هـــل شــرحتي لطفلك كــيــف وُلِـــدْ ؟
راح نهدرو اوّل على التربية الجنسية عند الأطفال.
كأوّل خطوة ديريها قبل ان يصل طفل الى المرحلة لي راح يسألك فيها هذاك السؤال المحرج.
ماما كيفاش جيت للدنيا ؟
الطفل يقدر من سنتين و نصف أو 3 سنوات يميّز بين الجنسين يعني يعرف من الذكر و من الأنثى.
يبدى يشوف او تبدى تشوف انو كاين حاجة راهي تميّز بيناتهم.
غالبية تبدى بملاحظة الشعر الطويل.
الطفل مثلا بما أنو يشوف بزاف يماه بشعر طويل و باباه بشعر قصير يولي يدير الفرق بين انو هو شعرو قصير و طفلة في الحديقة شعرها طويل.
و هكذا يقدر يقول لأمو اذا كانت مطولتلو شعرو ماما انا طفل ولا طفلة ؟
تقولو ماماه انت طفل.
يقوللها مالا وعلاش شعري كيما شعر الطفلة.
لهذا أشير للأمهات لي ولادهم يفوتو سنتين و هي مزال مطوّلة شعر وليدها حذاري من أنو ما تخليهش يتعرف على الجنس ديالو.
اوّل خطوة نديروها كي يجوز 2 ونص سنة هي تعليمه الخصوصية.
يعني تعلميه أنو كاين حاجات انتي فقط من يقدر يديرهالو كتغيير الحفاظة و غسله و تحميمه و..و..و…
اذا كانت كاينة شخصية ما تعاونك في هذا الأمر تشرحيلو أنو انتي و هي فقط لي تقدرو تبدلولو الحفاظة و تغسلولو ولا يوجد شخص آخر يقدر فعل ذلك.
بعدها تعلميه أنو العضو الخاص بيه هو الوحيد لي يقدر يشوفو.
و أنو لا أحد عندو الحق يشوفو.
و أنو هو أيضا ما عندوش الحق يشوف عضو انسان آخر.
طبعا راكي حا تقولي كيفاش واحد عمرو 2 و نص سنة أو 3 سنين نبدا نحكي معاه هكذا
لا
الطريقة بسيطة جدا
مثلا كي يدخل المرحاض و يخلي الباب محلول قوليلو لا لا لا الباب لازم تغلقو ما لازم حتى واحد يشوفك و انت في المرحاض
بهذه الطريقة راكي تعلميه الخصوصية.
مثلا كي تكوني حا تبدلي حوايجك و هو يقولك نقعد معاك قوليلو لا أنا نبدلك نعم أنا ماماك لكن انت لا وليدي اسمحلي نبدّل و كي نكمل ولي.
و أنتَ تان كي تكبر و تولي تعرف تبدّل وحدك أنا تان نولي ما نشوفكش.
و بابا تان ما يشوفكش و أنت ما تشوفش بابا.
لذلك ماشي مليح تحطي الأطفال يدوشو كيف كيف.
ماشي لي يجي يدوّش لوليدك.
حتى و يكبرو ولادي كي يروحو لقاعة الرياضة يبدلو قدام بعضاهم.
طبعا كاين لي ولادها يبكو كي تقوللهم نغلق الباب في المرحاض.
كاين لي كي تدخل للمرحاض الناس كامل يعرفوها بلي دخلت ….. خاطش وليدها ولا بنتها يفضحوها.
لكن معليش لا تستسلمي مع الوقت راح يتدرّب و كي يشوف انو دخلتي و في الأخير خرجتي راح يفهم انو ماكيش هاربة
مثلا بنت تحب باباها بزاف و تقول أنا حابة بابا يدوشلي، اوكي لكن قوليلها لازم نلبسو من التحت culotte خاطش بابا ما لازمش يشوفنا من التحت.
…شمس ساطعة
