التعامل مع المراهق

دايما المراهق التعامل معاه يكون عن طريق ابرام اتفاق و طبعا الاتفاق ماشي كيما نعرفوه عند معضم الآباء و كامل مرّيتو بهذه المرحلة مع امكم او ابوكم

تقولك شوفي احنا نديرو كذا و كذا و كذا …. متافقين ؟ هذا ماشي اتفاق …. هذا بلاغ وزاري  و كي يسمعو تستناي منو يُقِرْ لي قلتيه.

الاتفاق الحقيقي :

هو انك تقعدي مع وليدك المراهق لي عمرو من 10 أو 11 سنة الى فما فوق ,اقعدي و اشرحيلو المشكلة لي عندك معاه في موضوع ما

انا محتاجة كذا ,انا شايفة انو انت محتاج تدير كذا و كذا و كذا ,و من بعد تسأليه انت واش رايك ؟

هو يقول رايو و انتي تقولي رايك و من بعد ديرو اقتراحات ,اسأليه مثلا صحا انت واش تقترح لهذي المشكلة ؟

اسمعيه و شوفي الاقتراح لي انتي موافقة عليه و هو تان موافق عليه ,خاطش غالبا تكون الاقتراحات من حاجات انتي قلتيها و هو ماشي موافق عليها ,او هو قالها و انتي ماشي موافقة عليهم

اقعدي غربلي معاه الاقتراحات حتى تلقاي يا لوكان اقتراح واحد انتوما الاثنين موافقين عليه ,الآن جربي الاقتراح لفترة و من بعد شوفي واش راح يصرا بعد هذا و طبعا لو وليدك ما التزمش بالاتفاق هذا عاودي اهدري معاه

الطريقة الثانية لي تقدر تفيدك مع وليدك هي :

طريقة الاشارات :

مثلا تدخلي لغرفة وليدك و تلقاي حوايجو في الأرض شاوريلو عليهم بدون ما تقولي ولا كلمة ,تلقايه نسى روحو قدام التلفاز شاوريلو بيدك على الساعة اليد بدون ما تتكلمي ,لقيتي الصوت عالي شاوريلو براسك عن أنو الصوت مزعج و ما تقولي حتى كلمة

يعني الخلاصة أنو الطفل او المراهق مرات يتجاوب مع الأم كي يكونو الكلمات قلال جدا في الكلام

يعني درّبي روحك كيفاش تقولي الحاجات في جمل جد قصيرة لا تتعدى 10 كلمات ,و تقدري حتى تستعملي اسلوب الكلمة الواحدة

مثلا تدخلي الصالون تلقاي المخدة في الأرض قوليلو المخدة و اخرجي

وقت الرقاد و تسكتي ,المذاكرة و تسكتي ,الحمام و تسكتي ,سنانك و تسكتي ,كلمة وحدة

الطريقة الثالثة لي تنفع مع المراهقين و حتى مع الأقل سن هي :

طريقة المشاركة :

مثلا انتي اتفقتي مع الطفل انو يرتب الغرفة ,لكن الغرفة مخروبة بزاف تدخلي الغرفة و تقوليلو شوف نقسمو الغرفة على 2 و نشوفو شكون فينا لي يكمل الأول من بعد رجعيها متعة

يعني اذا انتي كملتي في 5 دقايق و هو في 6 دقايق ,قوليلو المرة الجاية لازم نحطمو الرقم القياسي تاعنا يعني انا لازم ندير اقل من 5 دقايق و انت تدير اقل من 6 دقايق

تقدري مثلا ما تقسميش الغرفة الى اثنان تديرو فقط سباق مع الوقت ,و تشوفو شحال وقت درتوه كي كملتو التخمال ,يعني هدفك واش هو في الأخير ؟

هو أنو الطفل يعرف كيفاش يخمّل الغرفة و يعرف انو الأمر يخلاص بسرعة و تقدر ما تديش أكثر من 5 دقايق برك هو لي كان يتماطل

بهذي الطريقة الطفل تاعك يحس انو كاين حاجة مشتركة بيناتكم و أنكم فريق واحد من غير ما يحس أنو انتي في ناحية و هو في ناحية أخرى انتي تأمري و هو يقول لا

فتكون و تبقى الأمور بيناتكم دايما في صراع و اصرار على القوة ,من فينا رأيه يجوز في الأخير

الطريقة الرابعة للتفاهم مع الأطفالك هي :

طريقة المرح :

مثلا دخلتي غرفة بناتك و لقيتي الملابس في الأرض في عوض ما تقوليلهم هاذي غرفة هاذي الملابس هنا بلاصتها ؟ ماشي بلاصتها الخزانة ؟ قوليها بطريقة أخرى

مثلا : واضح راكم دايرين عرض الأزياء اليوم على السرير ديالكم أو مثلا دخلتي غرفة الذكور و لقيتي كل الالعاب في الأرض و الدنيا مخروبة

قوليلهم يا باين اليوم جاز كاش مارد من هنا زربعلكم كلش وخلاكم حاصلين و أضحكي و راح يضحكو معاك ولادك و يبداو يتعاونو معاك و يطمو اللعب معاك

اذا خلاصة القول في التعامل مع الأطفال هي :

انو في عوض ما يكون هدفنا هو أنو ولادنا يخضعو لأوامرنا بدون نقاش نخلوهم ينفذو الأمور بالتعاون معانا

ماشي أنا نأمر و هو ينفذ و نبقى نتفرج و كاين الكثير من الأمهات يستعملو الكلمات الجارحة و البذيئة و حتى الضرب

في عوض ما يضحكو مع اولادهم و يخيرو الوقت المناسب لطلب الأمر من الطفل و التعاون معاه على تنفيذه

و بهذا تكون المقاومة أقل و التعاون أكثر و أنت في راحة أكبر.

…شمس ساطعة

العمل ، المهام المنزلية ، و النشاطات الاجتماعية يأثّروا على حجم الوقت اللِّي يقضيوه أفراد الأسرة مع بعض ؛ كي تزيديلها الواجبات الأخرى المرتبطة بنشاطات مابعد المدرسة : مشاوير السَّياَّرة ؛ إعداد الوجبات ؛ الوظائف المدرسية ؛ تنظيفات المساء ؛ وقت النوم ؛ و حتى اذا كنا محتاجين نطيّبو فنجان قهوة أو نرتّبو السرير نحسُّو دائما بلِّي ماعندناش وقت ؛ و لكن تقاسم الأوقات المميَّزة و الحميميَّة بالنِّسبة للأطفال هو حاجة مُلِحَّة و عامل نُمُوّ مهمّ و عنصر سعادة ؛ الوقت باختصار هو الحُبّ :  تمضيَّة الوقت مع الأطفال هو طريقة لقول “أنا أحبك” و كي ما نمدُّوش الوقت بالنِّسبة ليهم هذا معناه بلِّي “مانحبُّوهمش” .

التَّحدِّي هو في تقدير الفروق الدَّقيقة الحسَّاسة لطفولة أولادنا لأنو السِّنين و الأيَّام تمرّ مَرَّ السَّحاب : وْليد 5 اشهر يولِّي عندو 5 سنين في رمشة عين ؛ كلّ يوم يفوت علينا مع أطفالنا راهم يكبرو فيه و تتغيَّر المعالم و تَحدُث المعجزات و تخلق الرَّوعة .

الطِّفل مهما كان سنُّو يحتاج يعيش وقت خاصّ مع والديه كلّ يوم و لو لبضع دقائق : فضلاً على تقويَّة روابط الثِّقة رُفقة الوالدين تعزّز منطقة في مخّ الطِّفل تساهم في جعلو ذكيّ و خلَّاق و متحفّز و فضولي ؛ هذا الوقت ينمِّي عندو الإحساس بمتعة الحياة ، و الأوقات المميَّزة و الحركات العاطفية و الحنان يخلِّيو الصّغير يحسّ بلِّي راهو محبوب و غالي و في أمان و هذا اللِّي يخلِّيه يكبر واثق في نفسو و قادر ينمِّي مهاراتو الإجتماعية بينما الإبتعاد عنُّو يخلِّيه يفكّر بلِّي “إذا لم أحصل على انتباهم بشكل جيّد فساحصل عليه بعمل شيءٍ سيِّء“.

واش معناها تقضي وقت مع طفلك ؟

أكيد مش معناها ديرو دائما حوايج أو خرجات كبيرة و فوق العادة ؛ الفكرة هي أنّك تكوني مُتاحة و متوفّرة ليه مايوقف بيناتكم لا هاتف و لا تابلات  و لا شْغُل في يدِّيك ؛ لأنُّو يحتاج يشوف شكون انتي؟ و كيفاش تعيشي حياتك؟ …كاينة فعليا 940 أسبوع بين ولادة طفلك و دخولو للجامعة معظمها يروح في النّوم و اللّعب و الدِّراسة و النَّشاطات اليوميَّة ؛ كي يكون عمرو 5 سنين تكون جازت منها 260 أسبوع و كلّما يكبر وليدك كلّما تصبح أسابيعو أكثر انشغالاً عنك بدراستو و أصدقاؤو و نشاطاتو …الحقيقة أنَّنا نقضيو مع أطفالنا ساعات قليلة كل أسبوع لذلك حاولي فقط تخلِّي الدَّقائق المعدودة اللِّي تعيشيها معاه كلّ يوم مميَّزة و عوّضي الكميَّة القليلة من الوقت بجدولة نوعيَّة رفيعة منُّو : “ساعتين في الحديقة ؛ أمسية رسوم متحركة ؛ عشوة بيتزا من المطعم ….”

فِكْرْك في الأوقات المشتركة مع اولادك (اللي بذلتي جهد في الحصول عليها)  لازم مايكونش في مكان آخر لأنّك في هذي الحالة راح تفقدي طفولتهم تمامًا كما لو أنّك غايبة عنهم : أبقاي مْرَكّزة معاهم ؛ تشوفي فيهم ؛ تسمعيهم ؛ تفهميهم و تكوني مسرورة بواش صنعتي فيهم ؛ تعيشي و تتنفّسي معاهم معجزات التَّعلُّم و النُّموّ .

1. أقضي معاهم وقت راس براس :

ديرو حاجة تحبُّوها بين 2 مهما كانت الأسرة كبيرة ماتعجزيش تخصّصي الوقت لكلّ واحد وحدو : “روحي مع بنتك للعرس او خليها تحضّر معاك الكيكة” ؛ “تمشَّاي مع وليدك و هو يسوق الدَّرَّاجة”…. .

• 2–  دخلِّي الوقت المشترك في جداولكم اليومية :

الأطفال يحبُّو يعاونو : رايحة طيّبي خلّيهم يغسلولك الخُضْرة ؛ رايحة تشري ديريه وقت للمتعة معاهم ؛ راهي تبانلك فوضى و خدمة فوق الخدمة و لكن تأكّدي مع الوقت تلقايهم أكبر معين ليك و كلّما استرجعوا ذكرياتهم راح يقولو بلِّي وقت تحضير العشاء كان دائما وقتهم الخاص الجميل معاك .

• 3– ماتتلاقاوش حتى ال3 تاع العشية :

تقدري دائما تبيّني لهم بلي راهم في بالك : أكتبي ملاحظات تعبّر على حبّك و حطِّيها في محافظهم .

• 4– أوقات الرَّاحة :

مهما كنتِ مشغولة كَرّسي أوقات الراحة كأزمنة خاصة لأطفالك : ديري المؤقت على 15 دقيقة او نصف ساعة خلِّيهم يعرفوها وقتاش تبدا و وقتاش تخلاص ؛ و كي يبقاو غير 2 دقايق نبّهيهم باش مايتصدموش كي تخلاص المدة ؛ إذا بانتلك 15 دقيقة قليلة ماتخافيش بالنِّسبة للطِّفل هي وقت طويل من الرَّوعة .

• 5– ديرو أحاديث البيجاما :

ساعة النوم نتاع الأطفال بالنسبة ليك وقت فوضى و ضغط ؛ و مع ذلك هذا وقت جميل يقضوه معاك مش مع التلفزيون ؛ المفتاح هو البيجاما إحدى التِّقنيات لتهدئتهم -كي تكوني مستعدة-وجّديهم للرّقاد : يغسلو أسنانهم و وجوههم ويلبسو ملابس النّوم و اقضي معاهم 15 دقيقة في المحادثة و المعانقة و الضّحك  ؛ دغدغيهم ؛ تكلّمي معاهم في كلّ ما يهمّهم ؛ اطرحي أسئلة و انظري ليهم باهتمام و هوما يجاوبو ؛ ديريلهم “ماساج” ؛ غنِّيلهم أغاني ؛ احكي لهم قصَّة ؛ أقراي لهم كتاب أو أقراو مع بعض …من المفيد كذلك بعدما يتعشَّاو و كي تروحي تغسلي لماعن يدِّيهم باباهم يحوسُّو برَّا شويَّة يضربو دورة في الحيّ بالبيجاما و يرجعو جاهزين تماما للنَّوم .

• 6– ديري “ليلة المحاجب” :

 وقت العشا في حد ذاتو مميَّز زيدي ميّزيه بتخصيصو بوجبة معيَّنة ؛ الفكرة راح يحبُّوها الأطفال  “ليلة البيتزا” مثلا ؛ “ليلة المحاجب” ؛ “ليلة السردين”… هكذا تحمّسيهم و تعطيهم متعة على الطَّابلة و يقدرو يهدرو على يومياَّتهم و يحكيو أكثر على أخبارهم .

• 7– ديرو تصليحات مع بعض :

عمرو باباهم ما يخدم السّيارة أو يصلّح الحنفية أو يركّب الكرسي أو يصبغ النَّافذة أو يبدّل مقبض الباب بدون أطفالكم باش تعلّموهم على الأدوات و الحياة ؛ هذي طريقة تورِّيولهم كيفاش لحوايج يخدمو و كيفاش نصلّحوهم بأمان دائما أعطيهم لمحة و اشرحي لهم واش راكم ديرو .

• 8– في الطريق :

اللَّحظات القليلة اللِّي نقضيوها مع أطفالنا في الطّريق : “كي نكونو رايحين للمدرسة أو بيت جدهم أو الحانوت…” هي أوقات ثمينة ماتضيّعيهاش دائما في وسائل النَّقل طلبًا للرَّاحة ؛ حاولوا أحيانا تروحو تمشيو : المشي مع أطفالكم هو طريقة رائعة للتَّمهُّل في الحياة و أخذ لحظات أكثر تفصيلا معاهم ؛ تكلّمو على وين راكم رايحين؟ و واش راكم تفكرو؟  اسأليه كيفاش كان يومو؟و واش تشوفو في الطريق؟ احكمي يديهم …في حصصهم “تمارين رياضة ؛حلقات تحفيظ…” حاولي تلقاي مكان تقعدي فيه تستنايهم طيلة الساعة او الساعتين اللي يغيبوها .

• 9– ألعبوا ألعابهم :

من أجلهم تعلّموا ألعابهم الإلكترونية ؛ لازم تتقْني هذا الجزء من عالم طفلك لماذا؟  أوَّلًا لأنُّو طفلك راح “يغلبك” كي دخلتو مجالهم و انتي راح تولّي ديري جهدك ماتخليهش يغلبك و لكن مليح الطفل يشوف والديه يتْغلبو و ينْهزمو راح يعرف بلي راهم بشر ؛ ثانيا : الطِّفل راح يمرح بزَّاف و يضحك على قلَّة براعتكم و أخيرا  بعض الألعاب تعويض عن الحياة الواقعية لأنّها تقليد للنَّشاطات الحقيقيَّة كيما تنس الطَّاولة ؛ البولينغ  كرة السلَّة ؛ ألعاب الطَّبخ و التَّنظيف و لكن ديري حدّ للوقت ماتخلِّيش الواقع الإفتراضي ياخذهم من حياتهم .

• 10– تناولو بوظة و رقائق الذرة :

أنشئي تقاليد خاصَّة للنَّشاطات المَرِحة و خلِّيها محدَّدة مش دائمة يعني في أياَّم الصَّيف السّخونة عندنا الجمعة العشيَّة ناكلو بوظة و في الشّتا البارد أمسيات التِّلفزيون مع الكاوكاو أو الفشار ؛ القيمة مش في الطَّعام في حدّ ذاتو و إنما يوصّلنا للهدف : كي الأطعمة الخاصَّة و النَّشاطات المَرِحة تحفّز المحادثات و تصنع الذِّكريات .

لازم تعرفي بلِّي انشغالكم الدَّائم على أطفالكم و صعوبة توفُّر الأوقات ليهم يخلّف عندهم إحساس بانعدام الأمان و حالة من التَّوتُّر و اجتماعكم راح يولِّي غير محبَّب ؛ دائمًا أشرحي لطفلك أسباب غيابكم غير العادي و قوليلو بلِّي رغبتك في البقاء معاه أهم شي عندك باش تخلقي عندو حالة من التَّعاطف إضافة لشعورو بالرِّضا ؛ الأهمّ في الأوقات المميَّزة مع أطفالك مش المدَّة و إنَّما الحضور الذِّهني و العاطفي .

…شمس هنية

الكثير من الحالات  نسمعو بيها لطفل يكون يدور يلعب وين الأم تاعو تنظف  
و ياخذ المنتج لي راهي تستعمل فيه سواء كان ماء جافيل و لا روح الملح و لا حتى مكشط تع الفرن 
ياخذ الطفل هاديك القارورة و يديرها في فمه 
عادة الطفل كي يحط المحلول في فمو يحرقو يرميه 
احيانا الانسان الكبير و يغلط خاصة ميكانيكي يشرب اسيد تاع السيارات خاطر القرعة مش مكتوب عليها
بخلاف محاولات الانتحار لي يشرب نص القرعة و يبلع في ساع
محاولة الانتحار ايامنا هادو زادت بزاف و خاصة في اوساط البنات المراهقات  لي يقراو في المتوسطة و الثانوية بعد الخوف من النتائج عادة لهذا نأكد و نعاود على الحوار مع ابنائك
كيفاش نفرقو بين الخطأ و المقصود 
الطفل و لي شرب غلطة تلقاي الحروق في الفم تاعو فقط 
يعني الا شفتي فمو لاهب متتخلعيش 
اما المنتحر تلقاي الحروق في البلعوم و المعدة اما الفم عادة الحروق صغيرة ؛ لانو حاب يخلص مش حاب يذوق 
سواء كان طفل ولا انسان الكبير  يحاول الانتحار 

وش هي الاسعافات الاولية لي تقومي بيها و وش هي الامور لي ممنوع ديريها ؟ 

1-  اهدئي ؛ ما تعيطي ما تبكي ؛ حاجة عادية و تصرى و على قد ما تتحكمي في اعصابك على قد ما رح تنقذي المصاب سواء طفل او مريض نفسي.

 
2- تأكدي ولدك وش شرب ؛ يعني هل صح شرب او فقط يضحك ، الا شفتيه صحا لكن الا ماشفتيهش حاولي تهدري معاه بالعقل عادة الاطفال يخافو يخبرو والديهم وش شربو 
مرة مريضة في المستشفى كل الدلائل تقول بلي شربت و هي تقول شربت الكوكا 

3- اطلبي الاسعاف ، بيد ما يوصلو نتي ديري وش نقولك لانهم يطولو ^^
 

4- حاولي تحطي المصاب في وضعية نصف جلوس يعني ماشي  نايم خاطر وضعية النوم رح تزيد نن الاضرار. 

5- جيبي زوج مخاد و حطيهم تحت ظهرو و متحركيهش بزاف و لا فاقد للوعي جسي النبض تاعو في يدو باش تتأكدي انو مزال كاين نبض ؛ و جيبي قطنة فيها شوية كحول و حاولي تفيقيه .

6- حاولي تلقاي الحاجة لي شربها الا ماكانتش بقربه؛ و اقراي وش الطبيعة تاعها هل هي حمضية ام اساسية ؛ الحمض الحروق تاعو خفيفة اما للقواعد و الاساس لا ترحم …  كي تلقايها اديها معاك للمستشفى باش يشوفها الطبيب حتى لو جافيل اديها معاك.

الان خلصنا من وش لازم ديري نجو للممنوعات لي الا درتيهم ممكن تزيدي على المريض 

1- الان تخيلي معايا نار جازت على غابة كبييرة و وصلت لنهايتها 
منطقيا رح طفي النار في نهايتها مش رح تعاودي ترجعيها منين بدات 
تماما مثل حكاية القيا ؛ متحاوليش تقيي وليدك 
لانو المنتج مزال فعال و كون تعاودي ترجعيه رح يعاود يحرق وش محرقش حذاري 
و حتى كي يوصل للمستشفى اكدي على الاطباء انو شرب هاذاك المنتج باش ميحاولوش يخرجوه

2- ممنوع توكلي او تشربي ابنك اي شيء يعني ممنوع تشربيه الماء ممنوع تشربيه الحليب و لا الخبز و لا اي شيء متشربيه حتى دواء لانو والو ما ينفع لازم تفهمي و تفهمي عايلتك او عايلة المصاب بلي لازم يخلو المريض على حالتو مدة على الاقل 6 سوايع باش كي دخلو انبوب فيه كاميرا في البلعوم تكون الحروق  ظاهرة مليح ؛ ماشي هاملينو الاطباء و ماشافوهش 
و العلاج يختلف على حساب درجة الحروق من انو يبعثوه يروح عادي الى درجة يتغلق البلعوم تاعو من الحروق و هنا لازم ينحوه  

في الاخير نذكرو انو الوقاية خير من العلاج سواء للكبير و لا للصغير 
المواد الخطيرة ديما في مكان بعيد على طفل تاعك 
تحدثي و حاوري  مع المراهق لي في بيتك  
و لازم نحرصو على المريض النفسي انو ياخذ دواه في وقتو 
دمتم بصحة و عافية

موضوع فن الاكل موضوع مهم بزاف وخاصة كي يكون متعلق باطفالنا, لانو مع الطريقة السليمة و الاكل الصحي صحة أطفالنا راح تكون مليحة ونموهم الجسمي والعقلي راح يكون جيد
لهذا لازم على كل أم تعلم وليدها كيفاش ياكل, لكن للاسف الكثير من الامهات ما يهتموش بهذا الموضوع بزاف 
ومن هنا لازم  علينا نطرحوا هذا السؤال للأم ,كيفاش ياكل طفلك؟
هل ليملأ معدتو ام ليتغذى جسمو و يشبع حاسة الجوع في نفس الوقت ؟
هاذا المشكل غالبا ما يكون نتيجته السمنة عند الأطفال
اذ أنّ الطفل يأكل بسرعة فائقة في موعد الأكل و عادة ما يطلب المزيد لأنه لم يشبع
لماذا ؟
لأنّ امّه ما علماتوش انو وقت الأكل يمتد من 20د الى 25د و يكون المضغ من 15 مضغة الى 30 في حالة اللحم
طبعا راح تقولو هذا مبالغ فيه لكن المشكل هو حتى نتوما ما كانش عندكم هذا التدريب كي كنتو صغاو و من بينكم انا 
لكن الحمد لله مع الوقت قلت لما لا أتدرب و نشوف واش راني خاسرة مع الوقت اصبحت وجبتي تنتهي في 20د على الأقل و تكون الوجبة مشبعة و ساعات نحب نتمرد على هذا النظام و ناكل بسرعة و نتيجة ؟ نزيد نسقي و ناكل 
كيف تعوّدي ولادك على هذه الطريقة بلا ما يفيقولكم بلي راكم طولو في الوقت ؟
خاطش لوكان تقولولهم راح نديرو الأكل ليس اقل من 20د راح تحطوهم في حالة توتّر كبير و راح يصابوا بالملل و مع الوقت راح يتذمرو منو و يتمردو
اذا لعبة بسيطة و سهلة
راح تقوليلهم اليوم راح نلعبو لعبة التذوق حيث كل واحد فيكم يمضغ و يحاول يقولي واش راني مستعملة في هذا الطبق من مكونات
طبعا الاسئلة تكون على حسب السن مثلا اذا الطفل يعرف غير الخضر سقسيه على الخضر
اذا راه في سن يعرف البهارات سقسيه عليها
مرات حاولي تقوليلهم غمضو عينيكو و ديرو الأكل في فمكم و قولولي واش هي الطبخة
و مرات سقسيهم اذا يعرفو اسم الطبق
كل مرة حاجة حتى يتعود الجسم تاعهم انو قبل ما يكمل الطبسي يكون تعرف على كامل المكونات و الاذواق لي كلاهم
و هكذا مع الوقت يولي وليدك ياكل للتذوق و ليس لملأ المعدة فقط
حتى زوجك تقدري تعلميه هذه الطريقة حيث تسأليه جاتك بنينة ؟ واش رايك في المكونات ؟ هل حاجة ماذابيك نزيدها او نقصها ؟
كل هاته الأسئلة من جهة راح تتعلمي حاجات جدد في أولادك و في زوجك و من جهة راكي تعلميهم ياكلوا بذوق و ليس بطريقة تلقائية جعت لازم ناكل و السلام
اسئلة اخرى مليحة تسأليها قبل الأكل يعني قبل ما تسقي الطبسي اصلا
سقسي ولادك او زوجك شحال راكم جيعانين ؟ بزاف ولا شوية ولا ماشي جيعانين ؟
خاطش اولا من ناحية التبذير حرام علينا نسقو لواحد و يخلي طبسيه و نرموه
و من ناحية اخرى نحن قوم اذا اكلنا فلا نشبع يعني ممنوع تقولي لانسان بسيف كمل طبسيك و هو يكون شبعان
و من ناحية اخيرة الامر جد خطر اذا سيفتي على انسان ان ياكل و هو ماراهش جيعان
راح تقولي و الحل كيفاش نقول لوليدي معليش ما تاكلش و انا نوكلهم كامل في وقت واحد ؟
ساهلة ماهلة
كي يقولك وليدك مانيش جيعان قوليلو معليش اقعد معانا برك و اذا جعت كول و اذا ما جعتش اشرب ماء او عصير طبيعي فقط
الكثير من الناس تأتي شهيتهم كي يشوفو ناس آخرين ياكلو
اذا دون صراخ و دون شوشرة هذا حل بسيط
و اذا كان وليدك اكل قبل ما يفوتو 4 ساعات ديري في بالك انو وليدك غير محتاج الأكل
اذا حبسو طبيعة تاع جا وقت الفطور
الأكل موعده حينما يجوع الانسان و ليس حينما تقرّرين انتي انه حان وقت الأكل

…شمس ساطعة