اليوم راح نهدر عليك انتي …..إيه عليك نتي اللِّي راكي دوّشي دوش عادي حلِّي وذنيك مليح نقلّك خطوة بخطوة كيفاش ديري حمَّام العروس تولِّي بيه تسخّفي ؛ داومي عليه أسبوعيًّا من قبل العرس خلِّي النَّاس تلاحظ نضارتك و طراوة بشرتك ؛ جرّبي معايا و ان شاء الله ماتندميش أمَّالا بلا مانطوّل عليكم هذو هوما الخطوات :

• ابداي نحِّي الشّعر بالرّجيلة كي تكمّلي ديري طماطم باش مايزرقش جلدك و زيدي دهني بزيت اللُّوز و زيت الزيتون باش يرتاح جلدك ؛ لبنات المخطوبات ديرو هذي الوصفة يوم قبل الدُّخلة ولا على الأقل 6 ساعات المهم لازم يقعد طازج :

بسم الله نبداو : احكمي وحدة مايونيز تاع “لوسيور” وإلاَّ طلّعي مايونيز منزليّة الصُّنع وحدك : ضرّبي بيضة و معاها صفار بيضة و نتي تضرّبي زيديلهم بالشويَّة مغيرفة كبيرة عصير ليمون و زيدي كذلك نصّ كاس زيت الزِّيتون ابقاي تطلّعي في المكوِّنات حتَّان تحصلي على قوام متماسك تحطِّيها بالكامل لشعرك بعدما تكوني تهلِّيتي فيه مليح قبل و كل وحدة تعرف واش يليقلها أنا نفضّل حمَّام زيوت : نخلّط كامل الزّيوت : (زيت الزّيتون راهو يغذِّي الشّعر و يعطيه اللَّمعان ؛ زيت الخروع يرطّب و يجدّد و يقوّي الشّعر ؛ و زيت اللُّوز منعِّم و يمدّ القوَّة للشّعر) ؛ إذا كنتي ماتحبِّيش ريحة زيت الزّيتون تقدري تحطّي في القرعة ديالو عرف خزامى تأثيرو مش غير في الرِّيحة و لكنُّو فعَّال أيضا على الشّعر ؛

بعدما تديري حمام الزِّيت ديري المايونيز و غطِّيه بصاشي لمدّة ساعتين مَّالا تكونو فهمتو يا جماعة بلِّي المايونيز راهو ديفريساج طبيعي يمدّ النُّعومة و اللَّمعان للشّعر ؛ قوامو الدُّهني يرطّب و ينحِّي العقدات تاع الشّعر بسهولة ؛ ينقّص القشرة و يمدّ التَّرطيب الطَّبيعي للشّعر ؛ يصلّح الأطراف المتقصّفة و يحدّ من تساقط الشعر و يرجّع الحجم لشعرك ؛ صدّقيني يولّي شعرك حرير ؛ ديري واش قتلك و ماكيش راح تندمي .

• في هذاك الوقت احكمي وجهك الباهي اغسليه مليح بالصّابون اللِّي يوالم بشرتك اومبعد حطِّي قدرة تاع ما يغلي ؛ حطي فيه شويَّا ورق نعناع و عرّضي وجهك للبخار و ديري فوطة فوق راسك ؛ كي تخلص راح تلاحظي الفرق تلقاي وجهك احمر و مندِّي و مساماتك يكونو مفتوحين هنا نقدرو نتخلصو من الرُّؤوس السَّوداء اللِّي هي خليط من الدُّهن و الخلايا الميتة ؛ عيّني النِّقاط السَّوداء و اضغطيهم بين 2 مشاور تلفِّيهم بصباعتيك أو 2 أعواد قطنيَّة cotons tiges و إذا حبيتي اشري اللّصاقات الكحلة راهم يتباعو عند الكوسمتيك بعشرين الف حطّي وحدة في انفك و وحدة في خدّك الأيمن و وحدة في الايسر وحدة تحت فمك و انتي تعرفي البلايص اللِّي فيهم النِّقاط السَّودا و كاين في الملصقات الوقت اللِّي يبقاو في وجهك .
• كي تنحِّيهم ديري التَّقشير : ديري القهوة التّلوة و زيت الزِّيتون و شويَّة عسل : حطِّيهم على وجهك و ابداي تحرّكي الخليط بحركات دائريّة خفيفة لمدة 15 دقيقة (باش ماتضرِّيش جلدة وجهك اللِّي هي رقيقة) ؛

       أيَا كي تكمّلي  سخّني 2 مغارف كبار عسل في bain-marie و مبعد خلّطيها مع 2 مغارف فرماج ابيض ولا ياورت طبيعي yaourt nature و حطِّيها بالفرشاة على وجهك ؛ خليها 10 دقايق و شلّليها بالما السخون … هذي الخلطة راهي ترطّب البشرة في العمق و تعطيها النُّعومة و المرونة و النَّتيجة بشرة ناعمة كليًّا مع اللَّون الموحَّد ؛ و الفرق يبان من أوّل استعمال

من بعد نروحو للترطيب : tout d’abord نديرو ماسك القهوة هو الأول هو ماسك هايل روعة سهل و سريع و كل شي متوفر في أي دار : (أحكمي التلاوة و خلِّيها تشيح مليح) ؛ هذا الماسك مفعولو رهيب يقشّر الجلد الميّت و يبيّض البشرة و يشدّها و يزيل الهالات السَّودا و يضيِّق المسامات : ديري 2 مغارف كبار تلاوة و 2 مغارف كبار كاكاو مرحي و 3 مغارف كبار حليب (ولا ياورت) ؛ كي تحصلي على كريمة سايحة ديريها في وجهك ؛ إيه تفكّرت خلِّيها في وجهك 15 دقيقة و اغسليها بالما برك و هزِّي قطنة اغمسيها في ما الورد فوّتيها على وجهك .

• و مبعد تجي دالة الماسك الرَّهيب و مناسب لجميع أنواع البشرات : خلطي مغيرفة فرينة و بَّاطة ياورت طبيعي و ملعقة ما ورد بعدما تخلطيهم تتحصّلي على كريمة تدهني بيها وجهك و رقبتك و تخليها 30 دقيقة و تغسليها .
• 
• في هذاك الوقت نرحيو شريحتي خيار و نخلطوهم مع حبَّة فرماج و نحطُّوها على العينين لمدةَّ عشر دقايق ؛ مَّالا كي تكمّلي اغسلي وجهك و حطّي عليه “قناع الطَّماطم” ؛ مع الحمض القليل اللِّي فيها و الما الكثير و الأملاح المعدنية تمدّ مفعول ترطيب هايل : نخلطو لبّ الطّماطم مع 2 مغارف صغار عسل و نحطُّو هذي العجينة على الوجه 15 دقيقة و نشلّلو بالما الدافي ؛ البشرة تولِّي تبرق بفضل الخصائص التَّرطيبيَّة للطَّماطم ؛

كي تغسلي وجهك وجّدي قطنة مبلولة بما الورد تمسحي بيها وجهك ؛ و تختميها بلاقلاص تفوتِّيه على وجهك كامل باش تغلقي المسامات ؛هنا حبُّوباتي نكونو خلّصنا الماسكات تاع الوجه و الَّنتيجة راح تبان و الكلّ راح يلاحظ الفرق .

• ناخذ شويَّة سكر مشمّخ بزيت زيتون : قشّري بيه شواربك باش تتخلّصي من الجلد الميّت تقدري تبدّلي السُّكر بالبكربونات ولا النّخالة و زيت الزِّيتون تقدري تبدّليه بالعسل و تقدري تستخدمي السُّكر وحدو ..ضورك نروحو للسّنِّين كاينة حاجة ساهلة و نتائجها مضمونة و موجودة في كلّ بيت : معجون أسنان + بكربونات + قطرات عصير ليمون : اقعدي تحكِّي فيهم مليح ؛ الحصّة الأخيرة تاع هذي الخلطة لازم تكوني درتيها أسبوع قبل ؛ اومبعد امضغي النَّعناع و القرنفل : ديريهم في فمّك و ابقاي تمضغي فيهم .
• هنا يكونو فاتو 2 سوايع روحي ضورك لشعرك أغسليه بالشّامبوان لي توالمك ؛ الغسلة الاولى نحِّي بيها المايونيز و الغسلة الثَّانية نحِّي الدُّهنيات الباقية من المايونيز ؛ من بعد فوّتي الخلّ الأبيض على كامل فروة الرَّاس للقضاء على القشرة و شلّلي شعرك ؛ امبعد ديري بلسم و اغسليه مرّة أخيرة و لمِّيه في منشفتو
• نجو ضورك للجسم طبعا تكوني نحِّيتي الشّعر و خصَّصتيلو نهار وحدو : ابداي تكيّسي غير بالما و الكاسة لمدّة 10 دقايق ؛ زيدي كيّسي بالبكربونات 10 دقايق : رايحة تبياضي و مبعد اغسلي بالما و احكمي الطِّين الأخضر يتباع عند العطَّار حطِّيه على وجهك و جسمك كامل و تخلِّيه ينشف و تقشّريه بيدِّيك بحركات دائريَّة و مبعد اغسلي بالما ؛ بعد هذا طرّفي روحك بصابون الطَّرف و الكاسة و ابقاي حكِّي 10 دقايق و مبعد ديري جال دوش ؛ كي تكمّلي شلّلي يالماء و نشّفي روحك ؛ أيا كي تخرجي ادهني كامل جسمك بزيت جونسون و ديري خلطة الشّب و المسك و الطّلك المضادَّة للتَّعرُّق .
• ابداي بشعرك فوّتي عليه سشوار و احكمي بسينة تاع ما شويّةو زيديلها 3 مغارف بكربونات علاجال التاثير المضاد للبكتيريا و قطرات ليمون على جال الرِّيحة و حطِّي رجليك فيها 15 دقيقة و مبعد نشّفيهم مليح و حكِّيهم بالحجرة ؛ أغسليهم و خلّطي بنفس النِّسبة زيت زيتون و ملح و ادهني رجليك و دلّكيهم مليح حتَّان ينشفو : هذي الخلطة تقشّر و ترطّب في نفس الوقت .
• و مبعدا ديري 2 مغارف صغار عسل مع 2 مغارف كبار زيت لوز و زيديلهم 3 مغارف صغار عصير ليمون ودلّكي بهذا الخليط يديِّك لمدّة 10 دقايق و شلّلي بالما الدافي و نشّفيهم و ديري مناكير ؛

أيا ديري عجينة ب2 مغارف صغار بكربونات اعجنيها بما سعيدة و حطِّيها على أماكن النِّقاط السُّوداء اللِّي نحِّيتيهم ؛ خلِّيهم 5 دقايق و شلّلي بالما البارد ؛ مبعدا اغسلي وجهك بصابونة مليحة و نشّفيه و حطِّي طبقة من زيت اللُّوز الحلو و رطّبي شواربك : ذوّبي شويّة شمع النَّحل و زيديلو مغيرفة صغيرة تاع زيت اللُّوز و حطِّيه على شواربك .حطِّي زيت خروع في رموشك ؛ حطِّي استيك و ديودوغو و شوية باغفان و ارقدي بيهم ؛

غدوة ننصحك ديري ماسك هايل يعاونك باش يبان الماكياج تاعك ديري ماسك “القرعة” :  ديري 4 مغارف كبار تاع لبّ القرعة (الكبوية) زيديلو مغرف كبيرة زيت زيتون و مغيرفة كبيرة عسل و مغيرفة حليب و ديريه في وجهك و خلِّيه عشرين دقيقة ؛ امسحيه بمنشفة ورقيَّة و مبعد شلّلي بالما الدافي و نشّفي و اغسلي وجهك بصابونة اللي توالمو و جوّزي على وجهك قطعة (قلاصون) و هكذا تكوني واجدة للماكياج.

• جرّبي و ماراكيش راح تندمي la peau تاعك رح تولِّي كيما تاع البيبي و النَّاس كامل تلاحظ الفرق كي تديري هذا الحمَّام أكيد النتيجة راح تكون مبهرة .

…شمس هنية