الطريقة:
هي طيب بارد في بارد
عمري قدرة بالماء كامل ماشي حتى للفم لكن عمريها و خلي غير قيس ما تزيدي المكونات
هي من الاحسن القدر يكون اكبر من الكمية لي موافة طيبيها خاطش راح يتبخر الماء و لوكان تزيدي تمرقي تروحلها كامل البنة
المهم
عمري الماء
ديري بصلة مقصومة فقط على 2
طماطم 3 حبات مقسومين على 2
5 جزرات مقسومين على 2
كاس حمص تكوني غليتيه على جنب (انا نحب نغلي الحمص لي نكون شمختو 24سا باش يتخلص من ريحتو لي ماشي شابة ديريه يغلي في الماء وحدو بدون اي شيء )
2 معالق طماطم مصبرة
ربطة قصبر لا بأس بها ماشي فتاتة ههههه
قطعة لحم انا ندير صدر الجاج تجي بزاف بنينة و ضرك راه كاين اللحم ديري طرف صغير برك للبنة
ملح
فلفل اسود
عود قرفة
زعفران
و شوية كركم
و بس ما تزيدي حتى بهار
خلي النار قاوية مدة 30 دقيقة
من بعد نقسيلها كامل و خليها طيب 2 سا
الغطاء ديالك لازم يكون ما يسربش اذا فيه ثقبة اغلقيها بشوي لبابة الخبز مثلا او عود زلاميت
بعد ما يفوتو 2 سا
احكمي الفارميسال و ديري في مقلات شوية برك زيت و خلي الزيت تسخن من بعد حطي الفارميسال
ملاحظة هذي الشربة تحب الفرميسال بزاف يعني ماديريش شوية برك
مثلا اذا درتي 3 لتر ماء ديري 3 غراف تاع فارميسال
كي تحمار و يولي لونها ذهبي شوية رايح للبني
ديريها في ورق باش تنقص الزيت منها
و من جهة روحي لشربة ديالك نحي كامل المكونات ماعدي اللحم و الحمص
و من بعد زيدي للنار كي تولي تغلي ارمي فيها الفارميسال خليها تغلي 5 دقائق من بعد طفي و خليها 15د قبل ما تستعمليها باش تتنفخ مليح الفارميسال
و كي تكملي كلش قطعي شوية قصبر و ذرذري فوها
او عند التقديم كيما تحبي
ان شاء الله تجربيها
… الشمس الساطعة
