الموضوع باين من عنوانو
كل طفل يلحق لمرحلة وين يسأل كيف ولد ؟
كيف أجبته و اذا لم يتم الأمر كيف ستجيبينه ؟
راح نهدرو على التربية الجنسية عند الأطفال
الطفل يقدر من سنتين و نصف أو 3 سنوات يميّز بين الجنسين
يعني يعرف من الذكر و من الأنثى
يبدى يشوف او تبدى تشوف انو كاين حاجة راهي تميّز بيناتهم
غالبية تبدى بملاحظة الشعر الطويل
الطفل مثلا بما أنو يشوف بزاف يماه بشعر طويل و باباه بشعر قصير يولي يدير الفرق بين انو هو شعرو قصير و طفلة في الحديقة شعرها طويل
و هكذا يقدر يقول لأمو اذا كانت مطولتلو شعرو ماما انا طفل ولا طفلة ؟
تقولو ماماه انت تطفل
يقوللها مالا وعلاش شعري كيما شعر الطفلة
لهذا أشير للأمهات لي ولادهم يفوتو سنتين و هي مزال مطوّلة شعر وليدها حذاري من أنو ما تخليهش يتعرف على الجنس ديالو
اوّل خطوة نديروها كي يجوز 2 ونص سنة هي تعليمه الخصوصية
يعني تعلميه أنو كاين حاجات انتي فقط من يقدر يديرهالو كتغيير الحفاظة و غسله و تحميمه وووو
اذا كانت كاينة شخصية ما تعاونك في هذا الأمر تشرحيلو أنو انتي و هي فقط لي تقدرو تبدلولو الحفاظة و تغسلولو ولا يوجد شخص آخر يقدر فعل ذلك
بعدها تعلميه أنو العضو الخاص بيه هو الوحيد لي يقدر يشوفو
و أنو لا أحد عندو الحق يشوفو
و أنو هو أيضا ما عندوش الحق يشوف عضو انسان آخر
طبعا راكي حا تقولي كيفاش واحد عمرو 2 و نص سنة أو 3 سنين نبدا نحكي معاه هكذا
الطريقة بسيطة جدا
مثلا كي يدخل المرحاض و يخلي الباب محلول قوليلو لا لا لا الباب لازم تغلقو ما لازم حتى واحد يشوفك و انت في المرحاض
بهذه الطريقة راكي تعلميه الخصوصية
مثلا كي تكوني حا تبدلي حوايجك و هو يقولك نقعد معاك قوليلو لا أنا نبدلك نعم أنا ماماك لكن انت لا وليدي اسمحلي نبدّل و كي نكمل ولي
و أنتَ تان كي تكبر و تولي تعرف تبدّل وحدك أنا تان نولي ما نشوفكش
و بابا تان ما يشوفكش و أنت ما تشوفش بابا
لذلك ماشي مليح تحطي الأطفال يدوشو كيف كيف
ماشي لي يجي يدوّش لوليدك
حتى و يكبرو ولادي كي يروحو لقاعة الرياضة يبدلو قدام بعضاهم
طبعا كاين لي ولادها يبكو كي تقوللهم نغلق الباب في المرحاض
كاين لي كي تدخل للمرحاض الناس كامل يعرفوها بلي دخلت ….. خاطش وليدها ولا بنتها يفضحوها
لكن معليش لا تستسلمي مع الوقت راح يتدرّب و كي يشوف انو دخلتي و في الأخير خرجتي راح يفهم انو ماكيش هاربة
مثلا بنت تحب باباها بزاف و تقول أنا حابة بابا يدوشلي
اوكي
لكن قوليلها لازم نلبسو من التحت culotte خاطش بابا ما لازمش يشوفنا من التحت
ثاني خطوة : الهوية الجنسية كيفاش نفهموها لطفل لم يتعدى سن 3 سنوات ؟ سهل جدا بالنسبة للبنات : حاولي توريلها الفرق بين كونها طفلة و ماشي طفل في لبسها… في تسريحة شعرها ….. في ألوان ملابسها …. في ألعابها … و غرفة نومها يعني الوان بنات و حركات البنات و تقوليلها أنتي شابة كيما ماما انتي عاقلة كيما ماما حاولي ما تشبهيهاش بأبوها قبل أن تتأكدي أنها فهمت بلي هي فتاة أما الولد : نفس الشيء قوليلو نجيبلك كرة تلعب مع بابا و تولي كيما هو قوليلو انت ذكي كيما بابا انت تمشي كيما بابا حا نشريلك سروال كيما تاع الرجال يعني تبقاي كل مرة تأكديلهم على الهوية الجنسية لكل واحد فيهم لأنّ في وقتنا هاذا راهي كاينة وحد الظاهرة كارثة عظمى انو المرأة لي ما عندهاش ولد تجيها طفلة عندها شوية رجولية في شخصيتها تلقايها تضرب الذراري و تلعب الكرة و وووو يماها و باباها فرحانين بيها خاطش عاجبهم الحال كي راهم يشوفو فيها الذكر لي ما جابوهش او تلقاي مرأة جابت ولد شعرو شباب و أمّور وووو تلقايها تلعب بيه و يقول كلمات مثل البنات كيما مثلا راني حابة ماشي راني حاب و يماه فرحانة كي يقولها و تضحك لا أختي هذا ماشي ضحكة و لعبة هذي تربية سيئة و راح تعوجيلو هويّتو الجنسية و كي يكبر و يولي يلبس الطالون ردي بالك تنخلعي
رابع خطوة
تحضير الطفل لمرحلة البلوغ
من 6 سنوات الى 9 سنوات
طفلك يكون في مرحلة الاستكشاف يعني اذا راحتلك هذه المرحلة راح تلقاي صعوبة معاه في مرحلة المراهقة
لماذا ؟
الطفل ينسى الاسئلة الجنسية و يدور الى الاسئلة في كل المجالات
هاذي كيفاش مخدومة و وعلاش
الماركات تاع السيارات
المطبخ بالنسبة للبنات
الخ
انتي في هذه الفترة استغلي الفرصة و اشتري بعض الكتب العلمية لي تشرح الأعضاء التناسلية بطريقة علمية
و قوليلو انا ما نعرفش هيا نتعلمو كيف كيف من الكتب تاع الاطباء يعرفو خير منا حنا
و ابداي علميه او علميها كل أعضاء جسمها و الدور ديالهم في الجسم
و هكذا راح توجديهم لفترة البلوغ
لأنو الكارثة لي رانا عايشينها أنو أطفال يدخلو على مرحلة البلوغ و هوما ما يعرفوهاش كامل
حتى ولا مرة سمعو بيها
خاصة أنو كاين أطفال يبلغو قبل السن لي راح يدرسو درس البلوغ في المتوسط
و هذا راح يخليهم جد مضطربين
يعني اشرحي لطفلك انو بعد ما يلحق لنهاية الطفولة راح ينتقل للبلوغ
واش يعني البلوغ ؟
هو عمر التحول من الطفولة الى الرجولة أو الأمومة على حسب الطفل
قوليلها او قوليلو احنا راح نفرحو بزااااااف و نديرولك القاطو و نفرحو بيك ووووو يعني وجديهم على انو راح ينتقلو لحاجة في صالحهم
و ليس ضدّهم
بالنسبة للطفلة :
قوليلها راح يولي شعرك بشكل مختلف
راح صوتك يولي جميل
راح يولي الجسم تاعك فيه قوة أكثر باش تديري واش راكي حابة وحدك بلا ما نعاونك ….. الخ
بالنسبة للطفل :
تقوليلو راح تولي تطوال و تولي عندك عضلات قوية و تولي قوي
راح يولي عندك شوية شعرات في الموسطاش باش تولي تبان بلي راجل ماشي طفل صغير و يولي كاين شعر في مكان الفولاني و الفلاني
صوتك يولي كيما الرجال تولي كي تهدر يسمعولك ماشي يقولو اوووف خلينا من هذا الطفل الصغير …. الخ
المهم تعطوهم صورة على واش راح يواجهو
لكن شبهوهم بواحد يحبوه باش ما يتخيلوش رواحهم وحوش هههههههه
بالنسبة من الناحية الدينية :
ايضا يولي يعرف وقتاش يصلي و وقتاش لازم يغتسل
يعني حاولي تقوليلو حلال و حرام باش يبقى كلامك منطقي خاصة أنو وليدك في 9 سنين يكون قراء بعض الصور وين لاحظ الغسل و الطهارة و ووو
يعني انتي راح تكوني في دور المفسّر للآيات لا أكثر
أمّا الاجابة عن السؤال طبعا بعد ما تكوني جزتي كامل المراحل المذكورة تكون كالتالي
الجواب يكون عند طريق اخبارهم الحقيقة
يعني مكلاه الحكايات تاع شريتك
او جابك العصفور
او كليتك
او لقيتك في المستشفى
او لقيتك في علبة الحلوة
الحقيقة تكون عن طريق اخبار الطفل من 2 عام الى سن ما قبل المراهقة انو الاطفال يأتون عندما يتزوج بابا ب ماما و يحبان بعضهما و فقط و اذا بحث عن تفاصيل اكثر تقوليلو كي يكون عمرك كذا راح نقولك تفاصيل اخرى
اما المراهقين يحتاجون تفاصيل اكثر خاطش يحبو الحقائق العلمية بصح بدون الدخول في تفاصيل علمية معمّقة.
اما عن الجواب بالتفصيل لن ادرجه لأن كل ام او كل اب عندو طريقتو في التعامل مع ابناءه لذلك كل وحدة و شطارتها
المهم نخبرهم الحقيقة بشكل مبسط على حسب السن.
…شمس ساطعة
