يتميز الانسان الناجح بقدرتو على تنظيم حياتو و تخطيط اهدافو على مدار العام ، و في كل مرة يسطر قائمة من الاهداف يحققها باه يطور من نفسو و يحسن حياتو، و هذاالانسان عادة يعرف كيفاه يحفز روحو دايما و يشجع نفسو باه يوصل لتحقيق تلك الأهداف بوسائل و طرق عديدة و متنوعة من بينها المواسم و والمناسبات الخاصة لي تشجعنا على تحقيق اهدافنا كيما شهر رمضان، رمضان هو فرصة من ذهب و موسم رائع لكل واحد حب يحقق هدف معين او يحب يغير من نفسو، و بما انو مايتكررش و مايتعاودش لازم ما نخلوش هذا الفرصة الربانية تجوز هكداك بلا ما نستفادو منها، حبيت اليوم نعطيكم بعض الافكار لاهداف ممكن تحققوها في هذا الشهر الفضيل، طبعا هذه الافكار لكل وحدة راهي حابة تستفاد من هاذ الفرصة و ممكن تكون حايرة واش تقدر تحقق و خاصة كي تشوف الناس تجري و تحضر لرمضان و هي ماهيش عارفة بالضبط واش تقدر تدير ، راح نعطيك بعض الافكار اختي لي تستفادي منها.
الفكرة الأولى اولا و قبل كل شئ بما انو شهر رمضان هو شهر ايمانيات بالدرجة الاولى، فالاهداف الايمانية راح تكون فالمقدمة، من الاهداف الايمانية لي تقدري تحققيها في رمضان هو الصلاة و شهر رمضان هو الفرصة المناسبة باه تولي تصلي اذا كنتي ماتصليش او اذا كنتي تصلي و تخلي او تأخري وقت الصلاة، في رمضان الايمان تاعنا يزيد و هذا يسهل علينا المواضبة على اداء الصلوات المفروضة، و تقدري تاني تصلي النوافل بكثرة لانو النافلة في رمضان يولي عندها اجر تاع فريضة فمن غير الحكمة نضيعو هذا الاجر الكبير و الفضل الكثير.
الفكرة الثانية هي هدف الصدقة و هي من اعظم الاعمال عند الله في رمضان و في غير رمضان، اذا كنتي قادرة خصصي شئ تصدقي منو في رمضان دراهم،ملابس، اكل اي حاجة تقدري عليها.
الفكرة الثالثة هدف حول القرآن الكريم ، ما ننساوش رمضان هو شهر القرآن اذن لازم القرآن يكون عندو حظ كبير في يومنا شوفي الورد لي يخرج عليك و عدد الختمات لي حابة تكمليهم و اقرئيه يوميا، و هنا حبيت ننبهكم أخواتي انو القرآن نقراوه باه نتدبرو في اياته و معانيه و نفهمو ربي واش حاب يقولنا لانو التسابق على عدد الختمات الكثيرة ممكن مايصاحبهاش خشوع و تدبر.
الفكرة الرابعة الذكر ايضا مليح في رمضان خصصي اذكار تقوليها في يومك من تسبيح و حمد لله و واظبي عليها راح تخليك تهذبي لسانك و تبتعدي عن الغيبة و النميمة.
الفكرة الخامسة كاين لي في رمضان يديروا تقييم لانفسهم و يخططو لاهداف ما بعد رمضان في كل جوانب الحياة لانو هذا الشهر محطة لمراجعة و مراقبة انفسنا دينيا و دنيويا.
الفكرة السادسة ممكن تحطي من اهداف رمضان بانك تتقربي من عائلتك اكثر و تخصصي وقت لزيارتهم او الاتصال بهم باه تحسني العلاقات معاهم.
الفكرة السابعة حفظ سور معينة من القرآن الكريم خيري السورة لي راكي حابة تحفظيها و خططي لحفظ عدد ايات معينة فاليوم و ابداي تحفظيها.
الفكرة الثامنة التخلص من الفوضى بأنك تفرزي الملابس و كل حاجة عندك زايدة فالبيت لي تبيعيه و لي تصدقيه و لي ترميه.
الفكرة التاسعة ممكن تخططي انك تتعلمي الطبخ و الحلويات مع امك او تعلميها لبنتك او لاختك.
الفكرة العاشرة تحفظي ولادك بعض السور القصيرة
الفكرة الحاديه عشرمن أمثلة اهداف رمضان هو انك تولفي وليدك او بنتك الصغيرة الصوم و تبداي معاها غير بلعقل و تحببيهم في هذه العبادة.
و الفكرة الثانية عشر هي مراجعة حفظك للقران هي فرصة لمراجعة القرأن الكريم باه تسترجعيه و تثبتيه في ذاكرتك.
الفكرة الثالثة عشر الاكل الصحي و انقاص الوزن اذا كنتي حابة تغيري نمط اكلك و تنقصي من وزنك ممكن تبداي في رمضان لانو شهر رمضان هو شهر التخلص من السموم لي رانا ناكلو فيها عالعام و نتعودو ناكلو اكل نظيف و صحي.
الفكرة الرابعة عشر ادارة المال اذا حبيتي تنظمي ميزانيتك و مصروفك تقدري ديري خطة مالية لكامل العام و تبداي تخصصي مبلغ معين كتوفير ديري بيه كاش حاجة في بالك او تسافري بيه.
الفكرة الخامسة عشر من امثلة اهداف رمضان هو قراءة تفسير القرآن مثلا كل يوم تقراي تفسير اية و تفهميها مليح او انك تبعي برنامج تفسير على اليوتوب كل يوم حلقة.
الفكرة السادسة عشر انك تقراي كتاب معين اذا كنتي من محبي المطالعة و القراءة.
الفكرة السابعة عشر اذا كانت عندك حاجة حابة تبداي تتعليها استغلي هذا الشهر الفضيل مثلا تبداي تابعي دروس تعليم لغة جديدة او دروس رسم او خياطة او اي حاجة تستهويك.
الفكرة الثامنة عشر المشاركة في تنظيم افطار جماعي او افطار صائم في بيتك.
الفكرة التاسعة عشر الابتعاد عن وسائل التواصل الاجتماعي خاصة اذا كنتي مدمنة على هذه الوسائل فشهر رمضان يساعدك باه تتخلصي من هذه المشكلة.
الفكرة العشرون المشاركة في أعمال خيرية و تطوعية مثل جمع التبرعات و الانخراط في جمعيات خيرية.
الفكرة الحاديه و العشرون تعرفي وليدك او بنتك كل يوم على نبي من الانبياء عن طريق قراءة قصص الانبياء بطريقة بسيطة.
الفكرة الثانية و العشرون مراجعة الدروس اذا كنتي طالبة و عندك امتحانات بعد شهر رمضان ديري برنامج مراجعة تمشي عليه.
الفكرة الثالثة و العشرون حفظ اسماء الله الحسنى مع فهم معانيها.
الفكرة الرابعة و العشرون التطوع في مسجد تاع حومتك لتحفيظ القرآن للاطفال الصغار.
الفكرة الخامسة و العشرون تنقصي العصبية مع ولادك و تقعدي معاهم وقت اكثر.
من هذه الافكار نلاحظو انو اهداف رمضان متعددة و متنوعة منها الدينية و لي لازم نركزو عليها و نحطوها فالصدارة و كاين اهداف الصحية و العلمية و التعليمية و الاجتماعية و النفسية و هذا يخلينا نستنتجو انه شهر العمل و الانجاز ماشي شهر النوم و الكسل،
لهذا اختي ماتضيعيش وقتك اختاريلك اي حاجة حابة تحققيها و ابدايها في شهر رمضان، اخطيك من الخرطي و المسلسلات لي هدفها تجاري يعني يربحو دراهم و ثروات على ظهرك و اختاري هدف لي تقدري عليه باه ماتتعبيش بعد ايام و تستسلمي.
و ماتنسايش احتساب الاجر معنتها اختي كي تتعبي او تجوعي او تعطشي احتسبي الاجر عند ربي و انويه جهاد في سبيل الله هكذا راح تحسي بمتعة في صيامك و ماتحسيهش عبارة عن عذاب و مشقة.
اخواتي في هذا الموضوع حبيت نشارك معاكم امثلة عن اهداف رمضان و القائمة مزالت طويلة بزاف باش نشجعك و نحفزك على الانجاز و تحقيق الاهداف و كي نقول اهداف تقدر تكون أشياء بسيطة الا انها تحدث فرق في حياتك مثلا حفظ كل يوم ايه ممكن تستصغريها لكن في نهاية شهر تلقاي روحك حفظتي سورة كاملة من ثلاثون اية ، فرمضان ماشي شهر في السنة يخلاص و خلاص رمضان هو فرصة لبداية جديدة تفيدك لبقية السنة لازم نجتهدو في هذا الشهر الفضيل باه في نهايته نكونو طلعنا بحاجة تفيدنا لما بعد رمضان.
نتمنى انكم فهمتو الفكرة من وراء هذا الموضوع و نتمنى من كل قلبي اني نكون افدتكم اخواتي و لو شوية و رمضان كريم.
الشمس المشرقة