الكل يعرف شحال المنازل الجزائرية و العربية او الغير عربية تحتفظ بالكراكيب بعني الخردة لمدة طويلة جدا لكن الذي لا تعرفه هذه المنازل هو انو الخردة تمنع الرزق و تبعد البركة من المنزل.

 

كيف ذلك ؟

اذا انتي احتفظتي بغطاء مثلا و ما استعملتيهش لا الشتاء الماضي و لا الشتاء تاع هذا العام.

بيناتنا ؟ ربي ما يحاسبكش عليه و هو كاين آلاف الناس راهي تبات بردانة و ما تتغطاش و انتي مخبيا هذاك الفراش ؟

راح تقوليلي خليتو للضياف حسنا خلينا من الفراش

اللبسة لي راكي مخبيتها ؟

و ربما عمرك ماراح تزيدي تلبسيها لسبب او لغيره تان خبيتيه للضياف ؟

حسنا الأمر اظن راه واضح

نزيدو مثال تلفاز قديم او هاتف قديم مرمي في الدرج ,لماذا تحتفظي به ؟ 

هدية ؟

 حسنا لكن ما نفعها في الدرج ؟

راح نتعلمو التخلص من الخردة لي في المنزل

باش ننجحو في التخلص منها لازم تكون عندك عزيمة و همّة كبيرة

لأنّو راح تضطري للتخلص من اشياء عزيزة عليك بزاف

لكن عند ربي ستؤجرين ان شاء الله

و خزانات في البالكون و خزانات تحت السرير و فوق الخزانة كل هذي الامور علاش مخبيتها ؟

 

 و احنا واش نديرو ؟

راح نفرزو امورنا و نشوفو الحاجة لي تترمى نرميها و لي تتصدق نصدقوها و لي تنفع نهدوها نهديها

تهادو تحابو

على الاقل تفرحي ناس خير من راهي في الخزانة مرمية او في بلاكار مخبية

و اهّم حاجة انك راح تفتحي الباب لحاجات جديدة

لأنّو معروف :

”التخلص من القديم يأتيك الجديد “

…شمس ساطعة

 

 

الخلل الهرموني و علاقته بالسمنة .. النحافة… الشعر الزائد … تساقط الشعر

 

الشعر نعمة من الله تعالى وموطن جمال يزين الإنسان والحيوان، ولا يكون الشعر نعمة إلا إذا نما في الأماكن

التي تعارف الناس على ظهوره فيها، لكن ظهوره ونموه في أماكن غير مرغوبة يثير القلق والخوف

والخجل، ويجتهد الجميع في إزالة هذا الشعر الزائد للظهور بأحلى منظر وأبهى حلة.

لماذا ينبت الشعر في وجه بعض البنات ؟

لشعر الإنسان اضطرابات عديدة قد يعاني منها البعض، ومن هذه الاضطرابات: النمو الزائد (الكثيف) للشعر،

الصلع والنمو الداخلي لشعر اللحية.. وغيرها، وحديثنا هنا اليوم عن نوع معين من هذه الاضطرابات, إنه ما

يسمى بالشعر الزائد.

يمكن تعريف هذا الاضطراب على أنه نمو غير طبيعي للشعر في مناطق لا يفترض نمو الشعر فيها في الوضع

الطبيعي، وبمعنى أوضح حصول هذا الاضطراب يعني وجود عدد كبير من الشعيرات السميكة والداكنة في

أماكن لا ينبت بها هذا النوع من الشعيرات عادة مثل منطقة الشارب، الشفة العليا، الذقن، الخدين، الوجه،

أسفل الظهر والساقين، الذراعين، الصدر، حول حلمة الثدي، وأحيانا البطن والفخذين

ويكثر شعر الوجه خاصة في المنطقة ما بين الشفة العليا والأنف ومنطقة الذقن ، فتبدو المراة كأن لها ذقناً

وشارباً مثل الشباب المراهقين.

وعموما فإن ظهور الشعر غير المرغوب فيه يتزامن عند المرأة عادة مع سن البلوغ، ويكون خفيفا في البداية

لكنه يزداد كثافة بعد سن الخامسة والثلاثين، ويتركز في المنطقة التي تعلو الشفة العليا (الشارب) والذقن،

كما ينتشر الشعر عند بعض النساء بكثافة في منطقة أسفل عظام الوجنتين ومنطقة الرقبة، وكلما تقدمت

المرأة في السن كلما صار الشعر الزائد في الوجه أغمق لونا وأشد قسوة وأكثر وضوحا

الشرح

تستقر مستويات الهرمونات غالباً بعد الدورة الشهرية للمرأة، عوامل مختلفة مثل الإجهاد والقلق يُمكنها أن

تُخل بتوزان الهرمونات عند المرأة، ولكن متى يجب على المرأة مراجعة الطبيب النسائي الخاص بها؟ سوف

نعرض الآن أهم علامات إختلال الهرمونات التي حدوثها يحتاج زيارة للطبيب:

الإرهاق: نعم قد يصيب الإرهاق الكثير من الناس بعد ليلة سهر طويلة أو نهار شاق. لكن ما نتحدث عنه هُنا

هو  الإرهاق الذي لا يوجد له تفسير منطقي وهذا يستحق أن نتفحص أسبابه.

التغيرات الجلدية: حب الشباب الكيسي في المنطقة السُفلى وخاصة الذقن يُرجح مستويات عالية من هرمون  التستوستيرون عند النساء.

نمو الشعر: وهنا نقصد النمو السريع جداً للشعر أو ظهور شعر خشن داكن على الصدر والظهر والذراعين.

الدورة الشهرية غير المنتظمة: والتي يمكن أن يكون نتيجة لعوامل كثيرة، مثل الإجهاد، وأمراض الغدة

الدرقية،  وانخفاض هرمون الاستروجين، أو متلازمة المبيض المتعدد الكيسات/تكييس المبايض (PCOS).

يجب زيارة الطبيب لتحديد السبب وصرف العلاج المُناسب.

التعرّق الليلي: الاستيقاظ من النوم للشعور بالحرارة والتعرّق يمكن أن يكون نتيجة لانخفاض مستويات

هرمون الاستروجين أو قرب انقطاع الطمث.

 

 

 

الحل النسبي

العيش على النمط الطبيعي :

يعني الطبخ المنزلي و الابتعاد على الاكل تاع برا و استعمال زيت الزيتون في الطبخ و اكله كل يوم  والثوم

لا يمكن ان يكون خلل هرموني عند المراة إلاّ في الحالات النفسية التي تمر بها المراة مثل التوتر او مرهقة

او القلق او خلعة او عمل بكثرة

الامتناع على المواد الحياوانية معناه الحليب و اللحوم بكل أنواعها ما عدى السمك و الجميع المواد الصناعية

و ترجع نباتية و تأكل سمك حتى تضبط هرموناتها ,بعدها ترجع لما منع عنها مثل اللحوم و الحليب

لماذا المواد الصناعية محرمة لأنها تحتوي على مضافات غذائية و ملوّنات

و هناك مواد تحتوي على مبيدات و هذه الأخيرة تخرّب الهرمونات

البنات و النساء لي عندها آلام بسبب الدورة الشهرية تتناول قبل الدورة بيومين الكرفس بكمية صحن

و تمنع اللحوم و المواد الصناعية و الفاست فود

و طبعا النساء لي عندهم حالة مرضية مشخصة من عند الطبيب تتبع هذه الحمية لكن بمراقبة طبية

يعني كاين لي الطبيب مانع عليها مادة ما اذا عليها بالالتزام

ملاحظة :

هذا الخلل الهرموني الخاص بالنساء فقط و البرنامج الغذائي خاص بالنساء فقط

يعني وحدها النساء من يتأثر عندما تأكل اللحوم الحمراء و الحليب و ليس الرجال بالعكس, فالرجل بما انه

يقوم  بمجهودات اكبر من تللك التي تقوم بها المرأة فهو يجب عليه أكل اللحم كل يوم و حتى يستطيع أكله

في  النهار و في الليل عكس المراة التي يجب ان تأكله بمعدل مرة او مرتين فقط في الأسبوع ,هذا المعدل

عند المراة التي لا تعاني من الخلل الهرموني

اما المراة التي تعاني منه فهذا يعني انها يجب اتباع حمية لمدة 6 اشهر تولي نباتية بدون لحوم و حليب و

مشتقاته حتى يخرج الجسم كل السموم بعدها تولي تاكل بمعدل 2 مرات او مرة اسبوعيا

و في الولائم و كي يجوها الضياف بحكم انو واجب علينا اكرام الضيف و الاكل مما يأكل ماشي نقولولو رانا

ريجيم, لكن مدة 6 اشهر تصرح انها تتبع حمية لكي لاتضطر لتخريبه

…شمس ساطعة

 

أحد الحِرَف و الهوايات المُحبَّبة عند النِّساء اللِّي شعبيّتو ماتتراجعش و ترتيبو في القمَّة مايتغيرش مهما مرَّت السَّنوات و تخالفت الأجيال هو “الكروشي” نظرًا لقيمتو الجماليَّة الفائقة و سهولة اكتسابو و الحالة اللاَّنهائيَّة من الأفكار المُبدِعَة اللِّي تنشأ عنُّو
الكروشي سهل جدًّا و يمكن الإنطلاق في التَّفنُّن فيه بعد جلسة تعلُّم وحدة إذا كانت عندك الموهبة الفنِّيَّة اللِّي تخلِّيك تتذوّقي الجمال وين ماكان و النَّبَّاهة اللِّي تساهم في إتقانك للحدود الحسابيَّة ….تقدملك زُخْرُفة ملفّ كامل للعناصر الضَّرورية اللِّي تجعلك بإذن الله مُحترِفة كروشي مُتَمَكِّنة و صاحبةْ حضور إبداعي في المجال الفنِّي للهوايات النِّسائيَّة الأكثر ممارسةً.
واش تحتاجي باش تتعلّمي الكروشي ….تبّعي الخطوات التَّالية :

الخطوة الأولى : إختيار الأدوات الخاصَّة بالكروشيه : سنَّارة الكروشيه ,الخيْط  ,المقصّ

   1- سنارة الكروشيه : اختيار سنَّارة الكروشيه يكون حسب وزن الخيط اللي عندك ؛ حيث تسميَّة الخيط تشير غالبًا الى حجم السنارة اللاَّزمة للعمل مثلا 4.25ملم/غ

   2- الخيط : من الأفضل تبداي بخيوط الصوف والأحسن تكون مُلوَّنة باش تساعدك في التَّعلُّم (موضوع لوحده)

الخطوة الثانيَّة : الشِّيء الأوَّل اللِّي نحتاجو نتعلّموه في الكروشي هو عمل عُقدة الإنزلاق .
جميع أعمال الكروشيه تبدا مع العقدة الاولى اللِّي نسمُّوها “عقدة الإنزلاق” : سُمِّيَت الانزلاق لأنو الخيط كأنو ينزلق و هو يدخل في وسط الحلقة ؛ هنا شوفو كيفيَّة عمل عقدة الانزلاق :

  1- نعمل حلقة من خيط الغزل (خيط الكروشي) حيث يكون ذيل الخيط إلى الأعلى وبقيَّة الخيط في الأسفل 

 

 2- اقلبي الحلقة على الخيط كما في الصُّورة

  3- دخّلي السّنارة نتاعك داخل الحلقة بحيث يكون جزء من الخيط فوق السنارة كما في الصورة

  4- اسحبي الخيط لتشديده حول السّنارة

.ارفعي الخُطَّاف (راس الكروشي) و قومي بسحبه يعني تجبديه بخفَّة على طرف الذيل وقومي بتشديده زيّريه

؛ وهكدا راكي قمتي بإنشاء عقدة الإنزلاق الأولى

أوَّل حلقة (خطوة) ليك في عالم الكروشي مرحبا بك سيِّدتي.

الخطوة الثالثة : عندك الآن عقدة الإنزلاق على سنَّارتك تحتاجي لعمل سلسلة الكروشيه تسمَّى غالبَّا : “سلسلة البداية” أو “سلسلة الأساس” لأنّك تعملي غرزات اخرى بعدها فهي بمثابة الأساس لعملك
نبداو بكيفاش نحكمو السِّنارة : لكلّ شخص طريقتو اللِّي تريّحو في حمل السّنارة مثلا :

 
دوّري الخيط على صبعك الخنصر وزيدي دوّريه على السَّبَّابة واحكمي الجانب القصير أي الذيل مع اصبعك الأوسط والإبهام والسِّنَّارة تكون في اليد الاخرى .

غرزة سلسلة البداية تبدا عن طريق إلتواء الخيط (تدوّريه) حول السنارة

وتسحبيه خلال (وسط) الحلقة كيما في الصُّورة

 1- كمّلي السِّلسلة وما ديريش الحلقة ضيّقة بزّاف واستمري في الحلقة الثانية عن طريق سحب الخيط لتشكيل حلقة ثالثة .

 2- استمري في المتابعة حتى يكون عندك سلسلة 

الخطوة الرابعة : الصف الاول : نبداو نخدمو الصَّف الأوَّل من الكروشي :

 1- بإدخال السّنَّارة في الحلقة الثَّانية من السلسلة, عندك دوكا زوج حلقات حول السِّنارة نتاعك

 2- احكمي الخيط في ايدك اليسرى مع السِّنارة واسحبيه (اجبديه) من خلال (في وسط) الحلقة الاولى

 3- اقبضي على الخيط مرة اخرى مع السِّنارة واسحبيه من خلال كلّ الحلقات

 4- كرري هدي الخطوات حتى تحصلي على نهاية الصَّف بالسَّلاسل (فوطو الخيط لاصفر والاحمر).

 

 

في النِّهاية كي تكمّلي كامل المشروع نتاعك و تخلّصي القطعة تاع الكروشي اللي حبيتي تخدميها : اقطعي الجانب الطويل من الخيط واسحبيه من خلال الحلقة الاخيرة.

 

 

…شمس دافئة

 

كُل وحدة فينا تسأل نفسها الأسئلة هاذي بشكل مستمر، هل زوجي يحبني ولا والو؟ علاه زوجي ما يبينليش انو يحبني؟ كيفاش نعرف بلي زوجي يحبني؟ عمري ما حسيت انو زوجي يحبني؟ علاه زوجي مايعاملنيش كيما يعامل أخي زوجته؟ وغيرها من الاسئلة كثير.

شوفي عزيزتي راني حابة نأكدلك أنو زوجك يحبّك ماتتقلقيش بتاتا، بصح أنتي الي مازال ماراكيش فاهماتيه مليح، وذرك نعطيك مثال بسيط يوضحلك فكرتي، تخيلي روحك كي تكوني قاعدة مع وحدة وهي  تهدر بلغة ماتفهميهاش رايحة ماتتجاوبيش معاها تلقائيا،  وبمجرد ماتجي وحدة تفهم لغتك وتهدر معاك عينيك يتتحلو وتحسي بالفرحة وتتفاعلي معاها وتفرغي قلبك بكل أريحية، على هذا كاين كثير من الأزواج بعد سنوات من زواجهم يقلك: مرتي قد ما حاولت معاها بصح هي ماحبتش تفهمني، ولا الزوجة تقلك: راجلي قد ما حاولت معاه بصح ماحبش يفهمني، وغالبا الزوج يصبر وأمبعد يمّل و يروح برا وهذا الشيء راح يخليه يكون فريسة سهلة ويجي ويقلك هذا وين لقيت المرأة إلي توالمني و تفهمني، على الرغم من أنو مرتو أجمل وأنشط وأعقل وأنظف بكثير من المرأة الثانية، بصح هو يفضل الثانية لأنها فهمت وش يحب و وش يحوّس.

 

إذن حنونة إذا كنتي أنتي تهدري مع راجلك بالإسبانية وراجلك يهدر معاك بالايطالية، وانتي ماتفهميش الإيطالية وهو ثاني ما يفهمش الإسبانية راح يمّل منك و ماهوش راح يطوّل معاك وبالتالي راح يروح يحوّس على إلي تفهم اللغة تاعو باش يقدر يتواصل معاها.

علابيها موضوعنا راهو يدور هنا، لخاتش لازم عليك تتعلمي لغة زوجك بالسيف عليك باش ماتخلي حتى وحدة تديّه عليك ببساطة بحُكم أنها فهمت لغتو  إلي أنتي مافهمتيهاش، أو أنها تعلمتها على جال باش تكسبو فقط وتنال رضاه، وراكي عارفة بلي كاين الكثيرات من هذا النوع، أمالا الأولوية ليك أنتي باش تتعلمي لغة زوجك لأنك أنتي الأحق بيه.

 

اللغة إلي راني نتكلم عليها هي “لغة الحب”، نعم لغة الحب، لخاتش كل زوج عندو لغة خاصة بيه للحب وثاني الزوجة عندها لغة خاصة بيها، أحيانا يطيحو كيف كيف وأحيانا العكس وعلى هذا تلقايهم يقولو: انا نهدر في الشرق وهي في الغرب، أمالا أرواحي للشرق وحاولي تفهمي وتتعلمّي وبالشوية تولّي تهدري لغتو بطلاقة وخير منو ثاني وراح يزيد يذوب فيك ويسيح كي الزبدة.

 

بلا ما نطوّل عليك، نقلك مهما كانت المدة الي قضيتيها زواج معاه قصيرة ولا طويلة، راكي ذرك تكوني حفظتي شوية من طبايع زوجك وعارفة وش يحب و وش يكره واللغات هاذو اكتشفهم الدكتور “غاري تشابمان” مستشار العلاقات الزوجية بناءا على العدد الهائل من الاستشارات الي كانت توصل عندو بهذا الخصوص، إذن الي لازم تعرفيه أنو أكيد زوجك يتواصل معاك بوحدة منهم، أمالا ركزي مليح فيهم وحددّي نوع هاذي اللغة وتعلمّيها و تواصلي مع زوجك بيها باش يقدر يفهمك وانتي ثاني تفهميه، وراح تشعلي شرارة الحب بيناتكم من جديد بإذن الله.

 

اللغة الأولى هي لغة التشجيع والتأكيد بالكلمات: يقدر يكون زوجك من النوع إلي يعبر عن حبه بالكلمات ويمتدحك في شكلك أو في تصرفاتك، يقلك راكي شابة، راكي عاجباتيني اليوم، الللبسة هاذي واتاتك، أنا نحبك،  يعطيك الصحة على الغداء، وثاني يشجعك ويقلك راني فخور بيك، راني مستعد نعاونك باش تحققي اهدافك وطموحاتك، أنا محظوظ كي تزوجت بيك وغيره. شوفي اذا كان زوجك من هذا النوع لازم عليك تتعلمي تكوني كيما هو، امتدحيه وشجعيه وعبريلو على حبك ليه دوما صباح وعشية، راني متأكدة راح يولي خاتم في صبعك.

 

اللغة الثانية هي لغة المهام و تأدية الخدمات: هذا النوع من الرجال هو عكس الأول مايقدرش يعبر بالكلام لأنو حسب نظره الفعل أصدق من الكلمة، في هاذي الحالة زوجك راح يعاونك ويحاول يحمل الثقل عليك، هذا الزوج متعاون جداً مايتعبكش نهائيا في الدار وماهوش متطلِب يقوم بحاجياته وحده، ويقدر حتى يقوم بمهامك أنتي باش تحسي بالراحة، اذا كان زوجك من هذا النوع فهو يحتاج منك تقدرّي خدماتو ليك وتشكريه عليها وتحسسيه بمكانتو وأنو استحالة تقدري تستغناي عليه. راح يحس بالامتنان وحاجتك الدائمة ليه وهذا الشيء يخليه سعيد معاك.

 

اللغة الثالثة هي لغة تقديم الهدايا: بمعنى اذا كان زوجك على الدوام يقدملك هدايا بمناسبة أو من غير مناسبة هذا دليل قاطع على حبو ليك وهاذي هي طريقتو في التعبير، إذن انتي لازم تكوني كيما هو وتكافئيه على هداياه بطبخ أُكلته المفضلة، إعداد كعكة علاجالو، شراء هدية ملائمة، فاجئيه بأمسية رائعة، بينيلو أنو راهو في بالك ومتذكراتيه بهداياك المعنوية الدائمة ومش شرط هدايا مادية فقط.

 

اللغة الرابعة هي لغة قضاء وقت ممتع معاً: كاين كثير من النساء يشكو من أزواجهم على أساس أنهم يعتبروهم في آخر اهتماماتهم ومايقضوش وقت مليح معاهم لا في الدار ولا في الخارج، يعني مايخصصلهاش وقت ليها هي برك، اذا كان زوجك من الدار مايخرجش ويحبك تقعدي معاه وتحكي معاه وماتنشغليش عليه كي يكون معاك لا بالهاتف ولا التلفزيون ولا الانترنت، نقلك هنيئا ليك راكي في نعمة تفتقدها نساء كثيرات، أمالا ماتتذمريش وشدّي بلاصة جنبو وتلهاي بيه هو برك بلا ماتديري حتى حاجة أخرى لأنو  احنا النساء نقدرو نتكلمو في الهاتف وفي ايدنا طفل صغير وفي نفس الوقت نخلطو في الطنجرة ( اخطبوط)، في حين أن الرجل مايقدرش يركّز غير في حاجة وحدة وكي يشوفك هكاك راح يحس أنك مش مهتمة بيه ومش مركزّة معاه، أمالا كوني معاه قلبا وقالبا راح يديرك في عينيه.

 

اللغة الخامسة هي لغة التلامس والاتصال الجسدي: كاين نوع من الرجال يعبر على حبو من خلال تشابك الايدي، عناق زوجته، و تقبيلها  بالاضافة إلى العلاقة الحميمية، وهذا الشيء يمكن يسبب ازعاج لزوجاتهم وتقلك نهار كامل وهو لاصق فيا ويحب غير هذاك الشيء، هنا لازم عليك تفهمي انو هاذيك هي طريقتو في التعبير، والمطلوب منك تتجاوبي معاه بكل سرور مش بشكل إجباري لأن الراجل يحس ويعرف ماتقدريش تخدعيه وتمثلّي عليه، وهذا النوع اذا ما قدرتش زوجته تتفاعل معاه عمرها ما راح تقنعو بأي طريقة أخرى عن حبها واهتمامها بيه، لأنو كيما اتفقنا في البداية راح يحسها تهدر باللغة الصينية، ويستحيل أنو يتجاوب معاها.

 

في الأخير نقدر نقول أنو كاين إلي ممكن تقول أن زوجي يستعمل كل هاذيك الطُرق، وبالتالي ماقدرتش نحدد  وش من نوع هو، نجاوبك ونقلك أنو كاين منها صح لأنو كاين إلي يتقن أكثر من لغة ( عربية، فرنسية. انجليزية. إسبانية. إيطالية…)، ويتكلمهم كامل بكل بطلاقة، بصح كي يسمع واحد يهدر بلغته الأصلية يفرح ويميل ليه ويحبو دائما يكون معاه لأنو يعطيه إحساس بالحنين وبالأصالة تاعو وثاني أنو الوحيد إلي يقدر يفهمو مليح ويفهم عليه بسهولة، يعني ركزي وركزي مليح معاه بالتأكيد رايحة تلقاي لغة غالبة على لغات أخرى، وباش نسهّل عليك الأمر شوفي وشنهي هي الحاجة الي يطلبها منك زوجك باستمرار ويتذمر لو كان ماتلبيهالوش كيما يلزم او أنك تتجاهلي الطلب تاعو، إذن هاذي هي لغة زوجك الأصلية تعلميها وأتقنيها، وتمتعي بأسعد حياة زوجية كنتي تتمنيها.

 

… شمس راقية