الكثير من ربات البيوت يحتارو في اختيار أواني الطبخ الخاصة بمطابخهم كيما

( القدور، الطناجر، المقالي، الكاسرول) وهذا يرجع لكثرة الخيارات أمامهن في الأسواق من خلال الأسعار والأحجام والأشكال والأنواع (ستانلس ستيل، ألومنيوم، نحاس، فخار، التيفال)، هذا التنوع يزيد من حيرة ربة البيت ورغبتها في اختيار أحسن الأنواع من أواني الطبخ وإلي يكون صحي وبثمن معقول كذلك.

في هذا الموضوع حبينا نعرفو مليح أواني الطبخ الستانلس ستيل وإلي انتشر الحديث عليها لأنها من أكثر الأواني شيوعا في مجال الطبخ

ويعني إسم ستانلس ستيل stainless steel أن هذا المعدن غير قابل للصدأ، وهاذو الأواني هم عبارة عن خليط من بعض المعادن الثقيلة كيما النيكل والبروم والمولبيديوم، و تقدر ربة البيت تستخدم هاذو الأواني لأنها آمنة

وتعتبر من أفضل أنواع أوعية الطهي وأكثرها صحية للإنسان.

كاين نوعين من أواني الطبخ ستانلس ستيل:

النوع الأول وزنو خفيف والقاعدة تاعو تكون رقيقة.

والنوع الثاني وزنو ثقيل والقاعدة تاعو تكون خشينة و يكون ثاني مبطنّ بالنحاس أو الألومنيوم، وهذا التبطين ما يكونش فقط في القاعدة، بصح يكون ثاني في الحواف والأطراف، وأواني الستانلس ستيل إلي تكون مبطنّة بالنحاس أفضل من المبطنّة بالألومنيوم، لخاتش النحاس يوصّل الحرارة أحسن.

 

مميزات أواني الستانلس ستيل:

1. إلي يميز هاذو الأواني أنها غير قابلة للصدأ.

2. ماتتفاعلش مع الأكل وماتتأثرش بالأحماض.

3. ما يصرالهاش ثقوب كيما إلي نشوفوهم في أواني الألومنيوم.

4. اذا حافظتي عليها رايحة تعيشلك مدة طوييييلة.

5. صالحة لطهي جميع أنواع الطعام خاصة النوعية الثقيلة.

6. تبقى محتفظة بالحرارة لمدة طويلة من الزمن.

7. هاذ النوع من الأواني كيما قلنا في البداية من أفضل أنواع أوعية الطهي وأكثرها صحية.

8. سهلة التنظيف تقدري تنظفيها بسائل غسيل الأواني فقط، وإذا لقيتي سواد فيها تقدري تغلّي فيها شوية ماء وجافيل راح تتخلصي منو بسهولة.

عيوب أواني الستانلس ستيل:

1. اذا كانت من النوع الخفيف وإلي القاعدة تاعو رقيقة راح يلصق فيها الأكل، ويمكن أنو يحترق على هذا لازم تنقصي من درجة الحرارة كي تطيبي فيها.

2. الحرارة ماتتوزعش فيها بطريقة جيدة خاصة النوع الخفيف.

3. اذا استخدمتي مقلاة ستانلس ستيل لازم تستعملي كمية كبيييرة من الزيت.

4. اذا كان استخدامك لهاذ الأواني سيء، راح يتسبب في حدوث ثقوب وخدوش وحفر فيها وهاذ الشي راح يساعد على تجمع البكتيريا في هاذ الثقوب، وثاني هاذوك الخدوش والثقوب تسرّب المعادن الضارة للطعام.

إذن كي تحبّي تشري أواني الطبخ الستانلس ستيل اختاري الأوعية الثقيلة، لخاتش الأوعية الثقيلة تعتبر من الأوعية الصحية أكثر

لأنها تتكون من عدة طبقات من المعدن باش توزع الحرارة بشكل جيد وحاولي تحافظي على أواني الطهي تاعك في مكان نظيف، وأقراي  مليح على كيفية استخدامها والحفاظ عليها.

النصيحة إلي نقدموها في الأخير أنو أثناء شراء أواني الطهي لازم تكون معايير الشراء هي الصحة مش الشكل أو السعر أو اللون، يعني لازم علينا نختارو أواني الطبخ تاعنا على أساس ملاءمتها لصحتنا والمحافظة عليها من الأمراض، بحيث أنو كاين كثير من الناس يعانيو من عدة مشاكل صحية بسبب سوء استخدام أواني الطهي أو اختيار أواني طهي من النوع الرديء.

 

… شمس راقية

إذا حبيتي تتخلصي من التوتر والجهد تاع اليوم الشاق والطويل في الشغل، ننصحك أنك تستعملي كرات الاستحمام الفوارة، راهي مثالية باش تعطيك المزيد من الهدوء والاسترخاء، بلا ما ننساو الريحة الزكية والمنعشة تاعهم، كيما ثاني هاذو الكرات يساهمو في تخليص جسمك من الخلايا الميتة ويقومو بعملية ترطيب وتنعيم بشرتك.

فوائد كرات الاستحمام الفوّارة:

كاين فوائد كثيرة للكرات الفوارة منها: تعقيم الجسم وتنظيفه من الشوائب والبثور والدهون، إزالة سموم الجسم، تقشير البشرة بفضل بكربونات الصوديوم، استرخاء وتهدئة العضلات من خلال إضافة الزيوت المهدئة والأملاح، تنعيم وترطيب الجلد، تمنح الجسم رائحة جميلة ومنعشة، تعمل على تنشيط الدورة الدموية بإضافة الزيوت الأساسية المنشطة، علاج بعض الأمراض مثل الصداع النصفي والتهاب المفاصل والربو والاكتئاب بحسب الإضافات اللي نكونو ضفناها في تركيبة هاذي الكرات الفوارة.

تحضير كرات الاستحمام الفوّارة في المنزل:

تقدري تشري كرات الاستحمام الفوّارة مباشرة  من السوق، كيما تقدري تحضرّي هاذو الكرات الفوارة في المنزل، لخاتش تحضيرها سهل وفي متناول كل السيدات الراغبات في الاسترخاء، بالإضافة إلى  أنو مكوناتها متوفرة وطريقة تحضيرها بسيطة.

 

المكونات:

 

1. كاس بكربونات الصوديوم

2. نص كاس ملح الليمون

3. نص كاس نشاء

4. كمية من الورد المجفف (يباع عند العشاب)

5. ملعقة كبيرة زيت عطري ( زيت الورد أو زيت خزامى أو زيت ليمون أو زيت جوز الهند)

6. قوالب تاع السيليكون ( اختياري)

7. كمية من الماء

8. ملوّنات غذائية ( اختياري)

 

طريقة تحضير الكريات الفوارة:

 

خلطّي كل المكونات المذكورة مع بعض وحاولي تلميّها بالماء بايديك مليح و ماتكثريش الماء لميها برك.

وأمبعد تاخذي كرات صغيرة في ايدك وحطيهم في ليمول تاع السيليكون أو في أي مول آخر يكون كروي الشكل باش تخرجلك على شكل كرات، أو شكليهم بايدك فقط بكل بساطة، كي تكملّي خليهم ينشفو حوالي 24 ساعة،  بعدها نحيّهم من المول إلي كانو فيه وخبيهم في علبة زجاجية.

و كل ما تحبّي تستحمي عمرّي حوض الاستحمام تاعك بماء دافي وحطي كرة فوارة من إلي خدمتيهم في الحوض تاعك، راح تفور هاذيك الكرة و تنبعث منها ريحة هااايلة في هذاك الوقت أدخلي في الحوض و استمتعي بأحلى حمام استرخاء.

 

 


… شمس راقية

 

معظم السيّدات نلقاوهم يبحثو على بدائل للمستحضرات الكيميائية من الطبيعة، لخاتش يحسّو أنو المستحضرات الكيميائية تضّر بشرتهم، وثاني هاذي المستحضرات غالبا ما تكون أثمانها غالية، على هذا ينصحو خبراء التجميل بالعديد من الوصفات  الطبيعية وإلي تكون بديلة للمستحضرات الكيميائية من أجل إزالة الماكياج من الوجه حسب نوع كل بشرة.

 

مزيل ماكياج للبشرة العادية:

المكونات:

كمية من ماء الأرز

2 ملاعق بودرة الحليب

1 ملعقة صغيرة زيت زيتون أو زيت نواة المشمش

 

طريقة التحضير: 

تاخذي الأرز حطيّه في صحن وفرغّي عليه ماء سخون وخليّه يترقّد مليح، وأمبعد صفيّ الماء من الأرز وضيفيلو حليب البودرة وزيت الزيتون أو زيت نواة المشمش، واستعمليه في إزالة الماكياج من الوجه بواسطة الدوائر القطنية، وتقدري تحتفظي بيه في علبة في الثلاجة.

 

مزيل ماكياج للبشرة الجافة:

المكونات:

كمية من ماء الشوفان

2 ملاعق بودرة الحليب

1 ملعقة صغيرة زيت اللوز أو زيت الزيتون

 

طريقة التحضير: 

تاخذي الشوفان حطيّه في صحن وفرغّي عليه ماء سخون وخليّه يترقّد مليح، وأمبعد صفيّ الماء من الشوفان وضيفيلو حليب البودرة وزيت الزيتون أو زيت اللوز، واستعمليه في إزالة الماكياج من الوجه بواسطة الدوائر القطنية، وتقدري تحتفظي بيه في علبة في الثلاجة.

 

مزيل ماكياج للبشرة الدهنية:

المكونات:

كمية من الشاي أو الزعتر أو البابونج

2 ملاعق بودرة الحليب

1 ملعقة صغيرة زيت الخزامة أو أي زيت تفضليه

 

طريقة التحضير: 

تاخذي الشاي أو الزعتر أو البابونج حطيّه في صحن وفرغّي عليه ماء سخون وخليّه يترقّد مليح، وأمبعد صفيّ الماء من الشاي أو الزعتر أو البابونج وضيفيلو حليب البودرة وزيت الخزامة أو أي نوع آخر من الزيوت، واستعمليه في إزالة الماكياج من الوجه بواسطة الدوائر القطنية، وتقدري تحتفظي بيه في علبة في الثلاجة.

 

ملاحظة: دايما أخدمي كميات صغيرة باش ما تطوليش تحتفظي بيها في الثلاجة وتفسد، يعني ديري كمية إلي تكفيك أسبوع فقط. وعاودي كمية أخرى الاسبوع الجاي وهكا.

 

… شمس راقية 

كانت رحمة الفتاة المدللّة في عائلتها، فهي الأصغر والأجمل والأكثر أخلاقا، تربّت رحمة في بيت والديها معززة مكرمّة خاصة أنو باباها كان تاجر كبير في المدينة،

وماكان يبخل على دارو بحتى حاجة، بحيث أنو بناته عاشو في رفاهية تامة وعيش رغيد.
جا مكتوب بنات هذا التاجر وتزوجّو وحدة ورا وحدة، وكل وحدة كان زوجها أحسن من إلي قبلو ماديا، يعني عاشو حياة الرفاهية عند الأب وعند الزوج ( خدم وحشم وأموال).
كان من المتوقّع أنو رحمة على اعتبار أنها أجمل خواتاتها تتزوّج أغنى واحد في المدينة، باش تزيد تتفوق على خواتاتها حتى في الزواج.
وبالنظر للمواصفات إلي كانت تتمتع بيها رحمة، فقد شيع عنها في كل المدينة عن جمالها ودلالها وأخلاقها وذكاءها،

هاذ الأمور خلاّت شباب المدينة إلي راهم في سن الزواج كامل يحلمو بيها ويتمناوها زوجة ليهم، بصح كانو دايما يخممّو أنو مستحيل رحمة تقبل بيهم، على الرغم من القوة والشباب والغنى والسلطة إلي عندهم، إلا أنهم كانو يشوفو أنو رحمة راح ترفضهم كاملين لأنو حسب نظرهم الشاب إلي راهي تستنى فيه رحمة وتتمناه زوج ليها يستحيل يكون بيناتهم باش يفوز بيها.
فاتت السنين وما تقدّم حتى شاب من شباب المدينة المعروفين باش يخطبو رحمة خوفا من الرفض والإهانة إلي تجي بعد الرفض، في هذا الوقت كانت رحمة عايشة حياتها في دار والديها مثل الأميرة كل طلباتها مجابة وكل أمانيها محققّة، لخاتش هاذي هي الطفلة المدللة تاع باباها.
وفي طرف المدينة كان يعيش سعيد، شاب قوي، طيب، خلوق، بارّ بوالديه بصح فقيييير، كان ينوض الصباح بكري يروح للغابة يقطع الاغصان اليابسة ويجمعها ويبيعها في السوق، وإلي باع بيها يشريها أكل ليه ولوالديه الكبار في السن.

سمع سعيد بجمال وذكاء رحمة الشايع في المدينة، وكيما كل الشباب تمناها زوجة ليه. سعيد كان يختلف على الشباب الاخرين بأنو كانت عندو ثقة في الله وثقة في نفسو كبيرة، على هذا ما ترددش دقيقة في أنو يخطب رحمة.
كيما كان الحال راح سعيد للقصر إلي عايشة فيه رحمة وطلب الاذن باش يقابل باباها، سمحلو باباها أنو يقابلو ويشوف واش يحوس.
دخل سعيد لغرفة الاستقبال وقعد في مكان يكون وجها لوجه مع الأب تاع رحمة وطلب منو أنو يزوّجو بنتو رحمة على سنة الله ورسوله، في البداية والد رحمة تفاجأ من طلب سعيد بالزواج من الغالية والمدللّة رحمة، بصح في قرارة نفسو عجباتو شجاعة سعيد وجرأتو وثقتو في نفسو.
طلب والد رحمة مهلة باش يفكر في طلب سعيد وباش يشاور رحمة. وبعد هذا اللقاء بدا والد رحمة في السؤال على سعيد وطلب من الحاشية تاعو يجيبولو كل أخباره، بعد مدة قصيرة خبرّوه الحاشية أنو شاب يتمتع بالقوة والذكاء والأخلاق ما لم يتمتع بيه غيرو، وأنو بار بوالديه الكبار في السن، وأنو الناس كامل تشكر فيه.
هاذ الكلام فرّح والد رحمة وقرر أنو يقنّع رحمة تتزوج بيه خاصة أنو ما تقدّم ليها حتى شاب لحد الآن، تفاجأت رحمة من كلام باباها وقاتلو كيفاش أنا نتزوج بحطّاب؟ وكيفاش راح نعيش في كوخ في طرف المدينة، ضحك باباها وقالها: وشكون إلي قالك بلي نرضالك تعيشي في كوخ، بعد الزواج ان شاء الله نبنيلك أحسن قصر

ونعطي لزوجك الأملاك وراح تعيشي بنفس المستوى إلي راكي عايشة فيه، أنا عجبتني أخلاق الشاب ومانيش حابّ نفرّط فيه.
اقتنعت رحمة بكلام باباها ووافقت على الزواج مع سعيد، وتمّ الزواج بالفعل في أقرب وقت ممكن ودارو عرس كبير حضرو فيه كل سكان المدينة، وكان هذا اليوم أسعد يوم في حياة سعيد لأنو تزوج بالفتاة إلي تمناها، وأسعد يوم في حياة والدّي سعيد لأنو ربي استجاب لدعاؤهم وشافو سعيد عريس.


غدوى من ذاك خبّر سعيد زوجتو رحمة باش تروح تعيش معاه في دارو، جاوبت رحمة وقاتلو نبقاو هنا في دار بابا حتان يبنيلي بابا القصر إلي وعدني بيه، قالها: لالا، أنا مانحبش نسيبي يتصدّق عليا، عرفني حطّاب وزوجنّي بنتو وأنا حطّاب، لازم تعيشي حسب ظروفي أنا.
تفاجأت رحمة من كلام زوجها سعيد، وماتوقعتش منو هذا الردّ، كانت متوقعة أنو راح يفرح بالعطايا إلي راح يقدمهم باباها ليهم.
خبرّت رحمة باباها بقرار سعيد في أنهم يروحو يسكنو في دارو إلي في طرف المدينة، فرح والد رحمة بقرار سعيد و زاد تأكد أنو سعيد لما خطب بنتو رحمة مكانش طامع في رزق باباها، وقالها : يا بنتي هذا زوجك ولازم أطيعيه وأتبعيّه وتروحي معاه وين يقلك. إذا ماقدرتيش تتحملّي دار باباك مفتوحة في أي وقت ليك.
كيما كان الحال راحت رحمة مع زوجها سعيد باش يسكنو في دارو إلي في طرف المدينة،

كان سعيد بالنسبة لرحمة نِعم الزوج، كان يحبّها ويحترمها ويلبيّلها كل طلباتها في حدود قدرتو المادية، كان يعمل ليل ونهار باش رحمة تعيش في سعادة وحياة هانية.
حاولت رحمة تتأقلم مع وضعها الجديد، بصح ما قدرتش، كانت تنوض الصباح بكري تشعل النار وتطيب الفطور لزوجها وأبويه، كانت تمشي مسافة طويلة باش تجيب الماء على كتفها، كانت تغسل الثياب والاواني وتنظف وتقوم بأعمال شاقة ماتعودتش أنها تديرها في دار باباها، بحكم أنو كان عندهم الكثير من الخادمات يقومو بكل شيء، هي فقط ترتاح وتستمتع بالبساتين والأزهار.
قعدت رحمة تفكّر في وضعها الجديد وأمورها إلي انقلبت رأسا على عقب، وخممّت مع روحها أنو ماكان حتى حاجة تلزمها تعيش مع سعيد العيشة المزرية هاذي، ودار باباها أحسنلها من هاذ الجحيم والتعب إلي راهي فيه.
بعد تفكير عميق قررّت رحمة أنها تهرب من عند سعيد وترجع لباباها وتطلب منو يطلقها من سعيد لأنها ما قدرتش تتحمّل هاذ العيشة، جمعت شوية حوايج وأكل باش تتقوّت بيهم في الطريق وقررّت أنو بمجرد ما يرقد سعيد وأبويه تهرب في الليل لعند باباها. حطّت السرّة إلي جمعتها تحت راسها وقالت نرقد شوية نرتاح باش في الليل نقدر نمشي مسافة طويلة، بمجرد ما غفات عين رحمة تشوف في روحها في المنام أنها هربت ومشات طريق طويلة وانتهى الماء الي كان عندها، وهي تحوّس على الماء، تشوف شيخ كبير قاعد في نهاية ساقية

ويسقي للناس في الماء، كانت مجموعة كبيرة من الناس دايرين الصف ويستناو في دورهم باش يسقيلهم الشيخ الماء.
وقفت رحمة في الصف مع الناس إلي واقفين تستنى في دورها وتلاحظ، كان الشيخ وين ما يلحق دور كاش واحد يعمرّلو الماء ويعطيه، كاين الي يعمرّلو بيدون كبيييير، كاين الي يعمرّلو بيدون صغير، كاين الي يعمرّلو طاس، كاين الي يعمرّلو كاس…. وهكذا.
لحق دور رحمة في السقاية خزر فيها الشيخ وقطع ورقة شجر من إلي كانت بجنبو وغطسها في الماء وعطاهالها،

تفاجأت رحمة من هاذ الفعل تاع الشيخ وقاتلو: هذا واش تعطيني؟؟ واحد تعطيه بيدون، واحد طاس، واحد كاس…الخ وأنا تشمخلي ورقة شجر في الماء وتعطيهالي!!.
ردّ عليها الشيخ وقالها: هذا مكتوبك، وهذا واش عطاك ربّي.
ناضت رحمة من نومها على هاذ العبارة تاع: هذا مكتوبك، وهذا واش عطاك ربّي. استغفرت رحمة ربّي على عدم رضاها بمكتوبها وبكات،

وقررّت أنها ترضى بمكتوبها وبواش عطاها ربّي و ماتهربش لدار باباها وتبقى مع زوجها سعيد وتصبر على المعيشة معاه

فمهما كان فقير إلا أنو زوج يحبّها وحنين عليها ويدير الشيء إلي يقدر عليه باش يسعدها.

 

… شمس راقية

غالبا ما تحتار السيّدات في طريقة ترتيب وتنظيم أدوات التجميل والماكياج الخاصة بيها، خاصة لما يكونو عندها أطفال صغار في البيت وماتعرفش وين؟ وكيفاش؟ تخبّي أغراضها التجميلية بعيد عليهم وفي نفس الوقت يكونو في متناولها باش تعتني بجمالها وتظهر في أجمل حُلة.

كاين أفكار كثيرة ومتنوعة تساعد السيّدة باش ترتبّ أدواتها التجميلية ومكياجها ويكونو في متناول يدها في أي وقت تحتاجهم، وعلى السيّدة برك أنها تختار الطريقة إلي تناسبها وتوالم ظروفها.

تقدري ترتبّي أدوات التجميل تاعك في الدرج ، وتستعيني بفواصل خشبية حتى تقدري تفصلي كل نوع في جهة وحدو.

نفس فكرة الترتيب في الدرج وبالاستعانة بسلال بلاستيكية صغيرة باش تجمعي فيها الأدوات المتشابهة، راح تعطيك شكل جميل ومنظّم للدرج.

اذا كان عندك أطفال وتخافي أنهم يلعبولك بأدواتك تقدري تستعملي الحقيبة الخاصة بالماكياج، وتجمعي فيها ماكياجك كامل وتخبيه في خزانتك بعيد على أطفالك، وتجبديها وقت الاستعمال وتعاودي ترجعيها.

كاين حقائب للماكياج خاصة بالسفر، تجمعي فيها ماكياجك، وتلفّيها على شكل لُفافة وتغلقيها.

كاين منظمّات خاصة بترتيب الماكياج تباع في المحلات، تنظّمي فيها ماكياجك وتعطيك شكل جميل في غرفتك.

تقدري تستعملي الأدراج البلاستيكية  إلي حجمها صغير وجميل في ترتيب ماكياجك.

وكاين ثاني الأدراج البلاستيكية الشفافة ، وإلي راح تظهرلك من خلالهم الأشياء ومستحضراتك التجميلية إلي تحتاجيها.

تقدري تستخدمي الصناديق الخاصة بالماكياج، راح تجمعلك كمية كبيرة من مستلزمات التجميل وتغلقيها بعد الاستعمال ببساطة.

كاين هذا المنظّم إلي جاي شكلو كيما الحقيبة وتعلقيّه في الحمّام وقت استعمال أدوات التجميل.

وكاين هذا إلي تقدري تعلقيّه في الباب الداخلي للخزانة.

كيفيةصنع منظمّات للماكياج في البيت:

 

تقدري تصنعي منظّم لمكياجك في البيت وبأدوات بسيطة، تجيبي 6 قارورات تاع ماء فارغين وتقطعي الجزء السفلي منهم بحيث تتحصلّي على 6 كؤوس، زينّي حواف الكؤوس بشريط ملون ولا مررّي عليه الصمغ ( لساق)، وذرذري عليه اللمّاع البودر المهم باش تتغيّر الحافة تاعو، أمبعد لصقّي هاذيك الكؤوس مع بعضاها بمسدس الشمع كيما راهي توضّح الصورة ورتبّي فيها ماكياجك.

تقدري ثاني تصنعي منظّم لمكياجك بعلبة كرتون للأحذية وتقسمّيها من الداخل حسب كمية ماكياجك وأحجام الأدوات إلي راح تخبيهم فيها كيما في الصورة.

تقدري تستعملي سلة بلاستيكية أو خشبية وتزينيها بأشرطة ملونة وورود، بحيث أنك تعطيها صورة فنية تبعث فيك السعادة، وترتبّي فيها ماكياجك بشكل جميل.

إذا كانت عندك كؤوس وصحون ماتحتاجيهاش وشكلها جميل تقدري تستعمليهم للتنظيم وتزينيهم، بحيث تعطيهم شكل أجمل ومختلف، ونظمّي فيها أدواتك التجميلية.

اذا كانت عندك العلب الزجاجية الشفافة تاع التوابل وماتحتاجيهاش، تقدري تستعمليها في تجميع أدوات مكياجك المتشابهة، كل مجموعة في علبة وحدها، كيما أصابع أحمر الشفاه، وألوان طلاء الأظافر، وقطع القطن المزيلة للمكياج، وأعواد القطن وغيرها، حاولي تختاري علب جميلة باش تعطي مظهر لائق في غرفتك.

نصيحة أخيرة:

تخلصي من مستحضرات التجميل والكريمات إلي مااستخدمتيهاش لمدة تتجاوز  6 شهور.

 أفرزي أدوات ماكياجك كل مجموعة وحدها باش يسهل عليك استعمالها ( ظلال العيون ، أحمر الشفاه، أقلام الكحل، أقلام التحديد، طلاء الأظافر وغيرها).

 أجمعي فراشي المكياج مع بعضاها ونظفيها بشكل دوري بالبلسم والماء.

اذا كنتي ما تستخدميش الماكياج بزاف أشري الأنواع إلي تكون فيها كميات قليلة، باش تنتهي بسرعة وماتطولش عندك ياسر وتفسد وبالتالي تضر البشرة تاعك.

أضيفي قطرات من زيت الخروع للماسكرا تاعك إذا نشفتلك، راح ترجع تسيح وتعمل بشكل مليح.

 

… شمس راقية 

كلّ السيّدات الأنيقات يحبّو يكون عندهم مجموعة معتبرة من الحقائب تختلف في أحجامها وألوانها وأشكالها، بصح تصادفهم مشكلة ترتيب وحفظ هاذ العدد الكبير من الحقائب، ويحاولو في كل مرة يلقاو الطريقة الصحيحة إلي تساعدهم باش يرتبّو حقائبهم بشكل جميل وفي نفس الوقت تكون طريقة آمنة تحافظلهم على حقائبهم لمدة طويلة.

كيفاش ترتبّي الحقائب تاعك؟

 كاين مجموعة من النصائح يقدموها خبراء الموضة للمرأة باش تعتني بحقائبها وتحافظ عليهم من بينها:

–  رتبّي حقائبك حسب اللون والحجم: 

يعني حطي الألوان المتقاربة بجنب بعض، وهكا كي تحوسيّ على كاش لون تلقايه بسرعة بين الألوان

ورتبيّ الحقائب الكبيرة مع بعض والصغيرة مع بعض، باش ما يضيعولكش الحقائب الصغار تحت الكبار وتنسايهم.

– قومي بملأ حقيبتك بقماش أو ورق الجرائد:

هاذي الخطوة ضرورية باش تحافظي على شكل حقيبتك الطبيعي،  و باش ما تتكمشش وما تتكسرش، وتحافظي عليها مدة طويلة، إذن عمريّها بقماش قديم أو ورق الجرائد قبل ما تخبيّها وتخزنيّها.

 -احتفظي بحقيبتك في غلاف واقي:

عادة كي تشري حقيبة يد جديدة يكون معاها غلاف مصنوع من القماش، الفائدة تاعو أنو يحفظ الحقيبة من الغبار والبقع والأتربة، إذن احتفظي بهذاك الغلاف إلي يجي معاها وخبّي فيه حقيبتك في كل مرة تحبّي تخزنّيها

باش هاذ الغلاف يحميها من الغبار والبقع أو التلف، وإذا ما عندكش هاذ الغلاف تقدري تخيطِيلها واحد بقماش قديم.

– استعملي الصناديق للحقائب الفخمة:

باش تحافظي على الحقائب تاعك الفخمة وغالية الثمن من الخدوش والبقع والتلف، لازم عليك تخبيّها في صناديق خاصة

واحتفظي بيها في الرف العلوي لخزانتك.

– استعلي السلّة المبطنّة لحقائب السهرة:

كي تكوني حابة تحافظي على جمال وأناقة حقائب اليد الصغيرة تاعك أو حقائب السهرة الجميلة،  أجمعيهم  مع بعض في علبة مبطنّة

أو حطيّهم في صندوق خاص بصّح لفّي الحقيبة بقطعة قماش باش تحافظي على الأساور المعدنية تاع الحقائب من التلف وثاني باش تتجنبّي أنو يفسدو أو يسقطو الاكسسوارات إلي يكونو مزينين الحقيبة.

– استعملي الأرفف للحقائب الكبيرة:

إذا كان عندك حقائب من النوع الكبير يُفضّل أنك تخصصيلهم رف أو أكثر باش تخزنيّهم فيهم، رتبيهم جنبا إلى جنب في الرفّ

وخليّ مساحة بين كل حقيبة وأخرى للتهوية، أو ديري بيناتهم فواصل، لأنو التصاق الحقائب مع بعضاها راح يفسدها بسرعة.

إذا ماعندكش رفوف إضافية في الخزانة تاعك تقدري تستعملي هاذو المنظمّات على شكل رفوف

–  ما تستخدميش الشمّاعات في تعليق الحقائب:

ينصحو خبراء الموضة المرأة أنها تتجنّب تعليق حقائبها على الشماّعات إلي تكون مباشرة  في الخزانة كيما هاذو

أو الي تعلّق خلف الباب بهذا الشكل

لخاتش تعليق الحقائب بشكل مستمر سواء كانت فارغة أو ممتلئة راح يتسبب في قطع ذراعها أو الأساور الخاصة بها بشكل سريع جدا.

على هذا كاين منظمّات مخصصين لتخزين الحقائب بشكل آمن وأمبعد تعلقّي المنظّم كامل في العلاقّة تاع الخزانة وراح يجمعلك عدد لاباس بيه من الحقائب

هذا المنظّم متوفر بأحجام كثيرة وأشكال متعددة، وأنتي اختاري منهم إلي يناسب عدد وشكل الحقائب إلي عندك

وفي نفس الوقت ماياخذش مساحة كبيرة من خزانتك.

–  بالنسبة للحقائب الصغيرة المحمولة، تقدري تحتفظي بيها في أدراج خزانتك، أو فوق رفّ منخفض العلوّ. بصح ديري  فواصل بين الحقائب.

أو رتبيّهم في علبة أو سلّة ، بعد ما تنسقّيها بشكل مناسب وأنيق.

كيفاش تعتني بالحقائب تاعك؟

باش تقدري تحتفظي بحقيبتك الجميلة الأنيقة الصديقة والغالية لفترة طويلة، لازم عليك تتبعّي نصائح الخبراء وإلي هي:

– ما تبالغيش في تعبئة الحقيبة تاعك، لخاتش إذا عمرتيّها فوق طاقتها هاذ الشيء راح يأثر على شكلها، ويتسبّب في تمدّد الجلد أو يتشقّق، وثاني راح يفسد ذراع الحقيبة ويتقطع، وتتمزق البطانة الداخلية للحقيبة.

– ردّي بالك تحطّي في حقيبتك قلماً من دون غطاء، لأنو احتمال الحبر  يتسرّب مع الحرارة ويتلف القماش تاع الحقيبة، وثاني إذا كان رأس القلم حاد راح يمزّق بطانة الحقيبة، ويسقط القلم والكثير من الأغراض تحت البطانةالداخلية للحقيبة.

– ما تحطيش حقيبتك على الأرض نهائيا، بل ضعيها على كرسي أو مكتب أو على رجليك إذا كنتي جالسة، لأنو الحقيبة إلي تكون  على الأرض راح تتلوّث وتتوسخ بسرعة، وقادر أي واحد يعفس عليها ولا يركلها برجليه.

– بمجرد ما تدخلي للمنزل في آخر النهار، فرغّي الحقيبة تاعك من محتوياتها خاصة إذا كانت حمولتها ثقيلة

انفضيها مليح إذا كانت فيها بقايا أكل أو أوراق ماتحتاجيهاش، وتخلّصي من أيّ أغراض ما تحتاجيهاش، باش ما تتكدّسش داخل الحقيبة، وأمبعد رجعّي فيها فقط الأغراض الضرورية إذا كنتي مازال راح تستخدميها في الغد خاصة إذا كنتي عاملة أو طالبة.

– امسحي الحقيبة بفوطة مرطّبة للجلد أو مناديل مبللة عادية

لإزالة أي بقعة أو غبار، قومي بمسح خفيف فقط.

– حاولي قدر الإمكان تكون حقيبتك بعيدة على أشعّة الشمس المباشرة، لأنها راح تغيّرلها لونها وتأثر على الجلد ولا القماش المصنوعة منو.

 

... شمس راقية 

 

في الغالب تكون البشرة الجافة حسّاسة، على هذا من الواجب علينا أنو نقدّمولها عناية خاصة، بحيث أنو نقومو بحمايتها من العوامل إلي ممكن تزيد من جفافها وخشونتها كيما الاغتسال بالماء الساخن، نقص شرب الماء، استخدام صابون مصنوع من مكوّنات قلوية وإلي ينقّص من الزيوت الطبيعية للبشرة، وثاني التعرّض لجو جاف وحار أو جو بارد بطريقة مفاجئة.

و باش نعتنيو بالبشرة الجافة كاين ماسكات طبيعية كثيرة تساعدنا باش نحافظو على تألقها ونضارتها، وهاذو بعض الماسكات الطبيعية المجربّة للبشرة الجافة:

 

* الوصفة الأولى:

تاخذي ملعقة كبيرة تفاح مسكرفج

2 ملاعق طين أبيض

2 ملاعق حليب

 

خلطي المكونات السابقة مليح مع بعض حتى تتحصلي على كريمة، حطي هذاك الماسك على وجهك حوالي  20 دقيقة، كرّري استخدام هاذي الوصفة كل 15 أو 20 يوم.

 

 

* الوصفة الثانية:

تاخذي ملعقة صغيرة نشاء

ملعقة كبيرة ياغورت

ملعقة صغيرة حليب بودرة 

ملعقة صغيرة عسل

ملعقة صغيرة عصير ليمون ( اختياري)

 

خلطي المقادير السابقة على شكل كريمة وحطي الماسك على وجهك لمدة نصف ساعة وبعد ما ينشف أغسليه بماء دافي ثم ماء بارد. كرّري استخدام هاذي الوصفة 3 مرات في الأسبوع.

 

 

* الوصفة الثالثة:

تاخذي 4 ملاعق كبار حليب بودرة

2 ملاعق كبار عسل

2 ملاعق كبار ماء فاتر

 

خلطي المقادير السابقة مليح مع بعض، وأمبعد حطيه على وجهك و تجنبي محيط العينين و الشفتين، وخليه على وجهك حتى ينشف وأمبعد أمسحي وجهك مليح بقطعة قماش تكون مُبللة بشوية ماء. كرّري استخدام هاذي الوصفة ثلاث مرات في الأسبوع.

 

… شمس راقية

 

 

إذا أهملتي نفسك وجمالك، إذا  حسيتي أنك فقدتي ابتسامتك ونعومتك، اذا خانك هدوءك وحياءك، إذا حسيتي أنو أنتي أصبحتي انسانة ثانية غريبة تماما عنكِ، وأنك ماكنتيش هكا من قبل وماراكيش راضية على وضعك الحالي إلي وصلتي ليه

هنا نقلك بلي هاذي هي بداية التغيير، لأنك حسيتي بالفرق وبالخلل إلي راهو فيك، في البداية لازم تعرفي أنو أنتي انسانة وتحتاجي أنك تكوني مرتاحة، حاولي تسترخي وترخي أعصابك، وأعملي برنامج للعناية بالنفس وباش تسترجعي أنوثتك، لازم يكون الدافع تاعك أنو راح تقومي بالشيء هذا مش على جال زوجك أو على جال الناس لكن علاجالك أنتي أولا لخاتش أنتي بالأساس أنثى وتستحقي تكوني أحلى أنثى.

مالازمش تفقدي الثقة بنفسك وبأنوثتك، تبعّيني وبإذن الله راح تسترجعي أنوثتك إلي هي أصلا موجودة وطبيعية فيك.

أولا: كملّي شغل الدار بسُرعة، لازم تكوني خفيفة ونشيطة وما تأجليش أشغالك، وهذا الشيء ما يعنيش أنك  تضغطي على روحك فوق طاقتك، ديري جدول للتنظيفات ( يومي، أسبوعي، شهري)، يكون هذا الجدول مناسب ليك، وهذا الجدول أنتي إلي تخططيه وتنسقيه

يتناسب مع بيتك وعائلتك والتزاماتك والحالة تاعك إذا كنتي ماكثة في البيت أو عاملة، أم لعدة أطفال، حامل، مريضة الخ. لما يكون بيتك نظيف وأمورك مرتبة راح تكون نفسيتك مرتاحة ومعنوياتك مرتفعة. وهذا ينقلنا للخطوة الثانية.

 

ثانيا: لازم تعرفي أنك ماكيش المرأة الوحيدة إلي راهي حاسة أنها فقدت أنوثتها كاين كثير من النساء إلي راهم في نفس حالتك، وفي نفس الوقت كاين كثير من النساء إلي راهم مازال محافظات على أنوثتهم، هذا الشيء يخليك تتسائلي كيفاش قدرو هاذو النساء يكونو هكا بالرغم من مشاكل وصعوبات الحياة، هل أنهم مرتاحين بدرجة كبيرة وماعندهمش الضغوطات إلي عندك؟ بطبيعة الحال كل انسانة في الدنيا هاذي عندها حاجة مؤرقتها و مقلقتها

بصح تلقايها ماتحملش هاذ الهموم معاها وين ماكانت، بمعنى أنها تعمل بحكمة ” لكل مقام مقال“، وكل حاجة في وقتها وكل حاجة في بلاصتها، فالمرأة هاذي تعرف تتعامل بحكمة في حياتها، وعايشة حياتها بكل بساطة، هذا الشيء راح  يعينها باش تعيش متهنية ومرتاحة مع نفسها أولا ومع المحيطين بيها ثانيا.

 

ثالثا: استرجعي ثقتك في نفسك وفي جمالك، وهذا الاسترجاع يكون باستخدام الذاكرة، وحاولي تتذكري كيفاش كنتي سابقا، وكيفاش راكي حاليا وقارني بين الوضعيتين، كنتي انسانة خجولة، هادئة، قليلة الكلام، أنيقة، صوتك ناعم، بشوشة، تمارسي الرياضة، كانت عندك هوايات تقومي بيها كيما (الخياطة. الكروشي. الرسم. القراءة)

كنتي مهتمة بكل تفاصيل جسمك ( شعرك، بشرتك، ريجيمك، أظافرك، أسنانك)، وهاذو الأمور إلي كانو من أولى أولوياتك صارو أمور عادية وأحيانا في قائمة النسيان والإهمال، وباش تنفذّي هاذي الخطوة، انتقلي معايا للخطوة الرابعة

 

رابعا: جيبي ورقة وقلم وأكتبي واش كنتي أديري سابقا من نشاطات جمالية ومن اهتمامات شخصية ومن هوايات منسية

وماتقوليش ماعنديش الوقت، حاولي تنساي الكلمة هاذي، وما تقدميش لنفسك أعذار أنتي نفسك مش مقتنعة بيها،  ولازم تقتنعي أنو لما تسترجعي ثقتك في نفسك وفي جمالك راح تسترجعي أنوثتك تلقائيا، لأنو استرجاع الثقة في النفس تعطيك القوة والتحدّي، أما استرجاع الثقة بالجمال راح يخليك تهتمي بجسمك وبشرتك وشعرك وكل تفاصيلك الصغيرة لأنو عندك احساس داخلي بالجمال وهذا الشيء يدفعك ويشجعك للاهتمام بجمالك والحفاظ على هذا الجمال إلي عندك. إذن سجلّي كل اهتماماتك في ورقة وخططي برنامج لتنفيذ هاذي الاهتمامات، وهذا ينقلنا للخطوة الخامسة.

 

خامسا: انطلاقا من البرنامج إلي كتبناه نبداو في التنفيذ، واحنا راح نقسمو أعمالنا على 2 بحيث أنو كاين أمور ظاهرية وأخرى باطنية لازم نسترجعوهم، بالنسبة للظاهرية وإلي تتمثل في الاهتمام بالبشرة ومحاولة اصلاح العيوب إلي فيها كحب الشباب أو بقع الكلف او الهالات السوداء وغيرها، الاهتمام بالشعر وتغطية الشيب وعمل حمامات زيتية مناسبة لنوع شعرك و ثاني البحث على الخلطات الطبيعية إلي تعطي صحة وبريق للشعر، الاهتمام بالجسم  إذا كنتي سمينة ديري نظام غذائي ومارسي الرياضة بانتظام باش تسترجعي رشاقتك

وإذا كنتي نحيفة ابحثي على الوصفات إلي تزيدلك في الوزن وشوفي طبيب يساعدك في هذا الأمر، إذا عندك مشكل في أسنانك ما تتردديش في زيارة طبيب الأسنان باش تعالجي أسنانك وتسترجعي ابتسامتك بكل ثقة وسعادة. أما بالنسبة للأمور الباطنية وإلي تتعلق بعنايتك بشخصيتك، وتشمل هاذي العناية الحياء، الهدوء، الأدب في الحديث، كظم الغيض، الإبتسامة والثّقة بالنّفس.

 

في الأخير الحاجة إلي ننصحك بيها هي تجنب الأفكار السلبية والعبارات المُحبطة والأشخاص كثيري الانتقاد والسلبيين والي يحاولو يحبطو من معنوياتك وطموحاتك باش ما تيأسيش وما تكرهيش، يعني لازم عليك تحتكي بالأشخاص الايجابيين وإلي يشجعوك على تحقيق أهدافك وآمالك، مالازمش تيأسي وتستسلمي أبدا.

 

… شمس راقية

 

 

إذا حدث معاك نهار أنو احتجتي قلم أو شخص طلب منك قلم باش يكتب حاجة سريعا، مثلا باش يعمرّ شيك  chèque في مكتب البريد أو احتجتي منديل لمسح أمر معيّن، أو طلبت منك وحدة مرآة وطولتّي وأنتي تحوسّي على القلم ولا المنديل في الحقيبة تاعك بين أغراضك الكثيرة والمتناثرة ، وغالبا تضطري باش تفرغّي حقيبتك علاجال بطاقة هويتك أو محفظة نقودك أو مفاتيحك إلي تغلغلت داخل الحقيبة

كل هاذيك الأمور والفوضى إلي راكي فيها تعني أنو حقيبتك ماهيش منظمّة، و لازم تعرفي أنو الحقيبة المنظمّة هي عنوان المرأة المنظمّة والأنيقة.

 

كيفاش تنظمّي حقيبة يدك؟

كاين مجموعة من الحلول إلي ممكن تساعدك باش تنظمّي حقيبة يدك وبالتالي تنظمّي حياتك اليومية خاصة إذا كنتي عاملة أو طالبة

الأمر إلي يفرض عليك الخروج باستمرار وتلازم وجود صديقتك الحميمة وإلي هي حقيبة يدك معاك على الدوام .

الحل الأول: 

هو أنك تشري حقيبة يد تكون فيها جيوب كثيرة

باش تقدري تنظمّي فيها أغراضك، جيب للهاتف النقال، جيب للمفاتيح، جيب للنقود، جيب للقلم والدفتر الصغير، جيب للمناديل و للمراية وهكذا، بالطريقة هاذي راح تلقاي بسرعة الشيء إلي راكي تحوسّي عليه، وحاولي ما تبّدليش أماكن الأغراض في حقيبتك، باش تحفظي أماكنها وكي تحتاجيها راح يسهال عليك تلقايها بسرعة وبلا جهد.

الحل الثاني:

وهو أنو يكون عندك حقائب صغار تجمعي فيهم أغراضك خاصة الحوايج الصغار وتحطّي هاذو الحقائب الصغار وسط الحقيبة تاعك

وكل حقيبة صغيرة تكون مخصصّة لأغراض من نفس الفئة، يعني حقيبة صغيرة لأدوات الماكياج و عطرك و مرايتك، حقيبة صغيرة تحطّي فيها أغراض الطوارئ كيما: إبرة وخيط، فوطة صحية، مناديل ورقية وأخرى مبللة، علكة أو معطر للفم، وحقيبة تحطّي فيها قلم ودفتر، فواتير وأوراق مهمة أخرى بالاضافة لحافظة الوثائق تاعك.

وتخصصي جيوب حقيبة يدك  للهاتف النقال، المفاتيح ومحفظة النقود تاعك.

الحل الثالث: 

هو أنو يكون عندك المنظّم الداخلي لحقيبة اليد

هاذ المنظّم عملّي جدا، لأنو يتوفّر على جيوب كثيرة بحيث أنك راح ترتبّي في هاذو الجيوب  كل أغراضك

وتحطّي كل غرض في مكان خاص بيه، لأنو أصلا هاذ المنظّم راهو فيه تقسيمات كثيرة باش يجمع معظم مقتنيات المرأة إلي تحتاجها باستمرار

وكل ما حبّت المرأة تغيير حقيبتها راح تاخذ المنظّم كيما راه وتحطو في الحقيبة الجديدة بلا ما تنسى حتى شيء

لأنو غالبا لمّا نبدلّو أغراضنا من حقيبة لحقيبة ننساو بعضهم في الحقيبة السابقة ونكونو بحاجة ليهم.

 

طريقة صنع منظّم لحقيبة اليد

تقدر أي سيّدة تصنع منظّم لحقيبتها يجمعلها ويرتبلها كل أغراضها بشكل جميل ومنسّق، وكاين أفكار كثيرة ومتنوعة في الأنترنت وفي متناول كل السيدات، فقط أبحثي على الطريقة إلي تجيك ساهلة وتكون مستلزماتها بسيطة وموجودة عندك.

وأبسط طريقة لصنع منظم لحقيبة اليد هي أنك تجيبي قطعتين من القماش بنفس الطول والعرض تخيطيهم مع بعضاهم مقلوبين من كل الاتجاهات الأربعة، تخلّي فقط فراغ صغير بدون خياطة باش تقلبي النموذج إلي خيطتيه ويجيك على شكل كيس مخيّط كامل.

أطوي المستطيل الجديد إلي تحصّلتي عليه إلي شكلو مثل الكيس على اثنين بحيث يكون الجزء السفلي أعرض شوية على الجزء العلوي المتبقي، وامبعد جيبي أغراضك وقيسي حسب أحجامهم، وديري تقسيمات على شكل جيوب ( جيب للهاتف النقال، جيب للسماعات، جيب للقلم، جيب للدفتر، جيب لحافظة الوقائق… الخ)

وبهذا الشكل تكوني تحصلّتي على منظّم أنيق وبسيط لحقيبة يدك الجميلة.

وهاذو بعض الصور لمنظمّات مصنوعة في البيت ومستلزمات صناعتها بسيطة ومتوفّرة في معظم البيوت.

 

 

في الأخير نقلك أنو اختاري الطريقة إلي تناسبك في تنظيم حقيبة يدك، و راح تستمتعي بحياة سهلة ومنظمة بإذن الله.

 

… شمس راقية 

 

في كل مناسبة اجتماعية يجتمعو فيها النساء يبداو يحكو على يومياتهم مع أبنائهم  وأزواجهم، بطبيعة الحال كاين فيهم إلي يركزو على مشاكلهم و معاناتهم، وكاين نساء يبالغو في وصف الحياة المثالية إلي عايشينها بحيث تلقايها تقول: زوجي متفهّم، زوجي متعاون، زوجي رومنسي، زوجي يجيبلي هدايا بدون مناسبات، زوجي دايما يسافر بيا، و غيرها الكثير من العبارات إلي تخلي المستمعات يهتمو ويركزو مليح مع هاذي الأوصاف إلي من الصعب أنها تجتمع في رجل واحد، ومن ثم يحسّو بالغيرة ومن بعدها تبدأ المقارنة بين حياتهم وحياة الآخرين.

وبمجرد ما ترجع الزوجة للبيت تبدأ تفكر وتتذكّر في المحادثات والنقاشات إلي صرات، وتخمّم كيفاش زوجها مايعاملهاش كيما بقية الأزواج يعاملو نساهم؟ كيفاش ماهوش رومنسي معاها ومايسمعهاش كلام حلو؟ ودايما يكون مشغول البال، علاه مايجيبلهاش هدايا غير إذا طلبت منو باش يجيبلها؟ علاه مايعاونهاش في الدار؟ ومايخرجهاش تحوّس غير بالسيف؟

وبعد كل هاذي التساؤلات  وإلي توصلّها إلى إجابة وحيدة وهي أنها ماهيش سعيدة في حياتها ويزيد الشيطان يشعلها النار، ويقلها أنها أساءت الاختيار ولو كان صبرت شوية لكان راهي تزوجت براجل خير من زوجها الحالي.

هاذي الأفكار في رأسها راح تأثر فيها وتخلّيها عصبيّة وبمجرد ما يدخل زوجها تثور عليه وتفجّر فيه كل مكبوتاتها

والأزواج مايحبوش جوّ المقارنات مع الغير، وراح يعطيه انطباع أنو ماهوش عاجبك كزوج، وماهوش معمّرلك راسك، وكثير من الأزواج يمنعو زوجاتهم من حضور التجمعّات النسائية، لخاتش كي ترجع من عرس ولا وليمة ولا عرضة تنغصلو حياتو بالمشاكل ومقارنتو بغيرو من الأزواج ولا مقارنة نفسها بغيرها من الزوجات.

إذن المطلوب منك أنك تسمعي وتتعلّمي وتطّبقي وش يدور من حديث حول تجارب ناجحة، وتحاولي تفهمي كيفاش وصلو للحياة السعيدة إلي راهم عايشينها، وماتحاوليش تقارني لخاتش انتي ماكيش هي ولا زوجك هو زوجها. يمكن هي تكون حياتها سعيدة في جانب وتعيسة في جانب آخر، ونفس الشيء بالنسبة ليك انتي يمكن تكون حياتك تعيسة في جانب لكنها سعيدة في جانب آخر.  وتأكدي أنو مكانش وحدة عايشة حياة مثالية  100%.

 

… شمس راقية