شهر رمضان هو محطة ايمانية هامة نتعلمو منها و نطورو انفسنا و نحسنو سلوكنا و عاداتنا و نتدربوا على الصبر، لهذا نحبو نستفادو منو و نستغله احسن استغلال بصح للاسف عاد يجوز بلخف و مانحسوش كامل بيه حتى يخلاص و مانحققوش فيه واش كنا حابين و السبب خواتاتي هو بعض الامور لي تسرقنا وقتنا في رمضان انا نسميها سارقوا الوقت في رمضان، لانو صح تسرقنا وقتنا بلا ما نفيقو و بعدها نحسو بالندم و تأنيب الضمير حبيتو تعرفو واشنو هوما هاد اللصوص لي تسرقنا الوقت في رمضان اقراو الموضوع للاخير.

خواتاتي لصوص الوقت كثرت و في رمضان تزيد و تكثر و عاد الوقت مافيهش كامل البركة هذا اذا خططنا و عرفنا واش حابين نديرو و نظمنا وقتنا و مايكفيش فما بالك اذا بقى وقتنا مهمل و ماشي منظم و ماشي مدروس من بين هذه اللصوص لي تديلنا الوقت عندنا :السوق، في رمضان تحكملنا على المارشيات و القضيان و تغيرنا هديك السلع المعروضة و الروايح الله الله، تخرجي على حاجة تلقاي روحك جوزتي نص النهار فالسوق و اكيد راح تدخلي تعبانة و بعدها نص النهار لي قعد يجوز كامل تقريبا فالمطبخ و فالليل تطيحي عيانة و هكذا كل يوم حتى يضيع الوقت منك، حبيبتي لكي تتجنبي هاذ المشكل نقولك حضري من قبل قائمة المشتريات باه كي تخرجي تروحي مباشرة لواش راكي حابة و ماتبقايش تدوري و تخممي هاذي نشريها،هاذي مانشريهاش، هاذي واقيلا خلاصتلي،هاذي عندي، و حاولي تخرجي صباح بكري باه تجتنبي الغاشي و ترجعي بلخف لدارك و انتبهي ختي تبقاي غير ادوري فالسوق بلا فايدة راح تضيعي وقتك و تبذلي مجهود زايد و اتعبي روحك، اذن فالتسوق الكثير هو واحد من لصوص الوقت في رمضان.

و كي نقولو السوق و القضيان نقولو الطياب، الطياب يسرق بزاف وقت في رمضان، خاصة لي يطيبو عدة اطباق و عدة مقبلات و عدة تحليات، و اكيد راكي لاحظتي انو بعد هاد الوقوف الطويل جدا فالمطبخ و فالاخير تأكلو زوج لقمات و تشبعو، على هذا انتبهي اختي من المطبخ في رمضان راهو يأخذ وقت كبير بزاف و تتعبي بزاف، نقولك ختي حضري من قبل واش راح تطيبي و اسألي افراد عائلتك واش حابين ياكلو هكذا تعرفي واش راح تحضري ولي يتشرطو و يتوحمو نقولك كوني ذكية تقدري طبق تاع البارح تبدليه و يرجع يبان جديد، و كاين لي يجربو وصفات جديدة و اذا مانجحتش تولي حالة طوارئ فالبيت و تولي تجري تحضري حاجة جديدة في اخر لحظة و تتقلقي و ترتبكي، اجتنبي هذا الفوضى و كوني ذكية و اعرفي كيفاه تتحكمي فالوقت تاع المطبخ باه مايديش وقت مهام اخرى تستنى فيك، واستعيني بالتحضير المسبق و التخطيط قبل بيوم.

التلفاز و ماادراك مالتلفاز، و لوكان نعرفو شحال يضيعلنا وقت في رمضان، هاذو مسلسلات، و هاذو وصفات، و هاذو برامج، و بلا ماننساو الوقت لي يضيع و حنا نستناو فالاشهار يجوز، و اكيد القنوات عادو يستغلو شهر رمضان في اطلاق برامج جديدة وعادو يعتبروه السباق الرمضاني، ياسلام هما يتسابقو و الخاسر الاكيد هو حنا لي نقعدو نتبعو فيهم،حذاري ثم حذاري ختي من هذه الخدع الإعلامية و ماتستسلميش ليهم اذا حبيتي اتفرجي حاجة و لا ثنين و الباقي راهم يعاودوه عالعام و كي نجو للصح كل البرامج و المسلسلات متشابهة و موضوعها واحد و هدفها شد انتباهنا في رمضان، انتبهي يجوزو الايام و ينتهي شهر رمضان و تندمي على الوقت الكثير لي ضاعلك و نتي مقابلة التلفزيون.

و كذلك الانترنت ختي يضيع بزاف الوقت في رمضان و في غير رمضان، و حنا النساء عادة نقعدو نبحثو على الوصفات و الاكلات، او ربما مجرد تضييع الوقت كيما نقولو نجيب فالوقت بالأنترنت ،حبيبتي قلصي من وقت الانترنت خاصة في رمضان راهو يلهيك و ماتفيقيش للوقت كيفاه يضيعلك، و خصصي وقت معين للإنترنت مثلا نص ساعة فالصباح و نص ساعة فالعشية او أقل او أكثر، المهم يكون الوقت محدد و معروف، و غير يخلاص الوقت حبسي النت مباشرة و نوضي ديري مهام اخرى.

و الحاجة لي ولات مشهورة و معروفة هو النوم الكثير في رمضان، للاسف عاد شهر رمضان مخصص للنوم و الرقاد و الكسل، اذا كنتي ختي من الناس لي ترقد نهار كامل في رمضان نقولك مراكيش مستفادة من فضائل و قيم هذا الشهر العظيم لهذا غيري هذه العادة السيئة و نوضي تخدمي على روحك رمضان عمرو ما كان تاع رقاد و كسل و انما هو شهر العمل و النشاط و المثابرة و الجهاد.
وكاين تاني عوامل اخرى مثل المكالمات الطويلة و الطويلة جدا و خاصة كي عادت المكالمات باطل و ولات لاتنتهي و القصرة و الهدرة بلا فايدة، و القعدة مع الجارة او الصديقة لوقت مطول، و السهر لوقت متأخر من الليل و كاين حتى لي يجوزو ليالي بيضاء مايرقدوش كامل حتى مور الفجر و يرقدوا نهار كامل .

كذلك كاين عامل ضمان الوقت و هو كي نشوفو النهار طويل في رمضان و عندنا متسع كبير نطمعو و نأجلو مهامنا و نقولو مزال الحال ، مزال المغرب درك شوية و نبدا العمل كي شغل نضمنو انو مزال كاين الوقت حتى يطير يجري بلا ما نحسولو.
اختي مرانيش نقول ما تتفرجيش التليفزيون او ما ترقديش او ماتخرجيش كامل او ماتستعمليش الانترنت لا، و انما كوني معتدلة و متوازنة و اعطي لكل حق حقه ما تخليش حاجة تدي وقت حاجة أخرى، واستعيني بقائمة المهام لي تكوني وجدتيها نهار من قبل و لي تحددي فيها المهام تاعك تاع اليوم و كذلك حددي فيها المهام المهمة ولي لازم تندار و الغير مهمة، هي قضية تنظيم و ترتيب الوقت بين المهام و الراحة و الترفيه، باه في اخر الشهر الفضيل تلقاي روحك خصصتي وقت و انجزتي اهدافك و استفدتي من مدرسة رمضان.
كانوا الصالحين و الأتقياء مايضيعوش و لا ثانية في هذا الشهر الفضيل لانهم يعرفولو قدرو و قيمتو لدرجة انهم كانو يحبسوا قراءة الكتب و يتفرغوا للعبادات و قراءة القرآن و حنا ليوم للاسف نضيعوا وقتنا في امور تافهة و ماتنفعناش و السبب عدم وعينا و عدم استشعارنا لهاذ النعمة العظيمة علينا.

احذري يا اختي العزيزة من لصوص الوقت و من تضييع الوقت الثمين في رمضان كل دقيقة بحقها صدقيني لو تعرفي تسيري وقتك راكي تنجزي مهام كثيرة و متعددة و تحققي اهدافك و تحسي بالرضا و السعادة عن نفسك خير ما تحسي بشعور الندم و التأنيب و تقولي لوكان غير درت كاش حاجة، وقتناحنا مسؤولين عليه و راح نتحاسبو عليه، وكيما نقولو شعارنا في كل موضوع لازم نعيشو صح و نستغلو الشهر الكريم بذكاء.

الشمس المشرقة.

إزالة البقع من القماش

الغسيل اليوم قدّ ما ولَّى ساهل بفضل التكنولوجيا المعاصِرة اللي اختصراتو في بعض الضَّغطات و عوّضت ساعات طويلة كانوا يقضيوها أُمَّهاتنا في تنظيف القماش ؛قدّما النتيجة أحيانا مش مُرضيَّة كفاية ؛و لحوايج كيما نقولو بالعامية “مايخرجوش مليح”؛ المشكل يتأكَّد في حالة البقع و النِّقاط اللي تُصاب بالأوساخ و غالبًا ماتنحِّيهاش الآلة مهما كانت متطوّرة؛ و مايأثّرش فيها الصابون و عمليات الدَّعك و التَّدوير و السُّرعات العالية اللي تقدمها هذي الأجهزة و يبقى المنظر بالفعل و كأنُّو هذاك اللباس مش مغسول ؛نشوفوها أحيانا في مئزر ولادنا كي يقيسها فقط خط القلم السّيال؛ و ربَّما تكون عندك قطعة عزيزة تبقاي محرومة من ارتداءها فقط لأنّها مصابة ببقعة ماعرفتيش تنحِّيها ؛و خفتي تعرّضيها لمواد قويَّة تتلفها و تخسريها نهائيًّا .
عمومًا لمواجهة هذا المشكل مش راح نرميو غسَّالاتنا و نرجعو نغسلوا بيدينا… أبداااا !…نقومو فقط بمعالجة بسيطة للبقع قبل الغسيل العادي ؛و نخَليو هذا العمل روتيني و دائم و يولِّي غسيلنا نظيف و ملابسنا تقعد جديدة.
تحتاجي فقط تحدّدي التِّقنيات الصّحيحة لإزالة البقع ؛و تعرفي الطُّرق و المواد المناسبة للمعالجة ؛باش تنظّمي مسار عملي يحافظ على غسيلك و يساعدك في مواجهة مختلف الأوساخ و أنواع البقع ؛هذا المقال و المقالات اللاحقة توجّهك في إنشاء نظام لمعالجة البقع و إزالة الاوساخ من أجل تصحيح عملية الغسيل و الحصول على أفضل النتائج.
أنواع البقع: من المفيد بداية تصنيف البقع الشائعة اللي تواجهها معظم ربات البيوت و وضعها ضمن فئات باش يتم العمل على مستوى النوع و معرفة طرق الغسيل و أساليب المعالجة:
البقع البروتينيَّة : كلّ أشكال السَّوائل الجسديَّة ؛سواء البشرية او الحيوانية هي مصدر للبقع البروتينية : كيما الدّم ؛منتجات الحليب ؛البيض و عصارة اللحم ؛إذا واجهتي هذا النَّوع من البقع يخصّك تعرفي مبدأ المعالجة ؛و ماترتكبيش بعض الأخطاء الشائعة اللِّي تفسد الأمر بدل إصلاحو ؛فالبقع البروتينية إجمالا تقاوم تماما الازالة بالماء الحار اللي على العكس من ذلك يقوم بترسيخها ؛كما أنُّو تسخين البرويتن يغيّر التَّركيبة الكيميائية نتاع القماش ؛كذلك استعمال الأحماض كيما الخل و الليمون يقدم أيضا نفس المفعول الخاطئ على البقعة البروتينية و لا يخدم أبدًا الرَّغبة في إزالتها .
إزالة البقع البرويتنية تكون بالماء البارد و فقط بالماء البارد ؛عمرك ماتسخّنيه؛ أوّل ما تتلقى القطعة البقعة البروتينية تعرّضيها للكثير من الماء البارد ؛راح يقوم بإزالتها فورًا ؛و لكن إذا مازالتش شمّخي البقعة بماء بارد و ملح ؛ثمّ أغسليها بصابون الأواني و شلّلي بماء بارد؛ لاحقا اغسليها عادي؛ مهم أنّك دائما تعاودي العمليَّة في حالة الضَّرورة و تبقاي تعالجي في البقعة و هي مشمّخة ؛ماتخليهاش تشيح و بقعتها فيها رايحة تزيد تصعب عليك معالجتها تخليهاش تجفّ إلَّا بعد ما تتأكّدي من إزالة كلّ البقع.
البقع الزيتية: تعتبر من أصعب أنواع البقع مطلقًا كلنا ندرك صعوبة التخلص من بقعة خردل فضلا على زيت السيارة على بدلة الميكانيكي ؛فهي تتطلّب المعالجة الفورية من خلال الغسيل بالماء الحارّ ؛إذا ماراحتش حطِّيها في بسينة و زيديلها الما المغلي و القليل من الخلّ او بكربونات الصوديوم ؛و خليها تتشمّخ ثم حكِّيها بفرشاة.
البقع غير البروتينية: باقي أنواع البقع اللي ماتندرجش في خانة البروتينية تقدري تتعاملي معاها بسهولة من خلال نقعها لمدَّة معيَّنة حسب تطلُّبها في الماء و الخل :مثلا عصير طماطم ؛بقعة فاكهة؛ مرقة ؛أحمر شفاه …إذا لم تزُل يمكنلك اللُّجوء لعجينة الخل و بكربونات الصوديوم ؛تطلي بيها البقعة و تخلِّيها فيها ل 30 دقيقة قبل ما تغسليها ؛الخلّ ينفع أيضا للبقع القديمة المزعجة .
تقنيات إزالة البقع :
تصرّفي بسرعة: 2 حوايج هوما اللي يعاونو البقع على التَّغلغل و الاستيطان في القماش هوما الوقت و الحرارة؛ مهما كانت أعذارك كأمّ مشغولة ماتقنعيش نفسك بتأجيل معالجة بقعة ؛هذا مش اختصار للوقت بالعكس كلّما أسرعتي في الحلّ كلما زالت البقعة بسرعة ؛و بالمقابل كلّما مرّ الوقت على البقعة تزيد تترسّخ و تصعُب اكثر ؛قومي بالتَّصرف فورًا أوّلماتواجهي أيّ حادث للتلطُّخ مع محاولة الإزالة باتِّباع التِّقنيات التَّالية ؛مشاكل البقع في الغسيل ماتبقاش مزعجة خاتش راكي عارفة واش تديري.

امسحي البقعة أوّل ماتقع ؛أقول تمسحيها مش تحكِّيها أو تفركيها ؛هذا التصرف غير صحيح و ممكن يؤدي لتوطُّن البقعة في ألياف القماش ؛ممَّا يصعّب عليك فيما بعد إزالتها ؛إذا كنتي مثلًا تقومي بإطعام طفلك و وقعت لقمة من الطَّعام على السِّروال اللي لابسو؛ تحكمي قطعة قماش نظيفة و تحاولي مباشرةً إزالة أثر اللقمة بواسطة هذي القطعة من خلال المسح بالتَّربيت باش تنحِّي المخلَّفات الزَّائدة من هذي اللُّقمة مادامها جديدة (ياويلك إذا نشفت كامل ولصقت على القماش)؛ اثناء الإزالة بقطعة القماش انتبهي تشوّهي محيط البقعة؛ ثمَّ و بالجانب النَّظيف من القماشة اللي راكي تمسحي بيها في البقعة و بعدما تكوني أزَلتي كلّ الزَّوائد عاودي امسحي مكان البقعة من خلال التَّربيت باش تخرّجيها من السّروال ؛ماشي تحُكِّيها “تضربيها بلطف”؛ كي تحُكِّيها راكي تطحني في بقايا اللُّقمة داخل الألياف و بالتَّالي تثبّتيها ؛و باش ماتنتشرش البقعة اخدمي من الخارج إلى الدَّاخل ؛ابداي من أطراف البقعة حتى الوسط باش الوسخ اللِّي نحيتيه ماتعاوديش تطليه في مكان آخر ؛و القطعة اللي راكي تمسحي بيها قلّبيها باستمرار للجانب النّظيف باش ماتشوّهيش البقعة في أماكن أخرى.

أزيلي مخلَّفات البقع الجافة بواسطة فرشاة أسنان قديمة ؛ واش يزيد على البقعة مخلَّفات جافَّة جيبيلها فرشاة أسنان و افرشيها ؛الفرشاة تقدر تدخل في ألياف القماش و تنحِّي كلّ الزَّوائد و تهنِّيك من كثير من العمل لاحقا.

 امسحي الزَّوائد الرَّطِبة من البقعة بواسطة سكِّين غير حادَّة ؛هذاك الوسخ المبلول اكشطيه و أزيليه من فوق البقعة؛ كيما كي تكوني أزَلتي الزَّوائد الجافَّة بالفرشاة نفس المفعول تقدّميه للزَّوائد المشمخة من خلال مسحها ؛انتبهي فقط لا تقومي بنشر البقعة على باقي المساحة.

طريقة اخرى لإزالة الزَّوائد سواء من الملبوسات او من الاثاث او السجادات كي تنقعي البقعة باستعمال ماص للتَّسرب خصوصًا إذا كانت بقعة زيتية ؛قومي باستعمال بكربونات الصوديوم او النّشا ؛ترُشِّيه على مكان البقعة خلِّيه دقائق راح يقوم بمصّ الزوائد تاع البقعة ؛ثم حكِّيه بفرشاة أسنان او باسفنجة.

استعملي الماء الجاري: باش تنحِّي الزَّوائد و قبل المباشرة في عمليات الغسيل ؛ روحي للحنفية أو في بسينة عرّضي القماش للكثير من الماء ؛راح يجتاح الألياف و يقوم بطرد جزيئات البقعة ؛و يمكن يكون وحدو كافي لإزالتها لأنُّو الما كيما نعرفو أقوى عنصر مطهِّر ؛في مطلق الأحوال و إذا كنتي ماتعرفيش مصدر البقع فإنَّه مِنَ الآمن استعمال الماء البارد ؛

الفكرة الأشمل في هذا المجال اللي تريّحنا كأمهات مشغولات هي نقع الغسيل في الماء سواء مع الصَّابون أو الجافيل او أيّ منظف آخر و تروحي تقضي أعمالك بينما التّرناخ يقوم بعملو السحري في إزالة البقع خصوصا الصَّعبة منها و المستعصية.

التقنية الأخيرة في معالجة البقعة قبل ماتباشري الغسيل هي الإستعانة ب”مزيل بقع” ؛تحطِّيه مباشرةً فوق البقعة بكميَّة قليلة ؛راح يساهم في إزالة الجزء العنيد منها ؛تحتاجي في هذا النَّوع من المعالجة باش تنجحي لجمع الأدوات و الظُّروف؛ لأنُّو الفعاليَّة مرتبطة بعدة أسباب منها نوع المُزيل ؛المدَّة اللي توطّنتها البقعة في القماش؛ نوع البقعة ؛لاحقا يرجع المسارفي غاية السُّهولة ؛ببساطة تلقاي البقعة ترشِّيها أو تحُكِّيها بمُزيل مناِسب ثم تدخّليها للغسَّالة ضمن العمل الاوتوماتيكي العادي وين تكوني نتي مرتاحة و ماتديري والو سوى قطف الثمار و الاستمتاع بالنتائج الرَّائعة و الغسيل النَّظيف .

..شمس هنية

الجافيل الفعالية و السلامة

الجافيل

ماء الجافيل يستعمل لكلّ أصناف التَّنظيفات في المنزل: من إزالة بقع الغسيل؛ و التنظيف؛ و مقاومة الروائح الكريهة؛ و حتى التَّعقيم .

الاستعمال الآمن الصَّحيح و الفعَّال للجافيل:

الجافيل عنصر رئيسي في خزاين منظِّفاتنا خاتش هو متعدِّد الإيجابيَّات و رخيص في الثمن و لكنو ممكن يؤثر بالضّرر على الأقمشة لأنُّو مادَّة قويَّة كي ماتقوميش بتحليلو في الماء؛لذلك فهو كمادَّة كيميائيَّة يجب ان يعامَل باحترام مع الحرص على متابعة قواعد السلامة.

ماهو ماء الجافيل؟

الجافيل مركَّب من عدَّة أنواع من المواد الكيميائية؛ “صوديوم الهيبروكلوريت”   l’hypochlorite de sodium: الاسم العلمي للجافيل NaClO و هو الصِّيغة الأقوى و يعمل من خلال تحرير غاز من أجل أكسدة او تبييض البقع .النوعية اللي نشريوها من المتاجر فيها نسبة تركيز تصل الى 4-6% فقط و لكنو مع ذلك يعتبر مركَّز قوي يجب ان يميَّه.

إستعمال ماء الجافيل للغسيل و إزالة البقع:

الاستعمال الأكثر شيوعا لماء الجافيل في الاعمال المنزلية هو في مجال الغسيل و تحديدا في إزالة البقع لذلك من المفيد تعرفي الإجراءات اللي ينبغي اتباعها باش تحصلي على افضل النتائج

-قبل ما تستخدمي الجافيل على أي قطعة قماش تاكدي أولا من مراجعة ملصق الارشادات؛ إذا لم يذكر انو ممنوع استعمال الجافيل فانه لا مانع من استعماله.

-حسب الغسالات: إذا كان فيها نظام لإضافة المبيِّض حطّيه في الخانة المخصَّصة و الغسَّالة تقوم بالعمل وحدها؛ و اذا كانت غسالة عادية بدون خاصية التبييض هنا لا يمكن إضافة الجافيل مباشرة فيها و لكن: كي تحبي تستعملي الجافيل زيديلو الماء ثمَّ أضيفيه للصَّابون باش تتجنبي البقع البيضاء.

-النَّقع في محلول ماء الجافيل يكون لمدة نصف ساعة في حدّ اقصى؛ استعملي المعدل نتاع ملعقة ماكلة جافيل في لتر ماء دافئ؛و انتبهي الى أنُّو التّرناخ  لفترات طويلة يضعف الألياف جدًّا؛ و يتسبّب في بهت الألوان و الفسيخ.

-و دائما كوني حذرة خاتش قطرة وحدة تبيّض و إذا طوّلت على قطعة القماش تقطعو لذلك في حالة حادث إنسكاب تصرفي فورا و شلّلي بسرعة؛ و ديري في بالك دائما بلي الإستعمال المُطوَّل بتركيز عالي يصفّر لحوايج البيضاء.

-و نظرا لمفعولو القوي و تاثيرو في الضرر على الاقمشة و الاسطح تجنبي استعمال الجافيل على:

• الحرير يصيرلو ضرر دائم
• الصوف ضرر دائم
• الموهير ضرردائم
• الجلد cuir ضرر دائم
• النيلون يصفار مع الاستعمال المطول و التركيز العالي
• الاقمشة الملونة: يضعّفها الجافيل و يتسبب في بهتان الألوان يفسخها و يمكن يبيضها
• صبونداكس Spandex  (القماش نتاع الفيزو و السكليست و الملابس الرياضية اللي تتكسل) الجافيل يصفرها و يضعف مادتها.
• الزربية و السجادة يدير بقع بيضاء .
• الأقمشة الشَّفافة و الرّقيقة و الضّعيفة الجافيل يقطعها.
• تجنبي استعمالو لمَّا الماء يكون فيه تركيز كبير من الحديد ؛يصير بيناتهم تفاعل يؤدي الى الإصفرار في القماش.
• ماتفاعليش الجافيل مع الصدا يعمّقو مايزيلوش .

التَّطهير و التَّعقيم بالجافيل :

يقوم ماء الجافيل بالتعقيم من خلال قتل البكتيريا و الفيروسات و حتَّى العفن و الجراثيم؛ لازم تستعمليه بشكل آمن حيث يكون مخفَّف بشكل صحيح باش تحصلي على مفعول قويّ في التَّطهير و ضعيف في التَّخريب؛ محلول ماء الجافيل المميه مليح لتعقيم و تنظيف الاسطح اللي تستعمل يوميا و تتعرّض للكثير من التَّعاملات لي تقدر تنتج عنها أوساخ حيويَّة كيما الكوزينة و الحمام وين تحتاجي باستمرار للتطهير؛

استعملي 1 لتر ماء دافئ و ربع كوب جافيل و ملعقة كبيرة صابون بودرة بعدما تخلطيهم كبيهم على السطح لي حابة تنظفيه؛ وماتخلِّيش المحلول ينشف فوقو ولكن مهمّ ترنخيه على الأقلّ 5 دقايق ثم شلّلي و امسحي؛ الصَّابون يبقى اختياري و يأمّن التنظيف إضافةً للتَّعقيم اللي يقوم بيه الجافيل.

يمكنك أيضا وضع ما مقداره ملعقة و نصف من الجافيل في بخَّاخة مع 2 كؤوس ماء و مغرفة صابون بودرة؛ترشيهم على المساحة لي حابة تعقميها هكذا العمل يكون أسهل؛ و لكن انتبهي الى أن الاستخدام دائما يكون في منطقة مُهوَّاة خاتش ريحة الجافيل قويَّة و ارتدي القفازات لحماية البشرة؛ ابداي نظّفي المكان أوَّلًا إذ كان شديد الإتِّساخ ثم رشي بالبخاخ باش تقومي بالتعقيم اللي مايكونش فوري لذلك خلِّي المحلول 5-10 دقايق على المساحة باش يأخذ مفعولو قبل ما تشللي؛ لأنُّو الجفاف مايخلِّيش الجافيل يخدم؛ هذا التَّركيز ماتستعمليهش على الألياف كيما القماش أو الخشب تاع الأثاث و كذلك التَّركيبات المعدنية.

قواعد السلامة :

الجافيل المتواجد في السوق يحتوي على التركيز التجاري 4-6%  لي هو تركيز عالي يجب تخفيفه ؛و ماشي إذا كان القليل يخدم مليح الكثير يخدم خير؛هذا قياس خاطئ التزمي بالكميات الموصوفة من مادة الجافيل في عملياتك التنظيفية خاتش الزيادة تقدر تكون مضرة و ديرلك تلف في الانسجة و الالياف و المواد تاع حوايجك.

ماتخلطيش الجافيل مع كيمياويات أخرى كيما الامونيا او الخل؛ لأنُّو ينتج عن تفاعلهم غاز عالي السُّمِيَّة تاثر على صحتك و اسرتك.

كي تحبي تخدمي بالجافيل البسي ملابس قديمة اومئزر لحماية ثيابك ؛ و للبشرة استعملي دائما قفَّازات كي تخلطيه بيديك و حاذري على عينيك من الرَّذاذ؛ و خلطيه في مكان مهوَّى؛ يعني تفتحي النَّافذة او المروحة .

التخزين و الفعالية

على اعتبار خطورة كل المواد الكيمياوية و بالذات الجافيل مهم جدا انك تعتني بتخزينه بعيدا عن متناول الأطفال؛ اما اللي قمتي بتمييهو او وضعتيه في بخاخ فليس مفيدا القيام بتخزينه خاتش الكلوروصوديوم يتحلّل و يتكسّر بسرعة نسبيًّا لذلك كلّما تستعملي الجافيل في محلول ارمي الباقي منو ماشي تستعمليه مرة أخرى.

مدة التخزين للعبوات المغلقة قبل ماتفتح تماما تكون حسب الاستعمال الموجه فذا كنتي راح تستغلي الجافيل

-للتطهير المنزلي يمكنك حفظ العبوة المغلقة في الخزانة لمدة 6 أشهر

-اما اذا كان الجافيل للاستعمال في القماش و للملابس تقدري تخبيه حتى ل 9-12 شهر .

كيفاش تختبري ممانعة الاقمشة للفسيخ و تبييض الالوان؟

ديري كشف صغير في مكان مش باين من القطعة مثلا خياطة جانبية؛ بحيث تحكمي محلول نتاع ربع كوب ماء فيه مغرف جافيل؛ و بقطنة ديري المحلول في الخياطة؛ و خلِّيه دقيقة و مبعد نشّفيه بفوطة ورقية؛

إذا بقات الفوطة نظيفة معناها بلي قطعة القماش او الملابس اللي اختبرتيها راهي ماتفسخش او تفقد لونها؛و روحي للمنطقة اللي درتيلها الكشف شوفي هل يبقى اللون بنفس الوضوح هذا معناه بلي اللون اصلي و مايروحش مع الغسيل.

اما اذا خرج في الفوطة الورقية لون كيما نتاع القماش (مثلا درتي الكشف على سروال جينز و خرجت الفوطة زرقاء) هذا معناه بلي القطعة تفسخ ؛لاحظي كذلك المنطقة تاع الكشف اذا لونها تغير .

…شمس هنية