مقالات

في رمضان تزيد الأمور الروحانية بحيث يتسابق الجميع باش يتقربّو من الله عز وجلّ بكثرة الطاعات من صلاة ودعاء وقراءة قرآن وصدقات وصلة أرحام، وباش نستغلّو وقتنا أحسن استغلال في رمضان وعلى هذا لازم على المرأة أنها تتقيّد ببعض الأمور وإلي راح تعاونها في الاستغلال الفعّال لوقتها في رمضان، ومن بين هاذي الأمور ما يلي:

تجنبي الخروج في نهار رمضان إلا إذا كان في خروجك ضرورة

مثلا كنتي امرأة عاملة ولازم تخرجي لخدمتك، أو خروجك للطبيب، أو لحفظ القرآن في المدرسة القرآنية… وغيرها.

حاولي تنقصّي من الزيارات الكثيرة وخاصة الزيارات إلي ماعندها حتى غاية، لأنك راح تضيعي وقتك ووقت إلي راح تزوريهم، وفي هذا السياق واذا كان لا بُد من الزيارة حاولي تكون زيارتك خفيفة ظريفة تؤدي بيها واجبك مع إلي راح تزوريهم، وتجنبّي المجالس تاع النميمة والغيبة باش ما تفسديش صيامك تاع النهار.

تجنبّي الإكثار من مُتابعة المسلسلات والأفلام واليوتوب وتضييع الوقت في حل الألغاز والبوقالات.

ما تتخلايش على الورد اليومي تاعك من القرآن الكريم فرمضان هو شهر القرآن

وكل وحدة تشوف الوقت إلي يناسب ظروفها لقراءة القرآن، كاين إلي تقرأ وقت الفجر، وكاين إلي يساعدها وقت القيلولة، وكاين إلي تقرأ قبل السحور … وغيرها.

ما تخليّش أغلب ساعات نهارك من رمضان تفوت في النوم بحُجة طول النهار والتعب من الصيام

لكّن استغليها في قراءة القرآن وفهم آياته، ولا الاستماع لفيديو تحفيزي عن فضل شهر رمضان.

ما تضيعيش وقتك كامل في التفكير في المطبخ لإعداد مائدة الإفطار

اكتبي جدول يتضمن أهم الوجبات إلي يفضلوها أفراد عائلتك في افطارهم، وبالتالي راح تتوفرّلك عدة احتمالات الوجبات افطارك تتناسب مع المصروف إلي عندك، هكا تربحي وقت وجهد وتكاليف في اعدادك لمائدة الافطار.

وقتك في رمضان غالي ما تضيعيهش في الاتصالات الهاتفية المطوّلة ولا الجلوس المطوّل على مواقع التواصل الاجتماعي وإلي تحكي فيها كامل يومياتك وتحضيراتك ووجباتك.

حاولي ما تطولّيش في السهرات كثير باش يكون عندك متسع من الوقت للراحة وبالتالي تقدري تصلّي صلواتك في وقتها.

قومي بتأجيل كل أشغالك الدنيوية من تنظيفات ما بعد الافطار أو الزيارات العائلية أو إعداد موائد السهرات إلى ما بعد صلاة التراويح

صلّي صلاتك وأدعي ربي سبحانو وأمبعد عندك الوقت تديري واش تحبّي.

حافظي على صلاتك في وقتها، ماكاين حتى حاجة تخليك تستعجلي في صلاتك علاجالها

إذا كنتي تطيبي في الفطور ولحق وقت صلاة العصر، تقصّي للنار ولا طفيّها وانتبهي لصلاتك واخشعي فيها.

في الأخير لازم تكوني على يقين أنو رمضان راه شهر واحد برك في العام حاولي تستغلي كل وقت فيه أحسن استغلال باش تكوني من العتقاء من النار لأنو ماراناش عارفين هل راح نقدرو نصوموه العام الجاي ولا لا، لأنو كثير من المعارف صامو معانا العام إلي فات وهاذ العام رانا نطلبولهم الرحمة من عند ربّ العالمين. 

 

… شمس راقية