الكل يعرف شحال المنازل الجزائرية و العربية او الغير عربية تحتفظ بالكراكيب بعني الخردة لمدة طويلة جدا لكن الذي لا تعرفه هذه المنازل هو انو الخردة تمنع الرزق و تبعد البركة من المنزل.

 

كيف ذلك ؟

اذا انتي احتفظتي بغطاء مثلا و ما استعملتيهش لا الشتاء الماضي و لا الشتاء تاع هذا العام.

بيناتنا ؟ ربي ما يحاسبكش عليه و هو كاين آلاف الناس راهي تبات بردانة و ما تتغطاش و انتي مخبيا هذاك الفراش ؟

راح تقوليلي خليتو للضياف حسنا خلينا من الفراش

اللبسة لي راكي مخبيتها ؟

و ربما عمرك ماراح تزيدي تلبسيها لسبب او لغيره تان خبيتيه للضياف ؟

حسنا الأمر اظن راه واضح

نزيدو مثال تلفاز قديم او هاتف قديم مرمي في الدرج ,لماذا تحتفظي به ؟ 

هدية ؟

 حسنا لكن ما نفعها في الدرج ؟

راح نتعلمو التخلص من الخردة لي في المنزل

باش ننجحو في التخلص منها لازم تكون عندك عزيمة و همّة كبيرة

لأنّو راح تضطري للتخلص من اشياء عزيزة عليك بزاف

لكن عند ربي ستؤجرين ان شاء الله

و خزانات في البالكون و خزانات تحت السرير و فوق الخزانة كل هذي الامور علاش مخبيتها ؟

 

 و احنا واش نديرو ؟

راح نفرزو امورنا و نشوفو الحاجة لي تترمى نرميها و لي تتصدق نصدقوها و لي تنفع نهدوها نهديها

تهادو تحابو

على الاقل تفرحي ناس خير من راهي في الخزانة مرمية او في بلاكار مخبية

و اهّم حاجة انك راح تفتحي الباب لحاجات جديدة

لأنّو معروف :

”التخلص من القديم يأتيك الجديد “

…شمس ساطعة

قبل مانبداو نتعلمو الكروشي خطوة بخطوة لازم نتعرفو على سنَّارة الكروشيه على خاطر بزَّاف مايعرفوش واش من سنارة نستعملها ؛ في هدي المقالة راح تلقاي المعلومات اللي تهمّك وتفيدك ان شاء الله

سنَّارة الكروشيه : هي أداة رقيقة تشبّه في شكلها للعصا تتكون من مقبض مع خطاف من الأعلى (سنارة واحدة او اثنين) ونستعملوها لسحب الخيط من خلال حلقات لخلق غرز الكروشيه (يعني نجبدو الخيط في وسط الحلقات باش نديرو غرزات )

والمواد اللي تتخدم بيها السَّنانير مختلفة منها : الخشب .الالمنيوم .الفولاذ الصلب … ولكلّ نوع فوائد وعيوب تتعلّق بسهولة الاستخدام والسعر والراحة (فوطو سنارة الكروشيه)

أنواع السَّنانير :

1-الصُّلبة : هي أصغر الاحجام اللي كاينة وتُستَعمَل لخيط الكروشي الرّقيق كيما في المفارش والصدور ….الخ وهو المستعمل عندنا غالبا في الدزاير

2- الألمنيوم : تتوفّر في أحجام كبيرة وتتميز بسهولة الاستعمال بفضل السلاسة والسرعة اللي يطلع بيها الكروشيه نقدرو نستخدموها لحياكة سترة تاع طفل مثلا

3- البلاستيك : متوفرة في جميع الأحجام نلقاو منها حتى الكبيرة جدًّا وتكون مصنوعة عادةً من البلاستيك الأجوف لدلك تكون خفيفة الوزن ونستعملوها للصُّوف المتين

4- الخيزران : خفيفة الوزن ودافئة وتتوفّر بجميع الأحجام وتتميّز بالرَّاحة عند الإستعمال

قياسات سنَّارة الكروشي :

تختلف الاحجام و القياسات على حساب المواد والعلامة التِّجاريَّة والبلد اللِّي أُنتِجَت فيه السّنارة

يتّم تحديد حجم سنَّارة الكروشيه بواسطة قُطرِها حيث يحدِّد قُطر السِّنارة كم ستكون غرزة الكروشيه يعني الخيط الرّقيق يستلزم عادةً سنَّارة صغير القُطر تاعها و تكون بالتَّالي رقيقة ؛ و الخيط الخشين نخدموه بالسّنارة اللِّي قطرها كبير يعني تكون السّنارة في هذي الحالة خشينة باش تقدر تجبد الخيط .

وتاتي السّنارة في أحجام مختلفة مُرَقَّمة من عدد أكبر وعدد أصغر (يكتبو فيها الحدَّين معًا الضغير و الكبير).الأحجام تتراوح من سُمْك 0.6 ملم إلى سُمْك 3 ملم بالنِّسبة للصُّلبة

مقاسات السّنّارة الصُّلبة (جدول القياسات )

us(القياسات الامريكية)	00	0	1	2	3	4	5	6	7	8	9	10	11	12	13	14
قطر السنارة(مم)	3.5	3.25	3.75	2.25	2.1	2.0	1.9	1.8	1.65	1.5	1.4	1.3	1.1	1.0	0.85	0.75
uk(القياسات الاوروبية)	–	0	1	1.5	2	2.5	3	3.5	4	4.5	5	5.5	6	6.5	7	–

مثلا نأخذ قطر السنارة 2.25مم بالقياسات الامريكية تقولي للبائع أعطني رقم السنارة 2 وبالقياسات الاروبية تقوليلو أعطيني رقم السنارة 1.5

مقاسات البلاستيك والألمنيوم (جدول القياسات)

us(القياسات الامريكية)	B/1	C/2	D/3	E/4	F/5	G/6	7	H/8	I/9	J/10	K/10.5
قطر السنارة(مم)	2.5	3	3.25	3.5	4	4.25	4.5	5	5.5	6	7
uk(القياسات الاوروبية)	12	11	10	9	8	7	6	5	4	3	–

ملاحضة : في الجزائر نستعملو القياسات الاروبية

كيفاش نختارو القياس الصّحيح تاع السِّنارة؟ اذا نظرتم إلى خيوط الغزل (خيط الكروشي) سوف تجدون إقتراح حجم السَّنارة المناسب لهدا الخيط .

 

…شمس دافئة

 

كي تروحي لمتجر الخيوط ، من السَّهل تعجبك جميع الخيارات.و اذا ماكانش عندك تصور او فكرة واضحة في دهنك رح تضيعي في كم المعروضات الواسع جدا وربما تكون نتيجة عملك غير موافقة لتطلعاتك بسبب خطا في تقدير احد المواد الضرورية اللي تناسب فعليا موضوعك الفني ما هو خيط الغزل المُناسب لمشروعك؟

معظم الناس يلتزمو بالنُّوع الدقيق للخيط المُقترح في النموذج الذي تم اختياره للعمل عليه (حتى في اللون!) ، لكن هذا ماشي مقياس صحيح. في وقت اللي ماشي كل الخيوط مثاليَّة لكلّ مشروع ، نلقاو بلِّي كي تتعلّمي بعض لحوايج البسيطة هذا رح يسمح لك بالإبداع في اختياراتك.

اذا كنتي تفهمي بعض الأشياء حول أوزان الخيط راح تتمكّني من الحصول على المزيد من الحريّة فيما يتعلّق بالخيوط التي تستخدميها في المشاريع.

وزن الخيط يشيرلك الى سُمْك الخيط (الخشانة) وكاين 6 فئات مختلفة من أوزان الخيط

نصائح لاختيار خيط الكروشيه المناسِب

1- اختاري خيوط متوسِّطة الوزن ادا كنتي مبتدئة ؛ الصُّوف المتوسِّط هو الأحسن ليك

2- اختاري الخيط اللِّي يخرّجلك غرزة مليحة بحيث كي ديري غرزتك تشوفيها خرجتلك بسهولة يعني استعملي خيط الصوف و خيط القطن هوما الأحسن للمبتدئات

3- اختاري الخيوط الملوّنة الخفيفة بحيث تشوفي الغرزة بسهولة وتساعدك تعرفي وين ديري السّنارة نتاعك

4- اختاري السّنارة اللي تناسب وزن الخيط نتاعك أغلب الخيوط تلقاي تسميَّاتها تشير إلى حجم السّنارة المناسب وحجم 4.25ملم /غ هو الجيِّد للمبتدئات 

وفي الأخير ماتتقلّقيش بزَّاف من اختيار الخيط المناسب عند تعلُّم الكروشيه الهدف الرئيسي نتاعك هو أنّك تستخدمي المواد اللي تسهلّك العمل

 

…شمس دافئة

القفزة التِّكنولوجية تاع عصر الغسَّالات الأوتوماتيكية أنتجت بزاف خيارات متعلّقة بعمليّة الغسيل ؛ و طرحت تساؤلات جديدة مرتبطة بالمفاهيم و العوامل لي تخصّ  تأثير الغسيل على شكل الملابس و طول عمر الأقمشة و نوعيّة الخدمة و تقليل التّكاليف و الإقتصاد في الفواتير من خلال القرارات المعرفيّة المتَّخذة بشأن حرارة المياه و دورة الغسيل .

كلّ يوم تكوني راح تغسلي لحوايج لازمك تديري 3 اختيارات ضروريّة قبل ما تبداي تشغّلي الغسالة

• الاختيار الأول يخص “كمية الغسيل” : يعني شحال تحطّي حوايج في الغسالة و بالتاّلي كميّة الماء اللّازم للعمليّة
• الاختيار الثّاني يتعلّق ب “حرارة المياه” لمختلف عمليات الغسيل (تصبان و تشلال) .
• الاختيار الثّالث مُوجَّه “لدورة الغسيل” المناسبة لنوعيّة لحوايج لي راح تغسليهم .

أولا : كمية الغسيل 

 

 

هنا الاختيار بسيط و لكنو مُهِم و يتعلّق أساسًا ب”سِعة أنبوب الغسالة” وين تحطّي لحوايج و تتمّ عمليّات الغسيل  لانو قدّ مايكون الأنبوب كبير قدّ ما تقدري تحطّي فيه حوايج تغسليهم في كل مرّة ؛ و سعة الأنبوب تعني عدد الكيلوغرامات تاع الملابس الجافة لي تقدري تحطّيهم في الغسّالة ..إجمالا 1 كلغ يساوي تقريبا كسوة كاملة يعني (سروال و قميص و ملابس داخلية و تقاشر )…المشينة لي سعتها كبيرة تخلّيك تغسلي مرات أقل (ترفد بزّاف) و بالتّالي فواتير كهرباء اقل و كذلك التّأثير على البيئة.

 

 

 

 

سعة أنبوب الغسّالة أو حجم الغسلة يبدا من 5كلغ حتى 12كلغ…و لكن تذكّري الكبير مش دايما هو المليح لأنو المشينة تخدم مليح كي تملايها و لكن مش بالمبالغة في التحميل ؛ لذلك احصلي على مشينة ماتقعديش تعاني باش تملايها …يعني ما تغسليش بيها و هي نسبيا فارغة و ثاني ماتعمريهاش فوق الحد …يعني اختيار سعة الغسّالة تاعك يكون حسب أفراد اسرتك ..إليك هذا الدليل le guide:

 

• الأعزب أو زوجان بدون أطفال سعة أنبوب الغسّالة 5كلغ
• زوجان مع طفلين سعة أنبوب الغسّالة 6كلغ
• زوجان مع أربعة أطفال فأكثر سعة أنبوب الغسالة 6كلغ+

في المجمل لازم دائما ترجعي لكتيِّب الإرشادات تاع غسّالتك للحصول على المعلومات الدقيقة . .

 

 

ثانيا : حرارة المياه

 

الإختيار الصَّحيح للحرارة لي تغسلي بيها الملابس مُهم باش تحميهم من التّكسال و الفسيخ و التّكسار الدليل  le guide لي تعتمدي عليه هو الملصقات اللي في الملابس ؛ هذو يوجّهوك مليح بخصوص نوعيّة الغسلة و درجة حرارة الميّاه ؛ أحد مفاتيح الغسيل الصّحيح هي الفرز الجيِّد للملابس و غسيل الحوايج المتشابهة مع بعض .

كانت دائما كاينة نظريّة بلِّي الغسيل المليح لازملو الما السخون و لكن الحقيقة أنّو نوعيّة المواد المصنوع منها القشّ هي اللي تحدّد حرارة المياه …كاينة بزّاف الأقمشة الصِّناعية اللي تتضرّر من الما الحار ….إليك القاعدة الصحيحة :

• الماء البارد : هو الأفضل للألوان الدّاكنة و الأقمشة الحسّاسة و هو الإختيار الأمثَل لكلّ الملابس الخفيفة المسجّرة (المنقطة أو الي فيها وردات ..الخ) و كذلك زيّ العمل ؛ مهما كانت نوعية القماش الماء البارد مايضُرّش الكتَّان المغسول و يحافظ على جودة النّوعية
• الما الدَّافي : مناسب جدًا للأقمشة الصناعية SYNTHETIQUE و أقمشة الضّغط الدائم (نوع من القماش الصناعي) خيّري الما الدّافي لكلّ الملابس الملوّنة لي تكون موسّخة خفيف بالبقع و الزّيت .
• الما السخون : مناسب للأقمشة القطنيّة و البيضاء خصوصًا لي تتلبس قريب للجسم كيما الملابس الدّاخلية و التّقاشر و أغطية السّرير ؛ و كلّ الغسيل لي موسّخ خفيف و النّظافة فيه أهم من حماية اللّون كيما جينز للعمل ؛ زيّ الميكانيكي ؛ قنادر دار ؛ ملابس لعب للأطفال …هذو تحتاجيلهم الما السخون باش تنحّي البقع .
• مهما كانت حرارة الما اللّي اخترتيها للغسلة الّتشلال يكون بالما البارد …أولا باش توفّري في الطّاقة و ما تخسريش الدّراهم على تكاليف الخدمة و ثانيا لأنك ماتحتاجيش الما السخون في الّتشلال .

 

ثالثا : اختيار الدورة

كي تخيّري دورة الغسيل المناسبة في الغسيل و التصبان تساعدي الملابس باش يخرجو نظاف و يحافظو على أفضل مظهر ليهم ؛ ماكانش أسماء ثابتة لدورات الغسيل في كل الآلات ؛ كل موديل يسمي اسم مختلف ؛ انتي اعتمدي تقديرك أو اقراي كتيِّب غسّالتك باش تخيّري الدّورة المناسبة ؛ هاذو دورات مشتركة لبعض الغسالات الشهيرة :

 

 

• الحسّاسة delicat ؛ الغسيل باليد ؛ الصُّوف :

 

 

هذو التَّسميات متشابهة و تقدري تعتمديهم كفئة واحدة استعمليهم للحوايج الحسّاسة و الرّقيقة ؛ دورات الغسيل الأخرى ممكن تتلفهم ؛ هذي الدَّورة عندها خاصيَّة السُّرعات الدُّنيا في الخلط و الدَّعك أثناء الغسيل و السُّرعة الدُّنيا في الدَّوران ؛ دورة السُّرعات الدُّنيا والغسلة القصيرة تخلِّيك تتجنّبي الملابس يتكسّلو او يتقطّعو .

 

 

• الغسيل السريع RAPIDE :

هذي الدورة من المفروض مانستخدموهاش لملابسنا و لكن للحالات الطارئة دائما عندنا مئزر متاشي أو قميص فيه العرق باش يتغسل وحدو ؛ هذي الدَّورة تستخدم مدَّة الغسل الأقصر و سرعة التَّدوير الأعلى و سرعة التَّجفيف الأقصى ..تجنّبيها للملابس الخفيفة ولاَّ الحوايج الحسَّاسة …ردِّي بالك تعتمديها دائما .

 

 

• دورة الأقمشة الصِّناعية SYNTHETIQUE ؛ مراقبة التجعد ؛ الملابس اليومية ؛ الألوان الداكنة :

هذو الدَّورات الأربعة تسميّات مختلفة لنفس المفعول ؛ يناسبو كلّ الأقمشة الصِّناعيّة أو المختلطة و ملابس الضغط الدائم و كلّ الأقمشة الملوّنة ؛ تُستعمَل فيهم السُّرعة الوسطى للغسيل مع سرعات تدوير دنيا و فترات راحة لتجنُّب التّكسار (التجعدات ؛ طيات الملابس) .

 

 

• العادي NORMAL :

هذي الدَّورة هي للقطنيّات و الأقمشة المختلطة اللّي فيها وسخ متوسِّط و توفّق بين عامل سرعة الغسيل العالية و سرعة الدَّوران القصوى ؛ هكذا يكون الغسيل قويّ على الملابس .

 

 

• الخفيف leger :

اعتمدي دورة الغسيل الخفيف للأقمشة المتينة مثل المناشف و الفوطات و سراول الجينز ؛ هي تناسب كذلك الحوايج الموسّخين خفيف ؛ هذي الدَّورة توفّر فترة غسيل طويلة مع سرعة عالية للخلط و سرعة دوران قصوى باش تنحِّي قدر المستطاع الرُّطوبة من الملابس .

 

 

• السميك :

كاينة غسّالات عندهم دورة الغسيل السّميك للحوايج الخشان كيما الزّوَر و البطَّانيَّات و اللّحاف و الزّربية و الوسايد ؛ هذي الدَّورة تبدا بفترة تشماخ (نقع) باش الما و الصابون يتخلّلو لحوايج كليًا ؛ و مع مفعول الغسيل السَّريع و الدَّوران المتوسِّط تبقى الآلة في حالة التوازن.

 

 

• بياضات المنزل LINGE DE MAISON ؛ DRAPS :

تُستعمَل لكلّ الملابس و القطع العريضة من الأقمشة ؛ كي تعتمدي هذي الغسلة لحوايج الكبيرة ماتديرش كتلة وحدة أو دير كرة يعني ماكانش تشابك .

 

 

• الأبيض :

في أغلب الآلات دورة الغسيل الأبيض مُصمَّمة لتبييض لحوايج البيضا ؛ هذي الدورة تنظّملك الوقت المناسب لإدراج سائل كلور التبييض (كيما الجافيل) في مسار الغسيل ؛ دورة الغسيل الأبيض عندها سرعة غسيل عالية و كذلك سرعة الدوران .

 

 

• دورة البخار :

 

كاينة آلات غسيل عالية المستوى فيها الغسيل بالبخار ؛ هذي الدّورة ماتغسلش الملابس و إنَّما تُستَعمل لإزالة التَّجعُّدات منها بسرعة و للحصول على الإنتعاش و الإحساس بالنظافة للملابس و لكنَّها لا تقدِّم تنظيفًا عميقًا.

 

 

• الشطف و الدوران (التعصير) :

هذي الدورة ماديريلهاش الصَّابون و ماتقدّمش تنظيف عميق و إنما تشلّل و تعصر البلل من القماش ؛ تقدري ديريها للحوايج اللي يفسخو ولّا كي تكوني حابّة نشلّلي برك .

 

 

• تحديدات الضَّبط النِّهائيَّة :
• مستوى الاتساخ : كاينة آلات غسيل عندها مستويات ضبط للوسخ ؛ إذا خيّرتي وسخ قليل يكون وقت الخلط صغير ؛ و كلّما تزيد درجة الاتِّساخ يزيد وقت الغسيل .
• سرعة الدَّوران النِّهائية : إذا كانت غسّالتك عندها سرعة دوران نهائيّة لي تقدري تبدّليها خيّري سرعة الدَّوران الدُّنيا للأقمشة الحسّاسة باش تنقّصي التَّجعُّدات و التَّشابك و التَّلف تاع المنسوجات ؛ سرعات الدَّوران النِّهائيَّة العليا تخرّج الما مليح و تنقّص وقت التّنشاف و تساعد في الحصول على دورة تجفيف سريعة

من أجل كلّ ذلك أعرفي آلتك مليح باش تعاونيها و تحافظي على سلامتها و هي تعاونك بالحصول على أقصى درجات النظافة ….و المثاليّة .

 

 

…شمس هنية

 

 

أحد الأخطاء الشائعة في مسارات التنظيف المنزلية هو الافتقاد لتصفيف منطقي يوصّل للنّتيجة المرجوّة ؛ و كذلك الخلط بين تنظيف الوسخ (اللي هو بالنسبة ليا المَهمَّة الأسهل ضمن الأعمال المنزلية)… و بين عمليّة الترتيب اللي هي الأهم و العنصر المحوري في الحصول على عبارة “البيت النظيف” المطلوبة …لانك طالما قاعدة تنظفي في الفوضى(الكراكيب) ماراكي تديري والو .. ….

 

 

 

 

رتّبي أولا المراحل و ابداي في خطتك بالطور الاساسي و هو عملية إزالة الفوضى و الكراكيب و الربوج حتى الوصول الى تطهير و تعقيم المحيط اللي راكي عايشة فيه …مقاربتي البسيطة هي انو هذي الوظيفة تخضع لثلاث مراحل هي ..

 

• الترتيب الشامل …مع مايتضمنو من تحديد الأماكن و تصحيح الوضعيات و اخلاء المساحات ..
• التنظيف المتقن …باستعمال الأدوات المناسبة و الطرق الفعالة والمنهجية السليمة ..
• التنظيم الكامل ..هذا هو اللي يعطينا اللمحة اللي نحوّسو عليها تاع الحالة الصحية و التطهير التّام و طبعا “المنظر الجميل“….

و ضمن طرق التنظيم الحديثة نلقاو الكثير من أساليب الترتيب المنزلي الناجحة …و باعتمادي على معايير السيدة الفراشة “الفلاي ليدي” البسيطة و العملية و غير المتطلِّبة ؛ نعتبر نفسي حققت نتائج رائعة في محاربة الفوضى المنزلية في بيتي اللي سببها بالضرورة الطريقة الخاطئة لاكتساب الأشياء و التملُّك المادي و العاطفي ليها و ربطها الساذج بالقيم المعنوية …اما طريقة الفراشة في الترتيب فهي كالتالي …

 

أولا …ديري مخطط

 

قبل كل شيء .._و هذا عنصر مهم في كل المشاريع صغيرة كانت او كبيرة_ لازم يكون عندك هدف و خطة …مع اعتبار الواقعية و العملية …يعني كي تبغي ديري عملية ترتيب شاملة لبيتك مش عيب تاخذي كراسة و قلم و توضعي جدول بالايام و قائمة بالاماكن و لائحة بالاغراض ….يعني تكوني منظمة في ترتيبك ..

إذن اذا ملكتي القرار باش تبداي ترتيب دارك …سطّري اهدافك أولا ضمن قائمة ثم ضعي الأماكن المقصودة و الأغراض الناقصة و الأشياء الزايدة في مخطط …و أخيرا لازم تعتمدي جدول بالمدة اللي تحبي تخصصيها كل يوم للعملية ..و اللي يُفضَّل ماتتجاوزش ساعة و لك الخيار في انها تكون (عشر دقايق او ربع ساعة او عشرين دقيقة او نصف ساعة …الخ )…و عدد الأيام اللي تقدري تخصصيه لكل قطعة و المدة اللازمة للمساحة الكلية …مع ترك هوامش و ماتزيّْريش روحك …هكذا تكوني كمّلتي التصور تاع العملية و يبقالك غير التطبيق …

 

ثانيا …حدِّدي ادواتك …

 

جمع المواد المطلوبة يساهم في اختصار العمليات و تسهيل الوظيفة و عدم بذل المجهود الفكري و بالتالي توفير الطاقة …تحتاجي فقط لبعض العناصر في كل جلسة ترتيب لازم تكوني حريصة على تجهيزهم ..

 

1-المؤقت …هذا حليف استراتيجي يوفّرلك الدَّعم النَّفسي خصوصا اذا ماكنتيش من محبِّي عمليَّات التنظيف ..لانّك في النهاية تنتظري اللّحظة اللي يرنّ فيها المؤقِّت يعلن انتهاء العمل و هذي حقيقةً “لحظة سعيدة” …الفكرة أنو الكرونو يذكّرك بالهدف و بأهميّة الزّمن …و ماتقعديش في الحلقة الطّويلة تاع العمل الذّي لا ينتهي ..(لانو الأعمال المنزلية دائما تبان  بلِّي لاتنتهي) …كي تضبطي على عشر دقايق و تعرفي بلّي بعد عشر دقايق راح يخلاص هذا الشغل …(و لازم يخلاص لانو دائما كاين غيرو )..راح تكوني أكثر نشاطا و تبداي بتركيز اعمق و الفائدة ثابتة …

 

2- ثلاث صناديق كرتونية …بدل ماتبقاي تجري و تروحي و تجي و ترمي و تهزِّي و تحطِّي ..و …و …الخ اختصري كامل هذو العمليات بوضع كراتين تخصِّصيهم لمحاور الترتيب الثلاثة بالوجهات المختلفة لعملية الفرز …اللي هي ..

 

الوجهة الأولى …”ماسيتم حفظه” …هنا تحكمي قلم داكن markeur ..و تسجّلي على الكرتون عبارة “للحفظ” …و تحطِّي فيه الحوايج اللي لازم تحتفظي بيهم و عندهم أماكن و تحبِّيهم و تحتاجيهم …

 

الوجهة الثانية …”ماسيخرج للصدقة و الأعطيات” …نفس العمليّة ..احكمي القلم و اكتبي على الكرتون ..”للصدقة” …حطي في هذا الكرتون كل الأشياء اللي بحالة جيّدة و قابلة للاستخدام و انتي ماتحتاجيهاش او ما تحبيهاش …

 

الوجهة الثالثة …”ما ترمينه” …لحوايج عديمة القيمة و الفائدة خصِّصيلهم كرتون كذلك ضعي فيه كيس قمامة كبير و اكتبي على ظاهر الكرتون “للرمي” …احرصي دائما على التخلص الفوري من هذا الكيس …

 

ثالثا …ابداي الشغل ..

 

بمنشفة ميكروفيبر و بخَّاخ فيه مستحضر تنظيف مُرِّي على كلِّ البيت وِفق الجدول المخطَّط و حسب المواعيد الموضوعة …و مشّْطي بيتك كلُّو قطعة قطعة و باستخدام أدواتك فتّشيه دار دار و غرفة غرفة …كل غرفة ابدايها من اليمين الى اليسار ؛ من فوق الى الأسفل …هبّطي لحوايج من الأثاث …رشي بالبخاخ و نظّفي الأثاث …وا فرزي القطع حسب الكراتين الثلاثة ..كي يرنّ المؤقِّت و تخلاص الحصّة عالجي كلّ غرض على حدى و اتّخذي القرارات وفرّغي الصناديق …الهدف هو لمس كل قطعة مرة وحدة خلال جلسة التَّرتيب مع اتِّخاذ القرار و الحكم ….

ما يجب ان يُحفَظ هزِّيه في حضنك و ضعيه في اماكنو في الغرفة او في الغرف الأخرى …صندوق الرمي نحِّي الكيس ومباشرة الى القمامة …صندوق الأعطيات اختميه و توجهي بيه دون تأخير لمحتاجيه ..اذا ماكملتيش العملية في هذي الحصة تخصصي الحصة القادمة للتتمة و هكذا و بمرور الوقت تتخلصي كليا من كل أثر للفوضى …

 

تخصيصك لربع ساعة يوميا كافي جدا لمهمة الترتيب و لترتيب المُهِم في حياتك …بينما الساعات الطويلة غير المخطَّطَة ما هي إلّا هدر للطاقة و تضييع للوقت …اسلكي الطرق الصحيحة و احصلي على أفضل النتائج على أوسع نطاق و احتفلي بالانجاز الأهم في إزالة النقاط السلبية في بيتك و خوض المعركة الأكبر في حرب تنظيف المنزل و السيطرة عليه …

 

 

…شمس هنية