القناع الاول:

• 2 مغارف كبار كركم
• 1 مغرف كبيرة حمص مطحون
• 2 مغارف كبار ياغورت أبيض
• 1 مغرف كبيرة عسل

خلطي كل المكونات المذكورة حتى تتحصلي على كريمة، وأمبعد أطلي بيه البقع تاع الكلف بطبقة تكون غليظة وخليه في الوجه لمدة نصف ساعة وأغسليه بماء دافيء. كرري العملية من مرتين إلى ثلاث مرات في الأسبوع حتى تتخلصي نهائيا من البقع.

القناع الثاني:

• كمية من الودع المطحون( متوفر عند العشّاب) او تشريه حب وتطحنيه في البيت
• عصير ليمون

خلطي الودع المطحون على شكل بودرة مع عصير الليمون وديريه على البقع البنية لمدة 20 دقيقة، وأمبعد أغسليه مليح بالماء، وديري مسحة خفيفة بماء الورد. كررّي العملية يوم نعم ويوم لا لمدة 6 أشهر وبعدها راح تتخلصي من الكلف نهائيا.

القناع الثالث:

• عصير الخيار
• حليب بودرة

الطريقة سهلة وهي أنك تخلطي عصير الخيار مع حليب البودرة  حتى ينسجمو مع بعض وتتحصلي على كريمة، تدهنيها على الوجه فوق البقع وتخليها حتى تنشف مليح وأمبعد تغسليها بماء بارد. تكرريها من مرتين إلى ثلاث مرات في الأسبوع حتى تشوفي النتيجة.

ملاحظة : بالنسبة للوصفات العلاجية الطبيعية تحتاج الوقت والصبر، يعني ما تستعجليش وما تتقلقيش حتى تظهر النتيجة.

… شمس راقية

الكثير من الحالات  نسمعو بيها لطفل يكون يدور يلعب وين الأم تاعو تنظف  
و ياخذ المنتج لي راهي تستعمل فيه سواء كان ماء جافيل و لا روح الملح و لا حتى مكشط تع الفرن 
ياخذ الطفل هاديك القارورة و يديرها في فمه 
عادة الطفل كي يحط المحلول في فمو يحرقو يرميه 
احيانا الانسان الكبير و يغلط خاصة ميكانيكي يشرب اسيد تاع السيارات خاطر القرعة مش مكتوب عليها
بخلاف محاولات الانتحار لي يشرب نص القرعة و يبلع في ساع
محاولة الانتحار ايامنا هادو زادت بزاف و خاصة في اوساط البنات المراهقات  لي يقراو في المتوسطة و الثانوية بعد الخوف من النتائج عادة لهذا نأكد و نعاود على الحوار مع ابنائك
كيفاش نفرقو بين الخطأ و المقصود 
الطفل و لي شرب غلطة تلقاي الحروق في الفم تاعو فقط 
يعني الا شفتي فمو لاهب متتخلعيش 
اما المنتحر تلقاي الحروق في البلعوم و المعدة اما الفم عادة الحروق صغيرة ؛ لانو حاب يخلص مش حاب يذوق 
سواء كان طفل ولا انسان الكبير  يحاول الانتحار 

وش هي الاسعافات الاولية لي تقومي بيها و وش هي الامور لي ممنوع ديريها ؟ 

1-  اهدئي ؛ ما تعيطي ما تبكي ؛ حاجة عادية و تصرى و على قد ما تتحكمي في اعصابك على قد ما رح تنقذي المصاب سواء طفل او مريض نفسي.

 
2- تأكدي ولدك وش شرب ؛ يعني هل صح شرب او فقط يضحك ، الا شفتيه صحا لكن الا ماشفتيهش حاولي تهدري معاه بالعقل عادة الاطفال يخافو يخبرو والديهم وش شربو 
مرة مريضة في المستشفى كل الدلائل تقول بلي شربت و هي تقول شربت الكوكا 

3- اطلبي الاسعاف ، بيد ما يوصلو نتي ديري وش نقولك لانهم يطولو ^^
 

4- حاولي تحطي المصاب في وضعية نصف جلوس يعني ماشي  نايم خاطر وضعية النوم رح تزيد نن الاضرار. 

5- جيبي زوج مخاد و حطيهم تحت ظهرو و متحركيهش بزاف و لا فاقد للوعي جسي النبض تاعو في يدو باش تتأكدي انو مزال كاين نبض ؛ و جيبي قطنة فيها شوية كحول و حاولي تفيقيه .

6- حاولي تلقاي الحاجة لي شربها الا ماكانتش بقربه؛ و اقراي وش الطبيعة تاعها هل هي حمضية ام اساسية ؛ الحمض الحروق تاعو خفيفة اما للقواعد و الاساس لا ترحم …  كي تلقايها اديها معاك للمستشفى باش يشوفها الطبيب حتى لو جافيل اديها معاك.

الان خلصنا من وش لازم ديري نجو للممنوعات لي الا درتيهم ممكن تزيدي على المريض 

1- الان تخيلي معايا نار جازت على غابة كبييرة و وصلت لنهايتها 
منطقيا رح طفي النار في نهايتها مش رح تعاودي ترجعيها منين بدات 
تماما مثل حكاية القيا ؛ متحاوليش تقيي وليدك 
لانو المنتج مزال فعال و كون تعاودي ترجعيه رح يعاود يحرق وش محرقش حذاري 
و حتى كي يوصل للمستشفى اكدي على الاطباء انو شرب هاذاك المنتج باش ميحاولوش يخرجوه

2- ممنوع توكلي او تشربي ابنك اي شيء يعني ممنوع تشربيه الماء ممنوع تشربيه الحليب و لا الخبز و لا اي شيء متشربيه حتى دواء لانو والو ما ينفع لازم تفهمي و تفهمي عايلتك او عايلة المصاب بلي لازم يخلو المريض على حالتو مدة على الاقل 6 سوايع باش كي دخلو انبوب فيه كاميرا في البلعوم تكون الحروق  ظاهرة مليح ؛ ماشي هاملينو الاطباء و ماشافوهش 
و العلاج يختلف على حساب درجة الحروق من انو يبعثوه يروح عادي الى درجة يتغلق البلعوم تاعو من الحروق و هنا لازم ينحوه  

في الاخير نذكرو انو الوقاية خير من العلاج سواء للكبير و لا للصغير 
المواد الخطيرة ديما في مكان بعيد على طفل تاعك 
تحدثي و حاوري  مع المراهق لي في بيتك  
و لازم نحرصو على المريض النفسي انو ياخذ دواه في وقتو 
دمتم بصحة و عافية

الجيور و لا الجاير و لا قلصت تسميات مختلفة يستعملها الجزائريون باه يعبرو على الحموضة كي تطلع للبلعوم
هاذي الحاجة راهي طبيعية عند الناس اكل ، و اغلبية الناس يقولو بلي عندهم على الاقل مرة في الشهر يحسو بهاذي الحاجة
الاحساس بيها يكون على شكل الم او حرقة في منطقة منتصف الصدر و لا pyrosis علميا
لكن الخطورة تاعها كي يزيد العدد تع المرات لي يحس بيها الانسان بهاداك الالم لدرجة وين تولي تكرهلو حيانو و يولي يكره الاكل تماما
لازم تعرفي بلي راهي تزيد مع الوقت يعني على قد ما تتهاوني عليها على قد ما رح تزيد
خلينا قبل نعرفو علاش تجي وش هي المخاطر تاعها رغم اني عايشة بيها و عمري ما سمعت واحد مات بالجيور و لا بالجاير
المعدة في الحالة الطبيعية عندها في البداية تاعها يعني في نقطة اتصالهة بالبلعوم باب ، هاداك الباب يتحل كي تبلعي الماكلة و برك تجوز الماكلة يعاود يغلق من وراها
لكن احيانا ميتغلقش مليح
خاصة الا عمرتيها للباب خلاص يولي مش قادر يغلق
ولا رقدت بعد الاكل مباشرة
و الاشخاص السمان
الحموضة لي في المعدة تطلع للبلعوم و بما انو هو طبيعيا مش حامض رح ضرو هاديك الحموضة و يترجمها بالالم
هاديك الحموضة رح تخرب الخلايا تع البلعوم و تبدا تاكل فيها بشوية و البلعوم كل مرة يعاود يجددها
احيانا التجديد يكون ماشي مليح خاكر تعب كل مرة يسقم رح تجي خلايا من منطقة اخرى كيما الامعاء و تجي في هاديك المنطقة
هاديك الخلايا ماشي مكانها ، و هي في الحقيقة خلايا خبيثة
نعم سمعنا بزاف بسرطان البلعوم لكن البداية تاعو قادرة تكون حموضة بسيطة
الا حسيتي بحموضة ممكن ليك تشربي مضادات الحموضة كيما gavison لكن لازمك تشوفي طبيب في اقرب وقت
الدواء تاعو ساهل رح يمدلك مثبطات …. تع الحموضة لي رح تخلي المعدة تخدم حموضة اقل كيما omeprazole لمدة اسبوع و الكمية هو يحددها على حسب تقدم تع الاضرار لي جات في البلعوم

…شمس ضياء

كيف نتخلص من السموم و بقايا الأدوية أي بما يسمى الديتوكس Detox

الطريقة :

1 لتر و نصف ماء معدني دافئ يشرب كله مع الصباح حتى تكمليه كاااااااااااامل

بعد 40 دقيقة و هي الوقت الكافي في أنو الماء ينزل و تتخلصي منو عن طريق التبوّل

و بعدها يجب عليك ان تصبحي نباتية

يعني ممنوع لحوم بكل انواعها و الحليب و كل مشتقاته و كل ما يشترى من الخارج مصنع و معلّب

هذا النظام فيه خضر طازجة و فواكه و فيه حتى طبيخ

بعد 21 يوم او شهر تقدري تاكلي السمك كل يوم

اما اللحوم الأخرى فقط 1 او 2 مرات في الأسبوع

المواد التي تساعد على غسل الجسم :

المعدنوس

الكرافس

القصبر

البصل الحمراء

الثوم

القرعة الحمراء او الكابويا

الخيار

القرعة الخضراء

العسل مع الماء الدافئ

في الأخير بعض النصائح :

بعدما تغسلي جسمك من السموم

يجب على المواد الحيوانية ان لا تطغى على المواد النباتية لأنّ أصل التغذية عند الإنسان هي النبات

اذا كانت التغذية 90 بالمئة نباتية لن يكون هناك مشاكل في الجسم و خصوصا النساء لأنها عندها مشكل الهرمونات

لا يعنى بالنباتي أنّ اللحوم حرام فقط يجب معرفة متى و كيف تأكل اللحوم

و يجب أن لا يكون افراط في الأكل

و مليح لو تمشي بقاعدة لا ضرر و لا ضرار

النظام النباتي ماهوش غير سلطة فيه :

حبوب و بقوليات

فيه قمح و شعير

فيه خضر

فيه فواكه

…شمس ساطعة