قال الله سبحانه و تعالى: “أَلَمْ نَخْلُقكُّم مِّن مَّاءٍ مَّهِينٍ (20) فَجَعَلْنَاهُ فِي قَرَارٍ مَّكِينٍ (21) إِلَىٰ قَدَرٍ مَّعْلُومٍ (22) فَقَدَرْنَا فَنِعْمَ الْقَادِرُونَ (23)“
إحدى أعظم عجائب الخلق اللِّي أقام بيها ربّ العزَّة الحُجَّة على ربوبيته هي خلقُ الإنسان لِما فيها من الآيات المعجزة و الأدلة القطعية …و مازالت البشرية منبهرة تمامًا بمسار تشكيل الكائن العظيم و كلّ ما تعمّقت في العلم و الفهم تزيد الدهشة و يترسّخ اليقين ..
المُدهِش حقًّا أنَّنا جميعًا نبداو كائنات بالغة الصِّغَر : كُرات أو خلايا مكروسكوبية (لا تُرى إلاَّ بالمجهر) اللِّي تبقى تَنقسم و تَنقسم بحيث يأخذ النُّموّ سِياق مرسوم بدِقَّة .
و إذا كنَّا كامل نعرفو بلِّي البيبي في كرش يمَّاه يبقى 9 اشهر باش يكبر و يطوّر و يخرج إنسان سَوِيّ بتركيب مُعْجِز السُّؤال اللِّي يُطرَح : كيف و متى يتشكّلو هذوك الأعضاء و الأجهزة؟ ؛ وقتاش يبدا قلب الجنين يخبط؟ و المخ يتطوّر؟ …..الخ
من اللَّحظة اللِّي تعرفي فيها بلِّي راكي حامل تبداي تتخيّلي في الإنسان القادم كيفاش يتكوّن؟ و كل يوم تتساءلي كيفاش راهو داير؟ و واش راهو يوقع في حياتو في الظُّلمات؟
اذا حبيتي تعرفي واش راهو يصير في بطنك و تابعي نموّ جنينك شوفي هذا الدَّليل المُصَوَّر للتَّطوُّر الأسبوعي لحملك :
الحمل يتحْسب بالأثلاث (الفصل ؛ 3 اشهر) من أوَّل يوم تاع آخر دورة شهريَّة لمدة 40 أسبوع كاملة :
- الثُّلاثي الأوَّل من الحمل هو من الأسبوع 1 إلى الأسبوع 12 (حوالي 3 اشهر)
- الثُّلاثي الثَّاني من الأسبوع 13 إلى الأسبوع 27
- الثُّلاثي الثاَّلث من الأسبوع 28 إلى الولادة
الجنين يتغير من أسبوع لأسبوع ؛ إليكِ تقويمًا تقريبيًّا للأحداث الأسبوعيَّة للحمل :
الثُّلاثي الأوَّل من الحمل : (من الأسبوع 1 إلى الأسبوع 12)
الثُّلاثي الأوَّل قد يصل إلى 14 أسبوع من الحمل : الجنين يبدا بالتَّشكُّل و تظهر أعضاؤو الأوَّلية في نهاية هذا الثُّلاثي ؛ و رغم أنُّو لا يتجاوز 9سم نميّزو مليح راسو و جذعو و ذراعيه و سيقانو .
تبّعي تطوُّر حملك في الثُّلاثي الأوَّل أسبوع بأسبوع :
الأسبوع الأول : 40 أسبوعًا
من الصَّعب تحديد اليوم الصَّحيح للتَّلقيح بدقَّة (اختراق الحيوان المنوي للبويضة) ؛ من أجل تقويم مدَّة الحمل الأطبَّاء يستعملو عدد الأسابيع اللي توقفت فيهم العادة الشهرية ؛ و حساب تارخ الولادة يبدا من أوَّل يوم تاع آخر دورة ؛ طريقة الحساب هذي تزيد 14 يوم لمدة الحمل ؛ و في هذي الطَّريقة الأسبوعين الأولين لي يحسبوهم الأطبَّاء ماكيش صحّ بالحمل .
تشكُّل الجنين يَحدُث عادةً أسبوعين بعدما تَحدُث آخر دورة شهريَّة . و لكن هذو الأسبوعين داخلين في حساب شهور الحمل
الأسبوع الثاَّني : التَّبويض
التَّبويض هو الوقت اللِّي أحد المبيضين (الأيمن أو الأيسر) يخرّج بُويْضَة ؛ عمومًا يكون التَّبويض عند النِّساء 14 يوم قبل الدَّورة الشَّهرية ؛ هذا الرَّقم يتغيَّر من 11 إلى 18 يوم حسب العادة نتاع المراة ؛ البويضة اللِّي تخرج من المبيض تهبط على طول قناة “فالوب” وين يتمّ تلقيحها و تكمّل طريقها من بعد نحو الرحم .
مدَّة حياة البويضة من 12 الى 24 ساعة ؛ و فترة الخصوبة تستمرّ اذًا حوالي 5 أيام كلّ شهر ؛ من 4 أيام قبل التبويض حتى ل 24 ساعة بعدما يتمّ (التبويض) لأنُّو النِّطاف تقدر تعيش في جسم المراة من 3 إلى 5 أيام .
إذا تلقّحت أكثر من بويضة أو إذا البويضة الملقَّحة تنقسم على 2 راح نحصل على بويضة ملقَّحة متعدِّدة ممّا يعني “التوائم“
البويضة الملقَّحة عندها 46 كروموزوم: 23 من الأم و 23 من الأب ؛ هذو الكروموزومات يتحدّد من خلالهم جنس المولود و سِماتو الجسدية .
الأسبوع الثالث : الإخصاب
إحدى الحيونات المنويَّة من الأب تدخل داخل البويضة تاع الأم و يندمجو باش يشكّلو بويضة مركَّبة أحادية الخليَّة : هذا
هو التَّلقيح (أو الإخصاب) و هو البداية الحقيقيّة للحمل
هذي البويضة راح تأخذ الكثير من الأسابيع باش تكبر و تولِّي جنين و لكن فعليًّا راهي الآن تحتوي على الحقيبة الجينيَّة للطِّفل (اللِّي راح يجي) : جنسو ؛ لون عينيه ؛ طولو ؛ صبغيَّات بشرتو …الخ ؛ كلّ هذا في قطعة صغيرة قدّ راس الابرة .
خلال الأيام الأولى من حياتو البويضة تنزل بهدوء في قناة فالوب نحو الرَّحم ؛ أثناء هذي الرِّحلة البويضة أحادية الخلية تنقسم باش تمدّ 2 خلايا كلّ وحدة منهم تزيد تنقسم ل 2 كذلك ؛ هذو ال 4 خلايا ينقسمو و يمدُّو 8 ؛ و هكذا دواليك …هذي العمليَّة اسمها “إنقسام الخليَّة” و بهذي الطريقة يتشكّلو الأعضاء و الأجهزة و الأنظمة لي تمدّ كائن بشري .
الأسبوع الرابع : إنغراس البويضة
البويضة المخصَّبة تتعلّق حرفيًّا s’attache (و هذا وصف ليها بكلّ اللُّغات _سبحان الله_ في إشارة إلى “العَلَقَة” المذكورة في القرآن الكريم) بالغشاء المخاطي ؛ هذي المرحلة تسمَّى “الإنغراس” و تستمرّ عدَّة أيَّام و تحتاج هرمون خاص تنتجو البويضة هو “الهرمون المشيمي للغدد التناسلية l’hormone chorionique gonadotrope (hormone HCG) ): هذا الهرمون هو اللِّي تكشفو اختبارات الحمل ؛نسب HCG تتضاعف كلّ يومين إلى 3 أيام في بداية الحمل باش توصل للقمّة بين الأسبوع الثامن و العاشر ؛ وُجود هذا الهرمون يأمّن إنتاج كميَّات كبيرة من “البروجيسترون” اللِّي دورو يحافظ على الغشاء المخاطي السَّميك في مكانو وين تتموضع البويضة و كلّ مرَّة تزيد تتعمّق باش تحصل على التَّغذية و الأكسجين بفضل العديد من الأوعية الدَّموية الموجودة ثما .
في هذي المرحلة البويضة يكون قياسها 1.5ملم فيها بزَّاف الخلايا تشبَّه لحبَّة التُّوت و تتكوّن من طبقتين الدَّاخلية اللِّي يتشكّل منها الجنين و الجزء الخارجي اللِّي يصبح هو المشيمة (علابيها يسمُّوهم لخواتات) ؛ الغلاف ينفع في حماية و إطعام الجنين و في هذي المرحلة يبدا تشكُّل النِّظام العصبي.
الأسبوع الخامس : الحبل السُّرِّي
في غضون هذا الأسبوع الجنين يبدا يتحوّل من الشَّكل الدَّائري (تاع البويضة) إلى الإستطالة يولِّي يشبّه “لحصان البحر” صغير ؛ الدَّورة الدَّموية هي اللِّي تساعد في النُّموّ و التَّثبيت في مكانه و الجنين يكبر بزَّاف في هذا الأسبوع و يولِّي يبان بالعين المجرَّدة و القلب يبدا مراحل نُمُوُّو الأولى و الوجه يبدا يرتسم شيئا فشيئا : العين و الانف و الاذنين …
الحبل السُّرِّي يربط الآن الجنين مع الأم و بفضلو الجنين يتلقَّى التَّغذيَّة و الأكسجين اللِّي يجيو من عند الأم و يسمح كذلك بإخراج جزء من الفضلات اللِّي تروح في التَّجويف الرَّحِمي و الجنين يبقى يعوم في السَّائل الأمينوزي.
الأسبوع السَّادس : الأنبوب العصبي و أولى دقَّات القلب
خلال هذا الأسبوع يكون عندنا 4 أسابيع من بداية التَّخصيب و يكون كمّل تشكيل جزء رئيسي من الجنين هو “الأنبوب العصبي” ؛ هذا الأنبوب مُهِمّ لأنُّو كلّ النِّظام العصبي يتطوّر إنطلاقًا من هذي المُنشَأة ؛ المخّ في أحد نهايات الأنبوب و نفس الشِّي بالنِّسبة للنُّخاع الشَّوكي و الأعصاب ؛ نهايات الأنبوب راح تنغلق بنهاية الأسبوع و أخذ المُكَمِّلات الغذائيَّة تاع “حمض الفوليك” قبل و أثناء الحمل تهدف إلى تجنُّب التَّشوُّهات أثناء تَشكُّل الأنبوب العصبي .
قلب الجنين يخبط : و أثناء جلسة الإيكوغرافي ممكن نشوف الخفقان ؛ هذا القلب الصّغير مازال يتشكّل يبان كأنُّو نُتُوء صغير بارز بزَّاف قُداَّم جسم الجنين .
الجنين يشبّه لحبّة لوبيا هذا وين ناضو لها البراعم لي راح يكونوا في الأخير اليدين و السَّاقين ؛ والرَّقبة تان تبدا تبان في هذي المرحلة .
عدسة العينين و الأذن الدَّاخليَّة تبدا في النُّموّ كيما باقي الأعضاء : الرئتين و المعدة و الكبد و البنكرياس .
الأسبوع السَّابع :المُخّ
في هذا الأسبوع نموّ المُخّ هو اللِّي يتسارع مقارنةً مع الباقي : مشروع “قشرة الرَّاس” يبدا يبان مع تطوُّر شِقَّيْ (نصفي) الدِّماغ من لحاء الدِّماغ و المادَّة الرَّماديَّة ؛ الرَّاس يتشكّل بالشّويَّة و مُؤَخِّرة المخّ تُصبح أعرض بحيث يولِّي الجنين مايل راسو للأمام .
في وجهو نميّزو الآن الخياشيم ؛ و الحُفَر تاوع اللَّثَّة وين يخرجو الأسنان اللَّبنيَّة راهم ديجا متشكّلين ؛ و في كِلا جانبَيْ الرَّاس نشوفو منطقتين مظلمتين هذوك هوما العينين صباغ الشَّبكيَّة هو اللِّي يمدّلهم لونهم .
الأعضاء الحيوية كذلك تنمو و لكن مازالها ماتخدمش : داخل القلب نميزو الان 4 تجاويف.
الأسبوع الثامن : يبدا يتحرّك
الآن وقت الجفنين و الآذان الخارجيّة (راهي تشبّه لحبَّات صغار) باش يبداو يتطورو لكن الحواس الأولى اللي تتنبه عند الجنين هي الشَّم و التَّذوُّق ؛ في هذي المرحلة الأنف و الشَّفة العليا راهم ديجا تشكّلو وابتداءً من هذا الأسبوع المستقبِلات الشَّميَّة تظهر .
على مستوى الأطراف نشوفو براعم صغيرة هذو يشكلو أصابع اليدين و القدمين ؛ نميّزو كذلك مكان المرفقين و الركبتين ؛ الجنين مابقاش ساكن راهو يتحرّك : الجذع و الأطراف تتحرّك داخل الرَّحم و لكن مانحسوش بيهم
الكثير من الأعضاء الحيويَّة تأخذ شكلها :المعدة و المستقيم و البنكرياس …الكلتين يظهرو و لكنَّهم مازالو ما يخدموش
في نهاية هذا الأسبوع قيس الجنين من 11 الى 14 مم.
الأسبوع التَّاسع : الذِّراعين و السَّاقين
خلال هذا الأسبوع الذِّراعين و السَّاقين يطوالو و المفاصل (المرفقين و الركبتين) يتعيّنو ؛ نشوفو المعصمين و الكاحلين لي يترسمو و في الداخل العضلات و الاعصاب ياخذو شكلهم .
حجم الراس مازال كبير بالمقارنة مع بقيَّة الجسم و يتدوَّر تدريجيًّا و الرَّقبة تتعدّل ؛ نلاحظو 2 مناطق مظلمة للعينين في هذي اللحظة راهم بعاد في جانبي الراس و 2 حبات للوذنين و فتحة واحدة للأنف و الفم .
بالنِّسبة للمخطَّط الحسِّي نلقاو الآن مستقبِلات لمس : مستقبلات حول فم الجنين خلال هذا الأسبوع الخلايا التَّذوُّقيَّة الأولى راح تتطوّر ثان .
حسب جنس الطِّفل المبايض أو الخصيتين يبداو في التَّشكُّل و لكن لن تظهر الأعضاء التَّناسليَّة حتَّى الشَّهر الثَّالث .
الجنين يبدا يشبّه لطفل : أطرافو مستمرَّة في النُّموّ و كلّ الأجزاء بما فيها المفاصل راهم واضحين و الأصابع باينة مليح ؛ الجنين الآن يقدر يدير مجموعة من الحركات .
الأسبوع العاشر : المفاصل و الآذان
الجفون الآن راهم مشكّلين و يحميو العينين اللّي راهم يتشكّلو
الآذان الخارجيَّة راهم الآن يشبهو للأذن و لكنَّهم في موقع لتحت في الرّاس قراب للرّقبة .
في هذي المرحلة من الحمل معدَّل ضربات القلب تاع الجنين أقلّ من 130 خفقة في الدَّقيقة و يقدر يوصل حتى ل 160 ضربة في الدَّقيقة و راح تنقص بالتَّدريج أثناء الحمل .
نقدرو نلتقطو ضربات القلب بواسطة Doppler و هي آلة لي تسمح بالاستماع إلى دقَّات قلب الجنين .
الأسبوع 11 : مِن جنين إلى طِفل
مازال راس الجنين حجمو كبير مقارنةً مع باقي الجسم و لكن نُمُوّو الآن يصبح أبطأ من باقي الجسم و يكمّل يولِّي دائري .
الوجه أصبح سهل تمييزو : العيون راحو للجانبين في مقدِّمة الوجه و الجفون يغطِّيو العينين ؛ الشَّفتين محدَّدين مليح و الجنين يقدر يفتح فمُّو حتَّى أنُّو يشرب السَّائل الأمينوزي و الحمد لله الكلتين و الجهاز البولي يبداو يخدمو و يصفِّيو السَّائل المبلوع و يرميوه داخل المثانة على شكل بول .
في الفم و الأنف الهياكل الخلويَّة الأولى تحوّلو لتشكيل براعم التَّذوُّق و الشَّم و الغدد اللُّعابية و في هذا الأسبوع الحبال الصَّوتيَّة ثان تبدا النُّموّ .
الأسبوع 12 : نموّ الأظافر
كلّ الأعضاء و الأجهزة الحيويَّة تشكّلو جزئيًّا و الأطراف تخدمو ؛ كذلك الأظافر يبداو النُّمُوّ و جزء من الأمعاء الدَّقيقة تغطِّي الحبل السُّرِّي .
في المخّ الخلايا العصبيَّة تتكاثر و تترابط مع بعض باش تدير الكثير من نقاط الإشتباك العصبي synapses و نشوفو كذلك بعض ردود الفعل مثلاً : الجنين يطوي الأصابع إذا كاش حاجة قاست كفُّو .
ردود الفعل هذي تدلّ على النُّموّ العصبي الجيِّد للطِّفل .
الجنين الآن طولو 6سم من راسو حتى للعصعص و يوزن تقريبًا 14غ و كامل الرَّحم مليان بالسَّائل الأمينوزي هذي هي الحالة المثاليَّة لأوّل صورة ضوئية échographie .
في نهاية هذا الأسبوع خطر الإجهاض ينقص بزَّاف و تقدري تعلني لمن حولك الخبر السَّعيد.
الأسبوع 13 :العمود الفقري و نخاع العظم
الأنسجة العظميَّة الأولى تبدا تتكوّن خصوصا تاع الحوض و الأضلاع و الراس و الأطراف و لكنَّهم طريِّين بزَّاف
العمود الفقري ينمو أيضا شيئًا فشيئًا
براعم الأسنان اللَّبنيَّة يظهرو جزئيًّا و يتشكّلو لاحقًا أثناء الحمل في الثُّلاثي الثَّاني .
يتكوّن دم الطفل و نخاع العظم ينتج كراته الحمراء الأولى .
هذاك الجلد الرّقيق تاع الطفل تغطيه شعرات صغيرة رقيقة جدًّا “زغب” اللي تختفي عموما قبل الولادة ؛ صبغيَّات البشرة اللِّي تمدّلها اللَّون تنمو كذلك ؛ البشرة لغاية الآن كانت تقريبا شفَّافة ؛ كذلك مستقبِلات اللَّمس تغطِّي الآن كلّ الوجه و كفوف اليدين و باطن القدمين .
الأسبوع 14 : يبدا يرضع صبعو
وجهو يتحرّك و بعض السِّمات تتحدّد كيما الأنف و الفم ؛ الأذنين خذاو مكانهم في جانبَيْ الرَّاس و الطِّفل يقدر يدير بعض التَّعبيرات بوجهو مثل : تقطيب الحاجبين أو يتخلع .
حاجة أخرى مميِّزة لطفلك تبان : “بصمات الأصابع” ؛ البيبي يبدا يتفاعل مع المحفِّزات الخارجيَّة : إذا ضغطتي على كرشك ممكن الطّفل يجاوب و يضغط هو ثان ؛ و في هذي المرحلة كذلك يبدا يمصّ إبهامو
جنس الجنين يصبح واضح في هذا الأسبوع أو الأسبوع اللِّي بعدو : عند لبنات حويصلات البويضات يتشكّلو و عند الذُّكور البروستات يولِّي باين و في جلسة الفحص بالأشعَّة القادمة
تقدري تعرفي جنس طفلك إذا حبِّيتي .
في نهاية الثُّلاثي الأول الجنين طولو 9سم من الراس
إلى العصعص و يوزن حوالي 4غ .
…شمس هنية
