النَّظافة ماهيش راحة نفسيَّة فقط و لا مجرّد حاجة بيولوجية و مقياس صحِّي …هي معيار تفاضُل مستحَقّ ؛ و عنوان للشَّخصيَّة المتكاملة ؛ و إظهار للجمال الحقيقي غير المزيَّف اللي ينشأ عن الفطرة و الطبيعة ؛ و سلوك اجتماعي مُسيطِر و مُقدَّر و مُحترَم للغاية .
كلّ واحد فينا يدَّعي انو الأنظف و المجتمع لا يخلو من ممارسات ممقوتة في الإساءة للآخرين و وصفهم بلِّي مش نظاف و الأمثلة كثيرة : من الحماة اللي ماتاكلش طعام كنّتها ؛ و التلميذة لي صديقاتها يتكلمو في ظهرها على ريحتها ؛ و الجارة لي تدخل لجارتها و تخرج بجريدة على نقاوة دارها!..و بعيدا عن إصدار الأحكام وقتاش تعتبري روحك امراة نظيفة ؟
إذا كنتي حابة تكوني نظيفة ماتعجزيش على تكريس وقت كافي في كلّ يوم للعناية بكلّ تفاصيلك ..”نظافتك الشخصية ؛ ملابسك ؛ بيتك ؛ ولادك ؛ مقر عملك ..”مع التَّركيز على ترسيخ عادات جيِّدة و نمط حياة صحِّي و نظيف .
أولا : نظافتك الشخصية ..
1– اغسلي روحك كل يوم
- الاستحمام المنتظم يقلّل بكتيريا الجسم المسؤولة عن الرائحة لأنها تتغذى على العرق و الوسخ و الخلايا الميتة ..و مع ذلك تجنبي الاستحمام اليومي لانو يميل لتجفيف البشرة و يقضي على البكتيريا الصديقة…اعتمديه مرتين الى ثلاثة في الأسبوع ؛و لكن يوميًّا اغسلي روحك بالما الدافي و الصَّابون و ليفة ..و طرّفي مليح الأعضاء اللي تصدر العرق (الإبطين ؛ المنطقة الخاصة ؛ الصدر ..)خيّري صابون غير معطّر و يناسب حساسية البشرة باش تتجنبي الجفاف و الإلتهابات .
- حتّى اذا كنتي مدوشة ..ديري دوش بعد أي نشاط ينتج عنو تعرُّق : (شغل في البيت ؛ المشي لمسافة طويلة ؛ رياضة ….)و كذلك في الأيام الحارة و الرطبة .
- حافظي على نظافة رجليك و اغسليهم كل يوم .
- ما تستعمليش الصابون أو الريحة في تنظيفك اليومي للمناطق الخاصة باش ماتفسديش التَّوازن الطبيعي الكيميائي فيها …اغسلي المناطق المحيطة بالصَّابون و لكن المنطقة بذاتها استعملي فقط الما الدافي من الداخل و الخارج ..الفرج ينظف نفسو مليح في إبراء ذمة طبيعي من خلال السوائل اللي يفرزها .
- ما تعتمديش على العطور و مزيلات العرق يعوضو حمامك او غسيلك اليومي
2– اعتني بشعرك :
– اغسلي شعرك مرتين الى ثلاث مرات في الأسبوع ..تجنبي الغسيل اليومي لانو يأثر على الإفراز المتوازن للزُّيوت الطبيعية الضَّرورية لشعرك ..اختاري الشامبو و البلسم المناسب لنوع شعرك …قرّري عدد المرات اللّي تغسلي فيهم شعرك أسبوعيا من خلال مراقبة حاجتو للغسيل يعني إجمالا كي يزيّت للشعر الدهني و كي يتخبّل الشّعر الجاف ….الغسيل المعتدل يساهم فعليا في بناء الزيوت الطبيعية لشعرك و يساعد في بقاؤو قوي .
– امشطي شعرك على الأقل مرة في اليوم …هكا تنحي القشرة و تدعمي التوزيع الطبيعي للزيوت .
3– حافظي على صحة فمك :
– اغسلي أسنانك لمدة دقيقتين مرّتين في اليوم على الأقل …هكذا تنحِّي بقايا الطعام اللي تدير الرِّيحة و تتجنّبي التسوُّس
– استعملي خيط الأسنان مرّة في اليوم للحفاظ على اللَّثة الصحيَّة ..
– ما تستغنايش على الهدي النَّبوي اللِّي يوجهنا بعناية لاستعمال السِّواك عدة مرَّات في اليوم ..هذا التوجيه أثبت فعاليتو بالتَّجربة العملية و الحقائق العلمية المعاصرة .
4– اغسلي وجهك :
* استعملي الماء الدافي المعتدل و مُطهِّر للتَّنظيف : اغسلي وجهك مرّتين في اليوم من غير الوضوء في الصّباح و قبل النُّوم ..استعملي اصابعك في وضع الصابون و غسل البشرة..تجنبي الليفة او الأدوات الخشنة و ماتحكِّيش بزَّاّف ؛ شلّلي بالما الدافي و جفّفي بمنشفة نظيفة
* تجنّبي المنتجات المُقشِّرة اللِّي فيهم الكحول و حاولي ما تديريش الصّابون العادي ..هذو المنتجات قاسيين على البشرة
* إذا كانت بشرتك من النَّوع اللي يتقشّر او تحكّ او جافَّة استعملي مرطِّب للوجه و إذا كانت تلتهب بزَّاف از تزيِّت بسهولة استخدمي منتجات البشرة الحساسة
* اغسلي وجهك كذلك بعد القيام بالأعمال و التعرُّق النَّاتج عن مختلف الأنشطة ؛ كي تغسلي وجهك تتجنّبي انسداد المسام .
* ديري تقشير لوجهك مرّة في الأسبوع باش تتخلّصي من الخلايا الميّتة .
5–اغسلي يديك
باش يديك يبقاو دائما نظاف اغسليهم بالصَّابون و الما الدافي لمدة 20 ثانية و نشّفي بفوطة نظيفة ..وقتاش تغسلي يديك ؟
- كي يبانو موسخين .
- قبل ما تبداي طيبي
- قبل الأكل .
- قبل و بعد العناية بطفل أو شخص مريض
- قبل و بعد ما تمسي جرح .
- بعد ما تنثري أنفك أو تعطسي أو تسعلي .
- بعد استخدام المرحاض .
- بعدما تمسِّي القمامة .
- بعدما تلمسي الحيوانات او تلمي الوسخ تاعهم .
*دائما احملي معاك منتجات صغيرة حطيها في حقيبتك ديري فيها : قارورة معطر فم ؛علكة نعناع (هذو تقدري تستعمليهم بعد الوجبات) ؛ مراية صغيرة ؛ مطهر لليدين ؛ مناديل رطبة ؛ ديودورون و مشطة .
ثانيا : سنن الفطرة toilettage
- قُصِّي و نظّفي أظافرك باش تتجنّبي الفطريات و البكتيريا ؛ استعملي مقصّ أظافر أو مقلِّم أظافر و هذّبي شكلهم ؛ كي يكونو قصار عمرهم ما راح يحملو أي بكتيريا .
- أزيلي بانتظام الشَّعر الزَّائد في السَّاقين و الإبطين و المناطق الخاصة ؛ وجود الشعر يحتفظ بالرطوبة و يسبّب الرائحة ؛ استعملي موس حلاقة نظيف و جديد و حاد (و من الأحسن متعدد الشفرات) أو كريم حلاقة أو وصفات منزلية طبيعية و استعملي لوشن مرطب غير زيتي بعد الحلاقة باش تحافظي على بشرتك من الجفاف .
- تعطّري …الرَّائحة الجسدية أمر طبيعي لا يدعو الى الحرج ؛ يزداد إفراز الرَّائحة مع التَّعرُّق عند ممارسة مختلف النشاطات ؛ باش تقاومي الروائح السَّيئة ديري ديودورون بانتظام و كي تخدمي الشغل او كي تعرقي ؛ مع الاغتسال المنتظم كي تديري ديودورون تصبح ريحتك منعشة و لكن إذا كنتي مقلّقة من مزيلات العرق اللِّي في معظمها مادة الألمنيوم المضرَّة بالصّحة استخدمي مستحضرات طبيعية …ما تنسايش تستخدمي العطور و الكولونيا مع الديودورون يمدو ريحة طيبة …ملحوظة فقط ماكانش فرق بين الديودورن الرجالي و النسائي في المكوِّنات الفرق فقط في الرائحة .
- سيطري على رائحة قدميك نشّفي رجليك مليح قبل ما تدخليهم في الجوارب أو الحذاء و حاولي دائما تبدّلي بين الصبابط و تخلّيهم طول اللّيل في مكان فيه تهوية و استخدمي الجوارب القطنية بدل الألياف الصِّناعية .
ثالثا : ملابس نظيفة دائما
هذا مش معناه بالضَّرورة تبدّلي قشّك و تغسليه كل وقت و إنما البسي ملابس اللي ماشي متاشيين (البقع ) و ماشي معجرين (تجعدات الثياب) و مافيهمش الريحة ؛ أما إذا توسّخو أو عرقتي فيهم اغسليهم قبل ما تعاودي تلبسيهم .
- الملابس الداخلية و التقاشر بدّليهم يوميًّا .
- حمّالات الصّدر و البلوزات و الفساتين و القمصان أغسليهم بعد كل 3 الى 4 لبسات .
- السّراول و الجينز يتغسلو بعد كل 5 الى 6 لبسات
و لكن اذا عرقتي في الملابس اغسليهم مباشرة .
رابعا :أبقاي نظيفة أثناء الدّورة
- في المتوسِّط كل امراة في فترة العادة تستعمل من 3 الى 6 فوط في اليوم ، عند التدفق الخفيف في الأيام الأولى و في الليل استعملي فوط صغار بالاجنحة ؛ عموما ديري فوطة جديدة كل اربع الى ثمان ساعات حسب التدفق عندك .
- اغتسلي بانتظام هذا مش فقط مسموح بل مهم لأنُّو يدعم إحساسك بالنَّظافة و لكن أيضا لأنُّو الماء الدافي يعالج تشنُّجات الدورة ..اغسلي روحك عادي و المنطقة الحساسة اغسليها بالماء الدافي و نظّفي المكان بمنشفة ورقية قبل ما تديري الفوطة
- البسي ملابس داخلية داكنة هكا تتجنبي البقع المزعجة و تبقاي في حماية تامة ..
خامسا : حافظي على ترتيب البيت اليومي
- رتّبي كلّ الأسِرَّة كلّ صباح ..السرير المرتّب أساس للغرفة المرتّبة ؛ و لمعي حوضك كل ليلة قبل ما ترقدي الحوض النظيف رمز للمطبخ المرتّب .
- حافظي على نظافة الأسطح في المطبخ و راقبي باستمرار تكدّس المواعين و وجود البقع و الوسخ دائما نحِّيهم .
- اغسلي الحمَّامات …الحمَّام القذر هو أقوى علامة للشعور بالبيت الموسّخ : رتّبي رفّ المرآة و امسحيها دائما و اغسلي الحوض و الدُّوش و المرحاض و علّقي المناشف المبلّلة يشيحو الرطوبة فيهم هي اللي تدير الريحة .
- رتّبي الفوضى و نظّمي الأشياء في قوالب أنيقة : مجموعة كتب قرب السرير مثلا أو حاويات جميلة في خزانة المطبخ أو سلال مرتَّبة للملابس المطوية …تقليل الفوضى هو الضَّمانة لتنظيفات سهلة في البيت .
سادسا :تنظيف دائم للبيت .
- ابني عادات تنظيف مليحة : العادات الجيِّدة هي اللي تمدّلك بيت نظيف مثلا : إذا جبدتي حاجة رجّعيها مباشرة لمكانها بعدما تستخدميها .
- بعد الطّبخ و الأكل مباشرة اغسلي لماعن و رتّبيهم ؛ ما تخليهمش يتكدّسو منظرهم مزعج .
- القمامة خرّجيها كل ليلة
- الملابس الموسّخة ما يترماوش في الأرض خصّصيلهم سلال و حاولي تفرزيهم حسب النّوع .
- ما تتنازليش على التَّنظيف اليومي : مسح الغبرة ؛ الكنس ؛ التسياق… ماتخليش يتجمّع الغبرة و الأوساخ .
- اغسلي الملابس بانتظام ؛لازم الملابس تكون نظيفة و جاهزة كل يوم و ما يبقاش في البيت أي غسيل موسخ
- المناشف اغسليهم مرة في الأسبوع و الدراوات مرة كل أسبوعين …سيّري غسيلك بنظام
- نظّمي روتينات صحيحة فيها أعمال قليلة كل يوم لتنظيف المنزل مثلا ..عشرين دقيقة صباحا لغسيل أواني الفطور و ترتيب المطبخ و نصف ساعة مساء لتلميع الحوض و ترتيب المنزل قبل النوم .
- اعتمدي جداول تنظّمي بيها الأعمال المنزلية مثلا : يوم للتنظيفات الأسبوعية للمناطق الأكثر استعمالا و الاوساخ الأكثر شيوعا (إزالة البقع ؛ مسح الزجاج ؛ مسح الغبرة …) و خصّصي كلّ أسبوع من الشّهر لتنظيف منطقة من البيت بحيث تمرِّي على كامل البيت خلال هذا الشهر .
سابعا : حافظي على مقر عمل نظيف
وجودك في مقر عمل نظيف و مرتَّب كيما يدلّ على شخصيتك النَّظيفة و المتسامية فهو مرتبط أيضا بالمِهَنِيّة و الأداء العالي .
- إذا كان عندك مكتب في العمل خلِّيه دائما نظيف و مرتّب و ديريلو تنظيف أسبوعي تخلّصي من الأوراق الزايدة و القصاصات اللاصقة و الأدوات اللي ماتحتاجيهاش.
- و إذا كانت عندك خزانة أو مكتبة ما تخليهاش مليانة أو في فوضى ديريلها تنظيف شهري و فرز لكل الأغراض لي ماتحتاجيهاش .عاملي مقر عملك كيما بيتك.
النظافة ما تتجزأش …عندنا مَثَل قديم يسخر من المرأة اللِّي تنظّف بيتها و تخلِّي عتبتها أو تغسل وجهها و تتجاهل رقبتها …النَّظافة مرتبطة عميقا بمفهوم الجمال ..إلا انو جمال يتغلغل في التَّفاصيل و يخصّ في العموم و يشمل كلّ حواسك و حتى حواس المحيطين بيك عندما يتعلق الامر بالنَّظر و الشَّم و اللَّمس وين يكون الحكم عادل و قطعي …هنا يتجاوز الامر ذوقك الخاص الرَّاقي لسُمعة عند القاصي و الداني و لقب غالي عزّ في الناس الوصول اليه ؛ إلَّا إذا جمعتي في مفهومك للنَّظافة أطراف نفسك : جسمك و لبسك و بيتك و عطرك و ركن عملك مع طهارة الضمير و نقاء السر و العلانية و سلامة الصدر و حلاوة اللسان و وضوح البيان .
…شمس هنية
