الدكتور ابراهيم الفقي كان يركزّ كثير على المعتقدات إلي تتحوّل لأفكار والأفكار إلي تتحوّل لأفعال، وكل ما تم تكرار هاذ الفعل راح يولّي عادة عند الإنسان، وبالتالي كان يؤكد على أنو النتائج إلي يوصل ليها الإنسان راهي راجعة لمعتقدات وأفكار  والأفعال المتكررة لهاذ الإنسان.

واش معناها التفكير الايجابي؟

أنك تفكري ايجابيا معناه أنك تنظري للعالم بمنظور وردي مملوء بالتفاؤل والسعادة وتتجاهلي تماما الأمور السلبية.

حياتنا مليئة بالتحديّات ولمّا نفكرو ايجابيا راح نتعاملو مع هاذي التحديات بنظرة ايجابية،  والتفكير الايجابي ما يعنيش أنك تتجنبّي المواقف السلبية لكن خذي منها ما هو ايجابي بالنسبة ليك، نفس الشيء بالنسبة للاشخاص السلبيين في حياتنا مانقدروش نتجنبوهم أو نتجاهلوهم كيما الزوج، الوالدين، الأخوة،  زملاء العمل وغيرهم، بصح نحاولو نتعاملو معاهم بالنظر إلى الصفات الايجابية والمشرقة إلي فيهم.

أول حاجة لازم ننظرولها بالمنظار الايجابي هي الذات تاعنا، نحاولو نركزّو على صفاتنا الايجابية إلي تعزز ثقتنا في نفوسنا وتعطينا حافز قوّي للاستمرارية.

واش هي الفايدة من التفكير الايجابي؟

لما نفكرّو ايجابيا راح نعززّو أجسامنا بقوة تفاؤلية ساحرة، لأنو الفايدة تاع التفكير الايجابي تتجاوز الحالة النفسية والعقلية للإنسان حتى توصل للراحة الجسدية تاعو.

ومن بين أهم الفوائد إلي راح نحصودها بالتفكير الإيجابي ما يلي:

– لما نفكرو ايجابيا راح نساهمو في تقليل الضغوط إلي تأثر على نفسيتنا ومن بعدها أجسامنا.

– لما نفكرو ايجابيا راح نقللو من مخاطر اصابتنا بالاكتئاب.

– لما نفكرو ايجابيا راح نقومو بتقوية جهاز مناعتنا.

– لما نفكرو ايجابيا راح نرتقو بصحتنا النفسية ونقللو من مخاطر أمراض القلب والأوعية الدموية.

كيفاش نقدر نكتسب عادة التفكير الايجابي؟

التفكير الايجابي مهارة للعلاج النفسي خاصة للأشخاص إلي يعانيو كثير من الضغوطات، بصح نقدرو نجعلوه عادة مكتسبة في كل الأوقات مش شرط غير في الضغوط والأزمات. أول حاجة لازم نقومو بيها هي أنو نركزّو على حوارنا مع الذات تاعنا، وكيفاش رانا ننظرو لأنفسنا هل منظارنا لأنفسنا وردي أو رمادي؟ بعد ما نحدّدو لون هذا المنظار نتوجهو للنقطة الثانية وهي البحث عن الأشياء إلي ممكن تساعدني باش نغيّر التفكير تاعي ونكتسب عادة التفكير الايجابي، ومن بين أهم الأمور إلي تساعد في هذا الشيء ما يلي:

– نتعلّم نلبس مليح من خلال تتبّع مجلات الموضة ولا من خلال مواقع الأنترنت.

– نتعلّم نتحاور مع أشخاص آخرين ونتشاركو الأنشطة مع بعض بحيث أنو نستمتع بوجودي في الجماعة.

– نتعلّم نكون مرحة ومنبسطة في كلامي وأسلوب حياتي ونضحك على المواقف إلي تمّر عليا، لأنو القلق والارتباك ينقّص من العمر.

– نقوم بتنمية قدراتي الذاتية والتفاؤلية ونحاول نستفيد من قدراتي الابداعية، وأني نتقبّل كل المواقف إلي نمّر بيها مهما كانت نتائجها وعواقبها.

– قضاء وقتي بالتفكير في الأشياء السعيدة  إلي مريت بيها اليوم وفرحت بيها مهما كانت بسيطة لأنو الحياة القصيرة ما يقضيهاش الإنسان في التفكير غير في المآسي.

– كل وحدة فينا عندها هدف في حياتها، كي نفكّر في هدفي في هاذي الحياة راح نحسّ بالأمل والتفاؤل والتحفيز باش نحققو.

– نحاول أني نقوم بالحوايج إلي نحبّها وتعطيني احساس بالسعادة، خاصة في مجال ممارسة الهوايات يعطيني فرحة كبيرة.

– نفتح النوافذ ولا نخرج برا المهم أني نبدّل الهواء، هاذ الهواء المتجدد راح يرفع من نفسيتي ويعطيني قوة تفاؤلية كبيرة.

 

وبالتالي إذا حبيتي تعيشي سعيدة وفرحانة ورضيانة وتربحي صحتك وتحققي أهدافك في حياتك، السر هو أنك تفكرّي وتزيدي تفكرّي ايجابيا، أنظري لنفسك ولمن حولك بمنظار وردي جميل ما يشوف غير الحاجة المليحة إلي فيك أنتي وإلي موجودة في المحيطين بيك.

 

 

… شمس راقية