيادة مريضهم

لخاتش عيادة المريض يفرح بيها المريض  كثير، وتحسسّه أنو مش وحدو وتخفّف عليه مرضو، وتحاولي تكون زيارتك خفيفة وايجابية بحيث أنك تعطيه جرعات من الأمل بالشفاء والتفاؤل والرضا بقدر الله.

– قد تسّرين أخواتك بتهنئتهم  بزواجهم

وحضور حفلة العرس ومساعدتهم حسب امكانياتك المادية والعظلية.

– قد تسّرين أخواتك بتهنئتهم بنجاحهم أو نجاح أبناءهم أو إخوانهم

وراح يحسّو بفرحك لفرحتهم.

– قد تسّرين أخواتك بتهنئتهم بولادة مولود جديد لديهم أو لدى أقاربهم

زوريهم وخلّي حضورك ايجابي بحيث أنك تعطيهم نصأئح للاهتمام بالأم والرضيع.

– قد تسّرين أخواتك بتعزيتهم في فقدانهم أقرب الناس إليهم

وتذكريّهم أنو هاذي سنة الحياة في الكون، وتحاولي تصبريّهم وتطلبي منهم الدعاء للمرحوم بالرحمة والمغفرة.

– قد تسّرين أخواتك بمواساتهم إذا كانو مهمومين

وفي هاذي نعطيك مثال إذا جاتك صديقة ولا جارة تشكي من زوجها ومعاملتو ليها، ماتروحيش أنتي تشكري في زوجك وكأنو ربّي خلقو غير هو، حاولي تصبريّها وتفهميها أنو معظم الازواج هكا والنساء كامل راهم صابرين.

– قد تسّرين أخواتك بتقديم نصيحة ليهم

خاصة إذا طلبو منك النصيحة بحكم خبرتك وتجربتك.

وغيرها الكثير من الأعمال، المهم أنو تكون هناك أي طريقة من طرق إدخال السرور على المؤمنين والمؤمنات، وهاذ الأعمال عندها شأنٌ كبير عند الله عزَّ وجل.

هذا بلا ما تنساي أبناءك وزوجك ووالديك يعني تقومي بأي عمل يفرحّهم، يعني أولادك تشريلهم لعبة يحبوها أولبسة عجبتهم أو تطبخيلهم أكلة يفضلوها أو حلوة يتمنّوها

وكل أم أو زوجة أو بنت أدرى بالأشياء إلي تفرّح أبناءها وزوجها ووالديها.

وعن أبي هريرة رضي الله عنه عن النبي صلى الله عليه وسلم قال:” مَن نفَّس عن مسلمٍ كربة من كُرب الدنيا نفس الله عنها كربة من كرب يوم القيامة، ومن يسّر على مُعسر في الدنيا يسّر الله عليه في الدنيا والآخرة، ومن ستر على مسلم في الدنيا ستر الله عنه في الدنيا والآخرة، والله في عون العبد ما كان العبد في عون أخيه“.

فالدين الإسلامي أفعال و مواقف وأخلاق ، الدين خدمات و تعاون، الدين تعاضد و حل مشكلات، والله عز وجل أكرم الأكرمين، فأنتِ تتكارمين مع اخواتك واخوانك المؤمنين  و الله أكرم منك، أنتِ تُعطين و الله يعطيك.

… شمس راقية 

غالبا ما تلاحظ ربّة البيت أنو اليوم يفوت بسرعة، بحيث أنو بمُجرّد ما تنوض الصباح وتبدأ في أشغالها اليومية حتى يفاجئها الليل بلا ما تكون كملّت كل أشغالها إلي كانت حابة تديرهم، وعلى هذا تحتاج ربّة البيت أنو تنظّم يومها باش تقدر تنجز أكبر قدر مُمكن من الأعمال بلا ما تحّس بالتوتر والاستعجال وضياع الوقت.

ويقدمّو الخبراء في مجال تنظيم الوقت  نصائح عمليّة كثيرة وإلي تساعد ربّة البيت باش تنظّم يومياتها وأشغالها.

في البداية ينصحوها بتوزيع الوقت بين منزلها وصحتها ونفسها وعائلتها والعمل الخارجي إذا كانت خدّامة، وأنو من واجب هاذي المراة باش تعطي كل ذي حق حقه كيما يلزم،  ومن بين أهم النصائح والي يأكدو عليها ثاني هو أنو يلزم على ربّة البيت باش تنظّم يومها ما يلي:

1. نوضي الصباح بكري: 

هاذي أول نصيحة يأكدو عليها فنيّو ادارة الوقت، بحيث أنو اذا نضتي صباح بكري راح تنجزي أعمال كثيرة في وقت قياسي، لأنو راح تخدمي شغلك بدون أي مُلهيّات يعني حاجة ماتشدّك لا أطفال ولا اتصالات هاتفية، و بالتالي راح تربحي يوم مثمر بالنجاحات، في هاذي النقطة بالذات لازم عليك تحرصي على تأدية صلاة الفجر في وقتها وماتفوتيهاش،  ففي  البُكور وصلاة الفجر بركة كيما دعالنا رسول الله صلى الله عليه وسلم ” اللهم بارك لأمتي في بكورها”

وكي تنوضي بكري راح تقدري تتحكمّي في وقتك أكثر وراح تتخلصّي من التوتّر والخوف من ضياع الوقت.

2. حضرّي قائمة بأعمالك اليومية to- do- liste:

الحاجة المهمة إلي لازم تقومي بيها باش تنظمّي وقتك هي أنك تكتبي قائمة بالأعمال إلي راكي حابة تعمليهم خلال اليوم تاعك، تكتبي هاذو الاعمال بإختصار باش تتذكريّهم فقط

وبعد ماتنجزيهم تأشري (×) عليهم أنو تم انجازهم، وكتابة هاذي القائمة تكون في مساء اليوم السابق يعني قبل ما ترقدي في الليل ولّا في صباح اليوم المقصود. وفي نفس القائمة إلي كتبتي فيها المهّام حددّي الوقت إلي يلزمك باش تقومي بالمهمة مثلا (ساعة لتنظيف البيت، ساعة للطبخ، نص ساعة لزيارة مريضة.. الخ)، وثاني حاولي تتأكدي أنو القائمة تاعك تكون مرِنة يعني تقدري تزيدي ولا تنقصّي من المهام إلي كتبتيها حسب الأولويات والمفاجئات والطوارئ كيما زيارة ضياف مفاجئة، مرض، عطل في السيارة… الخ. ولازم تعرفي أنو كل ساعة تقضيها في التخطيط والكتابة راح توفرّلك من 2 إلى 4  ساعات من وقت التنفيذ، لخاتش الكتابة على الورق راح تخلّي العقل يركّز على أداء المهمات برك ومش لازم عليه يتذكرّها لأنها مكتوبة أصلا.

3. قسمّي أعمالك تقسيم جغرافي: 

يعني الأعمال إلي تكون في أماكن متقاربة تنجزيها بالتوالي باش تربحي الوقت  والجهد، مثلا تقدري تروحي لمكتب البريد la poste تجبدي دراهم وتخلصّي فاتورة الكهرباء في نفس الوقت، وإذا كانت عندك زيارة في هاذيك المنطقة ( والديك مثلا)، ديريلهم زيارة خفيفة وسريعة باش تطمنّي عليهم، كي تكوني في المطبخ تطبخي في الأكل نظفّي الثلاجة، أو أمسحي الأرضية، يعني الأعمال إلي تكون في نفس المنطقة قومي بيها مع بعض.

4.  قومي بتفويض بعض المهام لأشخاص آخرين:

عمليّة تفويض المهام تنقّص عليك التعب والضغوط، لأنك إذا أجبرتي روحك أنو لازم عليك تقومي بكل الأعمال وحدك راح تتعبي وتملّي وتحسّي بالظُلم في حقّك، على هذا اتفقّي مع أطفالكِ أنهم يقومو بتجهيز ملابسهم وحقيبة المدرسة للغد قبل قبل ما يروحو يرقدو في الليل بشكل يومي كل مساء، وتقدري تراقبيهم أمبعد فقط

يقدرو أطفالك يساعدوك في أنهم يجمعو ألعابهم المتناثرة ويحطّوها في صندوق الألعاب بعد ما يكملّو اللعب، أطلبي منهم يجمعو الثياب الموسخّة ويحطوها في سلة الغسيل ولا في الغسالة، حددّي مشتريات البيت اللازمة في قائمة وأعطيها لزوجك يجيبها معاه كي يكون جاي من الخدمة، قولي لبنتك تغسل الماعن إذا كانت تعرف تغسلهم.

5.  كوني واقعيّة وتجردّي من المثالية:

هاذي النقطة مهمة لأنو لما تتجردّي من المثالية  ما راكيش رايحة تحسيّ بالإحباط مع الوقت، وما لازمش تهتمي بالنقد كثير لخاتش نعرفو كامل أنو ارضاء الناس غاية لا تُدرك، يعني إذا كان باش يجو عندك ضياف فجأة، ما تتذمريّش وتبداي تطلعّي وتهبطّي ( لازم أنظف الدار، لازم نطيّب حاجة حلوة، لازم نستيكي روحي، ولازم ولازم ولازم…)، هاذ التفكير يديّلك الجهد ويحسسّك بأنك ماتقدريش تديري كل هذاك الشيء وراح يكرهّك في الضياف، وبالتالي حاولي تشوفي الأولوية لشكون راح تكون، يعني إذا كان تنظيف البيت هو الأولى أمالا روحي نظفّي بيتك واستيكي روحك باش تستقبليهم، وتقدري تخدمي حاجة ساهلة للتقديم، أو قدمّي فاكهة

ولا أطلبي من الزوج يشريلك حاجة جاهزة باش تقدميّها للضياف من السوق وحاليا كل شيء متوفّر فيه.

6. حاولي تستغلّي أوقات الإنتظار في أعمال صغيرة: 

يعني كي تكون تستناي في دورك في العيادة أو في مكتب البريد la poste  ماتقعديش هكاك، أجبدي كتاب أقرايه، تقدري  تقراي وِرْدَكِ من القرآن  أو الأذكار

أو أنك تطلعّي على الأخبار من خلال الأنترنت في الهاتف، تقدري تكتبي رسالة مهمة أو تحضرّي قائمة مهّام الغد، وأنتي تخدمي في شغل البيت تقدري تستعملي سمّاعات الهاتف باش تقومي بالمكالمات الهاتفية، أو تستمعي لوصفات الطبخ والتجميل من خلال المذياع في المطبخ.

7. حددّي وقت لمشاريعك الكبرى وتطوير ذاتك: 

شوفي إذا من الأول قَرَّرتي أنو ما عندكش وقت في يومك هنا تكوني درتي تثبيط لنفسك قبل ما تبداي أصلا، إلي يلزمك هو أنو تنظّمي وقتك برك لخاتش كل يوم هو فرصة جديدة ليك باش تضيفي المزيد من النجاحات والانجازات لحياتك

تعلمّي لغة جديدة، حرفة جديدة، أحفظي سور من القرآن الكريم، أرجعي لهواياتك وفعليّها من جديد لخاتش هاذو الهوايات هوما إلي يعطوك جرعات تاع الحماس والتشجيع باش تنجزي بلا ما تحسّي بالظُلم لنفسك. وما تحاوليش تقارني روحك بالأُخريات، لأنو المهم أنو يكون أسلوب حياتك  مريح ليك أنتي برك مش شرط أنو لازم يعجب الآخرين.

8. ما تحشميش من قول كلمة ” ما نقدرش”: 

ما لازمش تحشمي إذا طلبو منك طلب وأنتي ما يساعدكش وتضغطي على روحك باش تلبيّه، تعلمّي أنك تعتذري بكل لباقة، يعني إذا استدعاتك صديقة أو قريبة للخروج والوقت ما يناسبكش اعتذري

وهنا لازملك تعاودي تقيمّي صداقاتك و تحاولي تتجَنَّبي الصديقات والجارات إلي يضرّوك ويضيّعوك وقتك. أمالا ببطءٍ ولُطْف أجبدي روحك على العلاقات السلبيّة في حياتك، وحافظي على وقتك الثمين،  لخاتش إذا بقيتي بلا خطة وقائمة مهّام ضرورية، راح يستخدموك الآخرين باش تحققي ليهم أهدافهم وأولوياتهم وتبقاي أنتي هكا بدون خطة وأهداف.

9. ما تأجليش عمل اليوم للغد: 

كاين أعمال كل ما أجلتيها زادت صعوبتها، كيما تنظيف البيت إذا خليتيه راح يتراكم عليك الشغل

وبالتالي راح تعيشي سياسة اطفاء الحرائق وكاين إلي  يسميّه إدارة الأزمات وتبقاي تنتقلي من أزمة لأخرى.

10. عسيّ روحك من لصوص الوقت: 

وهنا لازم عليك تقَلِّصي من وقتكِ قدّام مواقع التواصل الاجتماعي كيما الفيس بوك و يوتيوب، وتويتر،  وامتنعي عن تضييع وقتك في الألعاب الإلكترونيّة كيما Candy Crush وغيرها

وثاني نقصّي من المكالمات الهاتفية إلي ماعندها حتى  هدف وفائدة فقط للدردشة وغالبا تدخل فيها الغيبة، حددّي أوقات ثابتة لمشاهدة التلفزيون واختاري برامج مفيدة وهادفة، وإذا احتجتي لاستخدام الإنترنت فلازم عليك تحَدِّدي وقت ليها باش ما تتفاجئيش بمرور الكثير من الوقت بلا ما تنتبهي ليه.

… شمس راقية