تعبّر الأمثال الشعبية على خلاصة وعمق التجارب والخبرات في الحياة، وكيما يقولو: ناس بكري ماخلاّولنا واش نقولو.
ويجمع هذا المقال البعض من هاذي الأمثال الشعبية الجزائرية من تراثنا الأصيل مع المعنى الخاص بكل مثل.

أنا بالمُغْرفة لفمّو وهو بالعُود لعيني
يقولو هذا المثل في الشخص إلي يقابل الإحسان بالإساءة.

لايغّرك نوّار الدفلى في الواد دايْر ظلايل ولا يغّرك زين الطفلة حتى تشوف الفعايل
يقولو هذا المثل على الناس إلي تغرّها وتخدعها المظاهر وأنو لازم الواحد يتأكد من أخلاق الآخرين من خلال تعاملهم مع الناس.

المكْسِي بقش الناس عريان
يؤكد هذا المثل على ضرورة الاعتماد على النفس وعلى المستلزمات الخاصة، لأنو يجي النهار إلي ياخذو فيه الناس أشيائهم ويبقى بلاش.

ما يحّس بالجمرة غير إلي كْواتُو
يقولو هذا المثل في الشخص إلي يشكي همومه لناس ما فاتتش على نفس التجربة تاعو وبالتالي ما يقدروش يحسّو بيه.

مادام ولِيت نرعى بفُمي غِير خلّي الذِيب يأكل أمي
يقولو هذا المثل على الإنسان ناكر الجميل، لخاتش من خلال هذا المثل نفهمو أنو الخروف لما كان يرضع الحليب كان متعلق بأمو، بصح لما كبر وصار يقدر يرعى وحدو تخلّى على أمو ومش هامّو أنو ياكلها الذيب.

الفم المزموم ماتدخلو ذبّانة
يؤكد هذا المثل على السكوت وتجنّب الكلام فيما لا يعني الإنسان باش مايسمعش حاجة ماتعجبوش.

المندبة كبيرة والميّت فأر
يقولو هذا المثل على تهويل وتعظيم شأن الأمور البسيطة وإعطاءها أكثر من حجمها.

أحسبني وكٌول سهمي
يقولو هذا المثل عتابا على عدم مراعاة قيمة و احساس الأخرين خاصة في المناسبات.

إلي ما هو ليك غير يعيّيك
ويعني أنو الواحد يشوف قدّو قدّ رُوحو وما يكونش متطلّب كثير لخاتش راح يتعب ياسر في حياتو.

ابكي يا قلبي على إلي ماتو وما تبكيش على إلي فارقك في حياتو
هذا مثل يقولوه في الصبر على فراق وخِداع الأحبة وخيانتهم لينا.

اسمع كلام إلي يبكيك وما تسمعش كلام إلي يضحكك
يؤكد هذا المثل على فضل النصيحة وأنها تكون في الغالب قاسية علينا، بصح الاعتماد عليها راح ينجينا في الأخير.

إلي ما ذاق المُر ما يعرف قيمة الحلو
ومعناه أنو ما نحسوش بطعم السعادة إلا اذا عشنا فترات من البؤس والشقاء.

تبّع الكذّاب لباب دارو
يعني أعطي الكذّاب قد نيتو حتان تظهر حقيقتو ولو بعد حين.

خوك يمضغك وما يصرطكش
يعني خوك قد ما وصلت المشاكل بيناتكم لكن عمرو ولا يخمم أنو يأذيك.

ربي يخلف على الغابة وما يخلفش على الحطّابة
يقولو هذا المثل في الناس إلي تستغل غيرها ودايرين في بالهم أنهم هوما الرابحين بصح ربّي يخلف على الشخص المستغَل مش هوما.

ايد وحدة ما تصّفقش
يؤكد هذا المثل على التعاون وأنو الواحد وحدو ما يقدرش يدير كلش.

الطمّاع يبات ساري يحلم بالتفاح والتفاح سومو غالي وأماليه شحاح
ومعناه أنو الطمّاع راح يضيّع وقتو وجهدو مع ناس بخيلة ما يدّي منهم والو.

ياكل من الشجرة ويقطّع في عروقها
يقولو هذا المثل في الشخص إلي يقابل الإحسان بالإساءة.

واش من مرقة حرقت شواربك
يقولو هذا المثل في الشخص إلي يتدخّل في أمور ما تخصوش.

الحديث والمغزل
ومعناه أنو الوحدة لما تكون في تجمّع للحديث تحاول تشغل يديها بأي صنعة كيما الغزل، الخياطة، الكروشيه… الخ المهم ما تضيعش وقتها في الحديث برك.

ازرع ينبت
يعني هات المفيد ولا هات من الأخير.

خرج من الحبس طاح في بابو
يقولو هذا المثل في الشخص إلي يخرج من مصيبة يطيح في مصيبة أخرى.

الذهب يغيّر المذهب
يعني الذهب والمال تغيّر النفوس والذِمم تاع الناس.

اذا لقيتو راكب خشبة قلّو مبروك العَوْد
يعني أدي كل واحد على حساب عقليتو.

يعرف الأوقات كي الفرّوج وما يصليّش
يقولو هذا المثل في الشخص إلي يعرف الأصول بصح ما يعملش بيها للأسف.

أنا نحْفرلو في قبر يماه وهو هارب بالفاس
يقولوهذا المثل في الشخص إلي تكون تجريلو على مصالحو وهو لا يُبالي وكأنو الأمر ما يعنيهش.

من عندي و من عندك تنْطبع وإذا غير من عندي تنقطع
يعني هذا المثل أنو لازم تكون مشاركة وتعاون بيناتنا لأنو الواحد وحدو ما يقدرش يعمل كل شي وحدو.

كُول ودرّقْ ولا كُول وفرّقْ
معناه أنو كول وخبّي الأكل تاعك و اذا ماحبيتش تخبّيه كول وفرّق يعني كول ومدّ من الأكل تاعك.

القط إذا ما ماقدرش على الشحمة يقول فايحة
يقولو هذا المثل في الشخص إلي إذا عجز يوصل لشيء معين يبدأ يحوّس على عيوبو ويهدر فيه.

سقّد بالنعالة حتى يجي الصبّاط
يقولو هذا المثل في الشخص إلي يطلب حاجة بعيدة ومازال عليها الحال، يقولولو مشّي أمورك بالنعالة يعني البليغة حتان يجي الصبّاط.

الوسادة نسّات في الولاّدة
يقولو هذا المثل في الشخص إلي ينسى يماه بعد ما يتزوج.

مضروب ولا محلوف فيه
ومعناه أنو الواحد لمّا يكون يستنى في حاجة يبقى ديما مقلّق بصح كي تفوت هاذيك الحاجة ولا الأزمة يرتاح ويتخلص من التوتر إلي كان فيه.

راحو عيينيا خصّالله حواجبي
يقولو هذا المثل في الشخص إلي يفقد شيء عزيز عليه وغالي ويسألوه الناس على شيء آخر أقل أهمية من إلي افتقدو.

العين ماتعلاش على الحاجب
يعبّر هذا المثل على أنو الناس مقامات.

ضربة بالفاس ولا عشرة بالقادوم
يعني هذا المثل أنو لما تكون بصدد القيام بأمر معيّن أخدمو مرة واحدة وتهنّى منو وما تقسموش على مراحل لأنك مع الوقت راح تمّل منو.

حمارنا ولا عَوْد الناس
يعبّر هذا المثل على أهمية الاعتماد على النفس وعلى مقتنياتنا الخاصة لأنو حاجة الناس للناس.

إلي بدلّك بالفول بدلّو بقشورو
ومعناه أنو إذا تخلّى عليك شخص على جال حاجة قليلة الأهمية أنت ثاني بدلّو بحاجة أقل أهمية من إلي بدلّك بيها.

جزّار وعشاتو لفت
يعبّر هذا المثل على الإنسان إلي يبخل نفسو وهو مقتدر ماديّا.

دراهم المشْحاح ياكلهم المرتاح
يقولو هذا المثل في الشخص إلي يجمع الدراهم ويبخل نفسو منهم ويكونو من حظّ إنسان آخر ماتعبش عليهم.

القط يعلّم بُوه النطّ
يقولو هذا المثل في الشخص إلي يلعبها راح يتفوّق على الإنسان إلي علمّو الصنعة ولا الحرفة.

خصّك غير السوّاك يا معوّجة الحناك
يعبّر هذا المثل على المرأة إلي تكون ناقصة شوية في الجمال وتظّل تزيّن في روحها وعاجبتها نفسها.

مول التاج ويحتاج
ومعناه أنو مكانش واحد في الدنيا هاذي وما يحتاجش مساعدة الآخرين.

إلي عطاه العاطي حتى الجبال ليه اطاطي
يقولو هذا المثل في الشخص إلي يكون محظوظ وأمورو ماشية بدون أي عراقيل.

إلي مش كاتبة من الفم تطيح
ومعناه أنو الواحد يدّي غير واش كتبلو رب العالمين في الدنيا هاذي.

الباب إلي يجيك منّو ريح سدّو واستريح
ومعناه الباب إلي يجيبلك مشاكل أغلق عليه باش ترتاح من مشاكلو.

إلي حفر حفرة لخوه يطيح فيها
يقولو هذا المثل في الشخص إلي يحاول يعمل مطّب ومشاكل لشخص آخر بصح المشاكل تطيح على راسو هو.

إلي يدّي و يرّد يولّي في المال شريك
يعبّر هذا المثل على أهمية ردّ الدين للمُدين، لأنو الشيء هذا راح يولّد ثقة بيناتهم وبالتالي كلما قصدو باش يتسلّف منو ماهوش راح يردّو خايب.

إلي فاتك بليلة فاتك بحيلة
يؤكد هذا المثل على دور الخبرة والتجربة في الحياة وضرورة الاستفادة من ذوي التجارب السابقة.

راجلها في الأحباس وهي ترقص في الأعراس
يقولو هذا المثل في المرأة عديمة المسؤولية.

إلي شاف الموت يرضى بالحمى
يقولو هذا المثل في الشخص إلي تعرّض لأزمة عويصة وبصعوبة باش تخلّص منها وبالتالي لمّا تجيه أزمة أقل حِدّة من السابقة يرضى بيها.

رأس بلا دْبارة كابُويا خِير منّو
يعبّر هذا المثل على احتقار الجهل والغباء.

إلي ماعندو كبيرو الهمّ تدبيرو
يعني إلي ماعندوش كبير يدبّر عليه راح تتغلّب عليه الهموم.

اللسان الحْلو يرضع اللبّة
يؤكد هذا المثل على أهمية الكلمة الطيبّة وأثرها البالغ في قضاء حوائجنا.

السفيه ينوي مافيه
يقولو هذا المثل في الشخص إلي دايما يظّن أنو الناس تخمّم كيما هو، حتى ولو كان يظّن السوء.

إلي حبّني ما بنالي قصر وإلي كرهني ما حفرلي قبر
يعبّر هذا المثل على أنو الناس ماعندها ما أديرلك سواء إذا حبّوك أو كرهوك.

أشري الجار قبل الدار
ومعناه أنو الواحد يسأل على الجار مليح قبل ما يقرّر يشري الدار لأنو اختيار الجار أسبق من شراء الدار.

إلي ما كْلا تبن ما يخاف من النار
معناه أنو إلي ما دار والو ما يخافش من الإتهام.

علّمتو الصلاة فاتني للجامع
يقولو هذا المثل في المتعلّم إلي كي يتعلّم خلاص يلعبها تفوّق على أستاذو.

إلي ماعندوش البنات ماعرفوهش باش مات
يؤكد هذا المثل على فضل وجود البنات في البيت لأنهم الأقرب لوالديهم خاصة في كبرهم.

يدور عليك الزمان يا ناكر خيري وتعرف قدري كي تعاشر غيري
يقولو هذا المثل في الشخص إلي يقابل الإحسان بالإساءة.

إلي والف الحفا ينسى صباطو
يقولو هذا المثل في الشخص إلي تعوّد على عادة معينة وحاول باش يستبدلها بعادة أخرى بصح مع الوقت يرجع لعادتو الأولى.

طول العشرة تعرفّك الذهب من القشرة
معناه أنو مع طول الوقت تعرف صاحبك تاع الصح من صاحبك تاع مصلحتو الشخصية.

تعلّم وأترك
معنى هذا المثل أنو لازم على الإنسان يتعلّم كل شيء ولو أنو شايف بلّي الأمر هذا ما يعنيهش ولا مايلزموش لأنو راح يجي النهار إلي يحتاجو فيه.

إلي يدخل بين البصلة وقشرتها ماينوبو غير فوحتها
ومعناه أنو الواحد لما يتدخّل بين الأقارب في أمر ما يعنيهش راح يسمع كلام ما يرضيهش.

المال يدير طريق في البحر
يعني أنو إلي عندو المال حاجة ما توقف في طريقو وتعرقل مسارو.

 

… شمس راقية