القناع الاول:

• 2 مغارف كبار كركم
• 1 مغرف كبيرة حمص مطحون
• 2 مغارف كبار ياغورت أبيض
• 1 مغرف كبيرة عسل

خلطي كل المكونات المذكورة حتى تتحصلي على كريمة، وأمبعد أطلي بيه البقع تاع الكلف بطبقة تكون غليظة وخليه في الوجه لمدة نصف ساعة وأغسليه بماء دافيء. كرري العملية من مرتين إلى ثلاث مرات في الأسبوع حتى تتخلصي نهائيا من البقع.

القناع الثاني:

• كمية من الودع المطحون( متوفر عند العشّاب) او تشريه حب وتطحنيه في البيت
• عصير ليمون

خلطي الودع المطحون على شكل بودرة مع عصير الليمون وديريه على البقع البنية لمدة 20 دقيقة، وأمبعد أغسليه مليح بالماء، وديري مسحة خفيفة بماء الورد. كررّي العملية يوم نعم ويوم لا لمدة 6 أشهر وبعدها راح تتخلصي من الكلف نهائيا.

القناع الثالث:

• عصير الخيار
• حليب بودرة

الطريقة سهلة وهي أنك تخلطي عصير الخيار مع حليب البودرة  حتى ينسجمو مع بعض وتتحصلي على كريمة، تدهنيها على الوجه فوق البقع وتخليها حتى تنشف مليح وأمبعد تغسليها بماء بارد. تكرريها من مرتين إلى ثلاث مرات في الأسبوع حتى تشوفي النتيجة.

ملاحظة : بالنسبة للوصفات العلاجية الطبيعية تحتاج الوقت والصبر، يعني ما تستعجليش وما تتقلقيش حتى تظهر النتيجة.

… شمس راقية

اللَّباقة لازم تكون في كلّ مفاصل حياتنا  :في الخدمة.في المدرسة.في الجامعة.مع الجيران.في الاماكن العامة…الخ

 اللَّباقة تعني الكثير من الأشياء و تشمل أكثر من مفهوم كيما الذَّكاء العاطفي والاحترام والتَّقدير  والرَّحمة والتَّفكير والرِّقة والصِّدق والدِّبلوماسية والمجاملة…

كَتعريف تقريبي عام لمعنى اللَّباقة : هي التَّعامل بحساسيَّة وتحديد واش هو مناسب في التَّفاعل مع الآخرين ؛ و هي كي  تقدري تهدري ولاَّ تتصرّفي بدون إساءة ؛ وهي كذلك قوَّة التَّحكُّم فواش لازم نقولو ؛ ولَّا نتصرّفو في الوقت المناسب باش نتجنّبو إيذاء النَّاس.

بهذي التَّعريفات نلقاو بلِّي اللَّباقة هي عدد من الصِّفات اللِّي تتماشى مع بعضها: يعني كي تكوني تهدري مع “طَرَف” تكون عندك نظرة ثاقبة ليه تقدري من خلالها إظهار التعاطف أو ضبط النَّفس حسب الحالة و المزاج اللِّي مقابلينك ..لأنُّو مهارة ضبط النَّفس مع الآخرين، وتجنُّب التَّهجُّم عليهم، واستيعاب الوضع  وفهم الفكر الثَّاني ركيزة من ركائز اللَّباقة على عكس المفهوم الشَّائع اللِّي يختزلها في اللُّطف فقط، نعم هو الأساس ولكن اللُّطف تدعميه باستراتيجيات الرَّد المناسب والدِّبلوماسية ؛ يعني قدّ ما نكون ظريفة و لطيفة و مؤدَّبة مع الأشخاص لازم يكون عندي موقف مناسب للحالات العدائيَّة ما يحطّنيش في خانة الوقاحة و ما يدخّلنيش في إطار الذُّل و نقدر نوصّل فكرتي صريحة “بدون مجاملة و بدون اساءة” للطَّرف الآخر ؛ لذلك شفتي : معنى اللَّباقة متشعِّب و هي بالتَّأكيد فنّ من الفنون.

 نشوفو البعض يعتقدو بلِّي الفصاحة و القدرة على توصيل الفكرة هي المهمّ و يظنو بلِّي اللَّباقة أثر جانبي و اختيار شخصي لكن الواقع أنُّو الشَّخص اللي يتحدّث بلباقة يكون مميَّز اكثر

هنا نقدملكم اربعة أسباب لماذا اللَّباقة مهمَّة:

1. اللَّباقة تديرلك انطباع إيجابي عند الآخرين . الإنطباع الأول اللِّي رح تتركيه في أوَّل لقاء مهم جدًّا في بناء صورتك و التعرُّف على شخصيتك بين النَّاس

3. رح ينظرو ليك على أنّك تفكّري قبل ما تتكلّمي . اللَّباقة ماهيش فقط علامة على التَّفكير الجيِّد ولكن تعكس قوَّة معيَّنة في الشَّخصيَّة؛ في مجتمعنا ولا في محيطنا دايما كاينة هذيك الفئة لي تكثَّر لهدرة بلا تخمام…بصَّح قليل وين نلقاو الشَّخص اللِّي يعرف وش يهدر ووقتاش يهدر وكيفاش يهدر.وللأسف الشَّخص اللَّبق ما يقدرش يتعايش مع الفئة المعاكسة ليه اللي مايفكروش واش يهدرو
4. من خلال إعطاء الإحترام، رح تحصلي على الإحترام في المقابل . أنّك تكوني صادقة ومراعية لمشاعر الآخرين رح يحقّقلك التَّقدير ؛ وشكون فينا ما يحبّش يكون محترَم في مجتمعو 

5. رح  تحصلي على لُبّ المسألة بطريقة أكثر فعاليَّة : واش نقولو مُهِمّ، ولكن كيفاش نقولوه هو الأهمّ ؛ ضروري في مناقشة أيّ مسألة التَّحلِّي باللَّباقة والإحترام، مهما كان المحتوى غير مريح أو مصدر جدل و تخاصم،  ماشي معناه أنو تغيّبي الصَّراحة والصِّدق ؛ لا ؛ الهدف هو أنُّو يبقى المستمِع يشارك في المناقشة كي أسلوبك يكون لبق الشِّي اللِّي هو أكثر منطقيَّة من فقدان استماعو من البداية كي تتّبعي نهج أقلّ فعاليّة لمَّا تتخلَّاي على لباقتك .

وبالنَّظر لأهميَّة اللَّباقة في حياتنا السُّؤال اللي نطرحوه هو:كيفاش نكون لبقة؟

كي تفهمي وعلاش مهمّ تكوني لبقة لازم تعرفي كيفاش تكوني لبقة ؛ شوفي هذي القواعد العامة لاعتماد اللَّباقة في الشَّخصيَّة و الحياة :

1.إلقاء التحية ؛ قال رسول الله صلَّى الله عليه و سلَّم : “أفشوا السَّلامَ بينَكمْ”  و مع السَّلام تجي أكيد المَحبَّة .

2.التَّعامل بحساسيَّة مع الآخرين و تقدير ظروفهم و خصوصياتهم و احترام مساحاتهم و مناطق راحتهم .

3.الانتباه لنبرة الصوت : مهما كان الكلام جميل تبقى اللُّغة التَّعبيريَّة هي اللي توصل ماشي واش يدور في راسك ؛ بالنِّسبة للشَّخص اللِّي رفعتي صوتك عليه راكي عيّطتي مهما كان قصدك انتي .

4.تجنّبي الحلف (القَسم) أو كثرة الإعتذار أو التَّبرير الدَّائم لأنُّو يدلّ على قلّة ثقة في النَّفس .

5.اطرحي أفكارك دون تجريح أو هجوم على الطَّرف الآخر وافهمي الكلام مليح

6.اهدري  بثقة

7.عبّري دائما على التَّعاطف والتزمي عموما بالصِّدق في الكلام

8.الإيجاز في الكلام ؛ كي يكثر الكلام يكثر الخطأ

9.اسمعي اكثر من ما تهدري

10.رتّبي أفكارك وماشي تتسرّعي في الهدرة

11.ادعمي كلامك باستدلالات(قران..حديث…قصة…اقوال…حكم)

 طريقة كلامك وحديثك مع النَّاس رح ترسُم شخصيّتك وتحدّد انطباع النَّاس عليك وهي من أبرز الوسائل اللي يتمّ من خلالها تقييمك سواء في العمل أو العائلة أو الأماكن العامَّة.و ظرافتك في هدرتك هي اللِّي تكسبك احترام النَّاس وتكوّن لك شعبيَّة واسعة لأنُّو اللَّباقة هي مفتاح قلوب النَّاس و كما قال الله سبحانه وتعالى لرسوله الكريم :”وَلَوْ كُنتَ فظًّا غَليظَ الْقلبِ لانفضُّو مِنْ حَوْلِك“

…شمس هنية

أي مرة تحلم تكون أنيقة وجذابة في لبستها,شكلها وحتى في هدرتها فمعنى الاناقة يقدر يشمل كل هاذي الاشياء,

الكثير منا يتسائلوا واش هي الاناقة؟

الاناقة أو elegance هي الحسن في الترتيب والتنسيق أو في المظهر والتعبير ,بعض الناس اعتقدوا ان الاناقة ما هي الا انك تكوني على قدر من الجمال والظهور بابهى حلة او زي والبعض الاخر اعتبروها انها فن الحوار,التعامل ,اللباقة والتعامل مع الضروف بايجابية .
أصل هاذي الكلمة هي الكلمة اللاتينية “elegantia” وتعني الذوق ,الملاءمة و الرقة.
تقول مصممة الازياء الشهيرة كوكو شانيل “الاناقة هي الرفضّ “هذا يعني أنو من الاحسن يكون عندنك نمط بسيط من الالبسة يمكن للوحدة  ترتديها وتبان بيها باحسن مظهر وفي نفس الوقت تتجنب الفخامة والبهرجة
الاناقة انك ترفضي الحكمة التقليدية لي تقلك انو لازم عليك تشري ملابس جديدة كل مرة,ترفضي فكرة انك لازم عليك تشري كل الالوان باه ما تمليش ولا فكرة هذا اللون لون السنة…
الاناقة ما تعنيش ابدا التعري ولا قلة الحياء وغيرها من هاذي الامور لي شاعت في الفترة الاخيرة ,تقدري تكوني انيقة بابسط الاشياء واقلها.
وفي حياتنا اليومية أخطاء شائعة في مظهرنا واناقتنا,عليها كثير من النساء يتسائلوا كيفاه يمكن نكونوا اكثر اناقة ونتجنبوا هاذي الاخطاء؟
لهذا نقدملك بعض النصائح حول الاشياء لي ما لازمش ديريها باه تكوني أنيقة:

“legging”:
هو لباس نسوي ضيق ,اكثر من 5 سنوات و أخصّائيي الأناقة يندّدو باه تتخلى المرأة عن legging و تعزله عن باقي ملابسها
طبعا هو شيء بشع و يولي اكثر بشاعة كي يكونو فيه صور او يكون بالألوان
و ما يمدش قيمة لشكل جسم المراة حتى ولو كانت نحيفة جدا
اذا كنتي ولا بد تحبي تلبسي حجات كيما هاذو
و كنتي تحبي بزاف تلبسي tuniques من الاحسن ان تلبسي collant opaque في الصيف و في شتاء اختاري نوغ خشن
او البسي tuniques مع jean slim او Jegging

  كولون “le collant” :
نوع من الملابس تشبه في الجوارب يقدر يكون شفاف ويقدر يكون ماهوش شفاف
collant chair او الشفاف ينعد من أعداء المرأة اذا كان في خزانتها
collant chair راح تشريه يبريي و لا فاتح جدا ولا mat في اسوء الامور راح يبانو رجليك كيما العجايز يعني يبرقو و مافيهمش الشعر
و راح تزيدي الطين بلّة كي تلبسي collant chair مع un escarpin ولا صباط مفتوح من الامام … اذًا نحي من خزانتك collant chair و عوضيه ب collants noir opaque او collant noir transparent.

حذاء الخفافة “les ballerines” :
شوفو هذا يرجع لقناعتي الشخصية لكن حبيت نقوللكم ايضا رأي اخصائيي الأناقة في les ballerines
تعتبر les ballerines من الحاجة الكبيرة لي عند معظم النساء طبعا لسعرها المنخفض اذا ماقلناش الرخيص و البخس
سوداء مع عقدة فراشة من الأمام رجلك مش راح تكون بأمان مع les ballerines كل حاجة تخبط فيها الحجر تحسي بيهم
و كي تدخلي للدار تولي تحلّي في الناس يمسدولك رجليك صح و لا لالا ؟
انا مثلا نفضل تكون عندك ballerines وحدة و من جودة عالية على انو تكون عندك 100 تاع 1000دج
ولاّ على الأقل اشري slippers femme على الأقل يواكب المودا و رجلك تكون في راحة أكثر
اذا لبنات حبسو علينا كل دورة تشري Ballerine.

التناسق المُفْرَطْ tout à sortis :
الحاجة لي نكرها كامل في حياتي نعطيكم مثال: 
” عندي فستان بالأزرق و الوردي مالا نحط براسلي وردي و خاتم ازرق و ندي معايا ساكي الغوز و ندير احمر الشفاه غوز و عينيا نديرلهم الازرق و نلبس سبّاط ازرق “
واش هذا المهرجان
يا ناس هذي كانت بكري ديجا راني عطست كي جبدت هذي الحكاية الغبرة طلعت
ماشي لازم تحطي اكسسوارات و ترفدي اكسسوارات في نفس لون ملابسك
اللي لازم ديريه هو انّك تكوني جريئة مع الألوان هذا مكّان
فرقي ساكك عن حذائك و حذائك عن لباسك
تقدري مرّات تستعملي في نفس اللون اذا كنتي تحترمي ظلال الألوان يعني يكون فاتح او غامق على لباسك لكن ابدا ما يكونش في نفس لون لباسك
لكن هنا حذاري ممنوع منعا باتا يكونو اكثر من 3 الوان في كل ما ترتديه و الا راح نولّو للمهرجان
فهمتو اذا لبنات حبسو علينا تاع ساكي و سباطي و خماري من نفس اللون ارجوكم.

الابتذال “la vulgaritée :
هي في الحقيقة طيح فيها بزاف نساء خاصة كي تحب تكون مثيرة “sexy”
في الحقيقة بين الابتذال و الاثارة خطوة واحدة اذا تقدمتي تولي vulgaire اذا لم تتقدّمي تبقاي sexy
1- اذا لبستي تنورة قصيرة متلبسيش حاجة تبيّن الصدر …يعني اذا زوجك شاف رجليك متوريلوش صدرك و اذا شاف صدرك متوريلوش رجليك
2- بالنسبة للكعب ابدا متلبسيش كعب تاع 13سم و انتي لابسة تنورة قصيرة و فوق هذا صدرك يبان
3- بالنسبة المجوهرات متلبسيش كامل مجوهراتك مرّة وحدة … دايما البسي يا اما براسليه تاع ذهب او سلسلة ذهب فقط يعني واحد اكسسوار من الذهب
و البارور parure دقة قديمة كيما يقولو وقت ماني و جدتي
4- اذا كانت ملابسك عادية ماشي تاع سهرة من الاحسن يكون المكياج simple و ماشي مشارجي
5- بالنسبة لملون الاظافر من الاحسن يكون لون موحّد ميكونوش الوان مختلفة و طبعا الأظافر يا تكون مقصوصة كامل يا تكون شوييييية طويلة اما اذا كانت طويلة و ongles en triangles super long ياااااااااااااااااا la vulgarité elle-même خليها للممثلات.

المكيّاج “le Maquillage “:
اوّل قاعدة عظمى هي ”إذا مكييتي الشفاه بلون ملفت تنقصي المكياج في العينين” يعني اذا درتي احمر الشفاه كيما لي راه على المودا هاذ الايام احمّر دموي العينين مديريهمش بمكياج غامق اللون smoky eyes
غير اذا كانت مناسبة لازم تمكيي فيها هكذاك
* بالنسبة للون البشرة اكبر غلطة تديرها النساء هي انها تختار لون غامق على بشرتها باش تبيّن بلي زعما راهي في صحة مليحة و بلي عندها بشرة bronzée بالعكس راح تباني تبهديلة هههه
* بالنسبة للفاراجو دايما خيريه برتقالي نوعا ما او مثل زهرة القرنفل لونها هايل carnation او غوز لكن طبعا ماشي تولي poupiyat hajout تعمري روحك فاراجو ديريه خفيف و باسفنجة اضربي فوقو برفق باش يتجانس مع الفوندوتان يعني on l’estompe en l’appliquant
* و ما تنساوش الدرس تاع متحطيش مكياج العينين يشبه للون لباسك
* و طبعا ما تنسايش تمشطي حواجبك و ياي على هاذوك لي يلقطوهم طبعا حرام لكن تزيد تديرهم على شكل فاصلة … حقّا اكبر جرم في حق الوجه
و مانحكوش على هاذوك لي راهم ينحو كامل حواجبهم و يرسموهم بالكريون واع جات الغولة اولا يبريي و زيد باين من البعيد بلي ماشي طبيعي و زيد ماشي شباب
اذا ماذا تفعلين؟ لقطيه فقط من الفوق و بين الحاجبين تقدرو تتأكدو من كلامي من فتوة ابن العثيمين انو حرام نتف الحواجب تحت الحاجب لأنو يظر العينين اما فوق الحاجب و بينهما فلا حرج
بعدها ارسميه بكريون يكون قريب جدا من لون حواجبك ماشي هوما شاتان و انتي ترسميهم بالأسود و طبعا الكريون يستعمل فقط باش تعمري الفراغات في الحاجب ماشي من الطرف للطرف
من بعد امشطيهم بالمشطة الخاصة بالحواجب
بعدها ديريلهم ماسكارا شفاف باش تفيكسيهم و مايعاودوش يتخربشو.

كل ما هو مزيّف “la contrefaçon”:
في الحقيقة مع الوقت راهي تروح شوية خاطش راهي تدخل للجزائر سلعة الخارج
بصح مزال كاين ناس تحب تشري ماركات مزيفة باش ناس تحسب بلي راهي لابسة الماركا
حبسو الماركات المزيفة يرحم والديكم Arrêtez les fausses marques
اذا ماعندكش الدراهم تشري حاجات من ماركا مثلا Louis Vuitton ماشي عيب بصح عيب كبير تلبسي لبسة مسينييها le pacpac du coin
صح راني من نّيتي لبنات …
خاطش ماكومش بلاك شايفين وحدة لابسة معطف faux Gucci و كتافو طايحين  
حقا ما تزيدوش تشروهم … و كلامي ايضا على حزامات السروال 

نسخة طبق الأصل “Le Copier Coller”: 
يعني تعاندي وحدة شفتيها ايا كانت من راسها لرجليها
حقا هذا يعني انّك ما عندك حتى شخصية و لا حتى style تاعك انتي وحدك
مرات صح طيحي في مواقع الكترونية او حصص المودا باش تمدلك بصفة عامة واش راه يدور فالمارشي و باش يعطوك خيال باش تحسني المنظر تاعك بصح ماشي باش tu copie كامل واش تشوفي فيهم لازم تلقاي style تاعك انتي برك و يوالمك انتي برك …. و يعبر على شخصيتك صح في صغرك بلاك كنتي تحبي تكوني كيما كاش فنانة مثلا بصح ديري في بالك بلي jamais ماراح تولي كيما هي …. اذا مكالاه تحاولي اصلا
من الاحسن تضيعي وقتك مع معرفت جسمك و واش يوالمو احسن ما تضيعي وقتك في انك تعاندي شخص ما مرات كي نشوف التعليقات لي يديرو في اليوتيوب على المودا او المكياج نحب نتصرع راهم مطلعينلهم شانهم اكثر من اللازم واااااااااااااا راني حابة ندير كيما انتي علاش ماشي تروحي تشوفي روحك انتي واش تقدري تديري بلاك تولي خير منها

لا تتمادي “le trop d’infos”:
يعني انك تعمري لبستك باش توري كامل واش عندك
و مرات كان تصيبي تلبسي كامل واش عندك اكسسوارات باش تزوخي و تقولي شوفو واش عندي صح ؟
مرات تلبسي بزاف ملابس مرسومة imprimé و مرات تلبسي بزاف اكسسوارات
بصح الأفضل هو انك تلبسي حاجة وحدة على المودة و الباقي حاجات simple
اذا لبستي بزاف حجات شابين و على المودة راح تشبهي و ببساطة …………. لوالو.
يعني باختصار اذا كان مونتو تاعك شباب بزاف البسيلو اكسسوار عادي
اذا كان المونتو تاعك شافوه من قبل البسي اكسسوار اوّل مرة يشوفوه

مسّاكة الشعر “pince crabe cheveux”:
لي يسموها اخصائيي الأناقة la pince crocodile
صح مليحة في المنزل تساعدك باش طميه و دوشي او ديري شغل الدار او تماكيي …. اوكي معليش استعمليها بصّح في المنزل فقط
ايه منخرجوش بهاذي الأشياء في الشعر , وخاصة كي تكون ملونة
و هاذي كانت بعض الأخطاء لي ملازمش كامل ديريها,يعني كل وحدة منا تقدر تكون انيقة وباهية بلا ابتذال ولا تعدي وبأبسط لحوايج لي عندها.

…شمس ساطعة

انتاج مواد التجميل و مستحضرات العناية هو صناعة مزدهرة و تُدِرّ الكثير من الأموال على المنتجين …و النساء في هذا الزمن تفتنو فتنة عجيبة بهذي المواد …و صرنا ما نتخيلوش رواحنا نقدرو نعيشو بدون المئات من هذي المنتجات.. بل أصبحت من الضرورات اللي لا غنى عنها و تشبه في قيمتها الأكل ؛ و اللبس اللي يستر …

شكون تستغنى على الشامبوان في كل استحمام …

و شكون ما يغسلش فمو عدة مرات في اليوم بالمعجون …

شكون يقدر ما يتعطرش و ما يستعملش مزيل الرائحة في أيامنا هذي ..

و لكن هل تعرفي بلي هذي المُركَّبات تفتقد كليًّا لمعايير الأمان عند استعمالها …و المرعب هو انو المكونات الكيميائية لهذي المنتجات غير صحية و مسرطنة و حتى فيها “خطورة تعطيل و تقليل الإجراءات الإنجابية” …

لذلك دائما ألْقِ نظرة على الملصقات اللي على المنتجات التجميلية ..(شامبوهات …بلسم ..مرطبات ..كريمات للشعر..احمر الشفاه..ماسكارا …العطور …)لازم تفهمو المكونات حتى اذا كانت الكلمات طويلة و ما عندها حتى معنى بالنسبة ليك ..من الغباء الاعتماد على جهلنا و عدم قدرتنا على معرفة مصطلحات المكونات الكيميائية لتبرير انسياقنا الاعمى وراء الحملات الإعلامية في الجري و تَتَبُّع هذي السموم و الحصول عليها بأغلى الأثمان ..

شوفي المكونات غير الصحية اللي تلقايها غالبا في مستحضراتك الشخصية ..

_ الشامبوان و الجال دوش فيهم غالبا كبريتات لوريل الصوديوم Sodium Lauryl Sulfate (SLS) / Sodium Laureth Sulfate (SLES)  

_ منتجات الشعر يستعملو فيهم غالبا Sodium Lauryl Sulfate (SLS) / Sodium Laureth Sulfate (SLES) و  DEA (Diethanolamine), MEA (Monoethanolamide), TEA (Triethanolamine)

_يظهر في الكثير من مواد التجميل و حتى الديودورون و صولا الى العطور Parabène (Méthyl, Butyle, Ethyle, Propylée)

_ Phtalate de dibutyle (DBP)يظهر في الكثير من الماركات

واش هي المشاكل اللي تواجهيها باستعمالك لمستحضرات و مواد التجميل ..

معظم منتجات الجمال ليست مفحوصة او مدروسة و مواصفاتها مخالفة لما هو معلن عنه  (هذا في العالم المتقدم عندنا ما نهدروش )…و تستخدم في معظمها خلطات متغايرة و تركيبات مُنتَجة كيميائيا و هي غالبا غير معتمدة من طرف أي نوع من سلطات المواصفات و الضبط ..

• على الأقل ثلث مواد العناية الشخصية تحتوي في ابسط تقدير على منتج واحد مرتبط بالسرطان
• الزيوت المعدنية و البتروليوم هوما مكونات أساسية في معظم مواد التجميل و هوما أصلا من الوقود الاحفوري
• ما تخدعكش عبارة “عضوي” او “طبيعي” على المنتج …هدف المنتجين هو الخداع لجلب الزبائن لمنتوجاتهم على أساس انها عضوية و هي ليست كذلك ..المكونات الطبيعية لازم يكون معاها شهادة تثبت ذلك …اذا ما لقيتش الشهادة تمعني جيدا في قائمة المكونات …المنتجات الطبيعية لا تحتوي على مواد حافظة و ليس فيها عبارة Parabène (Méthyl, Butyle, Ethyle, Propylée) تعلّمي تقراي المكونات باش ما تنخدعيش بالمواد اللي يقولو أصحابها بانها “طبيعية”

احذري من واقي الشمس créme solaire

هذي صورة توضيحية لواش يحدث عند استعمال واقي الشمس

كاينة مخاوف حقيقية من واقيات الشمس بنوعيها …المعدنية و الكيميائية لانو الإحساس بالأمان مع استخدامها مزيف و وهمي …افضل طريقة للبقاء آمنة من الشمس هي في الابتعاد عنها ..لذلك تجنبي كليا الاستعمال اليومي لواقي الشمس حتى اذا كان طبيعي

• كوني حذرة مع لوشنات الجسم ….كريمات الوجه و الماكياج …معروف طبيا ان الجسم يمتص بدرجة كبيرة ما فوق الجلد …فكري دائما في البدائل الطبيعية

• انتبهي من مزيل الرائحة و معاجين الاسنان

حتى هذو اللي يعتبرو رئيسين في قوائم التسوق للمنزل هوما مصدر خطر …معظم لي ديودورون les  déodorants فيهم الالمنيوم اللي هو سام على الجهاز العصبي و يسببلو التهاب كما انها تقوم بسد المسام و ما تسمحش للجسم بتعديل حرارتو طبيعيا ..

معاجين الاسنان فيها البارابان  Parabène و  Dioxine اللي يستعمل “للتبييض” ..و كذلك فيها مستويات عالية من الفلوريد …..القلق متنامي من مستويات الفلوريد اللي نستهلكوها في المركبات الغذائية و معاجين الاسنان ….الفلوريد يقاوم التسوس و لكن الجرعات العالية منو تسبب التسمم ….فالبديل هو معجون بكربونات الصوديوم منزلي الصنع

• ابقاي حذرة مع مستحضرات العناية بالشعر

الشعرة صح عبارة عن عضو ميت و لكنها تقوم بالامتصاص تماما كيما الجلد …شحال المنتجات اللي نحطوها في شعرنا من اجل التجميل ….اكيد الرقم مرعب …(شامبوهات …بلسم …كريمات …جل …سيروم …الخ )

الشامبوهات و البلسم فيهم مكونات بترولية …مثبتات الشعر و الجال تستعمل formaldehyde و ال phthalatesو العطور الصناعية

مكون صبغة الشعر p-phenylenediamine هو مركب سام جدا ..و كذلك قطران الفحم اللي يستعمل لمحاربة القشرة ..الأفضل الالتزام بالملوِّنات الطبيعية كيما الحنا و مستخلص البابونج و غيرهم كبدائل طبيعية

الحل مع كل هذي المكونات غير الصحية بل و السامة هو تجنبها قدر المستطاع في الاستعمال اليومي ..(في بلادنا ما تنفع في والو و أسعارها نارية )…اللي تتوفرلو منتجات طبيعية هذا اختيار افضل …و لكن التسويق يعتمد عادة على الغش لذلك تقدري تميلي الى صنع كل منتجاتك التجميلية بنفسك في البيت تماما كيما كانو جداتنا اللي اليوم ارقى المنتجعات التجميلية العالمية تعتمد على إرثهم …كيما الحمام المغاربي و الكاسة …و الطفل لارجيل ..الخ …

الرجوع الى الأصل فضيلة … و سلامة

…شمس هنية