لقد بشّرنا الرسول صلى الله عليه وسلم أحنا النساء وخاصة النساء إلي يعانو من أزواجهم ببُشرى رائعة وهاذي البُشرى تظهر من خلال الحديث النبوي الشريف التالي: ” ما رأيت من ناقصات عقل ودين أذهب لِلُبِ الرجل الحازم من إحداكن”.
يدّل هذا الحديث على أنه أي إمرأة قادرة أنها تسلب قلب وتفكير زوجها مهما كان هذا الزوج عصبّي أو مِزاجي أو متقلب، بمعنى أن هذا الأمر سهل وفي متناول كل النساء والحمد لله.
أحنا كامل نعرفو أن المرأة خُلقت من ظلع الرجل وهذا الشيء يدّل على أنها هي مصدر الحب والحنان لزوجها، إذن فهي تملك أقوى سلاح يمكن أن تستخدمه المرأة وهو ” الحب”، ولازم عليها تستخدمه باش تتذوّق طعم السعادة الزوجية وتذوّقو لزوجها هو ثاني.
وباش تحققّي الأمر هذا وإلي هو ” السعادة الزوجية” لازملك تفتحي الزجاجة ( قلبك) وتخلّي ريحة عِطرك ( حُبّك) تفوح وتنتشر في كامل أجواء حياتك الزوجية بصفة خاصة وحياتك العامة ككُل.
بالشكل هذا نقدر نقلّك أنك رايحة تتمكنّي من كُل مفاتيح قلب زوجك وتملكيها في إيدك، أمالا مبروك عليك مُسبقاً.
إذن عزيزتي آن الأوان باش تفتحي زجاجة عِطرك وتخلّي عبيرك يعطّر المكان، ويقدر زوجك يشّم هاذي الروائح الزكية من خلال:
1. ابتسامتك الدائمة وإلي تزيد إشراقة لوجهك الجميل، لأنو قد ما زينّتي وجهك بالمساحيق باش تظهري جمالك، أكيد ما لازمش تستغناي على ابتسامتك لأنها راح تعطيك جمال أنثوي طبيعي، وماتنسايش أن الابتسامة في وجه أخيك صدقة، إذن ابتسمي لزوجك وتصدقّي كل يوم، وبالتالي رايحة تضربي عصفورين بحجر واحد.
2. عذوبة حديثك ورِقة صوتك وحلاوة لسانك، نعرفو أن رِقة الصوت ونعومته من علامات الأنوثة وهذا الأمر ضروري مع الزوج، لكّن الحاجة الي يمكن تكون خافية عليك أنو تكوني في قمة النعومة معاه وفي غاية القسوة مع غيره، هذا الشيء راح يبيّنك أنك انسانة متناقضة او أنك لابسة ثوب غير ثوبك كي تكوني معاه، وبالتالي ما تخليش تعنيفك لأبناءك يكون في حضور زوجك، راح يخليّه يدّي عليك انطباع سيء، عامليهم بحنان وإذا استلزم الأمر العقاب أجليّه حتى تكوني وحدك معاهم.
3. حنانك الفيّاض وعطفك وتسامحك وحسن أخلاقك، مهما كانت طبيعة زوجك القاسية مالازمش تعامليه النِد بالنِد، كوني متسامحة غالبا وتغاضي على سفاسف الأمور باش المركب تسير أولا وباش تبينيلو أنك متفهمة وناضجة وتقدرّي الحياة الزوجية ثانيا.
4. حركاتك الأنثوية الفاتنة الجذابة، ماتخليش نهار يفوت بلا ماتحسّي فيه بأنوثتك وتحسسّي زوجك بيها، أحيانا الزوج يحس بالانوثة في الشارع وفي التلفزيون والانترنت، وما يحسهاش في دارو لخاتش زوجته جاهلة بالأمور هاذي، لازم تدللّي عليه، تغازليه وتخليه يغازلك، أضحكي، ألعبي، أفرحي بحياتك.
5. ألبسي أجمل ماعندك وتزينّي وتعطرّي، ماتخبيهمش غير للمناسبات لخاتش النهار إلي يروح ماعادش يرجع والعمر يجري، واللبسة إلي تناسب جسمك وعُمرك الآن احتمال ماتوالمكش مستقبلا وتندمي عليها، إذن لا داعي للتأجيل.
6. دللّي زوجك كيما أدللّي ابنك الصغير ، الراجل يحتاج الحنان أكثر من أي شيء آخر، وإنتي هي مصدر هذا الحنان ماتبخليش عليه أمالا.
7. كي تكونو مع بعض خلي لُغة العيون هي الي تبيّنلو حبك ليه، أما كي تكونو بعاد على بعض ما تحبسيش من إرسال رسائل الحب والشوق لزوجك، يعني حاصريه حتى يتعوّد عليها ويولّي يستنى في رسالتك بكل شوق حتى ولو مايبيّنلكش الشيء هذا وأغلبهم يكونو هكا.
8. كوني كريمة معاه وما تبخليش عليه بوقتك وجُهدك ومالك، وماتنشغليش عليه بغيرو حتى ولو بأولادكم، لأنو إذا خليتي بلاصتك والتهيتي عليه بحوايج واهتمامات أخرى، تأكدي أنو ماأطوّلش بلاصتك وهي فارغة وتجي إلي تعمرّها في أقرب فرصة، أمالا كوني حذِرة.
في الأخير نقلّك أنو لازم تعرفي بلّي حنانك وأنوثتك هي إلي تخلّي زوجك يذوب في حُبك، وراح يعطيك قلبه وعقله وماله وحياته وكل حاجة تتوقعيها وماتتوقعيهاش، صدقينّي، فقط كوني صبورة ورايحة تشوفي النتائج على المدى القريب بإذن الله.
بعد كل هذا ان شاء الله تكوني اقتنعتي أنه آن الأوان باش تفتحي زجاجة عطرك وتتمتعي بحياة زوجية سعيدة ان شاء الله.
… شمس راقية
