, ,

الانانية و حب الذات

سلام يا حلوات قولولي واش احوالكم، راكم تستفادو مالمواضيع لي رانا نحكيو فيها ؟ راني متأكدة انكم تسعاو لتحسين انفسكم و حياتكم، خواتاتي حبيت نطرح عليكم سؤال: تحبوا رواحكم او لا؟ كاين لي تقولي انعم نحب روحي، و كاين لي تقول لا مانحبش روحي بسبب.. و تبدا تجبد قائمة من السلبيات تاعها و نقاط ضعفها، نتي في بالك حتى تتخلصي من هاذ السلبيات لي فيك باش تولي تحبي روحك و ترضاي على نفسك، و في بالكم لازم نكونوا كاملين بلا عيوب و مثاليين باه نحبوا روحنا و نحترموها و نقادروها.

كاين ين بزاف اخوات مايحبوش رواحهم و ينتقدو تصرفاتهم و جسمهم و ماراهم راضيين على حتى حاجة فيهم، اذا كنتي تعاني من هاد المشكلة كلامي راهو ليك اختي.
حب الذات موضوع محقور شوية و مهمش، مانهتموش بيه بزاف و مانعطوهش قيمة، و كاين حتى لي يعتبروه انانية و تكبر.
الله سبحانه و تعالى خلقنا و كرمنا و جعلنا افضل و أكرم مخلوقاته و ميزنا بصفات لي معطاهمش لمخلوقات اخرى، مهما كان شكلنا و اللون تاعنا و حجمنا، بصح حنا نسينا هاذ الشيئ و ولينا نستصغروا رواحنا و نطيحوا بقيمتنا على جال امور تافهة، لي تقولك نكره روحي لاني سمينة و لي تقولك ماشي شابة، و لي تقول انا كحلوشة و راجلي يحب البيضا، و لي تكره ظروفها و عائلتها …
كل هاذ الامور، شكلك ، لونك، ظروفك، عائلتك، .. ولادك ماشي نتي لي جبتيهم لروحك و ماشي على جالهم ماتحبيش روحك نتي حاجة و كل هاذ الامور حاجة وحدو خرى.
نتي انسانة مكرمة عند ربي نفسك هادي عزيزة ،نفسك هي اغلى حاجة عندك هي ختك، هي صحبتك، هي كلش هي لي راك تكمل معاك حياتك و تفهمك و تحس بيك اذا ماحبيتيهاش و ما قدرتيهاش شكون لي راح يحبها و يحترمها ؟
اذا كان لازم عليك تحتارمي الاخرين و تقدريهم نفسك أولى و أجدر بهذا الاحترام و التقدير و الحب، باه تغيري هذه النظرة عن نفسك لازملك توقفي هاد الافكار السلبية على روحك تاع( أنا منحبش روحي، منحبش جسمي، لوكان غير جيت كما فلانة و فلانة) تعودي تشوفي للنقاط الإيجابية لي فيك و تمدحي روحك و تفتاخري بروحك و تحبيها.
اتعلمي تحبي نفسك و تحتارميها و تقدريها ، و ما تهدريش عليها هدرة عيانة ( انا حابسة، انا متخلفة.)،تحبي نفسك معناه كي ماتسمحيش للاخرين ينقصوا من قيمتك و من ثقتك في نفسك و من حبك لروحك.
تحبي نفسك كي تعطيها الحاجة المليحة ماكلة جيدة، رياضة،معلومة مفيدة، .. و ما تستخسري في روحك حتى حاجة، كي تتعلمي حاجات جديدة و تطوري من نفسك ووتنميها و تستثمري فيها ،هي كي ترفعي يقينك فالله ووفي روحك، هي كي تشوفي روحك جوهرة غالية ، هي كي ترحميها و تتلطفي بيها ماشي طيحي عليها بالخدمة و التهمبير وتحرثي عليها بلا رحمة ولا شفقة و انك ماتضيعيش وقتك في امور مراحش تفيدك، هي كي ديري كل حاجة تخلي حياتك احسن وافضل، تقوليلي صح أنا دايرة هكذا وعندي سلبيات بزاف و ظروفي خلاتني نخمم هكذا، نقولك حبيبتي تقبليهم عادي حتى وحدة ما راهي مثالية و كاملة، تقبلي نقاط ضعفك، تقبلي شكلك، لونك، ظروفك، حلتك الاجتماعية و قولي عادي أنا هكذا و انا راضية عن نفسي، و هذا هو السر هو تقبل النفس كلما تقبلتي نفسك كما هي و ظروفك كما هي كلما حبيتيها و عشتي في سلام و طمأنينة و هدوء و راحة البال.
كي تتقبلي روحك كما هي لتما وين تقدري تبداي تخدمي على نقاط ضعفك و سلبياتك و تتخلصي منها و تطوري منها، معناه كي تقولي انا نحب روحي و نحب كل حاجة فيا و حتى ظروفي لأنها صنعت مني انسانة قوية و صبورة، بصح راني حابة نزيد نتطور نزيد نتعلم، نزيد نقضي وقت كبير مع روحي، لهنا راكي لحقتي لمرحلة عميقة بزاف من حب الذات.

و كاين بعض الاخوات لي تقول أعوذ بالله لي يحب روحو اناني، في رايكم هاد الفكرة صحيحة، هل كل واحد يحب روحو معناها هو شخص أناني؟
عزيزتي الفرق بين الانانية و حب الذات، هو ان حب الذات
كيما تحبي الخير ليك راح تحبيه و تتمنايه للآخرين و تفرحي لفرحهم، و هذا الشئ لي يفرق حب الذات عن الانانية، الانانية هي كي تحبي المليح غير ليك و تتقلقي كي تشوفيه عند الاخرين و ربما تتمناي يزول من عندهم و يتحول ليك!  أو كي تحبي مصلحتك على حساب مصالح الآخرين هذا هو الفرق بين الانانية  و حب الذات.

حب الذات معناها تتصالحي مع روحك،مع ماضيك، معناها تقدري روحك و ما تحطيش من قيمتك و لو قدام نفسك، معناها تتعلمي من الخطأ نتاعك ما شي تقعدي غيري تعاتبي في روحك لوكان غير ما تصرفتش هكداك، لو كان غير درت هكذا..،  كي تحبي روحك راح تسامحيها على الاخطاء لي دارتهم و أكيد تحبي ترتقي بيها و تطوريها و تحافظي عليها.

راني حاسة بيك، نتي لي تعرضتي للانتقاد الشديد من طرف عائلتك، أو  زوجك،  أو صديقاتك الان أو في صغرك و هاد الشئ لي خلاك تصدقي كلامهم و تستصغري روحك، حبيبتي محال تعجبي كل الناس و يرضاو عليك الجميع، اذن ما ديريش على كلامهم هذا رأيهم وهم مسؤليين عنو و رأيهم يعكس تفكيرهم لو كانو ايجابيين لوكان شافو غير الإيجابي فيك و لكن الله غالب عليهم، نتي لي تعرفي روحك حسن المعرفة و أدرى بذاتك و هذا يكفيك اذن ما تتأثريش برأي الناس لأنو يعبر عليهم و ماشي عليك نتي.

نعطيك تطبيق بسيط لوكان تطبقيه لمدة راح يرتفع تقديرك و حبك لذاتك هو انك تهدري مع نفسك بايجابية دائما قولي أنا نحب نفسي، أنا أثق بقدراتي،انا اشعر بالرضا عن ذاتي، استحق التقدير لاني مميزة ..عاودي هذه التوكيدات يومياً و كل ما تجيك فكرة اوهدرة سلبية على روحك تم تم اتفكري حاجة إيجابية عليك ،راح تلاحظي تغير كبير في حياتك.

 حبيبتي نتي وحدك مسؤولة عن افكارك اذن خلي افكارك إيجابية عن نفسك ، اعتني بنفسك و أحبيها بدون شروط أو قيود يعني ما تقوليش كي يتغير شكلي نولي نحب روحي أو كي نتزوج او  كي ننجح فالمسابقة، لا لازم يكون حبك لذاتك بدون شروط أو قيود و أنما حب مطلق، و نزيد نقولك تقدير الذات شئ أساسي لسعادتك كلما حبيتي روحك كنتي سعيدة، مرحة، ايجابية، ما تطلبيش من الآخرين يحبوك و يقيموك و نتي ما تحبيش روحك لأنو فاقد الشيئ لايعطيه و ما تعطيش لكلام الناس  حتى أهمية.

فالاخيرحبوبتي خذيها قاعدة ماتقدريش تدعمي و تساندي أحد في الحياة طالما انك واقفة ضد نفسك و عدوة روحك، و قيمتك خذيها من ذاتك ماشي من الآخرين يعني ما تسنايش حتى الناس تحبك و ترضى عليك باه تحبي روحك و ترضاي عليها،  احبي نفسك احترميها و اعتني بها باه تعيشي حياتك صح و تعيشيها بذكاء  و لا واش قال خواتاتي و أنا اعترف لك اختي اني احبك و اتمنى لك الخير .
الشمس المشرقة

/بواسطة
,

كيف تعدلين مزاجك

المزاج و لا المورال كيما نعرفوه هو هذيك الحالة النفسية لي تكوني فيهامثلا سعيدة، حزينة، مقلقة، ،مديقوتية،كارهة حياتك و حنا النسا نعانيو بزاف من هد المشكل تاع المورال هاو طلع هاو هبط و عادة يهبطلنا المورال بزاف بحكم اننا عاطفيين و حساسين بزاف،و هذا الشئ يأثر علينا بالبزاف يخلينا نحسو بديقة الخاطر و الحزن و نلحقو حتى نبكيو و المشكلة انو هذا الشعور يأثر حتى على عايلتنا و الناس المحيطين يينا و ولادنا مساكن .
لازم تعرفي اختي بلي المورال هذا تقدري انك تتحكمي فيه و تسيطري عليه،صح يجونا ظروف اقوى منا تخلينا نعياو و نفشلو لكن كل ما تدربتي على السيطرة على مزاجك و التحكم فيه راح تتجنبي المشاعر السلبية او  على الأقل تنقصي منها،
باه تتعلمي تتحكمي في مزاجك او تعدليه لازم تعرفي الامور لي تطلعلك المورال و ديريها درك ماتقوليش نسافر حول العالم او نشري سيارة اخر طراز، لا نقصد الامور لي تقدري تديريها الان و حالا و تطلعلك المورال ، الامور لي مافيهاش جهد و لا مال و انما درك تقدري تنوضي تديريها فهمتيني مهما كانت امور تافهة مدامها تسعدك ديريها مثلا تأخذي حمام ساخن او تشربي قهيوة تعدلك المورال، تماكيي وجهك، تحكي مع امك او صديقتك، تشطحي او تسوطي، تنوضي تطيبي، تسمعي اغنية و لا قرآن، تتفرجي فيديو يضحك …….
يعني تكوني علابالك بالحاجة لي كي تنوضي تديريها تطلعلك شوية المورال و تسقملك النفسية تاعك، و لو كان تكتبي قأئمة بالاشياء البسيطة لي كي ديرها تفرحي و تزهاي هكذا كي تحسي المورال تاعك بدا شوية يولي للور يكون عندك الحل و السلاح الفعال.
يعني ماتخليش روحك تزيدي تدخلي في حالة حزن كبيرة او مبعد تحصلي بروحك و ماتلقاي كيفاه تديري لا، عالجي هذا المشكل من الاول غير يبدا يظهر و تشوفي روحك و مورولك بدا يرجع للوراء روحي ديري ولو حاجة من القائمة هذيك.

و تانيك من بين الحاجات لي تعونك باه تعدلي مزاجك و تطلعي مورالك كاين:

*الضحك: نعم حاولي تضحكي و لو كنتي في قمة حزنك حاولي تضحكي و الا مقدرتيش اضحكي تاع بسيف و لو فوق قلبك، صدقيني هذيك الضحكة السامطة الصفرة تاع فوق القلب عندها تأثير و تساعدك باه تولي متوازنة في مشاعرك.

*لا تعيشي في الماضي: كامل عندنا ذكريات سلبية فاتت علينا و كي نتفكروها نحزنو و يهبط المورال نقولو “يا لوكان ما صراليش هكذا” حبيبتي خلي الماضي يروح  على روحو و عيشي الحاضر و تأكدي بلي التجارب السابقة هي لي علماتك بزاف أمور و لوكان منغلطوش منتعلموش، اذن هذيك التجارب العيانة لي تتفكريها تهبطلك المورال ولي اعتبربها دروس ليك جات تعلمك و تربيك و تفهمك، افهمي الخطأ لي درتيه و ماتزيديش تعاوديه و خلاص انساي و ارمي الماضي و عيشي يومك.

*مساعدة الاخرين: علابالك مساعدة الناس فيها خير كبير ليك كي تعاوني الناس و توقفي معاهم و   لو بالنصيحة تحسي روحك درتي حاجة مليحة في انسان هدا راح يعطيك طاقة إيجابية و سعادة وخاصة كي تشوفي هداك لي عاونتيه سعيد و فرحان و استفاد منك مورالك راح يطلع كي الفليشة
المشي: ادا قدرتي تخرجي اخرجي امشي و استنشقي الهواء و لا اخرجي للبالكون و شمي شوية هواء نقي و ديري تنفس عميق راح تحسي براحة كبيرة.
*اهتمي بالغذاء الروحي: يعني العبادات و التقرب الى الله سبحانه ، صلي ركعتين او اقرأي شوية قرآن او اقعدي على سجادتك سبحي و استغفري هذا افضل علاج للنفسية الهابطة لانو يعطيك ثقة كبيرة في ربي و في نفسك، راح تعاونك بزاف و تحسسك بالسكينة و الطمأنينة.
*مارسي الرياضة: و لو في دارك قومي بحركات رياضية و كوني نشيطة، الرياضة تطلع المورال و تزهي البال و تخليك تباني ديما صغيرة و زاهية.
*الغذاء الصحي و الطبيعي : حاولي تأكلي صحة و تأكلي الخضر و الفواكه نية ،لان الاغدية المصنعة و الغير صحية تصيب الجسم بحالة السموم و الخمول و هد راح ياثر على مزاجك كيما كاين ماكلة تدير القلقة، و كاين ماكلة ترقد، كاين تاني اكل لي يسبب الحزن و يهبط المورال و متنسايش تشربي بزاف الماء،
*اكسري الروتين لي موالفة بيه غيري احيانا في نشاطاتك ، على خاطر الروتين و تكرار نفس المهام كل يوم يخليك تملي و تكرهي ،جربي أمور جديدة نوعي نظامك و نوعي مهامك ،مثلا بدلي ديكور دارك، او شكلك، او بدلي الطريقة لي موالفة بيها في شغلك اخرجي خرجة جديدة و ماتخليش الملل ينال منك.
*اسعدي الاخرين: كوني نتي مصدر سعادة ناس وحدوخرين و لو بإبتسامة او نكتة و دخلي الفرحة و الامل لقوبهم، كوني نتي الانسانة لي كي تدخل تدخل معاها الضحكة و الابتسامة و الامل و الخير ، بمجرد ما تشوفي السعادة و الفرحة في عيون الناس و لي كنتي ساهمتي فيها راح يخليك تسعدي لسعادتهم.
*الفراغ: الحاجة المهمة بزاف في هذا الموضوع و لي هي تدخلنا الوسواس و التقلاق و تهبطلنا المورال هو الفراغ، كي تكوني نهار كامل فارغة شغل ماعندك ماديري و ما تعملي هنا الشيطان اكيد مراحش يخليك في حالك راح يوسوسلك و يفكرك بكل حاجة سلبية تهبطلك المورال و يزيد يعطيك توقعات سلبية للمستقبل و نتي مدامك فارغة شغل راح تستجيبي للوساوس تاعو و تتأثري، اذن الفراغ اكبر عدو لينا لازملك يكون عندك امور تشغلي بيها نفسك، و تنتفعي بيها، املأي يومك بمهام ديري ليك اهداف و حاولي تحققيها ادخلي في جمعيات و لا اي حاجة تنفعك المهم ماتقعديش فارغة شغل.
*بعدي على المقارنة: من الاسباب الرئيسية لي تخليك حزينة و مكتئبة هو كي تقارني روحك بوحدة اخرى و راح تكتشفي انو ماعندكش واش عندها و هنا الصدمة لكبيرة تولي تكرهي روحك تكرهي زهرك و مورالك لتحت كامل و خاصة الان مع اليوتوب و لات ديار تاع الناس مكشوفة و تقدري ببساطة انك تقارني روحك بيها، حبيبة قلبي هذيك الانسانة لي تحسي روحك ناقصة قدامها معلابالكش واش راهي عايشة بالفعل بالاك راهي في ميزيرية كحلة بصح ماتبينش بالاك مريضة ما تقدريش ياختي لي تشوفيها تقارني روحك بيها اقتنعي بلي الشئ لي راكي فيه راهو خير ليك اقتنعي بلي كل واحد و رزقو في هاد الدنيا ، ماتشوفيش لي فوق عليك و انما شوفي الناس لي تحتك لي مراض و لي عايشين فالشارع و لي عايشين فالهم و الغم راح تعرفي قيمة الحياة لي راكي عايشتها و راح تحمدي ربي و ترضاي برزقك.
ديري في بالك بلي مكانش منا لي ميهبطلهاش المورال و ماتكرهش روحها، لكن المرأة الذكية هي لي تعرف كيفاه تخرج من هده الحالة و متخليهاش تأثر عليها بزاف، على هذا حاولي تفهمي و علاش اصلا راهو هابطلك المورال و السبب تاعو هل بسبب فكرة جاتك و لا انتقاد عطاوهولك، او ربما روتين القاتل لي راكي عايشةفيه، حاولي تتصداي هاذ المشكلة بأنك تنوعي نمط معيشتك و تعدليه بأنك تعدلي ماكلتك، تديري رياضة او المشي، تكون عندك علاقات اجتماعية مليحة و تكوني تعاوني لي يطلب منك المساعدة، و خاصة تكوني منشغلة بنفسك بتطوير روحك، بتعلم حاجات جديدة بتحقيق اهدافك هكذا راح تكوني سعيدة طول الوقت و تكوني انسانة نافعة لروحك بالدرجة الاولى و تنفعي الاخرين.
تذكري اختي مزاجك يؤثر على صحتك و على مردوديتك و اكثر من هذا راح يؤثر على ولادك و كل افراد الاسرة لهذا حاولي تخلي ديما مورالك طالع لأنك تستحقي تعيشي سعيدة و فرحانة كامل حياتك.
الشمس المشرقة

/بواسطة

تلخيص كتاب “سحر الترتيب” (الفصل الخامس)

الفصل الخامس:  سحر الترتيب يبدّل حياتك جذريا

 

تناولت الكاتبة الفصل الخامس من الكتاب بعرضها النقاط التالية:

 

1. رتّب منزلك واكتشف ما تريد القيام به فِعلا

فكّر في أيامك المدرسية والأشياء إلي كنت تديرها هاذاك الوقت، يمكن كنت تحب تطعم الحيوانات ولا تحب ترسم الصور… الخ، لخاتش كاين احتمالات كبيرة أنو هذاك الأمر مرتبط بشكل كبير بحاجة راك تقوم بيها حاليا كجزء طبيعي من حياتك، وترتيبك لبيتك هو إلي راح يخليك تكتشف هاذو الأشياء. فالترتيب أفضل طريقة تتعرف بيها على نفسك ومهنتنا تعكس بدقة كبيرة القرارات إلي اتخذناها في حياتنا، ومعظم الأشخاص إلي جربّو الترتيب زاد شغفهم للعمل وأسسو شركات خاصة، وآخرين غيرّو المهن تاعهم، واهتم آخرون بمِهنهم الحالية وصارو أكثر شغف ببيوتهم وعائلاتهم وأدركو فِعلا واش يحبّو.

 

2. التأثير السحري للترتيب يبدّل حياتنا بصورة جذرية

الترتيب يغيّر حياة الناس بصورة جذرية وهذا الأمر ينطبق على الجميع 100% وهذا التأثير  هو إلي سماتو الكاتبة إسم “سحر الترتيب”. ومن التأثيرات السحرية للترتيب هي ثقتك في قدراتك على اتخاذ القرارات ففي كل مرة تمسك فيها غرض وتسأل نفسك إذا كان يبعث فيك شعور بالفرح ولا لا؟ هنا راح تصقل مهاراتك في إتخاذ القرارات. بحيث أنو الناس إلي فقدت الثقة في أحكامها هي بالأساس تفتقد الثقة في نفسها.

 

3. اكتساب الثقة في الحياة عبر سحر الترتيب

تحدثت الكاتبة عن اعتمادها على نفسها منذ صغرها واهتمامها بالترتيب في الخامسة من عمرها، وأنو تعلمّت تقدير الحب غير المشروط من طرف بيتها مش من طرف الأهل ولا الأصحاب. وأنو ثقتها كبيرة في بيتها وفي أشياءها إلي تملكها وملابسها إلي تلبسها وبيتها إلي تعيش فيه والأشخاص إلي في حياتها. وهي تشعر بدعم الأشياء والأشخاص المميزين في حياتها وإلي يبعثولها شعور بالفرح، وهي تحاول تساعد الناس باش يشوفو مقدار الدعم إلي راح يتحصلو عليه من المساحة إلي يعيشو فيها والأشياء المحيطة بيهم.

 

4. تعلّق بالماضي أو قلق من المستقبل

لما نركزو مليح في أسباب عدم تخليّنا عن الأشياء راح نلقاو السبب هو إما تعلقنا بالماضي أو خوفنا من المستقبل ( هذا العقد قدمّه لي صديقي وأحببته وقتها، قد أحتاج هذا الإناء يوما ما… الخ). والتعلق بالماضي والخوف من المستقبل ما يتحكمش في طريقة اختيارك للأشياء فقط لكنّو يمثل المعايير إلي تعتمدها في إتخاذ القرارات في مختلف جوانب حياتك حتى علاقتك بالأشخاص ولا وظيفتك. وكاين ثلاث طرق نقدرو نواجهو بيهم أشياءنا: مواجهتها الآن أو مواجهتها في وقت ما أو تفاديها إلى أن نموت. والخيار ليك أنت، بصح من الافضل مواجهتها الآن وبشكل أسرع.

 

5. معرفة أنك تستطيع الاستغناء

لما ترمي الأشياء إلي ماتبعثش فيك الفرح مش راح تحس بأي تأثيرات جانبية ولا بأي سلبية في حياتك اليومية، وهاذ الشيء يدل على أنك كنت عايش كل هاذيك الفترة محاط بأشياء ماتحتاجهاش. ونادرا ما يندم الشخص على شيء يكون رماه لأنو هو إلي اتخذ قرار الرمي.

 

6. هل تُلقي التحيّة على منزلك؟

قُول للمنزل تاعك كي ترجع “مرحبا لقد عدت إلى المنزل” وإذا نسيت تقولها بمجرد دخولك للبيت قولها كي تتفكّرها “شكرا لأنك منحتني المأوى” وإذا حشمت تقولها بصوت عالي معليش قولها بينك وبين روحك، ولما تكرّر هاذ الفعل مع الوقت راح تحس أنو بيتك أصبح يستجيب للتحية تاعك كي تدخل، وبالتدريج راح تعرف الأماكن إلي خاصها ترتيب أو إلي راح تحطّ فيها أغراضك، إن ترتيبنا لبيوتنا هو فرصة للتعبير عن تقدرينا لمنازلنا وشكرها على توفيرها الراحة والمأوى لينا.

 

7. أغراضك تريد مساعدتك

لما ترمي شيء ما ما تتنهدش وتقول أوه، أو هاذ الشيء مااستخدمتوش كامل، بصح لما تجي تتخلص منو اشكرو على الدعم إلي قدمهولك وأداؤو معاك، إذن تخلص من كل الأشياء إلي ماتبعثش فيك الفرح وتمنّى لها رحلة سعيدة. وخلّي الوداع بمثابة احتفال لاطلاقها.

 

8. مساحة عيشك تؤثر في جسمك

حين ترتب منزلك يصبح الهواء في الداخل نظيفا ومنعشا، وتخفيف كمية الأغراض يخفف كمية الغبار في بيوتنا، وهاذ الشيء يخلينا نميلو للتنظيف بشكل أحسن لأنو الأرضية تصبح بارزة والاوساخ ظاهرة وبالتالي ننظفوها بسرعة وبسهولة، والهواء النقّي مفيد للبشرة، وقيامنا بعمليات التنظيف بعد التخلص من الفوضى يخفض وزننا ويحافظ على رشاقتنا. فالتخلص من فائض الملابس يجعل الناس أكثر رضا بما يملكون لخاتش احتفظو فقط بواش يحبّو، لأنو في السابق قد ماكان عندهم ملابس يحسو أنهم ماعندهمش ودايما يزيدو يشرو ويكدسّو الملابس في الخزانة. الأشخاص إلي تخلصو من الكتب والمستندات صارت عقولها أكثر صفاء، أما إلي خففو من عدد مستحضرات التجميل ورتبو المساحات حول المغطس والمجلى صارت بشرتهم نقية وناعمة. إذن ترتيب بيتك يعزّز جمالك ويخلّي جسمك أكثر صحة ورشاقة.

 

9. الترتيب يزيد الحظ

إن ترتيب الملابس وفق تدرج الألوان ( بحيث تكون الألوان الفاتحة في الجهة الأمامية وتنتقل تدريجيا للألوان الداكنة في الجهة الخلفية للدرج)، هذا الترتيب يشعرك بالروعة كلما فتحت الدرج، لخاتش الألوان الفاتحة عندها تأثير المهدئ. ولما تنظم بيئة عيشك بشكل يعطيك إحساس بالراحة والنشاط والسعادة في هاذي اللحظة تقدر تقول أنو عندك الحظ. إذن ترتيب البيت هو أفضل طريقة لبلوغ الحظ الجيد.

 

10. كيفيّة التعرّف إلى ما هو نفيس فِعلا

إن الأشياء إلي يحبها صاحبها ويعتني بيها تكون نابضة وتشعر أنو فيها رغبة باش تكون أكثر إفادة للمالك تاعها. على هذا نشوفو أنو الاشياء إلي تحظى باهتمام أصحابها تكون متألقة. وبالتالي من السهل تعرف وشنهي هي المقتنيات إلي يحبها صاحبها من غيرها على الرغم من كونو احتفظ بيهم كامل.

 

11. التواجد قرب الأشياء التي تبعث الفرح يجعلك سعيداً

إذا قدرت تقول بلا ما تتردد “أحب هذا فِعلا” وحبيت فكرة امتلاكو مهما قالو عليك الآخرين تجاهلهم  واحتفظ بأشياءك العزيزة على قلبك، لأنو أكبر سعادة يتحصل عليها الإنسان هي لما يكون محاط فقط بالأشياء الي يحبها.

 

 12. حياتك الحقيقية تبدأ بعد ترتيب منزلك

ما دام أنك اخترت باش تقرأ كتاب سحر الترتيب معناه أنو عندك رغبة في تبديل وضعك الحالي وإعادة ضبط حياتك وتحسين أسلوب عيشك واكتساب السعادة والتألق، ولحظة اختيارك هذا الكتاب بنيّة الترتيب راك قمت بالخطوة الأولى وكي وصلت في قرايتك للكتاب لهاذي النقطة معناها راك عارف مباشرة الخطوة إلي المفروض تقوم بيها. تقدر تبدأ الترتيب الآن ومرة وحدة وللأبد، إذن خصص وقتك وجهدك وشغفك للشيء إلي يفرحّك أكثر، ولمُهمتك في الحياة. والحياة تبدأ فِعلا بعد ترتيبك لبيتك.

 

في الأخير بينّت الكاتبة أنها تسعى من هذا الكتاب مشاركة الآخرين سحر الترتيب لأنو العواطف العميقة إلي يحسّ بيها الفرد لما يرتبّ أشياءه تتشابه مع العواطف إلي يحسّها الشخص في حفلة التخرّج. كذلك الإحساس  بالهواء النقيّ والمنعش إلي يكون في الغرفة بعد ترتيبها، هاذي الأمور كلها راح تخلّي يومك أكثر سعادة وإشراق.

 

 

إنتهى

 

… شمس راقية

 

 

/بواسطة

تلخيص كتاب “سحر الترتيب” (الفصل الرابع)

الفصل الرابع: تخزين الأغراض لحياة ممتعة

تناولت الكاتبة الفصل الرابع من الكتاب بعرضها النقاط التالية:

 

1. تعيين مكان لكل غرض

لخاتش وجود غرض من دون مكان راح يضاعف إمكانية عودة الفوضى مجددا للمكان، في هاذي الحالة لازملك تحددي مكان لكل غرض مرة واحدة فقط وبعدها راح ترتاحي بشكل نهائي لأنك راح تشري فقط الاشياء إلي تكوني بحاجة ليها وعندك ليها مكان. وبالتالي قومي بإرجاع كل غرض لمكانو بعد استعمالو راح يظل بيتك مرتب على الدوام.

 

2. الرمي أولا والتخزين لاحقا

مشكلتنا الحقيقية هي أننا نمتلك أكثر مما نحتاج أو نريد بالفعل. بصح كي تتعلمي إختيار أغراضك بطريقة صحيحة راح تكفيك المساحة المخصصة للتخزين. وهذا هو السحر الحقيقي للترتيب. وعلى هذا لازم تبداي بالرمي باش تتوفرلك مساحة لتخزين الاشياء إلي قررتي تحتفظي بيها.

 

3. التخزين: السعي إلى البساطة القصوى

مالازمش نتعبو تفكيرنا في إستراتيجيات معقدة للتخزين، نحاولو البحث على ابسط الطرق للتخزين، والسر باش تكون عندنا غرفة خالية من الفوضى هو إعتماد البساطة القصوى في التخزين.

 

4. لا تبعثر مساحات التخزين

ومعناه أنو يتم تخزين الأغراض إلي تكون من نفس النوع في نفس المكان. ومالازمش نبعثرو مساحات التخزين. وهنا كاين طريقتين نقسمو بيها الاغراض حسب الفئات وإلي هوما: حسب نوع الغرض وحسب الشخص إلي راح يستعمل الغرض.

 

5. إنس أمر “تدفق الواردات” و “تواتر الاستعمال”

بداية فإن الفوضى تنجم عن سببين محتملين وهما: الحاجة لجهد كبير من أجل ترتيب الأشياء أو عدم معرفة الأماكن إلي تنتمي إليها الأشياء. وبالتالي احتفظي بالأشياء المتشابهة في مكان واحد أو في أمكنة قريبة من بعضاها باش يسهال عليك اقتناءها. وبالنسبة لتواتر استعمال الأشياء قسمي الدرج إلى قسمين حطي في الجهة الخلفية الأشياء إلي ماتستعمليهاش غالبا وفي الجهة الأمامية الأشياء إلي تستعمليها غالبا.

 

6. لا تكدّس الأشياء: التخزين العمودي أساسي

تكديس الاغراض فوق بعضاها يزيد من صعوبة ملاحظة الحجم المتزايد للأغراض. أما التخزين العمودي راح يخليك تلاحظ أنو أي زيادة راح تحتل مساحة اضافية من مساحة التخزين المتوفرة عندك. يعني راح تنتبه لزيادة الأشياء وتراكمها ببساطة.

 

7. لا حاجة إلى لوازم خاصة بالتخزين

تقدري تحلّي مشاكلك الخاصة بالتخزين بأشياء متوفرة في بيتك كيما علب الأحذية الفارغة، تقدري تستخدميها لتوضيب الجوارب في الادراج، وترتيب قناني الشمبوان والبلسم في الحمام، توضيب مستحضرات التنظيف وأكياس النفايات… وغيرها. المهم أنو لما تكوني ترتبي في بيتك ماراكيش بحاجة للخروج باش تشري لوازم تخزين من السوق.

 

8. أفضل طريقة لتوضيب الحقائب هي حقيبة أخرى

يعني وضع نفس النوع من الحقائب مع بعض وأن تتألف المجموعات من حقائب يدوية مصنوعة من مواد متماثلة كالجلد القاسي أو القماش السميك أو حقائب صغيرة خاصة بالمناسبات مثل الزفاف أو المآتم. وبالتالي فإن توضيب هاذي الحقائب يكون حسب المادة والحجم وتواتر استعمالها. وأمبعد حفظها داخل بعضها البعض كيما الصناديق متعددة الأحجام.

 

9. أفرغ حقيبتك كل يوم

خصصي علبة احذية أو درج وفرغي فيه كل محتويات الحقيبة تاعك حتى ولو مازال راح تستعمليها في الغد، لأنو راح يعطيك فرصة باش تنظفيها وتتخلصي من النفايات إلي راح تكون فيها كيما بواقي أوراق أو تذاكر حافلة أو علكة ممضوغة… الخ.

 

10. الأغراض الموجودة على الأرض مكانها في الخزانة

نقدرو نخزنو اغراض كثيرة في الخزائن إلي تكون مبنية في الجدران لأنها عميقة وعريضة من الداخل. ومن الأفضل نقل كل وحدات التخزين لهاذي الخزانة كيما الرفوف الفولاذية والخزائن إلي تكون مصنوعة من الخشب الرقيق. ونحاولو نرتبو فيها الاغراض إلي حجمها كبير  كيما حقائب السفر والآلات الكهربائية… وغيرها.

 

11. إبقاء المغطس ومجلى المطبخ خاليين من الفوضى

ابعاد قناني الشمبوان المختلفة عن المغطس يسهل عملية تنظيفو. ونفس الشي بالنسبة للحوض تاع المطبخ، فعصر الاسفنجة وتجفيفها بعيد عن المجلى راح يخلصك من تراكم الجراثيم في حوض المطبخ، كذلك حددي مكان لعلب التوابل والصلصات في خزائن المطبخ باش تتوفرلك مساحة المجلى إلي تكون قريبة من الفرن.

 

12. زيّن خزانتك المفضلة بأغراضك المفضلة

لازم تكون غرفتك المكان إلي تقدري تستمعي فيه بهواياتك بطريقة ترضيك، تقدري تزيني خزانتك بالملصقات أو الصور الفوتوغرافية والزينة، وأي شيء تحبيه بلا ما تفكري في أي قيود لخاتش هاذي المساحة تاع التخزين خاصة بيك أنتي فقط.

 

13. انزع اللصيقة عن الملابس الجديدة فورا

كي تشري الملابس اختاريها بنية الترحيب بيها في بيتك وأنزعي اللصاق منها فورا، لازم عليك تقطعي حبل السرة إلي يربطها بالمتجر لخاتش  ولاّت ممتلكات شخصية ليك.

 

14. لا تقلل من أهمية  “ضجيج” المعلومات المكتوبة

ازيلي كل الملصقات عن أوعية التخزين لديك، مزقّي أوراق النايلون المليئة بالكلمات إلي ماتحبيش تشوفيها، لخاتش راح تسببلك ضجيج في دماغك وتضطري تقرايها كل ما مريتي عليها، وبالتالي كي تتخلصي من فائض المعلومات البصرية  راح تصبح مساحتك أكثر سلامة وراحة.

 

15.قدّر مقتنياتك

لازمنا نعاملو الأشياء إلي نستخدموها في حياتنا اليومية كالكمبيوتر والحقيبة اليدوية والاقلام بعناية واهتمام خاص لأنهم قدمولنا دعم كبير في حياتنا. وبالتالي اعتنائك وتقديرك لأغراضك يمثل حافز كبير ليها باش تدعمك، من خلال أنك تتعاملي مع أغراضك على أساس أنها حية وتسمعك وتشكريهم على اداءهم معاك.

 

( يتبع)

 

 

… شمس راقية

 

/بواسطة

تلخيص كتاب “سحر الترتيب” (الفصل الثالث)

الفصل الثالث : كيفيّة الترتيب حسب الفئة

تناولت الكاتبة الفصل الثالث من الكتاب بعرضها النقاط التالية:

 

1. تسلسل الترتيب: اتبّع التسلسل الصحيح للفئات


تسلحّي بأكياس نفايات كثيرة وابداي في رمي الأشياء الكثيرة المزعجة بالنسبة ليك وإلي ماعندهاش قيمة، وإلي أنتي بحاجتو الآن هو اتباعك التسلسل الصحيح للترتيب. يعني أبداي بالملابس وأمبعد الكتب وأمبعد الأوراق ثم الأغراض المتفرقة وفي الأخير انتقلي للأشياء إلي تمثلك قيمة عاطفية.

وبالنسبة لفئة الملابس توصي الكاتبة بتقسيمها إلى فئات فرعية أخرى وهي كالتالي:  ملابس النصف العلوي كيما القمصان والكنزات، ملابس النصف السفلي كيما السراويل والتنانير، الملابس إلي لازم نعلقوها كيما السترات و المعاطف و البدلات، الجوارب، الملابس الداخلية، الحقائب اليدوية، الاكسسورات كيما الأوشحة والأحزمة والقبعات، الملابس الخاصة بأماكن معينة كيما ملابس البحر وملابس المدرسة، وأخيرا الأحذية.

إذا اتبعتي هذا التسلسل راح تنجزي خدمتك بسرعة وراح تحققّي نتائج ملحوظة وبسرعة مفاجئة.

 

2.  الملابس: ضع كل قطعة ملابس موجودة في المنزل على الأرض

أجمعي كل ملابسك الموجودة في الخزائن والأدراج في مكان واحد، ما تخلّي حتى قطعة في مكان آخر سواء كانت معلقة ولا في الحقائب، وراح تتفاجئي بكمية الملابس إلي تملكيها، تحسسيها وحدة بعد وحدة واحتفظي فقط بالملابس إلي تبعث في نفسك الفرح، حاولي تبداي بملابس الموسم الماضي لأنو تعلق النفس بها يكون أقل، وأطرحي سؤال على نفسك: هل أريد أن أرتدي هذه القطعة فورا إذا تبدّلت فجأة درجات الحرارة؟. إذا كان جوابك هو : ليس بالضرورة، معناه تخلصي منها فورا، إذا لبستيها الموسم الماضي ياسر معناه أشكريها على أداءها معاك وتخلصي منها ثاني، المهم في الأخير راح تحتفظي فقط بالملابس إلي تبعث فيك الفرح وبالتالي راح يظل عندك المقدار إلي تحتاجيه، وبعد ما تتطور عندك القدرة على اختيار ما تحبين انتقلي لكل فئة فرعية من ملابس الموسم الحالي.

 

3. ملابس البيت: تحويل بعض الملابس إلى ملابس البيت أمر محرّم

كاين متاجر مخصصة فقط لبيع ملابس البيت لأنو كل من تصميمها وقماشها يبعثو شعور بالاسترخاء لمُرتديها. وهذا الشيء يوضح أنو ملابس البيت تختلف تماما عن ملابس الخروج،  وبالتالي من اليوم توقفي أنك تحولّي ملابس الخروج إلي ما ولاتش تعجبك وترتاحي فيها إلى ملابس البيت. والتبديد الحقيقي ماهوش في رميك لملابس ما تحبيهاش، بصح التبديد هو أنك تلبسي هاذو الملابس وأنتي عندك طموح في الحصول على أسلوب العيش المثالي. فمن المنطقي هو تعزيز الصورة الذاتية الايجابية وأنك تلبسي في البيت الملابس إلي تحبيها فِعلا وترتاحي فيها. إذن ألبسي ملابس أنثوية وأنيقة لأنها راح تؤثر على صورتك الذاتية.

 

4. تخزين الملابس: أطوِها جيدا، وعالج مشاكل التخزين لديك

كاين طريقتان لتخزين الملابس، إما أنو نحطوهم في العلاّقات الخاصة بالملابس وأمبعد نعلقوهم في القضيب، أو أنو نطبقوهم ونرتبوهم في الأدراج، وتوصي الكاتبة بشدّة على طريقة الطيّ من ناحية توفير المساحة بحيث أنك تقدري تخزّني من 20 إلى 40 قطعة من الملابس المطوية في نفس المساحة اللازمة لتعليق 10 قطع، ولما نقومو بطيّ وتطبيق ملابسنا راح نرتبو القماش ونمحو التجاعيد إلي فيه، وأثناء تطبيقنا لملابسنا كذلك نقدرو نلاحظو بسهولة الملابس إلي تقطّعت أو تنسلّت أو أي تغييرات أخرى تصادفها ملابسنا.

 

5. كيفية الطيّ: أفضل طريقة طيّ لمظهر مثالي 

أول خطوة تقومي بيها هي تصّورك كيفاش راح يولّي الدرج تاعك بعد انتهائك من الترتيب،  فالهدف تاعك هو تنظيم محتواه بحيث أنو تقدري تشوفي مكان كل قطعة ملابس بلمح البصر، وكأنك تشاهدين عنواين الكتب على الرفوف، وبالتالي فالهدف هو طيّ كل قطعة ملابس على شكل مستطيل بسيط، في البداية تاخذي قطعة الملابس وتطوي الجانب الطويل تاعها نحو الوسط، وأمبعد أثني الكُمين باش تتحصلي على شكل المستطيل، وبعدها أمسكي أحد أطراف المستطيل وأطويه من ناحية الطرف المقابل ليه، وزيدي أطويه مجددا إلى نصفين، وتقدري تعدلّي عدد الطيّات حتان تتطابق قطعة الملابس المطوية مع ارتفاع الدرج تاعك إلي راح ترتبيها فيه.

 

6. ترتيب الملابس: سر منح الطاقة لخزانة ملابسك 

توصي الكاتبة بطيّ كل الملابس الممكنة، ما عدى بعض الملابس إلي يكون من المستحسن تعليقها في العلاّقات كيما المعاطف، السترات، البدلات، التنانير و الفساتين، والقاعدة تقضي بتعليق كل الملابس إلي تنتمي لنفس الفئة جنبا إلى جنب، بحيث يكون قسم للسترات وقسم للبدلات… الخ، كذلك علقّي الاغراض الثقيلة ( وتشمل الملابس الطويلة، المصنوعة من قماش سميك والداكنة اللون) في الجهة اليسرى والاغراض الخفيفة ( وتشمل الملابس القصيرة، قماشها يكون أرق وألوانها أفتح) في الجهة اليمنى.

رتبي ملابسك حسب الفئة يعني ديري المعاطف في أقصى جهة اليسار وأمبعد الفساتين ثم السترات، السراويل، التنانير وأخيرا الكنزات. وهنا حاولي تلقاي توازن يخلّي الملابس تظهر وكأنها تنحدر صعودا نحو اليمين، راح تحتاجي فقط 10 دقائق باش تعاودي ترتبي خزانتك وفق الفئات.

 

7. تخزين الجوارب: عامل الجوارب باحترام

إن الجوارب المحفوظة في الدرج هي في فترة راحة بعد ارهاقها الشديد طوال اليوم  وتحملّها الضغط والاحتكاك باش تحفظ أقدامنا وعلى هذا لازم نرتبوها بطريقة توضح شكرنا ليها على أداءها معانا، وعلى هذا قومي بطيّ الجوارب النسائية على الطول إلى نصفين وأمبعد أطويها على ثلاث أقسام، بحيث تكون المساحة تاع الاصابع مطوية نحو الداخل، وأمبعد قومي بلفّ الجوارب مليح صعودا نحو الخصر المطاطي. وبالنسبة للجوارب العالية للركبة أطويها بنفس هاذي الطريقة، أما بالنسبة للجوارب الشتوية أطويها على اثنين فقط راهي كافية مش ثلاثة، وأمبعد رتبيها في ادراجك بشكل منتصب أو رتبيها في كرتونة أو علبة الأحذية وأمبعد حطي الكرتونة في الدرج، هاذي الطريقة تبينلك بسرعة عدد الجوارب إلي عندك وثاني تحميها من الضرر وتحافظ عليها ناعمة وما تتجّعدش.

ونفس الشي بالنسبة للجوارب العادية حطي جورب فوق الثاني واطويه على اثنين او ثلاثة حسب طول الجورب وارتفاع درجك إلي راح ترتبيهم فيه.

 

8. الملابس الموسمية: لا داعي لتخزين الملابس الموسمية

مع إدخال مكيفات الهواء وأجهزة التدفئة المركزية إلى حياتنا أصبحت منازلنا أقل تأثرا بالطقس الخارجي، وبالتالي حان الوقت باش نتخلاو على عادة تخزين الملابس وإخراجها حسب المواسم، يعني قسمّي ملابسك إلى ملابس قطنية وملابس صوفية وتجنبّي تصنيفها وفق الموسم (شتاء و صيف، خريف وربيع)، أو وفق النشاط ( العمل والتسلية)، لخاتش هذا التصنيف دايما يبقى غامض. وتوصي الكاتبة باش ماندفنوش الملابس في الخزانة لخاتش الملابس إلي تتخبّى مدة نصف سنة راح تبدو أنها باهتة وبدون حيوية، إذن خبيها في أدراج حتى ولو ماهوش الموسم تاعها و أفتحي الادراج و أسمحي للهواء يدخلها ومررّي يديك عليها مرة على مرة وحسسيّها أنك متشوقة لارتدائها الموسم الجاي وتأكدي أنو هاذ النوع من التواصل راح يخليها تعيش معاك مدة أطول.

 

9.  تخزين الكتب: ضع كل كتبك على الأرض

كثير من الناس ما يقدروش يرمو الكتب وينفصلو عليها، وباش نقدرو نرتبو الكتب أول خطوة هي إنزال كل الكتب من الرفوف على الأرض لخاتش هاذي هي الطريقة المناسبة إلي تساعدنا على الاختيار ، فالكتب إلي على الرف ما نقدروش نحددو احساسنا اتجاهها إلا اذا لمسناها بأيدينا،  وإذا كانت هناك كتب كثيرة يمكن نقسموها إلى اربعة فئات:

– الفئة العامة: وهي الكتب التي تقرأها للمتعة.

– الفئة العمليّة: وتشمل المراجع، كتب الطبخ… الخ.

– الفئة البصرية: وتشمل مجموعات الصور الفوتوغرافية… الخ

– المجلات.

وأمبعد أحكمي كل كتاب على حدى وتفقدي إحساسك اتجاهو إذا كان يبعث فيك شعور بالفرح ولا لا، بمجرد لمسو تفقدي احساسك لأنك اذا بديتي تتصفحي فيه راح يعطيك صورة ضبابية عن إحساسك وتفكري إذا هذا الكتاب تحتاجيه أم لا. فسعادتك راح تكون بامتلاكك رف مليء بالكتب إلي تحبيها أنتي فِعلا.

 

10. الكتب غير المقروءة: ” يوما ما ” تعني ” أبدا”

أكثر الأسباب شيوعا إلي ماتخليش الفرد يرمي الكتب هي عبارة ” قد أقرأه” أو ” قد أرغب في قرائته يوما”، لازم نعرفو أنو هدف الكتب هو أنها تعطينا المعلومات وهاذ المعلومات ماعندهاش معنى إذا رصيناها فوق الرفوف، وباش تقرر الاحتفاظ بكتاب معين لازم يبعث فيك هذا الكتاب الشعور بالفرح. أما بالنسبة للكتب إلي بديت قرايتها وماكملتهاش أو كتب اشتريتها وما قريتهاش لحد الآن على أمل أنك راح تقراها يوما ما، فالأنترنت سهّل مهمة شراء الكتب. ومشكلة التخلص من الكتب إلي رانا ناويين نقراوها أصعب من الكتب إلي قريناها من قبل. توصي الكاتبة بالتخلص من كل الكتب غير المقروءة، فالأفضل للإنسان قراءة كتاب أثار اهتمامو الآن مش كتاب غلفّه الغبار لعدة سنوات.

 

11. الكتب الواجب الاحتفاظ بها، تلك الشخصية جدا

تؤكد الكاتبة على أنو امتلاك عدد قليل من الكتب يزيد من تأثير المعلومات المقروءة، بحيث تقدر تتعرف على المعلومات الضرورية بسهولة، وبالتالي لما يعجبك كتاب معين يكون هذاك هو الوقت المناسب باش تقراه وباش ما تفوتش هاذيك الفرصة خلّي عندك مجموعة صغيرة من الكتب.

 

12. فرز الأوراق: القاعدة الأساسية، تخلّص من كل شيء

المبدأ الأساسي لدى الكاتبة في توضيب الأوراق هو رمي كل الاوراق، باستثناء الأوراق إلي تنتمي إلى احدى هذه الفئات الثلاثة: الأوراق المستخدمة حاليا، الأوراق اللازمة لفترة محددة من الوقت، الأوراق الواجب الاحتفاظ بها بأي ثمن. وكلمة أوراق ما تشملش الأوراق إلي عندها قيمة عاطفية كرسائل الحب القديمة أو دفاتر اليوميات، وبالتالي ألزم نفسك على فرز كل الاوراق التي لا تبعث فيك أية حماسة وحاول انهاء المهمة دفعة واحدة، وبالنسبة للرسائل خليها حتان تكون ترتب في الاغراض العاطفية.

بعد فرز الأوراق نقسمو الأوراق إلي احتفظنا بيها إلى قسمين: الأوراق الواجب الاحتفاظ بها، الأوراق الواجب التعاطي معها.

خصص زاوية للأوراق الواجب التعاطي معها كيما (الرسائل التي تستلزم رد، الاستمارات الواجب تسليمها، الجريدة إلي ناوي تقراها) بحيث تكون كامل في مكان واحد ومن الافضل ترتب في رفوف عمودية.

أما بالنسبة للأوراق الواجب الاحتفاظ بها قسمها إلى فئات فرعية حسب تواتر استعمالها يعني قسم للاوراق المستخدمة بشكل غير متواتر  كيما ( بوالص التأمين، الكفالات، عقود الايجار) ضعها كلها مع بعض في مجلد بلاستيكي شفاف، وقسم للأوراق المستخدمة بشكل متواتر كيما (الخطوط العريضة للمؤتمرات أو قصاصات الجرائد)، توضع في ملف شفاف بشبه الكتاب، ولازم باستمرار تخفيض حجم هاذي الأوراق لخاتش تتكاثر بسرعة.

الأساس في ترتيب الأوراق هو أنو نجمعو كل الأوراق إلي تنتمي لنفس الفئة في ملف واحد.

 

13. كل الحقائق عن الأوراق 

– كيفية تنظيم الأوراق: كاين مجموعة من الأوراق يصعب علينا باش نرموها و لازم نعالجوها كالتالي:

* أوراق الدراسة:  الأشخاص إلي يستمتعو بالدراسة المؤتمرات والحلقات الدراسية   المختلفة يجيبو معاهم كثير من الأوراق ويحتفظو بجميع المواد إلي يتحصلو عليها أثناء حضورهم لهذاك المؤتمر وهاذ الشيء يخلي الأوراق تتراكم عندهم بشكل متزايد، وعلى هذا لازم ترمي كل الأوراق الخاصة بهاذوك المؤتمرات وإذا بقى عندك شغف أحضر مؤتمر بنفس الموضوع مرة أخرى.

* بيانات بطاقة الاعتماد: تعبّر بيانات بطاقة الاعتماد على الوسيلة إلي من خلالها يتحقق الفرد من مقدار المال إلي تم انفاقو خلال شهر معين، وبالتالي بعد ما تتحقق من محتواها وتتأكد أنو صحيح أرميها على الفور.

* كفالات الأدوات الكهربائية: اجمعها كلها في ملف واحد شفاف لخاتش هاذو الكفالات تستخدم مرة وحدة في السنة وبالتالي كي تكون كلها مع بعض تقدر تتحقق بسهولة من تواريخ صلاحية الكفالات الأخرى.

* بطاقات المعايدة: تخلص من كل بطاقات المعايدة لأنها أدت الغرض المراد منها بمجرد استلامها واحتفظ ببطاقة وحدة برك باش تتأكد من عنوان المرسل في السنة القادمة.

* دفاتر الشيكات المستعملة: تخلص منها فورا لأنو رصيدك مش راح يزيد باحتفاظك بيها.

* بيانات الدفع: بيان الدفع يبينلك مبلغ المال إلي دفعتو هذا الشهر، كي تتأكد من محتواه تخلص منو مباشرة.

 

14. الكومونو ( أغراض متفرقة 1 )

الكومونو هي كلمة يابانية تعبر عن اشياء صغيرة ، اغراض متفرقة، اكسسوارات، هدايا، اجزاء او قطع صغيرة، وبالتالي يصعب على الناس التعامل معها، بصح اذا تعاملت معاها بالتسلسل الصحيح ماهيش راح تجيك المهمة صعبة، وباش نفرزو هاذو الأغراض الصغيرة لازمنا نتبعو هذا التسلسل:

– الأقراص المدمجة أو أقراص الدي في دي.

– مستحضرات العناية بالبشرة.

– مستحضرات التجميل.

– الاكسسوارات.

– الاشياء القيّمة ( جوازات السفر، بطاقات الاعتماد… الخ).

– المعدات والادوات الكهربائية ( كاميرات رقمية، وصلات كهربائية، أي شيء كهربائي).

– الاغراض المنزلية ( القرطاسية وأدوات الكتابة، لوازم الخياطة… الخ).

– اللوازم المنزلية ( الأدوية، أدوات التنظيف، المناديل الورقية… الخ).

– أغراض المطبخ/ لوازم الطعام.

– متفرقات أخرى.

المهم في كل مرة عالج فئة فرعية واحدة، فالكثير من الناس يحيط بيهم العديد من الاغراض ما يحتاجوهاش. وبالتالي احتفظ فقط بالاشياء التي تحبها فِعلا.

 

15. تغيير صغير، اجعل شِعارك “في محفظتي”

كلما صادفت نقود معدنية اثناء الترتيب ضعها مباشرة في محفظة نقودك مش في حصالة النقود، لأنك مع الوقت يمكن تنساها أو تتجاهلها لمدة طويلة واحتمال أنو يتغير لون النقود المعدنية وتصدأ وتفقد قيمتها المالية.

 

16. الكومونو ( أغراض متفرقة 2 )

الأغراض الصالحة للرمي- أشياء احتفظت بها ” فقط لأن…”

كاين كثير من الاشياء نقدرو نرموها فورا بدون طرح سؤال هل وجودها يبعث الفرح أم لا؟ وكاين كثير من الاشياء تم الاحتفاظ بها من دون أي سبب، لازم نعالجوها بسرعة والا راح تستهلك مساحة كبيرة في بيوتنا.

 

* الهدايا: كاين هدايا مافتحتهاش نهائيا أو استخدامها مرة وحدة فقط لأنها ماتناسبش ذوقك. والهدايا تعكس شعور المُهدي وبالتالي مالازمش نحسّو بالذنب اذا حبينا نتخلصو منها، اشكرها على السعادة إلي قدمتهالك لما تلقيتها وتخلص منها.

* علب الهواتف الجوالة: إرمي علبة الهاتف الجوال وكذا الدليل والقرص المدمج بمجرد فتحها، وإذا احتجت أي مساعدة أطلبها من الموظف تاع المتجر.

* حبال غير محددة الوظائف: احتفظ فقط بالحبال إلي تقدر تحدد مهمتها بسهولة، أما الباقية فتخلص منها مباشرة.

* الأزرار الاحتياطية: توصي الكاتبة بتثبيت الأزرار الاحتياطية مباشرة في البطانة الداخلية للمعاطف والستراتبعد مانشروها، أما الملابس الاخرى إذا فقدت أحد الأزرار تقدر تشريه بكل سهولة من المتجر.

* علب الادوات الكهربائية: تخلص من علب الادوات الكهربائية فورا لأنك مش راح تحتاجها مرة أخرى راهي فقط محتلة مساحة في بيتك بلا سبب.

* أجهزة التلفزيون والراديو المكسورة: لا حاجة للاحتفاظ بها طبعا.

* لوازم سرير الضيف الذي لا يأتي أبدا: من الجيد الاحتفاظ بلوازم السرير لضيوف يجوك باستمرار، بصح إذا كان من النادر يجيك ضيوف تخلص من هاذي اللوازم وفي حالة الضرورة تقدر تستأجرها لهاذيك الليلة.

* عينات مستحضرات التجميل المحتفظ بها للرحلات: كي تكون كمياتها صغيرة جدا تتدهور بسرعة وبالتالي من الخطر استعمالها.

* مستحضرات من أحدث الصيحات الطبية: اذا كان عندك من هاذو المستحضرات الغالية الثمن كيما أحزمة التنحيف وزجاجات زيوت المعالجة العطرية وآلات خفض الوزن وغيرها،  ومااستخدمتهاش تخلص منها فورا واشكرها على الطاقة إلي منحتها لك وقت شراءها.

* الهدايا المجانية: هاذي الهدايا أبدا ماتعطيكش إحساس بالمتعة كيما فوطة تنظيف الهاتف الجوال إلي جاتك مع زجاجة العطر أو نظارة تحمل شعار شركة مشروبات أو رزنامة الجيب السنوية وإلي مرّت ستة اشهر ومااستعملتهاش… الخ، تخلص من كل هاذوك الاشياء فورا.

 

17. الأغراض العاطفية: منزل أهلك ليس ملاذا لتذكاراتك

خلّي ترتيب فئة الأغراض العاطفية للنهاية لأنها أصعب وحدة فيهم، ماتخافيش من رمي التذكارات لأنو الذكريات النفيسة فِعلا ما تختفيش حتى لو رمينا الاشياء المرتبطة بيها، وما لازمش باش نتخلصو من أغراضنا العاطفية السابقة نخبّوها في بيت أهالينا لازمنا نتصرفو فورا ونحددو الأشياء إلي من المفروض نحتفظو بيها فقط عندنا، يعني لازم نعالجو الماضي الآن باش نقدرو نضبطو حياتنا وننظمو حساباتنا وبالتالي نتقدمو خطوات للأمام.

 

18. الصور الفوتوغرافية: دلّل نفسك الآن

وهاذي هي الفئة الأخيرة إلي نقومو بفرزها لخاتش الصور تظهر في أماكن كثيرة مش متوقعة لما نكونو بصدد ترتيب هاذيك الأماكن كيما الأدراج أو الرفوف أو علب الاغراض المتنوعة وبالتالي كلما صادفتنا في هاذيك الأماكن نجمعوها باش نتصرفو فيها لاحقا، والطريقة الصحيحة لفرز الصور هي أنك تخرجيها كامل من كل ألبوماتها وتلمسّي كل صورة على حدى واحتفظي فقط بالصور إلي تبعث فيك إحساس بالفرح وارمي البقية، وبهاذي الطريقة راح يتبقى عندك عدد قليل من الصور إلي تمثل أحداث مميزة في حياتك وتعيدلك الذكريات بطريقة حية.

كاين أشياء أخرى من الصعب التعامل معها كيما تذكارات  الاولاد كهداياهم لنا في عيد الأم أو الأب، صورة رسموها في صغرهم… الخ إذا كانت هاذي الأشياء مازالت تبعث فيك الفرح احتفظي بيها.

كاين أشخاص يبقاو مخبيين أغراض ترجع طفولتهم كيما علاماتهم المدرسية أو شهادات الامتحانات أو لباس معين، لازم نعرفو انو المساحة إلي تعيش فيها التذكارات لازم تكون للشخص تاع اليوم مش تاع الماضي.

 

19. تخزينات احتياطية مذهلة رأيتها

كاين أشخاص يحبّو دايما التخزين بكميات كبيرة ومكانش مقدار معين من المخزون يعطيهم إحساس بالأمان فكلما امتلكو أكثر كلما خافو من نفاذ الكمية إلي عندهم، وبالتالي مش راح تقدر تستخدم كل هذاك الفائض لأنو راح تنتهي مدة صلاحيتو، الحل حسب الكاتبة هو أنك تتخلص منو فورا بتوزيعو على أصدقائك أو ناس تحتاجو أو مراكز إعادة التدوير، وكي تحتاج كمية معينة المتجر قريب ويتوفر على كل شيء. من المهم تقوم الآن بتقييم واش تملك وتتخلص من الفائض.

 

20. التخفيف إلى أن تشعر بشيء في قلبك

لما تقوم بتخفيض مقتنياتك بفضل الترتيب راح توصل لمرحلة تدرك فيها فِعلا أنو هذا هو المقدار إلي تحتاجو بالفعل باش تعيش في راحة وسعادة، وبعد ما تتجاوز هاذي المرحلة راح تلاحظ أنو مقدار الأشياء إلي تملكها مش راح يزيد أبدا. وهاذ الشيء تحديدا إلي مش راح يخليك ترجع للفوضى مجددا. وأنت تقوم بترتيب بيتك وتخفض في كمية مقتنياتك راح تعرف قِيَمك الحقيقية والأشياء المهمة فِعلا في حياتك وإلي تبعث فيك إحساس بالفرح، وإلي تخليك تستمتع بحياتك وفق معاييرك الخاصة بيك.

 

21. اتبع حدسك وسيكون كل شيء على ما يرام

أنت وحدك إلي تعرف نوع البيئة المناسبة ليك وتحسّسك بالسعادة، وفنّ اختيار الاشياء أمر شخصي جدا، وباش ما ترجعش لحالة الفوضى لازم ترتبّ بناءا على معاييرك الخاصة بيك، وعلى هذا تظهر أهمية احساسنا حيال كل غرض، وكلما خفّضت من كمية أغراضك كلما قدرت تهتم بيها أكثر. ولما تسأل قلبك إن كان هذا الغرض يشعرك بالفرح أم لا؟ لازم عليك تصدّق قلبك كي يجاوبك بنعم أو لا. ولما أتبّع الحدس تاعك راح تذهل بالتغييرات الجذرية وكأنها لمسة سحرية أصابت حياتك.

 

 

( يتبع)

 

 

… شمس راقية

 

/بواسطة

تلخيص كتاب “سحر الترتيب” (الفصل الثاني)

الفصل الثاني : الرمي أولاً

 

تناولت الكاتبة الفصل الثاني من الكتاب بعرضها النقاط التالية:

 

1.  إبدأ بالرمي كل شيء دفعة واحدة

كي تبداي ترتبي في المساحة تاعك بصورة شاملة راح يظهرلك أن التغيير عميق جدا وبالتالي راح تحسّي أنك في عالم مختلف وهاذ الشي راح يأثر على عقلك ويبعث فيك بُغض كبير للعودة إلى حالة الفوضى إلي كنتي فيها، وهاذ الإحساس بالتغيير الجذري ما تقدريش تحسّيه إذا كانت عملية الترتيب تدريجية. وكلما استغرق الترتيب وقت أطول كل ما راح تحسٍي بالتعب أكثر ومن ثم تزيد احتمالات استسلامك وأنتي مازال في منتصف الطريق. وباش تحققي أفضل النتائج لازم تقومي بالترتيب بالتسلسل الصحيح يعني  أنك تقومي بالرمي وأمبعد التفكير في أماكن لوضع الأغراض، فكرّي فقط في الرمي أولا وكي تكملّي هاذي المهمة انتقلي للتفكير في المكان المخصص للحفظ.

 

2. قبل أن تبدأ حدّد هدفك  

قبل ما تبداي في عملية رمي الأشياء خذي وقتك للتفكير وتصوّر أسلوب عيشك المثالي إلي تحلمي بيه، وبالتالي فإن تحديد الهدف من الترتيب بتنظيف المنزل، والتخلص من الأغراض التي لا تستخدمينها هو تيسير الوصول للأشياء وتخفيف الزحام، واستشعار  أن منزلك سيكون بعد الترتيب منزلاً منظماً و رائعاً، هاذ الإحساس لازم يكون حاضر بقوة في ذهنك قبل البدء في الترتيب. يعني أرسمي صورة جميلة لبيتك بعد انتهائك من عملية الترتيب راح يعطيك حافز قوي للعمل،

واذا عجزتي باش تتصوري هاذيك الصورة الجميلة تقدري تطلعي على البعض من مجلات الديكور باش تساعدك في التصّور. وحاولي في كل مرة تسألي نفسك علاه راكي حابّة ترتبي بيتك؟ وكل ما تلقاي جواب زيدي أسالي نفسك لماذا؟ علاه؟ في كل مرة علاه؟ علاه؟

وراح تتوصلي إلى نتيجة وهي أنو كل الجدوى من رمي ألأشياء والاحتفاظ بالقليل هي أن تكوني سعيدة.

 

3. كيف أختار؟ هل يشعر بالفرح؟

 

 

كاين أنماط في الرمي يقومو بيها الناس، كيما الأشياء المكسورة والأشياء إلي ماتبقاش صالحة للاستعمال، ورمي الأشياء إلي فاتت عليها مدة دون استخدامها ، ورمي الأشياء إلي مانقدروش نصلحوها، ورمي الأشياء القديمة جدا والملابس إلي ماهيش مناسبة للموضة، والأشياء إلي كانت مرتبطة بحدث أنتهى خلاص.

بصح صعوبة رمي الأشياء هي لما ما يكونش عندنا سبب واضح ومُقنع للرمي، بعض الخبراء ينصحو في هاذي الحالة برمي الأشياء إلي ما استخدمناهاش خلال سنة كاملة، واذا عجزنا على القرار نخبوها في صندوق وننتظرو مدة ستة أشهر واذا ما استخدمناهاش مجددا نقدرو نتخلصو منها الآن، بصح ماري كوندو تشوف أنو أفضل طريقة لرمي الأشياء هي

أنك تأخذي كل غرض على حدى،  وتمسكيه بين يديك، وتسألي نفسك “هل يشعرني هذا الغرض بالفرح؟” أو أنك ما تلقاي حتى مشاعر اتجاهو أو أنو يذّكرك بذكرى حزينة.

القاعدة هنا هي أنك ترمي كل شيء ما عدى الأشياء إلي تعطيك شعور بالفرح. وبالتالي راح تحتفظي فقط بالأشياء المفرحة والمبهجة في بيتك.

 

3. فئة واحدة في كل مرة

توصي الكاتبة بالتفكير في الفئة وليس المكان، يعني ماتقوليش راني حابّة نرتب غرفة النوم أو غرفة الجلوس، لخاتش كثير  من الناس تخزّن نفس الفئة في أماكن مختلفة من البيت وهاذ الشيء راح يستهلك جهد ووقت كي تجي ترتبيهم بالإضافة إلى إحساسك بالتعب والملل، على هذا روحي أجمعي كل الأشياء إلي تنتمي لنفس الفئة إلي قررتي ترتيبها كيما الملابس، وحاولي أنك تتعاملي مع كل قطعة على حدى، يعني قومي بالنظر لكل ثوب، واحد بعد الآخر وحددي مشاعرك اتجاهو، وأمبعد اتخذي قرارك ونفس الشي قومي بيه مع الأواني و الكتب و الأجهزة والحقائب والأحذية… وغيرها.

لازم تكون مساحاتك المنزلية مشغولة فقط بالأشياء المفرحة والمبهجة وإلي تنال تقديرك وحبّك. بالإضافة إلى أنو عملية جمع الأشياء من صنف واحد في مكان واحد قبل البدء بتصنيفها راح يضبط مشاعرك اتجاهها، وبالتالي راح يسهّل عليك عملية تقييمها ويوضح لك حجم وكمية الاغراض إلي تملكها. وكثير من الناس تصيبهم صدمة لما يشوفو حجم الأغراض إلي يملكوها وإلي غالبا تكون ضعف توقعاتهم. جمع الأشياء في مكان واحد راح يظهرلك الاغراض المتشابهة وهاذ الشيء راح يسهّل عليك القرار في الاحتفاظ بيها ولا لا.

 

4. ابدأ بشكل صحيح

لما يكون بعض الأشخاص بصدد ترتيبهم بيوتهم ينشغلو بتصفح ألبوم الصور ولا كتاب ولا أي غرض آخر يذكرهم بأحداث سعيدة وعزيزة عليهم، وياخذو وقت طويل في التصفح، وهاذ الأمر يخليهم يهربو من عملية الترتيب، خاصة إذا بداو ترتيبهم بالفئات هاذي وإلي يكون من الصعب اتخاذ قرار الرمي أو الاحتفاظ بيها. ولازم نعرفو أنو للأغراض قيم أخرى بالإضافة إلى القيمة المادية تاعها،  وبالتالي كاين أربعة عوامل تعطي القيمة لأغراضنا : كيما قيمة الوظيفة إلي تؤديها، وقيمة المعلومات إلي تحتويها، وقيمتها العاطفية ومعناه ارتباطنا العاطفي بيها، وأخيراً  قيمة الندرة خاصة إذا كان يصعب علينا أنو نتحصلو على هاذو الأغراض مجددا أو استبدالهم إذا رميناهم. وتوصي الكاتبة باش نتجّنبو البدء في الترتيب بأي فئة تتعرّض لذكرياتنا، وبالتالي فإن أفضل تسلسل حسب ماري كوندو للترتيب هو  أنك تبداي بالملابس ثم الكتب ثم الأوراق والأغراض المتفرقة وفي الأخير الأشياء ذات القيمة العاطفية والتذكارات.

 

5. لاتدع عائلتك تراك 

تؤكد الكاتبة على أنو مارثون الترتيب بطبيعة الحال يوّلد نفايات ياسر، وهاذ الحالة راهي تعبّر نجاح عملية الترتيب، بصح الأم و الأب عندهم مقاييس الاحتفاظ بالأشياء أو رميها تختلف عن مقاييس صاحب هاذي الأشياء، وعلى هذا باش تقدري تقومي بعملية رمي الأغراض إلي ما تحتاجيهاش بكفاءة لازم ما تخليش عائلتك يشوفو كمية الأكياس إلي راح تتخلصي منها باش ما يأثروش على قرارك هذا.

 

6. إذا كنت غاضبا من عائلتك فقد تكون غرفتك هي السبب

في حالة ما إذا حسّ الشخص بالانزعاج من أفراد عائلتو لأنهم مش مرتبين، لازم عليه يهتم بالمساحة المخصصة ليه ويرتبها، يعني الخطوة الأولى تتمثل في مواجهة أغراضك الخاصة وأمبعد تنتقل لترتيب المساحات المشتركة، بصح المساحات الخاصة بالآخرين خليها لأنك ما تقدرش تتصرف فيها وترمي الاغراض منها، أما في المساحات المشتركة تقدر تعمل بهدوء للتخلص من فائض الأغراض بطريقة ما تخليش أفراد عائلتك ينتبهو لفقدان أغراضهم لأنهم بالأساس ماكانوش يستعملوهم من مدة طويلة، وبالتالي ماهمش بحاجتهم.

 

7.  ما لا تحتاج إليه أنت لا تحتاج إليه عائلتك أيضا

إذا حبيت تتخلص من أغراض ما تحتاجهاش مش لازم تفرضها على أفراد عائلتك، يعني ماتحاولش تفرّغ خزانتك على حساب الآخرين وتعطيهم أشياء يمكن ما يحتاجوهاش وما تعطيهمش إحساس بالمتعة، وبالتالي رايح فقط تزيد عليهم عبء تخزينها. يعني إذا حبيّت تمد حاجة لأفراد عائلتك لازم تكون عارف أنهم محتاجينها فِعلا أو كانو مستعدين باش يشروها قبل ما تقرر تعطيهالهم.

 

8. الترتيب حوار مع الذات 

لما تقرّر باش تقوم بالترتيب حاول أنو يكون الوضع هادئ لخاتش راح تكون في حوار مع ذاتك لاختبار مشاعرك اتجاه كل غرض من أغراضك، وبالتالي الضجيج والموسيقى والتلفزيون راح يأثرو على هاذ الهدوء، وعلى هذا تنصح ماري كوندو بالترتيب في الصباح الباكر، لأنو غالباً في هذا الوقت تقدر ترتب  بضعف سرعتك الاعتيادية.

 

9. ما يجب فعله حين تعجز عن رمي شيء ما

تؤكد الكاتبة على أنو المعيار الأساسي الواجب استخدامو لاتخاذ قرار الاحتفاظ بشيء معين هو:  “إحساسنا بالفرح عند لمسه”، لكن لما نلمسو شيء ومايعطيناش إحساس بالفرح وفي نفس الوقت تفكيرنا يمنعنا من رميه ونقولو أنو يمكن نحتاجوه كاش نهار، أو غاضني باش نرميه، تنصح الكاتبة في الحالة هاذي بالتفكير في ما يلي:

• فكري مليح في سبب امتلاكك لهذا الشيء  أساساً ( وقتاش تحصلتي عليه؟ علاه؟ واش كان يمثلّك في هذاك الوقت؟).

• فكري مليح في الدور الحقيقي لهذا الشيء،  وتذكري أنو كل غرض راه يقوم بدور محدّد وأمبعد تنتهي المهمة تاعو، وراح تتفاجئي  بكميات كبيرة للأشياء إلي قامت بدورها خلاص بصح أنتي مازلتي محتفظة بيها. فمن الصعب تقولي أنك تحبّي حاجة وهي مدفونة في أعماق خزانتك أو درجك، وحتى أنك ماكنتيش تعرفي بلي راهي موجودة عندك، على هذا قومي بتحرير تلك الأشياء وتخلصّي منها على الفور، وقتها راح تستشعري معنى الصفاء والانتعاش.

 

 

(يتبع)

 

 

… شمس راقية

/بواسطة

تلخيص كتاب “سحر الترتيب” (الفصل الأول)

كتاب  “سحر الترتيب” الفن الياباني في التنظيم وازالة الفوضى، هذا الكتاب أحدث شُهرة عالمية حول الترتيب والنظام، بحيث أنو تمت الترجمة تاعو إلى عدة لغات من بينها اللغة العربية.

المؤلفة: ماري كوندو

ترجمة: لينا شبارو

عدد الصفحات: 218

الطبعة الأولى لسنة 2015

عدد الفصول: 05

 

الفصل الأول  : لماذا لا أستطيع إبقاء منزلي مرتباً؟

الفصل الثاني : الرمي أولاً .

الفصل الثالث : كيفية الترتيب حسب الفئة.

الفصل الرابع : تخزين الأغراض لحياة ممتعة.

الفصل الخامس : سحر الترتيب يبدل حياتك جذرياً.

 

 

في البداية تحدثّت الكاتبة عن حبّها  للترتيب منذ صغرها، وإقبالها الدايم على مشاهدة المجلات التي تتناول صور  البيوت الجميلة و المنظمة، وبالتالي كانت تتمنى يكون بيتها بهذا النظام والجمال.

تكلمت الكاتبة على أنها كانت تمضي وقت كبير  في إعانة الناس باش يتخلصو من الفوضى، ويرتبو بيوتهم ومكاتبهم، كانت تقرأ كل ما يكتب عن الترتيب، بصح لقات أنو مبادئ الترتيب التي أكد عليها بعض المؤلفين ماهيش  عمليّة على أرض الواقع، وعلى هذا ترجع الفوضى  بشكل سريع للمكان.

وعلى هذا حاولت تتخصص في هذا المجال وتبدع فيه، الأمر إلي خلّى جدولها مملوء بالمواعيد مع الزبائن لترتيب بيوتهم ومكاتبهم وتتلقى العديد من الاتصالات اليومية بهذا الشأن.

 

الفصل الأول  : لماذا لا أستطيع إبقاء منزلي مرتباً؟

تناولت الكاتبة هذا الفصل من خلال النقاط التالية:

 

1. لا يمكنك الترتيب مطلقا إذا لم تتعلّم الطريقة

تؤكد الكاتبة في هاذي النقطة أنو المشكلة الحقيقية إلي نعانِيو منها هي أننا نطمحو للترتيب، بصح ما نعرفوش الطريقة المثلى للترتيب، وبالتالي ماهوش بإمكانك أنك تقوم بالترتيب إذا ماكنتش تعرف كيفاش يتم الترتيب أساسا. وهاذ الشيء يرجع في الأصل  أنو ما تلقيناش دروس في الترتيب نهائيا في السابق، وعلى الرغم من ذلك يقومو آبائنا ومعلّمينا بتوبيخنا إذا ما قمناش بالترتيب بالشكل الصحيح. يعني حتى في المدارس كانو يعطونا دروس في كل شيء كيما الطبخ، الاعتناء بالحديقة، اليوغا والتأمل، ما عدا الترتيب على هذا نلاحظو أنو المكان  يرجع للفوضى بسرعة.

 

2. رتّب دفعة واحدة وبطريقة صحيحة

لا تتفق الكاتبة مع فكرة ترتيب المنزل على دفعات،  هي تؤكد على فكرة الترتيب الشامل للبيت ومرة واحدة مش على دفعات، لخاتش تشوف بلّي سبب الفوضى هو أنو الناس لما يقومو بالترتيب راهم يقومو فقط بفرز الأغراض وتخزينها بشكل جزئي. وعلى هذا ما تفوت غير فترة قصيرة حتى ترجع الفوضى من جديد.

 

3. رتّب قليلا كل يوم فترتّب إلى الأبد

تشوف الكاتبة أنو فكرة (رتب قليلاً كل يوم) هي مجرد خدعة، لأنك إذا مانجحتش باش تكون مرتب خلال كل سنوات حياتك مش راح تقدر تقوم بتطوير  عادة الترتيب كل يوم بالشوية، وهنا الكاتبة تدعو باش يقوم الفرد بترتيب ضخم يكون على أسس صحيحة باش يقدر يستمتع بالتنظيم، بحيث أنو أبرز سر للنجاح هو ترتيب كل شي دفعة واحدة مش على دفعات وهاذ الشي راح يخليك تغيّر تفكيرك بصورة جذرية. وذكرت الكاتبة أنها قامت بشراء كتاب بعنوان (فن التخلص من الأشياء) وهاذ الكتاب ساعدها باش تتخلص من أشياء كثيرة  ما تحتاجهاش في بيتها هاذ الشي خلاّها تتخلص من 8 أكياس كاملة مليانة بالأغراض قليلة الأهمية بالنسبة ليها خلال بضع ساعات فقط.

 

4. السعي إلى الكمال

إذا كنتي من النوع غير المجتهد وغير المثابر  فالكاتبة توصيك بالسعي وراء الكمال دفعة واحدة، من خلال أنو تقسّمي العمل إلى نوعين:

– تحديد ان كنتي ستقومين برمي الشيء أم لا.

– تحديد مكان لوضع الشيء إلي احتفظتي بيه.

وإذا قدرتي تقومي بالعملين السابقين تكوني وصلتي لدرجة الكمال فِعلا.

 

5. ما إن تبدأ حتى تعيد ضبط حياتك

تؤكد الكاتبة على أهمية انجاز مهمة ترتيب بيوتنا بشكل سريع باش نقدرو نواجهو المسائل المهمة فعلا في حياتنا، لخاتش الترتيب هو مجرد أداة ماهوش المقصد النهائي لينا، بحيث أنو لما تكون غرفتك نظيفة ومرتبة راح تلتفت لأمورك الباطنية وبالتالي راح تتمكّن من رؤية كل المشاكل إلي كنت تحاول تتفاداها في كل مرة تصادفها، وهاذ الشيء راح يجبرك أنك تتعامل معاها وتلقالها حلول. وفي اللحظة إلي تبدأ فيها الترتيب راح تكون مضطر باش تضبط حياتك وبالتالي حياتك راح تبدأ في التغيير.

 

6. خبراء التخزين مُسّببون للفوضى

ترى الكاتبة أنو أدوات وعلب ووحدات التخزين راهي مجرد وسائل تساعد الناس باش يقومو فقط بإخفاء الأشياء عن الأنظار، وهاذي الطريقة توهم الناس أنهم تخلصو من الفوضى بصح مع الوقت راح تمتلأ هاذي الوحدات تاع التخزين ونكونو في حاجة لوحدات أخرى باش تستوعب الكميات الكثيرة من الأغراض وإلي أحنا ماراناش بحاجة ليها باش فقط تخفيها مجددا عن أنظارنا.

 

7. الفرز وفق الفئة وليس الموقع

توصي الكاتبة بالترتيب وفق الفئات، فبدلاً من أن تقولي : اليوم راح نبدا بترتيب غرفة النوم ، أو المطبخ، ركّزي على أن تكون البداية بفئة محددة، يعني قولي اليوم نرتّب الملابس وغدوى نرتّب الكتب، يعني الترتيب يكون  وفقاً لفئة الأشياء مش وفقاً لمكان تخزينها وعلى هذا أنتي مطالبة باش تجمعي كل الأغراض إلي تنتمي لنفس الفئة في مكان واحد ، هاذ العمل إلي قمتي بيه راح يبيّن لك  حجم الأغراض إلي عندك، و وقتها راح يتوضح لك الأشياء إلي تحتاجيها والأشياء إلي ماتحتاجيهاش. و يعتبر هذا أحد المبادئ المهمة في الترتيب والتخلص من الفوضى.

 

8. لا تغيّر الطريقة لتناسب شخصيتك

تشوف الكاتبة أنو الأشخاص إلي ما يقدروش يبقاو مرتبين نصنفوهم إلى ثلاث أنواع: نوع ما يقدرش يرمي أي شيء، نوع ما يقدرش يرجع الأشياء لأماكنها، ونوع يجمع بين النوعين السابقين مع بعض يعني ما يقدرش يرمي أي شيء وما يقدرش يرجع الأشياء لأماكنها. والترتيب الفعال ينطوي على عملين أساسيين:

أولهما : الرمي وثانيهما : تحديد المكان إلي راح يتم تخزين الأغراض فيه.

ولازم يتم الرمي هو الأول وأمبعد تخزين ما تم الاحتفاظ به. ففكرة الترتيب تبدأ بالتخلص من الأشياء بصرف النظر عن نوع الشخصية وعلى هذا ما نبدلوش مضمون الفكرة باش يتناسب مع كل شخص، لأنو بطبيعة الحال كل انسان متميز وفريد عن الناس الآخرين.

 

9. اجعل الترتيب حدثا مميزا

تؤكد الكاتبة على أنو الترتيب لازم ينجز مرة وحدة فقط و في فترة زمنية واحدة. وباش يكون الأمر أكثر دقة لازم نرتبو كل شيء دفعة واحدة. فالترتيب ماهوش واجب يومي تقوم بيه بالعكس هو مهمة دورية تتنفذ بشكل سنوي أو نصف سنوي، وعلى هذا كاين نوعين من الترتيب:

– الترتيب اليومي من خلال إعادة الاغراض إلى أماكنها بعد استعمالها.

– ترتيب الحدث الخاص من خلال ترتيب المنزل بأسرع وقت ممكن ولمرة واحدة فقط.

وبعد ما تقومي بتنظيم بيتك راح يقتصر الترتيب تاعك إلى إعادة الأشياء إلى أماكنها بعد استخدامها باش تمنعي تفاقم الفوضى في بيتك هذا ماكان.

 

(يتبع)

 

 

… شمس راقية

 

/بواسطة

هل أنتي زوجة صالحة؟

كل امرأة تطمح في أنها تكون زوجة صالحة في مملكتها الصغيرة، ربّها راضي عليها وزوجها سعيد في حياتو معاها.

إذا حبيتي تكوني زوجة صالحة حاولي أنك تطبقّي النقاط التالية:

 

1. إتقي الله وبعدّي على المعاصي:

القاعدة في هاذي النقطة هي “احفظي الله يحفظك ويحفظلك زوجك وبيتك”، لخاتش طاعة الله تجمع القلوب أما معصيتو راهي تشتّت القلوب وتمزقّها، حاولي أنك تحافظي على صلاتك في وقتها وماتأخريهاش مهما كانت الأسباب، تجنبّي المجالس تاع الغيبة والنميمة لأنها راح تحرقلك كل حسناتك وتضيفلك سيئات الآخرين إلي تكلمتو عليهم، ما تنتقصي من قيمة أي انسان خلقو ربّ العالمين ولا تسخري منو لأنو يمكن يكون أحسن منك عند ربّي سبحانو، أولادك ربيهم تربية إسلامية.

 

2. تعرّفي على زوجك:

أعرفي الحوايج إلي يحبهم زوجك كثّري منهم وطيعيه فيهم وتجنبّي الحوايج إلي يكرههم بطبيعة الحال أنو هاذي الطاعة تكون في مرضاة الله سبحانه وتعالى، فلا طاعة لمخلوق في معصية الخالق.

 

3. أحسني معاشرة زوجك:

نعرفو كامل الحق العظيم للزوج على زوجتو، قال رسول الله صلى الله عليه وسلم: “لو كنت آمرا أن يسجد لأحد لأمرت المرأة أن تسجد لزوجها“، وقال ثاني: “إن صلّت المرأة خمسها وصامت شهرها وحفظت فرجها وأطاعت زوجها قِيل لها أدخلي الجنة من أي أبواب الجنة شِئت“.

 

4. كوني قنوعة:

يعني أرضاي بواش عطاك ربي سبحانو مهما كان قليل ولا كثير، وما تحملّيش زوجك فوق طاقتو، قال رسول الله صلى الله عليه وسلم: “أعظم الناس بركة أيسرهن مؤونة“.

 

 5. أحسني تدبير شؤون بيتك:

من خلال أنو تربّي أولادك تربية صالحة، تنظفي بيتك وترتبيه، تطبخي الأكل في وقتو لأهل بيتك، وما تكونيش مُبذرّة في الإنفاق خاصة على الكماليات.

 

6. عاملي أهل وأقارب زوجك بالمعروف:

كوني لطيفة مع أهل زوجك خاصة أمّو لخاتش هي أقرب إنسانة ليه، احترميها واقتربي منها وكوني لطيفة معاها واتحملّي أخطائها وتنفذّي أوامرها قدر استطاعتك في غير معصية الله أكيد، لازم تتفكرّي فضلها لأنها هي إلي جابتلك هذا الزوج وربّاتو وكبرّاتو وعطاتهولك راجل.

 

7. شاركي زوجك أحاسيسو ومشاعرو وقاسميه همومو وأحزانو:

يعني افرحي لفرحتو مش لما يجي يحكيلك على انجازاتو ولا ترقياتو تبقاي متذمرّة ومنكدّة وكأنو الأمر مايعنيكش، أو أنو تغيّري الموضوع لموضوع آخر كئيب، وثاني اوقفي مع زوجك في أحزانو ونكباتو وحسسيّه أنك متفهمة وضعو والحزن إلي راهو فيه مش تضحكي عليه ولا تسخري من المأساة إلي يتعرّض ليها.

 

8. أشكري زوجك:

مالازمش تنساي أفضال زوجك عليك أشكريه بابتسامتك الجميلة، واعرفي أنو هاذي الابتسامة عندها مفعول السحر على زوجك وراح تهوّن عليه كل المشّاق تاع اليوم، قوليلو كلمة طيبة حنينة وعبريلو على حبّك وامتنانك ليه، قال رسول الله صلى الله عليه وسلم: “يا معشر النساء تصدّقن فإني رأيتكن أكثر أهل النار، قُلن: وبِم يا رسول الله؟ قال: تُكثرن اللعن وتكْفرن العشير“. وكفران العشير معناها جحود فضل الزوج وعدم القيام بحقو.

 

9. أكتمي أسرار زوجك وأستري عيوبو:

الزوجة هي أعرف الناس بخصائص زوجها وصفاتو الطيبة والسيئة، والزوجة الصالحة هي إلي تستر عيوب زوجها على الناس المتطفلة وإلي ماهوش همهم الإصلاح بصح همهم الوحيد هو أنو يعرفو الحوايج المخبية فقط، على هذا خبّي أسرار زوجك وما تخرجيهاش إلا للضرورة القصوى ومصلحة شرعية كيما التظلم عند القاضي ولا المُفتي.

 

10. كوني حذِرة من الأخطاء:

أكبر خطأ يطيحو فيه بعض النساء هو أنها تذكر محاسن نساء أخريات قدّام زوجها كجمالهن أو طبخن أو طيبتهن… الخ،  بلا ما تعرف أنو راح  يروح هذا الزوج يتخيّل في هاذوك النساء وأحيانا يجيه فضول باش يشوفهم ويتعرّف عليهم بعد شهادة زوجتو عليهم وعلى حسنهم، وثاني لازم تعرفي الوقت المناسب إلي تطلبي فيه مستلزمات بيتك مش لما يكون الزوج تعبان، أو زعفان أو مرهق من الخدمة برا، بالإضافة إلى أنو ماتنسايش تتزيّني لزوجك فهو الأولى بالتمتع بجمالك لأنو كثير من النساء تزيّن فقط للأعراس والمناسبات ولا كي تكون خارجة أما زوجها فهي ما تهتمش بزينتها قدّامو.

 

في الأخير إذا حاولت كل زوجة أنها تتقيّد بتعاليم ديننا الحنيف وتتقّي الله حق التقوى، تتأكد أنها راح تنجح في حياتها وتسعد في الدارين ان شاء الله.

 

 

… شمس راقية 

 

/بواسطة

الأمير الحلاّق

 

في واحد الزمان كان عايش سلطان في المملكة تاعو مع  زوجتو السلطانة وإبنو الأمير الوحيد، كان السلطان يأمل أنو إبنو الأمير يكون حازم كيما هو ويفرض السُلطة والهيبة تاعو على الرعيّة، بصح العكس تماما، الأمير كان إنسان طيّب ومسالم وخاطيه الحُكم والسلطنة، كان حابّ يتعلّم حرفة يدويّة تعينو على الزمان، وبالتالي كان طِوال الوقت يتبّع في حلاّق القصر ويطلب منّو يعلمّو حرفة الحلاقة، حلاّق القصر استغرب وخاف من العقاب تاع السلطان، وكان دايما يترجّاه أنو يخليّه في حالو لخاتش لو كان يعرف السلطان أنو الحلاّق يعلّم في إبنو الحلاقة راح يعاقبو أو يقتلو لأنها تعتبر إهانة في حق السلطان والأمير في اثنين.

مع إصرار الأمير على تعلّم حرفة الحلاقة وأنو وعد حلاّق القصر باش يتعلّم في الخفاء وواحد ما راح يفيق بيه ولا راح يخبّر السلطان بالأمر، وافق حلاّق القصر باش يعلّم الأمير حرفة الحلاقة لكن في الليل بعد ما يرقد جميع سكان القصر.

بعد مدة قليلة تعلّم الأمير الحلاقة وأصبح ماهر فيها كأنو من زمااان يحترفها.

فكّر السلطان في طريقة يخلّي بيها الأمير يتصدّى للظروف وأنو الدنيا هاذي ماهيش بالبساطة ولا بالأمان إلي راهو عايش فيها الأمير، يعني حابّ يوريّلو  مشاق الحياة وصعوباتها فقرّر أنو يطردو من القصر لمدة ستة أشهر بلا حتى حاجة ويخليّه يعتمد على نفسو ويعيش من قوت جبينو باش يعرف قيمة النعمة إلي راهو عايش فيها.

خرج الأمير الحلاّق من قصر باباه مطرود، وبقى يتجوّل من مدينة لمدينة يحوّس على خدمة، وفي يوم من الأيام لقى روحو في سلطنة أخرى يحكمها سلطان آخر غير باباه، وهو يتجوّل في السوق سمع الناس يحكو على السلطان وأنو يحوّس على حلاّق للقصر تكون ايدو حنينة لدرجة أنو يقدر يرقد أثناء الحلاقة، وسمع ثاني أنو قتل وطرد كثير من الحلاقين من قصرو لنفس السبب، على هذا خافو كل الحلاقين إلي في السلطنة باش يترشحو لمنصب حلاّق القصر، هنا خمّم الأمير الحلاّق وقرر أنو يرشح نفسو لهاذيك المهمة، ومباشرة انطلق لقصر السلطان وقدّم نفسو على أنو حلاّق جاء من مدينة بعيدة يحوّس على خدمة في القصر،  بالنسبة لموظفّي القصر حاولو ينصحو الشاب بعدم الترشح لأنو السلطان صعيب وممكن يقتلو إذا فشل في المهمة تاعو، بصح الأمير الشاب أصرّ على الموقف تاعو وعلى رغبتو وحاجتو المُلحة للوظيفة.

المهم ترشح الأمير للمنصب وقالو السلطان أنت شاب صغير ما تحاولش تتحداني لأنو إذا ماكانتش الحلاقة تاعك حنينة ونرقد على ايدك راني نقتلك. قالو الشاب جربني ونشوفو. استلقى السلطان وأمر الأمير باش يبدأ يحلقلو، وماهي إلا لحظات حتى رقد السلطان أثناء الحلاقة، وكي ناض من نومو لقى أنو الأمير كمّل الحلاقة بلا ما يحسّ بحتى حاجة. فرح السلطان وعجبو الحال وقرّر أنو يوظّف الأمير حلّاق خاص بيه في القصر. وكيما كان الحال أصبح الأمير الحلّاق الخاص بالسلطان، وبعد ما فات شهر قبض الراتب تاعو (فراك ونص) وراح بيهم للسوق دار ودار ما عجبو والو في السوق، وكي جاء خارج تلاقى مع المنادي ينادي: شكون يشري فايدة؟ شكون يشري فايدة؟ شكون يشري فايدة؟. وقف الأمير وسأل المنادي: شحال هاذي الفايدة؟ جاوب المنادي: فراك ونص ( يعني نفس الراتب الشهري تاعو)، فكّر الأمير شوية وأمبعد قرّر يشري الفايدة، عطى للمنادي الدراهم وقالو المنادي على الفايدة (الحكمة) وهي: “بقّي والزمان يلقّي“، ومعناها ما تدخلش في حاجة ماتعنيكش. المهم كتب الأمير الفايدة في ورقة وحطّها في جيبو ورجع للقصر.

في الشهر الثاني بعد ما قبض الراتب تاعو زاد راح للسوق، وما اشترى حتى حاجة وكي جاء خارج تلاقى مع المنادي ينادي: شكون يشري فايدة؟ شكون يشري فايدة؟ شكون يشري فايدة؟. وقف الأمير وسأل المنادي: شحال هاذي الفايدة؟ جاوب المنادي: فراك ونص،  فكّر الأمير شوية وأمبعد قرّر يشري الفايدة، عطى للمنادي الدراهم وقالو المنادي على الفايدة (الحكمة) وهي: “ِقيس ولا غَرق بعد القيس“، ومعناها الانسان مالازمش يتسرّع في اتخاذ قراراتو و يدرسها مليح وبالتالي مش راح يتورّط. كتب الفايدة ورجع للقصر.

في الشهر الثالث بعد ما قبض الراتب تاعو زاد راح للسوق، وما اشترى حتى حاجة وكي جاء خارج تلاقى مع المنادي ينادي: شكون يشري فايدة؟ شكون يشري فايدة؟ شكون يشري فايدة؟. وقف الأمير وسأل المنادي: شحال هاذي الفايدة؟ جاوب المنادي: فراك ونص،  فكّر الأمير شوية وأمبعد قرّر يشري الفايدة، عطى للمنادي الدراهم وقالو المنادي على الفايدة (الحكمة) وهي: “ِإذا لقيت الزهو والطرب ما تبدلّو بالشقاء والتعب“، ومعناها أنو إذا كنت في جوّ بهيج ما تخليهش وتبدلّو بجوّ كئيب ومتعب. كتب الفايدة ورجع للقصر.

في الشهر الرابع بعد ما قبض الراتب تاعو زاد راح للسوق، بصح هاذي المرة هو إلي كان يحوّس على المنادي باش يشري فايدة جديدة لكن المنادي ماجاش. رجع الأمير للقصر  وبالصدفة وهو يتجوّل في القصر يشوف أنو وزير السلطان خارج من جناح السلطانة زوجة السلطان وهاذ الشيء يعتبر محرّم في السلطنة، فكّر الأمير شوية و في الأخير شاف أنو هذا هو الوقت باش يطبّق الفايدة الأولى إلي شراها وهي “بقّي والزمان يلقّي“، وبالتالي قرّر أنو ما يتدخلش في أمر ما يعنيهش ويركّز فقط في خدمتو وهي حلاّق السلطان.

وتكررّت نفس الحادثة في يوم ثاني، بحيث أنو شاف وزير السلطان خارج من جناح السلطانة، وهاذي المرة شافت السلطانة أنو الحلاّق على علم بواش صرا، وبالتالي خافت أنو يخبّر السلطان بخيانتها ويكون عقابها هو الموت، فكرّت في حيلة تخلصّها من الحلاّق قبل ما يكشف سرّها ويفضحها، جابت مجموعة من السكاكين تاع الحلاقة نوعيتها رفيعة ودهنتها كامل بالسُم باش يموت السلطان بالسُم أثناء الحلاقة، ويتم اعدام الحلاق بتهمة قتلو للسلطان، وبالتالي تكون ضربت عصفورين بحجر واحد. وأمبعد توجهّت لزوجها السلطان وقدمتلو السكاكين كهديّة ليه. فرح السلطان بالهدية وأمر الحلاق باش يحلقلو  بالسكاكين الجديدة، استلقى السلطان كيما العادة ولما حاول الأمير يحلقلو نام السلطان في نوم عميق، تردد الحلاق قبل ما يبدأ  الحلاقة بالسكاكين الجديدة وخاف أنها تجرح السلطان ويعاقبو، في هاذي الأثناء وقعت عينيه على القطة نايمة وخمّم شوية أنو هذا هو الوقت باش يطبّق الفايدة الثانية وهي “ِقيس ولا غَرق بعد القيس“، وقرّر أنو يجرّب السكاكين الجديدة فيها ويحلقلها شعرها إذا ما ناضتش وما انزعجتش راح يقوم ويحلق للسلطان بيهم. كيما كان الحال بمجرد ما بدأ يحلق للقطة حتى بدات تتقلّب وتتخبط من آثار السم ومباشرة ماتت، توجه الحلاق للقطة حطّ بجنبها السكاكين وخبّاها بعيد. وفهم المقلب إلي حبّت توقعو فيه السلطانة.

قام الحلاق وحلق للسلطان بالسكاكين القديمة تاعو بلا ما يحّس السلطان بأي شيء. لما ناض السلطان من رقادو كان فرحان بالحلاقة تاعو إلي ما قلقتش رقادو.

كانت السلطانة تستنى في خبر موت السلطان بصح تفاجأت لما جاها السلطان وشكرها على هديتها إلي فرحاتو بيها. هنا فاقت أنو الحلاّق تنبّه للحيلة تاعها وزادت خافت منو أكثر. هاذ الخوف خلاّها تخمّم في حيلة أخرى تخلصّها منو نهائيا. وبالتالي قالت للسلطان بطريقة ماكرة أنو الحلاّق تاعو راه دايما يترصّد للأميرة بنت السلطان ويغازل فيها بوقاحة، وهاذ الشي يتطلب عقابو، جنّ جنون السلطان وتقلق من هاذ الشي بصح صارح زوجتو أنو هذا هو الحلاق الوحيد إلي ارتاحلو وإلي قدر يرقد بين يديه ويحلقلو بلا ما ينوض وما هوش حاب يخسرو، بصح السلطانة ما استسلمتش وبقات تحرّض في السلطان عليه حتى خضع ليها وللمكر تاعها. هنا طلبت منو أنو يبعث رسالة مع الحلاق إلى أتباع السلطان في ضواحي السلطنة ويكون مضمونها: أقتلو حامل هاذي الرسالة.

انطلق الأمير بالرسالة في الحين لأصحابها وهو في الطريق تلاقى مع وزير السلطان واستدعاه لدارو باش يحضر لحفلة طهور وليدو في الليلة هاذي، حاول يعتذر الأمير من حضور الحفلة تاع الطهور لأنو مبعوث من طرف السلطان باش يوصّل رسالة مستعجلة، في اللحظة هاذي طلب الوزير من أحد أعوانو أنو ياخذ الرسالة من الأمير الحلاّق ويروح يوصلّها لأصحابها باش الأمير يقدر يحضر حفلة الطهور وهو مطمّن، في اللحظة هاذي تذكّر الأمير الفايدة الثالثة  “ِإذا لقيت الزهو والطرب ما تبدلّو بالشقاء والتعب” وكيما كان الحال وافق الأمير يحضر الحفلة المهم أنو توصل الرسالة لأصحابها في الوقت، إنطلق مساعد الوزير بالرسالة وبمجرّد ما وصل عند أتباع السلطان في ضواحي السلطنة وبعد ما قراو الرسالة قامو بقتل هذاك المساعد دون تردّد.

في هاذي الأثناء كان الامير مستمتع بالحفلة، وبعد ما انتهت الحفلة استفقد الامير مساعد الوزير لأنو تأخر في الرجعة تاعو من ضواحي السلطنة، وتقلّق وتوتّر وفي الأخير قرّر أنو يروح بنفسو لأتباع السلطان ويشوف علاه مساعد الوزير ما رجعش؟ قالو الوزير أنا نروح معاك ونشوفو واش كاين؟ انطلق كل من الأمير والوزير  ولما وصلو وسقساو على المساعد، جاوبوهم الاتباع أنهم قتلوه بأمر من السلطان! تعجّب كل من الأمير والوزير من الخبر هذا وخاصة لما قراو بنفسهم الرسالة إلي كتبها السلطان.

في هاذي اللحظة توجّه الأمير للسلطان بالرغم من أنو الوزير نصحو باش يهرب وما يرجعش مادام السلطان فكّر باش يتخلّص منو، بصح الامير أصّر أنو يعرف من السلطان شخصيا السبب إلي خلاّه يفكّر يتخلّص منو.

ولما وصل الأمير والوزير عند السلطان، تفاجأ السلطان من بقاء الحلاّق حيّ!! وحكاولو كيفاش أنو المساعد راح في بلاصتو يوصّل الرسالة باش يتمكّن الأمير من حضور الحفلة.

في هاذي الأثناء جاوبهم السلطان أنو السبب إلي خلاّه يقرر يقتلو بهاذيك الطريقة أنو الحلاّق تجاوز حدودو وغازل الأميرة بنت السلطان، أنكر الحلاّق الكلام هذا وطلب من السلطان أنو يواجه الأميرة بالاتهام هذا. وباش تظهر الحقيقة استدعى السلطان الأميرة وسقساها إذا صح كان الحلاّق يترصّدلها في الطريق ويغازلها، جاوبت الأميرة أنها أول مرة تشوف الحلاّق ومكانش منها الحكاية هاذي، وأنو الوزير هو إلي كان يترصّدلها ويغازلها.

بعد ما ظهرت الحقيقة واعتذار السلطان للأمير ليه وأنو اتهمّو بلا ذنب وبلا حتى ما يتحقّق من الأمر، وترجّاه أنو يبقى في القصر معاهم وأنو يزوجّو من بنتو الأميرة، اعترف الأمير للسلطان أنو هو في الحقيقة مش حلاّق، هو أمير ابن سلطان وأنو خرج من السلطنة تاع باباه باش يبني نفسو بنفسو ويحقّق ذاتو.

رجع الأمير للسلطنة تاع باباه وحكالو على مغامراتو وعلى زواجو من بنت السلطان، هذا الشيء فرّح باباه وخلاّه يفتخر بيه وبعقلو الراجح.

 

 

… شمس راقية

/بواسطة

الأمير الحلاّق

في واحد الزمان كان عايش سلطان في المملكة تاعو مع زوجتو السلطانة وإبنو الأمير الوحيد، كان السلطان يأمل أنو إبنو الأمير يكون حازم كيما هو ويفرض السُلطة والهيبة تاعو على الرعيّة، بصح العكس تماما، الأمير كان إنسان طيّب ومسالم وخاطيه الحُكم والسلطنة، كان حابّ يتعلّم حرفة يدويّة تعينو على الزمان، وبالتالي كان طِوال الوقت يتبّع في حلاّق القصر ويطلب منّو يعلمّو حرفة الحلاقة، حلاّق القصر استغرب وخاف من العقاب تاع السلطان، وكان دايما يترجّاه أنو يخليّه في حالو لخاتش لو كان يعرف السلطان أنو الحلاّق يعلّم في إبنو الحلاقة راح يعاقبو أو يقتلو لأنها تعتبر إهانة في حق السلطان والأمير في اثنين.
مع إصرار الأمير على تعلّم حرفة الحلاقة وأنو وعد حلاّق القصر باش يتعلّم في الخفاء وواحد ما راح يفيق بيه ولا راح يخبّر السلطان بالأمر، وافق حلاّق القصر باش يعلّم الأمير حرفة الحلاقة لكن في الليل بعد ما يرقد جميع سكان القصر.
بعد مدة قليلة تعلّم الأمير الحلاقة وأصبح ماهر فيها كأنو من زمااان يحترفها.
فكّر السلطان في طريقة يخلّي بيها الأمير يتصدّى للظروف وأنو الدنيا هاذي ماهيش بالبساطة ولا بالأمان إلي راهو عايش فيها الأمير، يعني حابّ يوريّلو مشاق الحياة وصعوباتها فقرّر أنو يطردو من القصر لمدة ستة أشهر بلا حتى حاجة ويخليّه يعتمد على نفسو ويعيش من قوت جبينو باش يعرف قيمة النعمة إلي راهو عايش فيها.
خرج الأمير الحلاّق من قصر باباه مطرود، وبقى يتجوّل من مدينة لمدينة يحوّس على خدمة، وفي يوم من الأيام لقى روحو في سلطنة أخرى يحكمها سلطان آخر غير باباه، وهو يتجوّل في السوق سمع الناس يحكو على السلطان وأنو يحوّس على حلاّق للقصر تكون ايدو حنينة لدرجة أنو يقدر يرقد أثناء الحلاقة، وسمع ثاني أنو قتل وطرد كثير من الحلاقين من قصرو لنفس السبب، على هذا خافو كل الحلاقين إلي في السلطنة باش يترشحو لمنصب حلاّق القصر، هنا خمّم الأمير الحلاّق وقرر أنو يرشح نفسو لهاذيك المهمة، ومباشرة انطلق لقصر السلطان وقدّم نفسو على أنو حلاّق جاء من مدينة بعيدة يحوّس على خدمة في القصر، بالنسبة لموظفّي القصر حاولو ينصحو الشاب بعدم الترشح لأنو السلطان صعيب وممكن يقتلو إذا فشل في المهمة تاعو، بصح الأمير الشاب أصرّ على الموقف تاعو وعلى رغبتو وحاجتو المُلحة للوظيفة.
المهم ترشح الأمير للمنصب وقالو السلطان أنت شاب صغير ما تحاولش تتحداني لأنو إذا ماكانتش الحلاقة تاعك حنينة ونرقد على ايدك راني نقتلك. قالو الشاب جربني ونشوفو. استلقى السلطان وأمر الأمير باش يبدأ يحلقلو، وماهي إلا لحظات حتى رقد السلطان أثناء الحلاقة، وكي ناض من نومو لقى أنو الأمير كمّل الحلاقة بلا ما يحسّ بحتى حاجة. فرح السلطان وعجبو الحال وقرّر أنو يوظّف الأمير حلّاق خاص بيه في القصر. وكيما كان الحال أصبح الأمير الحلّاق الخاص بالسلطان، وبعد ما فات شهر قبض الراتب تاعو (فراك ونص) وراح بيهم للسوق دار ودار ما عجبو والو في السوق، وكي جاء خارج تلاقى مع المنادي ينادي: شكون يشري فايدة؟ شكون يشري فايدة؟ شكون يشري فايدة؟. وقف الأمير وسأل المنادي: شحال هاذي الفايدة؟ جاوب المنادي: فراك ونص ( يعني نفس الراتب الشهري تاعو)، فكّر الأمير شوية وأمبعد قرّر يشري الفايدة، عطى للمنادي الدراهم وقالو المنادي على الفايدة (الحكمة) وهي: “بقّي والزمان يلقّي”، ومعناها ما تدخلش في حاجة ماتعنيكش. المهم كتب الأمير الفايدة في ورقة وحطّها في جيبو ورجع للقصر.
في الشهر الثاني بعد ما قبض الراتب تاعو زاد راح للسوق، وما اشترى حتى حاجة وكي جاء خارج تلاقى مع المنادي ينادي: شكون يشري فايدة؟ شكون يشري فايدة؟ شكون يشري فايدة؟. وقف الأمير وسأل المنادي: شحال هاذي الفايدة؟ جاوب المنادي: فراك ونص، فكّر الأمير شوية وأمبعد قرّر يشري الفايدة، عطى للمنادي الدراهم وقالو المنادي على الفايدة (الحكمة) وهي: “ِقيس ولا غَرق بعد القيس”، ومعناها الانسان مالازمش يتسرّع في اتخاذ قراراتو و يدرسها مليح وبالتالي مش راح يتورّط. كتب الفايدة ورجع للقصر.
في الشهر الثالث بعد ما قبض الراتب تاعو زاد راح للسوق، وما اشترى حتى حاجة وكي جاء خارج تلاقى مع المنادي ينادي: شكون يشري فايدة؟ شكون يشري فايدة؟ شكون يشري فايدة؟. وقف الأمير وسأل المنادي: شحال هاذي الفايدة؟ جاوب المنادي: فراك ونص، فكّر الأمير شوية وأمبعد قرّر يشري الفايدة، عطى للمنادي الدراهم وقالو المنادي على الفايدة (الحكمة) وهي: “ِإذا لقيت الزهو والطرب ما تبدلّو بالشقاء والتعب”، ومعناها أنو إذا كنت في جوّ بهيج ما تخليهش وتبدلّو بجوّ كئيب ومتعب. كتب الفايدة ورجع للقصر.
في الشهر الرابع بعد ما قبض الراتب تاعو زاد راح للسوق، بصح هاذي المرة هو إلي كان يحوّس على المنادي باش يشري فايدة جديدة لكن المنادي ماجاش. رجع الأمير للقصر وبالصدفة وهو يتجوّل في القصر يشوف أنو وزير السلطان خارج من جناح السلطانة زوجة السلطان وهاذ الشيء يعتبر محرّم في السلطنة، فكّر الأمير شوية و في الأخير شاف أنو هذا هو الوقت باش يطبّق الفايدة الأولى إلي شراها وهي “بقّي والزمان يلقّي”، وبالتالي قرّر أنو ما يتدخلش في أمر ما يعنيهش ويركّز فقط في خدمتو وهي حلاّق السلطان.
وتكررّت نفس الحادثة في يوم ثاني، بحيث أنو شاف وزير السلطان خارج من جناح السلطانة، وهاذي المرة شافت السلطانة أنو الحلاّق على علم بواش صرا، وبالتالي خافت أنو يخبّر السلطان بخيانتها ويكون عقابها هو الموت، فكرّت في حيلة تخلصّها من الحلاّق قبل ما يكشف سرّها ويفضحها، جابت مجموعة من السكاكين تاع الحلاقة نوعيتها رفيعة ودهنتها كامل بالسُم باش يموت السلطان بالسُم أثناء الحلاقة، ويتم اعدام الحلاق بتهمة قتلو للسلطان، وأمبعد توجهّت لزوجها السلطان وقدمتلو السكاكين كهدية ليه. فرح السلطان بالهدية وأمر الحلاق باش يحلقلو بالسكاكين الجديدة، استلقى السلطان كيما العادة ولما حاول الأمير يحلقلو نام السلطان في نوم عميق، تردد الحلاق قبل ما يبدأ الحلاقة بالسكاكين الجديدة وخاف أنها تجرح السلطان ويعاقبو، في هاذي الأثناء وقعت عينيه على القطة نايمة وخمّم شوية أنو هذا هو الوقت باش يطبّق الفايدة الثانية وهي “ِقيس ولا غَرق بعد القيس”، وقرّر أنو يجرّب السكاكين الجديدة فيها ويحلقلها شعرها إذا ما ناضتش وما انزعجتش راح يقوم ويحلق للسلطان بيهم. كيما كان الحال بمجرد ما بدأ يحلق للقطة حتى بدات تتقلّب وتتخبط من آثار السم ومباشرة ماتت، توجه الحلاق للقطة حطّ بجنبها السكاكين وخبّاها بعيد. وفهم المقلب إلي حبّت توقعو فيه السلطانة.
قام الحلاق وحلق للسلطان بالسكاكين القديمة تاعو بلا ما يحّس السلطان بأي شيء. لما ناض السلطان من رقادو كان فرحان بالحلاقة تاعو إلي ما قلقتش رقادو.
كانت السلطانة تستنى في خبر موت السلطان بصح تفاجأت لما جاها السلطان وشكرها على هديتها إلي فرحاتو بيها. هنا فاقت أنو الحلاّق تنبّه للحيلة تاعها وزادت خافت منو أكثر. هاذ الخوف خلاّها تخمّم في حيلة أخرى تخلصّها منو نهائيا. وبالتالي قالت للسلطان بطريقة ماكرة أنو الحلاّق تاعو راه دايما يترصّد للأميرة بنت السلطان ويغازل فيها بوقاحة، وهاذ الشي يتطلب عقابو، جنّ جنون السلطان وتقلق من هاذ الشي بصح صارح زوجتو أنو هذا هو الحلاق الوحيد إلي ارتاحلو وإلي قدر يرقد بين يديه ويحلقلو بلا ما ينوض وما هوش حاب يخسرو، بصح السلطانة ما استسلمتش وبقات تحرّض في السلطان عليه حتى خضع ليها وللمكر تاعها. هنا طلبت منو أنو يبعث رسالة مع الحلاق إلى أتباع السلطان في ضواحي السلطنة ويكون مضمونها: أقتلو حامل هاذي الرسالة.
انطلق الأمير بالرسالة في الحين لأصحابها وهو في الطريق تلاقى مع وزير السلطان واستدعاه لدارو باش يحضر لحفلة طهور وليدو في الليلة هاذي، حاول يعتذر الأمير من حضور الحفلة تاع الطهور لأنو مبعوث من طرف السلطان باش يوصّل رسالة مستعجلة، في اللحظة هاذي طلب الوزير من أحد أعوانو أنو ياخذ الرسالة من الأمير الحلاّق ويروح يوصلّها لأصحابها باش الأمير يقدر يحضر حفلة الطهور وهو مطمّن، في اللحظة هاذي تذكّر الأمير الفايدة الثالثة “ِإذا لقيت الزهو والطرب ما تبدلّو بالشقاء والتعب” وكيما كان الحال وافق الأمير يحضر الحفلة المهم أنو توصل الرسالة لأصحابها في الوقت، إنطلق مساعد الوزير بالرسالة وبمجرّد ما وصل عند أتباع السلطان في ضواحي السلطنة وبعد ما قراو الرسالة قامو بقتل هذاك المساعد دون تردّد.
في هاذي الأثناء كان الامير مستمتع بالحفلة، وبعد ما انتهت الحفلة استفقد الامير مساعد الوزير لأنو تأخر في الرجعة تاعو من ضواحي السلطنة، وتقلّق وتوتّر وفي الأخير قرّر أنو يروح بنفسو لأتباع السلطان ويشوف علاه مساعد الوزير ما رجعش؟ قالو الوزير أنا نروح معاك ونشوفو واش كاين؟ انطلق كل من الأمير والوزير ولما وصلو وسقساو على المساعد، جاوبوهم الاتباع أنهم قتلوه بأمر من السلطان! تعجّب كل من الأمير والوزير من الخبر هذا وخاصة لما قراو بنفسهم الرسالة إلي كتبها السلطان.
في هاذي اللحظة توجّه الأمير للسلطان بالرغم من أنو الوزير نصحو باش يهرب وما يرجعش مادام السلطان فكّر باش يتخلّص منو، بصح الامير أصّر أنو يعرف من السلطان شخصيا السبب إلي خلاّه يفكّر يتخلّص منو.
ولما وصل الأمير والوزير عند السلطان، تفاجأ السلطان من بقاء الحلاّق حيّ!! وحكاولو كيفاش أنو المساعد راح في بلاصتو يوصّل الرسالة باش يتمكّن الأمير من حضور الحفلة.
في هاذي الأثناء جاوبهم السلطان أنو السبب إلي خلاّه يقرر يقتلو بهاذيك الطريقة أنو الحلاّق تجاوز حدودو وغازل الأميرة بنت السلطان، أنكر الحلاّق الكلام هذا وطلب من السلطان أنو يواجه الأميرة بالاتهام هذا. وباش تظهر الحقيقة استدعى السلطان الأميرة وسقساها إذا صح كان الحلاّق يترصّدلها في الطريق ويغازلها، جاوبت الأميرة أنها أول مرة تشوف الحلاّق ومكانش منها الحكاية هاذي، وأنو الوزير هو إلي كان يترصّدلها ويغازلها.
بعد ما ظهرت الحقيقة واعتذار السلطان للأمير ليه وأنو اتهمّو بلا ذنب وبلا حتى ما يتحقّق من الأمر، وترجّاه أنو يبقى في القصر معاهم وأنو يزوجّو من بنتو الأميرة، اعترف الأمير للسلطان أنو هو في الحقيقة مش حلاّق، هو أمير ابن سلطان وأنو خرج من السلطنة تاع باباه باش يبني نفسو بنفسو ويحقّق ذاتو.
رجع الأمير للسلطنة تاع باباه وحكالو على مغامراتو وعلى زواجو من بنت السلطان، هذا الشيء فرّح باباه وخلاّه يفتخر بيه وبعقلو الراجح.

… شمس راقية

/بواسطة