حقيبة يد المرأة تكاد تكون أفضل صديقة ليها، لأنها دايما معاها، تحمل أسرارها والعديد من أغراضها الضرورية. فبقدر اهتمام المرأة بالشكل الخارجي لحقيبة يدها، لازم عليها تعرف أهم الأغراض الضرورية إلي من المفروض تتواجد في حقيبة يدها باستمرار بالإضافة لهاتفها النقال ومفاتيحها، وهذا باش تتفادى الوقوع في أي موقف محرج تتعرضلو بسبب نسيانها إحدى أغراضها المهمة.
ومن خلال هاذي السطور راح نذكرّوك بالأغراض الهامة الواجب تواجدها في حقيبة اليد تاعك، بحسب مدة بقاءك خارج بيتك، والمكان إلي راكي متوجهّة ليه، و المسافة إلي تبعدك عن بيتك.
1- حافظة وثائق:
من البديهي أنو تكون في حقيبة يدك حافظة لوثائقك المُهمة، كيما بطاقة الهويّة، بطاقة الشفاء، بطاقة زيارة الطبيب، بطاقة العمل إذا كنتي عاملة ولا بطاقات الطالب إذا كنتي طالبة.
و رُدّي بالك تغلطي وتحطّي فيها دراهمك، لخاتش لو كان تتسرقلك ولا تطيحلك في السوق أو سيارة التاكسي راح تضيعلك الوثائق المهمة تاعك إلي كانت فيها، وتحصلي باش تسترجعيهم أو تخدمي أخرين جدد.
2- نقود:
احتفظي دايما بمبلغ من المال نقداً في جيب من جيوب حقيبة يدك، وهذا خارج المحفظة تاع النقود العادية تاعك
وحاولي أنك تخليّ هاذ المبلغ فقط للطوارئ، بحيث أنو يكون مُنقذ ليك في حال انتهت نقود محفظتك بلا ما تنتبهي ليها، أو تعرضت محفظة نقودك للسرقة.
3- دفتر صغير وقلم:
بالرغم من التطور التكنولوجي الهائل، واعتماد معظمنا على تطبيقات الهواتف الذكية في تخزين وحفظ المعلومات الهامة. لكن هاذ الأمر ما يلغيش احتواء حقيبتك على القلم والدفتر
لأنو يمكن تنتهي بطارية الهاتف في الوقت غير المناسب، وتكوني في حاجة لكتابة محتويات ملّف إداري، كتابة وصفة طبخة أو ماسك تجميلي، أو كتابة رقم هاتف أو موعد هام ، على هذا لازم تكوني دايما جاهزة لهاذ المواقف المُفاجئة.
4- مرآة صغيرة:
تحتاجي في حقيبة يدك لوجود مرآة صغيرة الحجم
باش تتأكدي من أنو خِمارك معدول وشعرك ما يبانش من الخمار، وأحيانا باش تتحقّقي من نظافة أسنانك، وعدم وجود أي شيء عالق في فمك وظاهر في أسنانك خاصة بعدما تكوني تناولتي الطعام.
5- مُعطّر للفم منعش أو علكة بنكهة النعناع:
ما كاين حتى وحدة تحبّ أنو رائحة الفم تاعها تكون كريهة ولا مزعجة، على هذا ما تنسايش تحطّي في الحقيبة تاعك معطّر للفم أو علكة
باش تعطيك رائحة منعشة للفم تاعك، خاصة إذا تناولتي الأكل تاعك خارج المنزل.
6- حقيبة صغيرة للمكياج :
لازم دايما تكوني محتفظة بأساسيات المكياج في حقيبة صغيرة داخل حقيبة ايدك، باش تبقاي محافظة على مظهرك الجميل والمرتّب
وتحتوي هاذي الحقيبة الصغيييرة واقي الشمس، كحل للعين، أحمر الشفاه أو ملمّع الشفاه، زجاجة عطر صغيرة، فرشاة صغيرة للشعر، مبرد للأظافر.
7- حقيبة صغيرة للطوارىء:
هاذي الحقيبة ضرورية للطوارئ والمفاجآت
بحيث أنك تحطّي فيها: الأسبرين للصُداع المفاجئ، ابرة وخيط في حالة ما تقطّع حجابك أو طارتلك قفلة منو وأنتي في الخارج، فوطة صحية للاحتياط، ضمّادة جروح ومعقمة طبية، جال معقّم لليدين للتخلّص من البكتيريا، مساسك تاع الخمار، كمية صغيرة من المناديل الورقية تحتاجيها في حالة ما استنشقتي الغبار و اضطريتي تعطسي وأخرى من المناديل المُبللة في حالة ما لقيتي بقعة في ثيابك تاع أكل ولا عصير تمسحيها بيها على الفور (كاين عُبوات صغار من المناديل الورقية والمناديل المبللة مخصصين لحقيبة اليد).
8- ملحقات الهاتف النقال:
وتتمثل هاذي الملحقات في شاحن الهاتف النقال
أو بطارية إضافية خاصة إذا كنتي راح تطولّي خارج المنزل و سمّاعات الأذن الخاصة بالهاتف النقال تاعك
كذلك تحتاجي ناقل بيانات (فلاش ديسك)
خاصة إذا كنتي عاملة ولا طالبة باش تنقلي فيها ملفّات أو معلومات هامة.
عموما هاذي المحتويات بشكل عام وتناسب كل السيّدات، وإذا أي وحدة شافت أنو من الضروري تزيد أغراض أخرى تزيدها حسب استعمالها وحاجتها ليها، وإذا شافت أنها أغراض كثيرة عليها تقدر تستغني على الأشياء إلي تكون متأكدة تماما أنها مش راح تحتاجها في حقيبة يدها.
… شمس راقية
