“نخدم …نخدم …و مش باين عليا” …
هذي العبارة اللي تتكرر عند معظم ربات البيوت ؛و تتكرر معها الشكوى من
عجزهن على المحافظة على نظافة البيت رغم بذلهن للجهود الكثيرة ؛
و تخصيصهن الازمنة الطويلة لتنظيف و ترتيب وصيانة المنزل ..
و الحق انو اتباع تكتيكات معينة هو السبيل الوحيد لجعل البيت دائما منظم؛
وعلى اهبة الاستعداد لاستقبال اي ضيف و في اي وقت….
و ليس تخصيص الساعات الطويلة ؛و المبالغة في الاهتمام بالتفاصيل ؛و
البحث عن الكمال و المثالية في الانجاز …اللي ينتج عنهم فقط إما تضييع
اوقات ثمينة من اعمارنا سوف نسأل أنفسنا بالتاكيد فيم قضيناها و نتساءل
يوما ما عن انتاجيتها ..او حالة التوتر و الاحباط لانو طاقتنا استنفذت في
العمل المنزلي و ما اخذناش حقنا لانفسنا مع باقي الالتزامات ولا من
الحظوظ و الراحة و المتعة …
تبّعي معايا الاستراتيجية التالية راح تحققلك حلم البيت النظيف على مدار الساعة في اوقات معقولة و مهل محدودة
1- ديري روتيناتك اليومية و الاسبوعية بانتظام ….انضباطك على روتينات
المساء اللي تسهل روتينات الصباح و تحقيقك لربع ساعة يومية من الترتيب و
الصيانة و التزامك بساعة اسبوعية من التنظيف الشامل و ملاحقة الاحداث في
الاماكن النشيطة …هذا شرط اساسي للحصول على الحد الكافي من نظافة
المنزل …هنا تكوني أعدتي تقييمك لمهامك المنزلية و وضعتيها في جدول
زمني قياسي و محصور ..وماتركتيش الاعمال في البيت أبدية …
2- التزمي بدقيقتين الى خمس دقايق يوميا لتبريد “النقاط الساخنة” …
واش هي النقاط الساخنة؟ ..كامل عندنا هذيك النقطة في البيت اللي نحطو فيها كل
شئ …الاوراق ..المفاتح ..الملابس ..المناديل ..الخ …
سواء كانت طاولة مطبخ
او خزانة الاحذية عند الباب
او ادراج مرآة …
البوتاجي …
كرسي في غرفة النوم …
هذي النقاط الساخنة اللي تتشكل يوميا لازم تتحارب يوميا..
تخصيصك لدقايق كل ليلة في روتيناتك المسائية للقضاء عليها راح يحافظ
بطريقة مدهشة على نظافة بيتك بمنع هذي النقاط من التراكم و السيطرة على
الأمن و النظام في هذي الاماكن المضطربة …
3-“كل شئ في مكانه ؛و مكان لكل شيء”…هذي قاعدة ذهبية لنظافة و ترتيب
دائمين في البيت
…كي كل حاجة يكون عندها مكانها اللي تنتمي ليه …و كي
كل حاجة تلتزمي دائما بوضعها في هذا المكان…و تكوني عارفة كلشي وين لازم
يكون …ماكيش رايحة تشوفي ملابس مرمية على الكانابي ..و لا اواني محطوطة
على البوتاجي …ولا مائدة الصالون مليانة بالكؤوس و الفناجين و الصحون و
الجرائد ….و الالعاب مزربعة على الارضية …لانو ببساطة كل حاجة من هذو
عندها مكانها اللي تنتهي اليه اخيرا …و دائما ترجعيها ليه …اذا
ماكانش عندها مكان يسمى ماتحتاجيهاش ..تخلصي منها ..و إلا اجتهدي
تلقايلها مكان …
4- رتّبي او نظفي لحوايج مباشرة بعد استخدامهم ….يعني كي تنوضي من
السرير رتبيه مباشرة …
كي تكملو الماكلة مباشرة تغسلي لماعن …
كي تطيبي لعشا طول تنظفي الطناجر و المقالي …
غير يخلص صغيرك حصة اللعب لمِّي الالعاب و رجّعيهم لمكانهم …
كي تدخلي من برا مباشرة ماترميوش ملابسكم
..بل ترتّبوهم في أماكنهم ؛كذلك الحقائب و الاحذية …
كي تكملو اي نشاط تاع قراءة او دراسة تلمو الكتب و الكراريس و الادوات و ترتبو المكتب
…
اللي ينحي الملابس الموسخة يحطّها في سلال مجهزة خصّيصا …..
هذي هي النشاطات اليومية اللي تسبّب تراكم الاعمال و تصعّب المهام المنزلية ..و
الالتزام بالتعامل الفوري معاها هو اللي يسهّل العمل المنزلي بنسبة 50%و
ال 50 % الاخرى تكاد تكون تحضيرات و أعمال استباقية ..
5– تصداي للاحتمالات و الطوارئ …بمعنى:
اليوم اللي تعرفي راح تشري فيه القضيان؛ نظفي الثلاجة و جهزي البلاكار …
اليوم اللي تكون فيه العاصفة و الامطار ؛و تتعمر الدنيا غبرة خصّصي ربع ساعة اضافية لتنظيف الزجاج و
الاثاث و ازالة التراب و بقع الماء …
كي تشري الجاج او اللحم او الخضرة…نظفي و قطعي و افرزي و وجهيها طول لأماكنها …
……………………..
التزامك بالحصص الصغيرة
هو اللي يجنبك الاعمال الكبرى و يحافظ على وقتك و يضمن النظافة الدائمة و
الترتيب الشامل لبيتك …
6- اجمعي ادوات التنظيف في مكان واحد و خليها جاهزة باستمرار ؛ المنشفات و
الممسحات و المكنسة و المنفضة و انواع مختلفة لفرشاة التنظيف …
استعيني بالمستحضرات المنزلية لمواد الصيانة و فكرة وضعها في البخّاخات حسب
الاستعمالات ..و قاومي البقع و الاوساخ أولا بأول ….و نظفي الحمام بعد
الاستخدام …
7- ماتخرجيش من الغرفة “بيديك فارغين “….عادتنا البشرية تقتضي وين نروحو
نخليو أثر …و طبيعي المكان اللي تغادريه تلقاي فيه حاجة ماتنتميش ليه
كي تخرجي هزّيها معاك و حطّيها في مكانها …
كاس شربتو فيه و خليتوه
…كتاب قرا فيه الزوج و حطو في غرفة الجلوس …
سروال نحّاه وليدك وخلاّه في الحمام …
كل ماتدخلي لغرفة حاولي تخرجي منها بحاجة تدّيها ترتبيها في مكانها …
8- قبل ما ترقدي دائما ديري دورة على البيت :لمي و رتبي و اعيدي لحوايج
لأماكنها حتى بعد الروتين المسائي ..لانو أحيانا ممكن تحطّي في السّهرة
أطعمة …فواكه او مكسرات او مشروبات ..او تمارسو نشاط معين ..قراءة او
جلسة على النت …حاولي ترجعي الكؤوس و الصحون و تلْمي الكتب و الاوراق و
الاجهزة ..و تعدلي الوسادات و تطبقي الدراوات ..تطفي الاضواء و تفصلي
الاجهزة …
هذي تقنيات اذا تبّعتيها راح تحصلي يقينًا على البيت المرتب دائما اللي
تكوني فخورة في كل وقت بفتحو للضيوف …لاحظي ..حركات صغيرة و تفاصيل
استراتيجية …مفعولها أفضل بكثير من عشرات الساعات الجزافية اللي نديو
منها غير التعب و الفشلة و القعاد على بعض الاشغال …نهار كي يجي الضيوف
يقول هذو يظلو راقدين ؟!!!!…
و ربي برك اللي عالم شحال راكي تتعبي
….النقاط السابقة كفيلة بتحقيق حلمك و انتي نسبيا راقدة …
….شمس هنية
