مقالات

الطريقة : 

التمر أنا بهاذو المقادير كفاني علبة وحدة من الغرس التمر المطحون 

فتيه بين صباعتيك باش تحسي اذا كاين عضام التمر

ثم ضيفيلو قرفة مرحية + حبات قرنفل مرحي + حبة كبابة مرحية + شوية زيت 

حطيه يفور في كسكاس و قدرة 

غير تشوفي طلعلو لفوار شوية نحيه 

غطيه و خليه يبرد 

كي يبرد شكليه كريات متوسطة (ما كبيرة يجي المعمول غير تمر، ما صغيرة حتى يبداو يحوسو على التمر ) 

خليهم محطوطين حتى يوجد العجين للتشكيل في الطابع

في اناء خلطي جميع المكونات الناشفة مغربلة لازم مغربلة (التغربيل لازم يكون خطوة ضرورية في كل وصفة تديريها هذا سر الحلويات) 

2 كاس دقيق رطب (تاع المطلوع) + 1 كاس فرينة + 1 كاس حليب غبرة + نصف كاس مايزينة + 3 ملاعق كبيرة سكر ناعم + ملعقة

صغيرة خميرة فورية + فانيليا ملعقة صغيرة + زريعة البسباس مرحية ناعمة (غربلي كلش ماتنسايش) 

في اناء الخلط (أنا درت في جفنة العجن) 

خلطي 250غ زبدة طرية (تكوني خرجتيها من الثلاجة بساعات قبل البدأ )+ 2 صفار بيض بيدك حتى تولي كريمة 

زيديلها المكونات الناشفة و خلطي (ماتعجنيش غير جمعي المكونات مع بعض ) 

زيديلها ربع كاس ماء لا أكثر و لا أقل فيه بعض القطرات تاع ماء الزهر 

العجينة حتبانلك جارية شوية لكن ماتخافيش كي يدخل فيها الماء مليح 

حطيها في اناء يدخل الثلاجة و غطيها بورق الفيل الغذائي و خليها تريح 45 دقيقة 

كي تخرجيها حتلقايها نشفت من الماء 

الان شعلي الفرن درجة 180 

و بداي تعملي الحبات 

أحكمي الطابع

حطي فيه ساشي باش متلصقش العجينة 

حطي قطعة من العجينة قد الشكل لي خيرتيه و رجعي عليه الساشي و حفريه باش تدخل فيه التمر 

حطي كرية التمر وغلقي عليها بالعجين

رجعي عليها الساشي و عبزي مليح الحبة باش فائض العجينة يبانلك و تنحيه 

حطي الحبة في السنيوة لي تدخل الفرن 

كي تكملي التشكيل حطي السنيوة في الفرن نقسيلو شوية النار 

كي يحمار من التحت شعليلو يحمار قليلا جدا من الفوق 

أنا شد معايا 6 د من التحت و 3 د من الفوق 

غير يخرج فورا ومتبطايش رشي عليه بالصفاية تاع لحليب سكر غبرة مخلط مع قرفة غبرة 

وخليه

كي يبرد تماما بعد 1 سا ديريه في ليكيسات 

 

…شمس ساطعة

الطريقة:

ديري ثلاث كيسان فرينة ملح

ثلاث معالق سكر 

ملعقة تاع خميرة الخبز 

ثلاث ملاعق كبار لحظة 

زوج مغارف كبار تاع زيت الزيتون

حبة بيض و خلطي بالماء الدافي حتى تولي عجينة

خليها تخمر حتى تولي الضعف

في هاذ الوقت احكمي اسكرفجي الطماطيش حب, و ثوم و معدنوس و ملح و فلفل اسود و زعيترة خلطيهم و حطيهم بجيه اذا حابة الحار قطعيه معاهم

كي تخمر العجينة في سنيوة ديري زيت و حلي العجينة تم و اثقبيها كامل بالفرشيطة

و حطي الطماطم لي قتلك فوقها و دخليها طيب

كي تخرجيها حسب الذوق يا اما ترشيها بزيت عادي يا اما بزيت الزيتون

ملاحظة قد ما كانت الطماطم بزاف خير خاطش تجي بنينة و مشمخة

 

…شمس ساطعة

الطريقة :

2 كاس فرينة

ملح

ملعقة صغيرة سكر

ملعقة صغيرة خميرة الخبز

ملعقة كبيرة زيت الزيتون او زيت النباتي

ماء دافي

خلطي كي تولي متجانسة خليها ترتاح 30د

ديري المقلة تسخن مليح

في تلك الاثناء

فرشي الفرينة و احكمي كرية و حليها رقيقة كامل

و حطيها فوق المقلة كي تشم النار اقلبيها

راح تجي زوج ورقات

 

…شمس ساطعة

 

 بما أن خميرة الخبز المنزلية طبيعية و مفيدة جدا للجسم بحيث تساعد العديد من الاشخاص على التخفيف من الحالات التالية

(اضطرابات هضمية، امساك، اسهال) ومفيدة لمرضى السكري

طبعا من الافضل استعمال دقيق القمح الكامل لاعداد الخبز و لو أنو هذه الخميرة صالحة لأي نوع من الخبز

حبيت برك نمد معلومة صحية قبل اعطاء الوصفة

المكونات :

لبن + فرينة + قطعة بصل أو 3 سنات ثوم (واحد منهما فقط) + ماء من الافضل ماء البطاطا بالقشور مغليا أو ماء عادي حسب التوفر + ملح

الطريقة :

نخلط الكل بالفرشات لنحصل على عجينة ثقيلة على تاع البغرير لكن ماشي كيما تاع الخبز

من بعد نغطيها بالسيلوفان

و نخليها مدة 2 يوم في الظلام

من بعد نجبدها و نحي منها البصل أو الثوم الي حطينا

و نعاود نغلقها مليح و نخبيها في مكان مظلم

و كل مرة نستعملها نرجعها لمكانها

ردي بالك تفيضلك

ملاحظة : خميرة الخبز هذه تشد الوقت باش تخمر الخبز ديرو حسابكم عجنو بكري شوية و خلوها تخمر في مكان دافئ

 

…شمس ساطعة

الطريقة :

على حسب الكمية المراد تحضيرها تقدري تلعبي بالمقادير كيما تحبي لكن انا انصح تجربي هذه الكمية راح تجيك بزاف ما تكبريش كرشك و تحصلي ههههه خاطش بهذه الكمية خرجتلي قريب 30 حبة يويو

في اناء حطي :

نص كاس سكر

نص كاس حليب

نص كاس زيت

حبة بيض

ملعقة قهوة خل

قشور الليمون او البرتقال او لافاني

خلطي الكل مليح حتى يتجانسو

من بعد

ضيفي 2 ملاعق كبار فرينة و فوقهم نص كيس خميرة الحلوة و فوقهم 1 ملعقة فرينة و بداي تخلطي

انا جاتني قريب 10 ملاعق فرينة تاع اكل

انتي ضيفي بالزوج ملاعق و خلطي

النتيجة لازم تكون طرية بزاف لكن في نفس الوقت تقدري تحكميها في يدك و تشكليها

لكن كان تزيدي اكثر من اللازم راح تجيك معجنة

اذا انتي ديري 8 ملاعق فرينة و جربي تديري حربوش و تشكليه مسياسة اذا جاك اوكي اذا ما جاكش زيدي ملعقة وحدة و هكذا باش ما تتسرعيش تضيفي اكثر من اللازم

ديري مقلة الزيت تسخن بحيث حبة اليويو تغطس نص فقط و ليس كامل

الزيت لازم تكون سخونة لكن الطياب لازم يكون على نار هااااااااااااادئة و الا يطيب من الخارج و يبقى معجن من الداخل

انا كنت نطيب بال 3 حبات لكي اتحكم بدرجة حرارة الزيت

خاطش كان تحطي بزاف راح تبرد الزيت و تشرب حبة اليويو بزاف الزيت

كي تشوفي الزيت نقصت بزاف من الاحسن ما تزيديش كمية اخرى تقدري تميلي فقط المقلة و تشديها

طريقة القلي :

شكلي مسياسة رقيقة بحجم 1 سم عرض و 15سم طول و اجمعي الطرفين باش تولي مسياسة

حطي الحبة في الزيت و مباشرة ابداي ترمي فوقها الزيت بمساعدة ملعقة اكل كبيرة

كي تشوفيها تشقّت من الفوق و تنفخت مليح خلاص خليها طيب من التحت حتى تحمار و من بعد اقلبيها تحمار من الفوق

——–

وجدي طبسي فيه ورق مصاص الزيت و طبسي فيه سكر عادي

غير طيب الحبة حطيها لمدة 30 ثانية يشرب منها الورق الزيت و بعدها مباشرة و بلطف رمديها في السكر و حذاري يتفتتلك في يدّك بلطف شديد تعاملي مع الحبة كي ترمديها في السكر

———-

هذه هي طريقتي في تحضير اليويو

ملاحظة : الصور ماشي ديالي لكن نفس النتيجة بكل أمانة

…شمس ساطعة