غالبا ما تلاحظ ربّة البيت أنو اليوم يفوت بسرعة، بحيث أنو بمُجرّد ما تنوض الصباح وتبدأ في أشغالها اليومية حتى يفاجئها الليل بلا ما تكون كملّت كل أشغالها إلي كانت حابة تديرهم، وعلى هذا تحتاج ربّة البيت أنو تنظّم يومها باش تقدر تنجز أكبر قدر مُمكن من الأعمال بلا ما تحّس بالتوتر والاستعجال وضياع الوقت.
ويقدمّو الخبراء في مجال تنظيم الوقت نصائح عمليّة كثيرة وإلي تساعد ربّة البيت باش تنظّم يومياتها وأشغالها.
في البداية ينصحوها بتوزيع الوقت بين منزلها وصحتها ونفسها وعائلتها والعمل الخارجي إذا كانت خدّامة، وأنو من واجب هاذي المراة باش تعطي كل ذي حق حقه كيما يلزم، ومن بين أهم النصائح والي يأكدو عليها ثاني هو أنو يلزم على ربّة البيت باش تنظّم يومها ما يلي:
1. نوضي الصباح بكري:
هاذي أول نصيحة يأكدو عليها فنيّو ادارة الوقت، بحيث أنو اذا نضتي صباح بكري راح تنجزي أعمال كثيرة في وقت قياسي، لأنو راح تخدمي شغلك بدون أي مُلهيّات يعني حاجة ماتشدّك لا أطفال ولا اتصالات هاتفية، و بالتالي راح تربحي يوم مثمر بالنجاحات، في هاذي النقطة بالذات لازم عليك تحرصي على تأدية صلاة الفجر في وقتها وماتفوتيهاش، ففي البُكور وصلاة الفجر بركة كيما دعالنا رسول الله صلى الله عليه وسلم ” اللهم بارك لأمتي في بكورها”
وكي تنوضي بكري راح تقدري تتحكمّي في وقتك أكثر وراح تتخلصّي من التوتّر والخوف من ضياع الوقت.
2. حضرّي قائمة بأعمالك اليومية to- do- liste:
الحاجة المهمة إلي لازم تقومي بيها باش تنظمّي وقتك هي أنك تكتبي قائمة بالأعمال إلي راكي حابة تعمليهم خلال اليوم تاعك، تكتبي هاذو الاعمال بإختصار باش تتذكريّهم فقط
وبعد ماتنجزيهم تأشري (×) عليهم أنو تم انجازهم، وكتابة هاذي القائمة تكون في مساء اليوم السابق يعني قبل ما ترقدي في الليل ولّا في صباح اليوم المقصود. وفي نفس القائمة إلي كتبتي فيها المهّام حددّي الوقت إلي يلزمك باش تقومي بالمهمة مثلا (ساعة لتنظيف البيت، ساعة للطبخ، نص ساعة لزيارة مريضة.. الخ)، وثاني حاولي تتأكدي أنو القائمة تاعك تكون مرِنة يعني تقدري تزيدي ولا تنقصّي من المهام إلي كتبتيها حسب الأولويات والمفاجئات والطوارئ كيما زيارة ضياف مفاجئة، مرض، عطل في السيارة… الخ. ولازم تعرفي أنو كل ساعة تقضيها في التخطيط والكتابة راح توفرّلك من 2 إلى 4 ساعات من وقت التنفيذ، لخاتش الكتابة على الورق راح تخلّي العقل يركّز على أداء المهمات برك ومش لازم عليه يتذكرّها لأنها مكتوبة أصلا.
3. قسمّي أعمالك تقسيم جغرافي:
يعني الأعمال إلي تكون في أماكن متقاربة تنجزيها بالتوالي باش تربحي الوقت والجهد، مثلا تقدري تروحي لمكتب البريد la poste تجبدي دراهم وتخلصّي فاتورة الكهرباء في نفس الوقت، وإذا كانت عندك زيارة في هاذيك المنطقة ( والديك مثلا)، ديريلهم زيارة خفيفة وسريعة باش تطمنّي عليهم، كي تكوني في المطبخ تطبخي في الأكل نظفّي الثلاجة، أو أمسحي الأرضية، يعني الأعمال إلي تكون في نفس المنطقة قومي بيها مع بعض.
4. قومي بتفويض بعض المهام لأشخاص آخرين:
عمليّة تفويض المهام تنقّص عليك التعب والضغوط، لأنك إذا أجبرتي روحك أنو لازم عليك تقومي بكل الأعمال وحدك راح تتعبي وتملّي وتحسّي بالظُلم في حقّك، على هذا اتفقّي مع أطفالكِ أنهم يقومو بتجهيز ملابسهم وحقيبة المدرسة للغد قبل قبل ما يروحو يرقدو في الليل بشكل يومي كل مساء، وتقدري تراقبيهم أمبعد فقط
يقدرو أطفالك يساعدوك في أنهم يجمعو ألعابهم المتناثرة ويحطّوها في صندوق الألعاب بعد ما يكملّو اللعب، أطلبي منهم يجمعو الثياب الموسخّة ويحطوها في سلة الغسيل ولا في الغسالة، حددّي مشتريات البيت اللازمة في قائمة وأعطيها لزوجك يجيبها معاه كي يكون جاي من الخدمة، قولي لبنتك تغسل الماعن إذا كانت تعرف تغسلهم.
5. كوني واقعيّة وتجردّي من المثالية:
هاذي النقطة مهمة لأنو لما تتجردّي من المثالية ما راكيش رايحة تحسيّ بالإحباط مع الوقت، وما لازمش تهتمي بالنقد كثير لخاتش نعرفو كامل أنو ارضاء الناس غاية لا تُدرك، يعني إذا كان باش يجو عندك ضياف فجأة، ما تتذمريّش وتبداي تطلعّي وتهبطّي ( لازم أنظف الدار، لازم نطيّب حاجة حلوة، لازم نستيكي روحي، ولازم ولازم ولازم…)، هاذ التفكير يديّلك الجهد ويحسسّك بأنك ماتقدريش تديري كل هذاك الشيء وراح يكرهّك في الضياف، وبالتالي حاولي تشوفي الأولوية لشكون راح تكون، يعني إذا كان تنظيف البيت هو الأولى أمالا روحي نظفّي بيتك واستيكي روحك باش تستقبليهم، وتقدري تخدمي حاجة ساهلة للتقديم، أو قدمّي فاكهة
ولا أطلبي من الزوج يشريلك حاجة جاهزة باش تقدميّها للضياف من السوق وحاليا كل شيء متوفّر فيه.
6. حاولي تستغلّي أوقات الإنتظار في أعمال صغيرة:
يعني كي تكون تستناي في دورك في العيادة أو في مكتب البريد la poste ماتقعديش هكاك، أجبدي كتاب أقرايه، تقدري تقراي وِرْدَكِ من القرآن أو الأذكار
أو أنك تطلعّي على الأخبار من خلال الأنترنت في الهاتف، تقدري تكتبي رسالة مهمة أو تحضرّي قائمة مهّام الغد، وأنتي تخدمي في شغل البيت تقدري تستعملي سمّاعات الهاتف باش تقومي بالمكالمات الهاتفية، أو تستمعي لوصفات الطبخ والتجميل من خلال المذياع في المطبخ.
7. حددّي وقت لمشاريعك الكبرى وتطوير ذاتك:
شوفي إذا من الأول قَرَّرتي أنو ما عندكش وقت في يومك هنا تكوني درتي تثبيط لنفسك قبل ما تبداي أصلا، إلي يلزمك هو أنو تنظّمي وقتك برك لخاتش كل يوم هو فرصة جديدة ليك باش تضيفي المزيد من النجاحات والانجازات لحياتك
تعلمّي لغة جديدة، حرفة جديدة، أحفظي سور من القرآن الكريم، أرجعي لهواياتك وفعليّها من جديد لخاتش هاذو الهوايات هوما إلي يعطوك جرعات تاع الحماس والتشجيع باش تنجزي بلا ما تحسّي بالظُلم لنفسك. وما تحاوليش تقارني روحك بالأُخريات، لأنو المهم أنو يكون أسلوب حياتك مريح ليك أنتي برك مش شرط أنو لازم يعجب الآخرين.
8. ما تحشميش من قول كلمة ” ما نقدرش”:
ما لازمش تحشمي إذا طلبو منك طلب وأنتي ما يساعدكش وتضغطي على روحك باش تلبيّه، تعلمّي أنك تعتذري بكل لباقة، يعني إذا استدعاتك صديقة أو قريبة للخروج والوقت ما يناسبكش اعتذري
وهنا لازملك تعاودي تقيمّي صداقاتك و تحاولي تتجَنَّبي الصديقات والجارات إلي يضرّوك ويضيّعوك وقتك. أمالا ببطءٍ ولُطْف أجبدي روحك على العلاقات السلبيّة في حياتك، وحافظي على وقتك الثمين، لخاتش إذا بقيتي بلا خطة وقائمة مهّام ضرورية، راح يستخدموك الآخرين باش تحققي ليهم أهدافهم وأولوياتهم وتبقاي أنتي هكا بدون خطة وأهداف.
9. ما تأجليش عمل اليوم للغد:
كاين أعمال كل ما أجلتيها زادت صعوبتها، كيما تنظيف البيت إذا خليتيه راح يتراكم عليك الشغل
وبالتالي راح تعيشي سياسة اطفاء الحرائق وكاين إلي يسميّه إدارة الأزمات وتبقاي تنتقلي من أزمة لأخرى.
10. عسيّ روحك من لصوص الوقت:
وهنا لازم عليك تقَلِّصي من وقتكِ قدّام مواقع التواصل الاجتماعي كيما الفيس بوك و يوتيوب، وتويتر، وامتنعي عن تضييع وقتك في الألعاب الإلكترونيّة كيما Candy Crush وغيرها
وثاني نقصّي من المكالمات الهاتفية إلي ماعندها حتى هدف وفائدة فقط للدردشة وغالبا تدخل فيها الغيبة، حددّي أوقات ثابتة لمشاهدة التلفزيون واختاري برامج مفيدة وهادفة، وإذا احتجتي لاستخدام الإنترنت فلازم عليك تحَدِّدي وقت ليها باش ما تتفاجئيش بمرور الكثير من الوقت بلا ما تنتبهي ليه.
… شمس راقية
