مقالات

برنامج متكامل للمرأة في رمضان


بعد أيام قلائل سيُقبل علينا ضيف كريم هو شهر رمضان شهر التوبة والغفران، شهر العتق من النيران، وغالبا ما تحتار المرأة في الطريقة المناسبة الي تتبعها باش تقتنص الكثير من الحسنات في هذا الشهر الفضيل، وبالتالي كثير من النساء يوضعو جداول تنظيمية تتضمن معظم المجالات إلي من المفروض يقومو بيها، كاين إلي تنجح وتحقق اهدافها وكاين إلي تحس بعذاب وبؤس لما تلقى أهداف كثيرة بقات حبر على ورق، واخفاقها هذا يرجع لمثاليتها في وضع أهدافها ولأنها حابة تقوم بكل المهام على الوجه الأكمل 100%، وعلى هذا الأساس فمن خلال هذا المقال سنقدّم برنامجا متكاملا للمرأة في رمضان.

أول حاجة لازم تتعودّي عليها هي أنك تنوضي الصباح، ما تدّيش النهار كامل رقاد، ديري روتينك الصباحي في نظافتك الشخصية، فطرّي أولادك الصغار ما تنسايهمش راهم صغار ويحتاجو الفطور تاع الصباح والأكل خلال النهار، إذا كنتي عاملة روحي للعمل تاعك في الوقت وربي يعينك ويأجرك على العمل تاعك وقضاء حوائج الناس، أما إذا كنتي قاعدة في الدار فعندك مُتسع من الوقت باش تخملّي دارك وتديري روتينك المنزلي الصباحي بشكل عادي، بلا ما تنساي تصلّي ركعات الضحى وتستفيدي من 360 حسنة وكأنك تصدّقتي على كل عضو من أعضاء جسمك، وأمبعد تقراي ما تيّسر من القرآن باش تربحي المزيد من الحسنات وتغتنمي فضل الخيرات.

بعد ما تصلّي صلاة الضحى وتقراي القرآن روحي للكوزينة وقومي بتحضيرات مُسبقة للفطور تاع اليوم

مثلا:
– نقّي السلطة واغسليها وخبّيها في الثلاجة.
– ديري التحلية تاع السهرة تاعك( طيبي قلب اللوز، الفلون، حلويات… الخ).
– غلّي البيطراف والبطاطا والجزر والبيض أو اشوي الفلفل والطماطم والباذنجال … الخ.
– حضرّي حشوة البوراك أو حشوة الخبيزات باش العشية كي تجي تعمرّيهم وتقليهم تلقايهم واجدين.
– قطعي كمية من الزيتون الأخضر دوائر وقطعي الدبشة والمعدنوس وحطيهم في علبة صغيرة في الثلاجة باش تستعمليهم في نفس اليوم.

وفي خضم التحضيرات السابقة رطبّي لسانك بذكر الله ( استغفري، سبحّي، صلي على الرسول، هللّي، كبرّي وأدعي الله….الخ)، كيما تقدري ثاني تستمعي للتسجيلات الخاصة بالدروس الدينية وكاين ثاني إذاعة القرآن وقناة القرآن يعاونوك بشكل ممتاز على تعلّم الدين، أو الاستماع لتلاوة القرآن بصوت أحد المشايخ باش تتعلمّي نطق الكلمات بشكل جيد وما تغلطيش في القراءة، بعد ما تكملّي كل هاذيك التحضيرات المطبخية أو يمكن تزيدي عليها تحضيرات أخرى حسب ظروفك، روحي ارتاحي شوية وإذا عندك أطفال اهتمي بيهم شوية اعطيلهم الأكل تاعهم وتكلمّي معاهم وفهميّهم على رمضان وأنهم كي يكبرو هوما ثاني راح يكونو مطالبين بصيام رمضان، وكوني هادئة قدر الإمكان وتحكمّي في أعصابك.

في هذا الوقت يكون لحق وقت الظهر نوضي توضاي وصلّي الظهر في وقتو وأقراي ما تيّسر من القرآن، وأمبعد روحي نامي شوية ( القيلولة)، وإذا كنتي من النوع إلي ما يرقدش القايلة ديري أي نشاط ترتاحي فيه وما يكونش مجهد بالنسبة ليك وفي نفس الوقت يمنحك السعادة.

كي يلحق وقت العصر راح تنوضي بأريحية لأنك حضرتي 70% من الأعمال في فترة الصباح، وبالتالي صلّي صلاتك بمجرّد ما يأذن أذان العصر وأقراي ما تيّسر من القرآن، وأمبعد ادخلي لكوزينتك دُوزني الشربة تاعك حسب طريقتك المُعتادة وتقاليد المنطقة تاعك، أحشي البوراك ووجديّه باش تقليه، زينّي السلطة تاعك بلا ما تديريلها التتبيل تاعها خليه حتان وقت التقديم، حضرّي الطبق الثاني إلي راح تقدمّيه بعد الشربة وإلي كنتي وجدتيلو من الصباح مكوناته ونقصتّي عليك الخدمة، أو حتى ولو هذاك وين راح تحضريّه راح يكفيك الوقت ان شاء الله، وتعودّي أنك تغسلي الأواني إلي تستعمليهم أثناء الطبخ أول بأول باش ما يتراكموش عليك

وبعد الافطار راح تلقاي غير الصحون والكؤوس إلي فطرتو بيهم

ودائما احتسبي أجر تعبك في التحضيرات أنك راح تؤجرين بأجر افطار الصائمين الشيء إلي راح يعطيك جُرعات من الحماس والتشجيع أكثر للعمل بدون تذمّر، ما تنسايش تذوقّي جارتك من أكلة لذيذة حضرتيها، أو أنك تبعثي فطور كامل لأحد الصائمين بعيد عن أهلو (متغّرب) ويتشهّى أكلة منزلية، وإذا كان في مقدورك قومي بدعوة من تشائين لتناول الإفطار في بيتك ولك أجر افطار الصائم لا ينقص من أجره شيء، عن أنس رضي الله عنه قال: ” كنا مع النبي صلى الله عليه وسلم في السفر فمنا الصائم، ومنا المفطر قال: فنزلنا يَوْمًا مَنْزِلاً حارًّا، وأَكْثَرُنَا ظِلاًّ صَاحِبُ الْكِسَاءِ، ومنا من يَتَّقِى الشمس بيده قال: فَسَقَطَ الصُّوَّامُ وَقَامَ الْمُفْطِرُونَ فَضَرَبُوا الأَبْنِيَةِ وَسَقَوْا الرِّكَابَ، فقال النبي صلى الله عليه وآله وسلم : ((ذَهَبَ الْمُفْطِرُونَ الْيَوْمَ بِالأَجْرِ)). فأثناء تعبك في اعداد الافطار ستكونين قد أخذت أجر صيامك، ناهيك عن أجر القائم على الصائم.

قبل المغرب بدقائق تكون الطابلة تاعك واجدة من التمر والحليب والماء أولا، ومن الأكلات الأخرى إلي حضرتيها لهذاك اليوم، ألبسي لباس جميل وأمشطي شعرك باش يكون هناك تناسق بين جمالك وجمال طاولة افطارك، تتوضاي وأدعي الله بأي دعاء تشائين في انتظار الأذان،

لما يأذن المؤذن عجلّي بالافطار بالتمر والماء أو التمر والحليب حسب عاداتكم، نوضي صلّي المغرب في وقتو وأمبعد اجتمعو أنتي وعائلتك على ما لذّ وطاب على مائدة الإفطار

وحاولي تكوني بشوشة وهادئة ما تتعصبيش على أطفالك باش ما تفسدّيش فرحة زوجك بافطار هذاك النهار، كذلك ما تكونيش منّانة( يعني تشكي من التعب تاعك في النهار) يخي كل شي فات ذرك خلاص واحتسبتي أجرك لله عزّ وجلّ، اضحكي وافرحي مع زوجك وأولادك وعائلتك.

بعد الانتهاء من الفطور قومي مباشرة اجمعي الصحون وخملّي مائدة الإفطار وأغسلي الأواني بسرعة وأمسحي الطبّاخة وسطح العمل تاعك المهم قبل اذان العشاء خلّي كوزينتك تبرق

بمجرد ما يأذن الأذان تاع العشاء روحي توضاي وصلّي التراويح وعودّي اطفالك يكونو هادئين وقت صلاتك وإذا يفهمو وكبار خليهم يصلّو معاك قد ما يقدرو ويحبسو كي يتعبو هاذ الشيء راه ممتع بالنسبة للأطفال تأكدي من ذلك.

بعد ما يرجع الزوج من صلاة التراويح وجدّي السهرة تاعكم حسب عاداتكم ( تاي. قهوة. فواكه. قلب اللوز. زلابّية. حلويات. مكسرات… الخ)

أو يمكن تستقبلي زائرين، أو أنكم تخرجو زيارة للأقارب، أو تخرجو للهواء الطلق المهم أنكم ما تطولوش وتنامو في وقت مبكّر، وماتنسايش صلة أرحامك ولو باتصال هاتفي لتوطيد أواصر الأخوة والمحبة بينكم.

اضبطي المنبّه تاعك على وقت السحور وإلي كنتي حضرتيه سابقا، نوضي غير باش تسخنيه أو تنظمي المائدة وكل واحدة وطريقتها، بعد السحور أجمعي الأواني أغسليهم بسرعة إذا قدرتي وإذا ما قدرتيش خمليهم وخليهم للصباح ان شاء الله.

إذا كنتي من الناس إلي يتسحرّو متأخر نوضي توضاي صلي ركعتين وأحكمي المصحف تاعك وأقراي قدّ ما تقدري قرآن وأدعي الله سبحانه وتعالى بواش تحبّي حتان يأذن أذان الفجر صلي صلاة الفجر والصبح وزيدي أقراي قرآن “ إن قرآن الفجر كان مشهودا “،

كي تكملّي صلاتك وقراءة القرآن روحي ترقدي وترتاحي حتان يطلع النهار باش تقدري تقومي بأشغالك تاع اليوم الجديد.

… شمس راقية 

/بواسطة

الاستعداد لشهر رمضان المبارك

مساء النور و السرور عليكم كامل أخواتي الغاليات ، كيما علابالكم كامل شهر رمضان راهو قريب و الريحة نتاعو بدات تعبق و الاسر بداو التحضيرات لاستقباله، يادرا بديتو توجدو و لا مزال، حنا الجزائريين معروفين نحبو رمضان و نوجدلو من قبل هاذي مشتريات، هاذي ديكورات جديدة، هاذي سبيغة جديدة للدار، و هاذي قدرة جديدة تاع الشربة، اختلفت الطرق بصح الهدف واحد و هو الترحيب و السرور بشهر الرحمة و الغفران، لاننا نحبو هذا الشهر الفضيل و نفرحو بيه بزاف.

لكن كاين لي يركزو غير على التحضير المادي لرمضان و يغفلو يوجدو لرمضان من جانب آخر مهم بزاف و هو التحضير النفسي و الروحي لرمضان، كيفاه نستعدو نفسيا لرمضان؟ كيفاه نحضرو قلوبنا لرمضان هذا هو الشئ لي راح نعرفوه اليوم من خلال موضوعنا.

الاستعداد الداخلي لرمضان مهم كثير يخلينا نعرفو بالضبط واش رانا حابين نحققو و واش هي أهدافنا خلال الشهر الكريم، و كيفاه رانا حابين نستغلوه، و هذا الاستعداد يكون بتخطيط مسبق و دقيق عن طريق:

-وضع خطة لرمضان هاد الخطة نحددو فيها أهدافنا لرمضان و كيفية تحقيقها مثلا الهدف هو ختم القرآن مرة على الأقل و لتحقيق هذا الهدف لازم نقرأ عدد صفحات معينة في وقت محدد ممكن صباح او فالسهرة نتي و ظروفك المهم انك تحددي شحال تقراي و اي وقت تقراي و اين او في اي مكان تقراي ماشي تقولي نقرا القران و خلاص قد ما دققتي و فصلتي قدما كان الانجاز سهلا، اذن تحظري قائمة بالأهداف و طريقة التنفيذ و هاذي مهمة بزاف حبباتي لانو كي نحددو هدف بدون طريقة مفصلة لتحقيقه مراحش تكون عندنا رؤية مفصلة على الهدف و بالتالي مراحش نتشجعو على تحقيقه، حضري قائمة فيها اهدافك و مخططاتك في الشهر الفضيل و كذلك الوسائل المساعدة و لي تعاونك في تحقيق اهدافك مثلا اجندة تستعيني بيها في الكتابة و اذا كنتي ما تحبيش الكتابة استعيني بالتطبيقات المختلفة راهم كاينين بزاف تطبيقات يعاونوك و يسهلولك عملية تنظيم و تخطيط اهدافك باه ما تتلفلكش حبيبتي تروحي مباشرة للاجندة او التطبيق و تعرفي واش هو المطلوب منك اليوم.

-كيما نمدو أهمية كبيرة لتنظيف البيت و وترتيبه و التسياق لازم نهتمو أيضا بتنظيف قلوبنا و مشاعرنا من الداخل و لازملهم تنظيف عميق جدا، ننصحك أختي باه ديري قعدة مع روحك حبيبتي و صارحي نفسك على واش كاين في قلبك واشنو هوما حقيقة مشاعرك إذا عندك غيرة او حقد على أي احد واذا ظلمتي كاش ناس اعتذري منهم و اطلبي السماح و سامحي نتي تاني لي غلط معاك و نقي قلبك من كل شعور او فكرة سلبية ، هكذا تصومي و نتي مرتاحة و قلبك مهني.

-استعدي لرمضان بأنك تبداي تحسني و تطوري من نفسك من الآن بأنك تكتسبي عادات جديدة و تتخلاي عن عادات سيئة، انعم ابداي من درك ماتنسايش حتى يدخل رمضان باه كي يبدأ رمضان تكوني نتي تعودتي على العادة الجديدة و تمارسها بشكل عادي لانو عقلنا لازملو على الأقل مدة ٢١يوم ليتعود على سلوك جديد او يمسح القديم، مثلا حبيتي تعودي روحك انك تصلي فالوقت و تتخلصي من عادة المماطلة في الصلاة، اذن ابداي تدربي من الآن بأنك تنوضي تصلي بمجرد ما يأذن و يوم بيوم راح تتعودي و كي يلحق رمضان تكوني تعودتي و اكتسبتي هاذ العادة الجيدة ، مثلا هدفك انك تنقصي من الغيبة و الكلام في ظهر الناس اذن من الان انتبهي لكلامك و عسي روحك واش تقولي و شغلي لسانك بالكلام الطيب من ذكر و تسبيح او نصح فالاول تجيك صعيبة و بعد مدة من الممارسة تجيك سهلة و تولي تتحكمي في لسانك واش يقول هكذا كي يدخل رمضان يكون كلامك موزون و خالي من الكلام في اعراض الناس، يعني بالمختصر ماشي حتى يلحق رمضان نبداو السلوكات الجيد و انما لازم نلقاو روحنا تدربنا عليها و تجينا ساهلة.

– و من الاستعداد الجيد لرمضان انك تفهمي فقه الصيام من شروط صحة الصيام و شروط القبول و مبطلات الصوم و كيفاه يكون الصوم صحيح و مقبول، باه تكون عندك فكرة مسبقة و تكون عندك دراية في موضوع الصوم و اذا كانت عندك أسئلة و امور غامضة ابحثي عن الإجابة من الان، ماتنسايش حتى يدخل و تولي تجري تحوسي على الأحكام و الفتاوي.طبعا نذكرك اذا كان عندك قضاء ايام لي مزال ماصمتيهمش من العام لي فات تصوميهم الان.

-وكذلك اختي استعدي لرمضان بأنك تقراي عن فضائله و قيمته عند الله و كيفاه كانو السلف الصالح يستعدون لرمضان باه يزيد ايمانك و تتشوقي اكثر لقدومه و تستنايه بفارغ الصبر و تحسي انو مختلف عن باقي الشهور الاخرى، و اكيد راح تلقاي هذه المواضيع بكثرة فالكتب او الحصص التلفزيونية و والإذاعية او تبحثي فالانترنت.

-و من الجيد انك كيما تستعدي لهذا الشهر العظيم تدخلي عائلتك و المحيطين بك في هذا الاستعداد بأنك تذكريهم بفضل شهر رمضان، و تعلميهم يستعدولو افضل الاستعداد من الان، و الاولاد الصغار تاني خاوتك الصغار او أبناءك عرفيهم بشهر رمضان بطرق سهلة و مشوقة باه يستشعرو قيمة هذاالشهر و يستناوه بفارغ الصبر، مثلا تحكيلهم قصص على الصحابة او على السيرةالنبوية او تشريلهم ثوب مخصص للصلاة مع سجادة صغيرة او اي فكرة تحببيهم في هذا الشهر الخاص جدا بالنسبة لنا.

و قبل كل هذا لازم النية انك تنوي الاستعداد لشهر رمضان المبارك باه تصومي كما أمرنا الله عز وجل و انك تتوبي الى الله من كل الذنوب و الخطايا و كل سيئة درتيها، لهذا اختي نقترح عليك انك اديري عملية تقييم لنفسك فالعام لي فات، و اعرفي في واش كنتي مقصرة مع ربي و في واش كنتي مجتهدة، فالامور لي كنتي موفقة فيهم و حققتيهم زيدي طوري منهم اما الامور لي كنتي مقصرة فأعرفي السبب اولا ثم اتخذي الأسباب باه متزيديش تقصري و اطلبي من الله يساعدك و يعاونك و ابداي من جديد ياك يقولك التائب من الذنب كمن لا ذنب له.

والمهم هو انك نتي تكوني حابة تستغلي شهر رمضان احسن استغلال في كل جوانب حياتك و تكون عندك دافعية قوية داخلك و لازم يكون قرار ينبع من داخلك زائد إرادة قوية، كي تكون عندك هذا الامور راح تتحفزي و تتشجعي باه ما تضيعيش هذه الفرصة الثمينة و ديري كامل واش تقدري باش تستغليه و تستفادي منو.

عزيزتي شهر رمضان هو مدرسة تعلمنا الكثير من الامور ولهذا لازم نوجدو روحنا ليه و نديرو تخطيط مسبق و استعداد ليه ،كيما نوجدو بيوتنا و مطابخنا و نبحثو عن الاكلات لي راح نحضروها، لازم نحضرو نفسيتنا و نكتسبو عادات حسنة و نخططو لاهداف نحققوها خلال هذا الشهر الفضيل، ملازمش نخلوه يجوز هكذاك برك لانو شهر رمضان مختلف ماشي كيما بقية الشهور هو هدية لينا من الله عز وجل على هذا لازم نستغله صح و نعيشه بذكاء.

الشمس المشرقة.

/بواسطة