شكون فينا إلي ماتعرفش كاتم الصوت (mute)؟؟

هذا كاتم الصوت نستعملوه لما نكونو نسمعو في حاجة في التلفزيون أو الحاسوب أو الهاتف النقال…الخ، بصح اقتضت الضرورة أنو نسمعو حاجة أهم من إلي رانا نسمعو فيها الآن، مثلا باش نتأكدو أنو الباب يدقدق، أو شخص ما ينادينا أو نتأكدو من رنين الهاتف.
بضغطة بسيطة على زر كاتم الصوت في جهاز التحكم عن بعد (télécommande ) ولا على الحاسوب ولا الهاتف النقال راح يكتم الصوت نهائيا ويعّم الهدوء تماما.

وشنهي هي استراتيجية كاتم الصوت؟

تعتمد استراتيجية كاتم الصوت على تخيّل كتم الصوت المزعج وإلي ماهوش محبّب لينا، يعني تحتاجي تطبيق استراتيجية كاتم الصوت كي تلقاي العالم الخارجي ماهوش مناسب ليك وما يعجبكش. يعني راح تتخلصّي من خلال تطبيقها من تأثير العوالم الأخرى على العالم الخاص بيك أنتي.
لازم تفهمي أنو نفسك أولى بحمايتها من مصاصّي الطاقة، اهتمي بالعالم الداخلي تاعك لأنو يعبّر عليك أنتي ولأنو هو الأقرب لروحك.

أثناء تطبيقك لاستراتيجية كاتم الصوت رددّي في قلبك العبارات التالية: ما يهمنيش واش راك تقول، أنا سعيدة وفرحانة، الحياة جميلة بداخلي، مارانيش نسمع فيك بتاتا، كلامك لا يعنيني، أنت تتكلّم عن شخص آخر، أنت إنسان سلبي ومش راح تأثر عليا … وغيرها من العبارات إلي تخلّي عندك إحساس بالقوة والثقة بالنفس والإمكانيات والإيجابية.

كيفاش نستخدمو استراتيجية كاتم الصوت؟

بالتأكيد تكوني لاحظتي كاش نهار وأنتي قاعدة في تجمع نسائي أنو لما يحتدم النقاش والحوار، تلقاي وحدة من النِسوة كانت ساهية وتخمّم في موضوع آخر غير إلي كنتو تحكو عليه، وكي تسقسيها وحدة منكم على رايها في الموضوع المطروح للنقاش؟ يكون جوابها أنو ماكانتش تسمع فيكم وماهيش عارفة على واش كنتو تحكو، هاذي المرأة قامت بتطبيق استراتيجية كاتم الصوت بدون إرادتها وبدون وعي منها أساسا، لأنو بشكل ما من الأشكال كانت تخمّم في موضوع آخر زاعجها، وبالتالي مالت بشكل غير إرادي لموضوعها وكتمت أصوات النسوة من حولها.
إذن هاذي هي استراتيجية كاتم الصوت بصح لازم تطبقيها بإرادتك أنتي مش غصب عنك.
وعلى هذا لما تسمعي كلام يزعجك ويسّببلك التوتر، استخدمي كاتم الصوت من خلال أنك تتخيلّي بلي راكي حاطة كِتمان في وذنيك وبالتالي مش راح تسمعي ولا شيء من إلي راهو يتقال أمامك.

في هاذي اللحظة لازم تشغلي نفسك بكاش حاجة باش ما تضطربش تقنية الكتمان إلي راكي أطبقي فيها، يعني في هاذي الأثناء استغغري ربي أو أقراي آيات تكوني حافظاتيها في قلبك، أو تقدري تتخيّلي أنك تستمعي لموسيقى هااادئة تخليّك تسترخي تماما

وبعد ما يُنهي الشخص إلي كان يتكلم كلامو المزعج معاك تلقاي أنو ما أثّرش فيك تماما كلامو لأنك بالأساس ما سمعتي ولا كلمة منو، وأنك مازلتي محافظة على قوتك وثقتك بنفسك وبقدراتك وبإيجابيتك ومعنوياتك المرتفعة.
اقرأ المزيد