الطريقة : 

التمر أنا بهاذو المقادير كفاني علبة وحدة من الغرس التمر المطحون 

فتيه بين صباعتيك باش تحسي اذا كاين عضام التمر

ثم ضيفيلو قرفة مرحية + حبات قرنفل مرحي + حبة كبابة مرحية + شوية زيت 

حطيه يفور في كسكاس و قدرة 

غير تشوفي طلعلو لفوار شوية نحيه 

غطيه و خليه يبرد 

كي يبرد شكليه كريات متوسطة (ما كبيرة يجي المعمول غير تمر، ما صغيرة حتى يبداو يحوسو على التمر ) 

خليهم محطوطين حتى يوجد العجين للتشكيل في الطابع

في اناء خلطي جميع المكونات الناشفة مغربلة لازم مغربلة (التغربيل لازم يكون خطوة ضرورية في كل وصفة تديريها هذا سر الحلويات) 

2 كاس دقيق رطب (تاع المطلوع) + 1 كاس فرينة + 1 كاس حليب غبرة + نصف كاس مايزينة + 3 ملاعق كبيرة سكر ناعم + ملعقة

صغيرة خميرة فورية + فانيليا ملعقة صغيرة + زريعة البسباس مرحية ناعمة (غربلي كلش ماتنسايش) 

في اناء الخلط (أنا درت في جفنة العجن) 

خلطي 250غ زبدة طرية (تكوني خرجتيها من الثلاجة بساعات قبل البدأ )+ 2 صفار بيض بيدك حتى تولي كريمة 

زيديلها المكونات الناشفة و خلطي (ماتعجنيش غير جمعي المكونات مع بعض ) 

زيديلها ربع كاس ماء لا أكثر و لا أقل فيه بعض القطرات تاع ماء الزهر 

العجينة حتبانلك جارية شوية لكن ماتخافيش كي يدخل فيها الماء مليح 

حطيها في اناء يدخل الثلاجة و غطيها بورق الفيل الغذائي و خليها تريح 45 دقيقة 

كي تخرجيها حتلقايها نشفت من الماء 

الان شعلي الفرن درجة 180 

و بداي تعملي الحبات 

أحكمي الطابع

حطي فيه ساشي باش متلصقش العجينة 

حطي قطعة من العجينة قد الشكل لي خيرتيه و رجعي عليه الساشي و حفريه باش تدخل فيه التمر 

حطي كرية التمر وغلقي عليها بالعجين

رجعي عليها الساشي و عبزي مليح الحبة باش فائض العجينة يبانلك و تنحيه 

حطي الحبة في السنيوة لي تدخل الفرن 

كي تكملي التشكيل حطي السنيوة في الفرن نقسيلو شوية النار 

كي يحمار من التحت شعليلو يحمار قليلا جدا من الفوق 

أنا شد معايا 6 د من التحت و 3 د من الفوق 

غير يخرج فورا ومتبطايش رشي عليه بالصفاية تاع لحليب سكر غبرة مخلط مع قرفة غبرة 

وخليه

كي يبرد تماما بعد 1 سا ديريه في ليكيسات 

 

…شمس ساطعة

مقروط مقلي معسل

الطريقة :

العسيلة :

اول حاجة توجديها من الاحسن هي العسيلة باش تكون باردة

اذا راكي رايحة ديري كمية كبيرة مثلا 1 كلغ سميد راح تحتاجي الى:

في كسرونة حطي 1 كلغ سكر كيليه في طاسة باش تعرفي شحال من كيلة ماء تضيفيها لي راح تكون ضعف كمية السكر

انا مثلا جاتني 3 كيلات سكر و 6 كيلات ماء

زيدي عليها عصير نص حبة ليمون + عود قرفة

و حطيه فوق النار

ملاحظة : العسيلة ما تتحركش بمغرف حطب لازم تكون مغرف لي ناكلو بيها باش ما تقراصش و باش ما تتسكرش

المهم احكمي المغرف لي ناكلو بيها و مرة على مرة حركي السكر حتى يذوب كامل في الماء

باش تعرفي بلي وجدت العسيلة لازم تشوفي انو الكمية لي حطيتيها ولات نص

او احكمي المغرف و كي تخرجيها جوزي بصباعك و شوفي اذا عاقدة شوية

لازم ما تكونش عاقدة كيما العسل تاع النونورس لي نشروها و ما تكونش كيما السيرو

تنبيه : كاين بزاف لي يديرو كاراميل من بعد يزيدو السكر انا ننصحكم ديرو هاذي الطريقة

لماذا؟

خاطش كان ديرو طريقة الكاراميل راح حلوياتكم تجي كامل بنفس النكهة و تجي تقهم الخاطر

التمر :

نقي التمرمن العلف دريه يفور زوج تفويرات الاولى من بعد نحي هذاك الماء و عاوديلو ماء نقي و زيد فوريه

اضيفي عليه سمن مدينة + ملعقة زيت عادي + قرفة و خلطيه مليح من بعد زيديلو ماء الزهر

و هذا هو سر انو التمر يبقى طري كي تضيفي ماء الزهر ليه

عاودي خلطي مليح بحيث تزيدي تتأكدي انو مكاش علف

شكلي حرابش طوال و يكونو بعرض 2 سم و خليهم يرتاحو غطيهم بالفيلم الغذائي بعد ما يبردو تماما باش ما يعرقوش اذا كانو سخونين

العجينة :

1 كلغ سميد متوسط من النوع الرفيع او الممتاز سفينة انا جاتني 3 كيلات

1 كيلة سميد رقيق بزاف تاع المطلوع

نصف كيلة فرينة

تنبيه : ما تنساوش تغربلو خواتاتي كامل المكونات طبعا هاذي العفسة كامل تعرفوها لكن حبيت نفكركم انو قاعدة الحلويات هي التغربيل

ملح

خلطي بيدك كامل الحاجات الناشفة هاذو

من جهة اخرى وجدي

1 كيلة سمن مدينة ذايب و بارد

نصف كيلة زيت عادي

ضيفيها للسميد و خلطي حتى تدخل مليح في السميد

بعدها خليه هكذاك مبعثر و غطيه خليه يبات غدوة منذاك ان شاء الله استعمليه

في يوم الغد

احكمي السميد لي بات ضيفيلو نصف كيس خميرة حلويات و 2 اكياس سكر فانيليا

1 كيلة ماء مخلط مع ماء الزهر + بياض حبة بيض خلطيهم حتى يتجانسو

رشي السميد و ما ديريش كامل الكيلة ضربة وحدة

و قطعيه يعني ما تعجنيش ديري حركة كيما انك تقطعي في حاجة

و مرة على مرة شوفي اذا تشكلت معاك العجينة لي نحتاجوها للمقروط

بعدها اجمعي العجينة في جهة و خليها ترتاح 2 ساعة

بعدها راح تنشف شوية كيما حصل معايا و اذا ما نشفتلكش حسنا خليها

لكن انا نشفت شوية زدتلها ماء الزهر حتى عاودت ولات كيما نستحقها

طريقة تشكيل الحبات قبل القلي :

احكمي كمية من العجينة حطيها على فيلم غذائي

هذا هو سر التشكيلة السهلة و بدون معانات

و شكلي حربوش بعرض 5 سم و ارتفاع 3 سم و طول كيما تحبي انا درت 20 سم باش نزرب

الان عبزيه من الفوق باش تبسطيه شوية

من بعد بصبعك الصغير تاع يدك عبزي في وسط الحربوش باش تحطي التمر

من بعد شكلي حربوش التمر رجعيه 1 سم او 1.5 سم باش يبان مليح في المقروط ماشي يولي غير سميد

حطيه في الوسط و اغلقي العجينة بحيث ما يوليش كامل يبان التمر

من بعد اغلقي على الحربوش بالفيلم الغذائي و بداي ديري حركة الحلاّل باش تتجمع مليح

و من بعد شدي طرف الايمن تاع الفيلم و بيدك اليسرى شكلي المستطيل بصباعك الاول و الثاني تاع يدك بحيث يولي فيه عرض 2 سم

فقط و ارتفاع 2 سم ايضا

و من بعد حلي الفيلم و حاولي تنحي الحربوش من فوق الفيلم بدون ما تخسري الشكل باش تقطعيه

لوكان تخليه فوق الفيلم راح يتقطع و راح تضطري تعاودي تستعملي فيل اخر

قطعي الحبات متساويين و شكليهم شكل لي حبيتي

طريقة القلي :

في مقلة عميقة حطي الزيت كي تسخن مليح نقسيلها كامل و ارمي المقروط يطيب

و اذا شفتي روحك انو مازال ما شكلتيش حبات للقلي من الاحسن طفيه

هكذا الزيت ما يتحرقش في باطل و يطلق ريحة ماشي شابة

و حتى طعم المقروط يتبدل

كي تتقلى الحبة و تولي لون شباب اجبديها و حطيها على طول في العسيلة لي تكون باردة بزاف ما تكونش سخونة و ما تكونش دافية

و خلي المقروط فيحا حتى يوجدو الحبات لي راهم يتقلاو

خرجيهم و حطيهم في كسكاس يقطرو

حتى يوجدو الحبات لي راهم يتقلاو حطي الحبات لي راهم فالكسكاس في les caissettes

 

…شمس ساطعة

الطريقة :

على حسب الكمية المراد تحضيرها تقدري تلعبي بالمقادير كيما تحبي لكن انا انصح تجربي هذه الكمية راح تجيك بزاف ما تكبريش كرشك و تحصلي ههههه خاطش بهذه الكمية خرجتلي قريب 30 حبة يويو

في اناء حطي :

نص كاس سكر

نص كاس حليب

نص كاس زيت

حبة بيض

ملعقة قهوة خل

قشور الليمون او البرتقال او لافاني

خلطي الكل مليح حتى يتجانسو

من بعد

ضيفي 2 ملاعق كبار فرينة و فوقهم نص كيس خميرة الحلوة و فوقهم 1 ملعقة فرينة و بداي تخلطي

انا جاتني قريب 10 ملاعق فرينة تاع اكل

انتي ضيفي بالزوج ملاعق و خلطي

النتيجة لازم تكون طرية بزاف لكن في نفس الوقت تقدري تحكميها في يدك و تشكليها

لكن كان تزيدي اكثر من اللازم راح تجيك معجنة

اذا انتي ديري 8 ملاعق فرينة و جربي تديري حربوش و تشكليه مسياسة اذا جاك اوكي اذا ما جاكش زيدي ملعقة وحدة و هكذا باش ما تتسرعيش تضيفي اكثر من اللازم

ديري مقلة الزيت تسخن بحيث حبة اليويو تغطس نص فقط و ليس كامل

الزيت لازم تكون سخونة لكن الطياب لازم يكون على نار هااااااااااااادئة و الا يطيب من الخارج و يبقى معجن من الداخل

انا كنت نطيب بال 3 حبات لكي اتحكم بدرجة حرارة الزيت

خاطش كان تحطي بزاف راح تبرد الزيت و تشرب حبة اليويو بزاف الزيت

كي تشوفي الزيت نقصت بزاف من الاحسن ما تزيديش كمية اخرى تقدري تميلي فقط المقلة و تشديها

طريقة القلي :

شكلي مسياسة رقيقة بحجم 1 سم عرض و 15سم طول و اجمعي الطرفين باش تولي مسياسة

حطي الحبة في الزيت و مباشرة ابداي ترمي فوقها الزيت بمساعدة ملعقة اكل كبيرة

كي تشوفيها تشقّت من الفوق و تنفخت مليح خلاص خليها طيب من التحت حتى تحمار و من بعد اقلبيها تحمار من الفوق

——–

وجدي طبسي فيه ورق مصاص الزيت و طبسي فيه سكر عادي

غير طيب الحبة حطيها لمدة 30 ثانية يشرب منها الورق الزيت و بعدها مباشرة و بلطف رمديها في السكر و حذاري يتفتتلك في يدّك بلطف شديد تعاملي مع الحبة كي ترمديها في السكر

———-

هذه هي طريقتي في تحضير اليويو

ملاحظة : الصور ماشي ديالي لكن نفس النتيجة بكل أمانة

…شمس ساطعة

 

المدة : 25 دقيقة

العدد : 8 اشخاص

الصعوبة : سهل جدا

التكلفة : اقتصادي

المكونات

500غ فرينة

كاس حليب دافي

3 مغارف كبار سكر

2 بيضات

75غ او 5 مغارف كبار زبدة

قرصة ملح

2 مغارف كبار خميرة

الأدوات

مقلاة

سكين

فرشاة مطبخ

ملعقة قلي

الاعداد

المرحلة الأولى

نخلطو المكونات على التوالي و نزيدولهم بالتدريج الفرينة و ندلكو مليح من أجل الحصول على عجينة طريّة و مهويّة

المرحلة الثانية

نخدمو  قرصة بسمك 1سم و نقطّعوها  مربّعات أو دوائر باستخدام كاس مثلا

المرحلة الثالثة

 

نسخّنو المقلاة على درجة حرارة متوسطة و نقليو حبّات البينيي ؛ نقليوها حتى الحصول على اللون الذهبي بعناية و مع المراقبة و الاهتمام بالتَّقليب ؛ و نحطّوها تقطر في كسكاس و نرشّوها بالسكر .

يُقدَّم البينيي بارد أو سخون و يرافَق بمشروب ساخن أو مربى .

 

…شمس هنية

 

 

المدة : 10 دقائق      العدد : 6 اشخاص   الصعوبة : سهل جدا      التكلفة اقتصادي

المكونات

نصف لتر حليب  

250غ  فرينة

  3 بيضات

  2 مغارف كبار زبدة  

  6 مغارف صغار زيت

ملح

الأدوات

مقلاة

خلاط يدوي او fouet

غراف

 spatule

التحضير

المرحلة الأولى

في اناء حطي الفرينة المغربلة  و كبي عليها الحليب دافي بالشوية مع الخلط المستمر و زيديلها قرصة ملح ما ديريش الحليب على مرّة باش تتجنبي الكتل و إنما كلّ ما تثقل العجينة زيديلها الجليب حتّان تخلصّي الكميّة

المرحلة الثانية

ضرّبي البيضات و اضيفيهم للخليط تاع الفرينة و الحليب ثمّ زيدي الزّيدة الذايبة

المرحلة الثالثة

منديل ورقي غطّسيه في الزيت و ادهني بيه المقلاة ؛ كي تسخن المقلاة كبّي فيها العجين بالغرّاف بحيث تشكّلي طبقة رقيقة و مدورة

المرحلة الرابعة

كي تحمار الفطيرة من تحت قلّبيها باستعمال spatule كي يطيب الوجه الثاني فرّغيها في صحن وكمّلي بنفس الطريقة كامل العجينة اللّي عندك

المرحلة السادسة

زيّني بالسّكر او العسل او المعجون او الشّوكولا

 

…شمس هنية

المكونات :

4 صفار البيض

6 ملاعق كبيرة حليب

6 ملاعق كبيرة زيت 

6 ملاعق سكر خشن

2 مغارف كاكاو

8 ملاعق كبيرة فرينة

2 خميرة

لافاني

قشور القارص

طريقة التحضير :

في اناء نضع 4 صفار بيض + 6 ملاعق سكر ونخلطو بالباتور

نضيف 6 ملاعق زيت ونخلطو بالباتور

6 ملاعق حليب وأيضا بالباتور

ثم نزيد 8 ملاعق فرينة +خميرة

وبعدها نضيفو الكاكاو على حسب الرغبة

نجيب بلاطو نرش فيه شوية فرينة ونحط فيه الخليط

نطيبوه ربع ساعة من تحت و 5 دقائق من فوق

المورانغ :

في اناء زجاجي نحطو 4 بياض بيض + سكر خشن +قرصة ملح ونطلعو بالباتور لمدة 5 دقائق (لازم يكون اناء زجاجي او رينوكس)

 

 

 

 

 

نضع المورانغ فوق التارت ونعاود ندخلو للفور لمدة 5 دقائق

 نضغ التارت في الثلاجة ربع ساعة بعدها نقطعوها.

 

…شمس دافئة

كيلة زبدة او سمن

كيلة غير ربع سكر رطب 

كمية من الكاوكاو مرحي ناعم

لافاني

 و 6 مغارف كبار  فرينة  تكوني  حمصتيها

 في   إناء   نحط  كيلة   الزبدة  ولا  سمن  مع  السكر ولافاني   ونخلط    حتى  نتحصل  على  كريمة  بيضاء   نضيف   الكاوكاو  و الفرينة  المحمصة  ونولي  نضيف

 بالتدريج    الفرينة  حتى  تتماسك  العجينة  وتكون  طرية   منيبسوهاش  وفي  هاد  الوقت  نشعل  على   الفرن   ونخليه  يسخن  على  درجة   180  نلدا  نشكل

  الغريبية  كويرات  ونزينهز  بحبيبات الكاوكاو   وندخلها  للفرن   ونقص   على   الحرارة   ونخليهم  يطيبو  عل  حرارة   قليلة .

…شمس حبيبة

 

المكونات:

250 غ فرينة

2 ملاعق كبار نشاء

2 ملاعق كبار زيت عادي

3 ملاعق كبار سكر

2 حبات بيض

1 ملعقة صغيرة فانيليا

نص لتر حليب

ملعقة صغيرة خمارة الحلوى

شوية ملح

سكر أو  عسل أو مربى حسب الرغبة

 

طريقة التحضير:

خلطّي كل المكونات السابقة مع بعض في الخلاط الكهربائي، وأمبعد حطّي الخليط في الثلاجة يرتاح مليح من 2 إلى 3 ساعات.

كي تخرجيه من الثلاجة وقبل ما تستعمليه خلطيّه شوية بملعقة برك مش بالخلاط باش يعاود يتجانس مع بعض.

طيبي البغرير الماريكاني تاعك في مقلاة تاع الكريب les crêpes، تحطّي حوالي فنجان صغير في المقلاة وخليه كي يحمار من التحت راح يظهرلك بلي طاب من الجوانب تاع حبة البغرير، أقلبيه على الجهة الأخرى، وواصلي هكا حتان تكملّي كل كمية العجين إلي خلطتيّه، وكي تكمليّهم ستفيهم في صحن التقديم و ديريلهم السكر أو العسل أو المربى  كل حبة بغرير وحدها أو تقدري تديريهم على شكل طبقات محشيين بالعسل أو المعجون أو السكر.

 

… شمس راقية

 

المكونات:

كاس صغير سكر

كاس صغير زيت

كاس صغير حليب

نص كاس صغير ماء الزهر 

2 حبات بيض

1 خمارة الحلوة

كمية من الفرينة

 

للتزيين:

عسل أو سكر ناعم ( اختياري)

 

طريقة التحضير:

تاخذي صحن عميق حطي فيه السكر والزيت والحليب والبيض وماء الزهر والبيضتين وخلطيهم مليح مع بعض، أجمعي المكونات بالفرينة حتان تتلم العجينة وضيفيلها كيس الخمارة الكيميائية، كي تتحصلّي على عجينة طريّة

حليّها بالحلال وأطبعيها حلقات.

أقلي هاذوك الحلقات في زيت يكون سخون شوية، أقلبيهم على الجانب الآخر حتان تكملّي كل الكميّة إلي عندك.

في الأخير تقدري تعسليّهم أو ترشّي عليهم سكر ناعم وقدميّهم مع القهوة أو الأتاي.

… شمس راقية 

 

 

 

المكونات:

14 حبة تمر

– كاس كبير ونصف كاس حليب بارد

– نصف ملعقة صغيرة قرفة

– ملعقة كبيرة ماء زهر

– 3 ملاعق كبار زبيب

 

طريقة التحضير:

في البداية تاخذي التمر تنحيلو العلف، واديريه  مع الحليب في المطحنة الكهربائية، ضيفيلو القرفة وماء زهر و الزبيب، وخليهم يطحنو مليح ويتجانسو مع بعض في المطنحة الكهربائية.

وأمبعد حطيه في الثلاجة يبرد مليح ووقتها يكون جاهز للتقديم.

هذا العصير يناسب الأطفال  و الكبار إلي مايتناولوش التمر و  الزبيب بالرغم من الفائدة العظيمة تاعهم، وبالتالي بالطريقة هاذي رايحة  أدخليلهم التمر و  الزبيب في الحليب، بلا مانقلك على الذوق الرائع تاعها.

 

 

 

… شمس راقية