ربما راح تنخلعو شوية واش دخلها المرأة في التحراش و البناء ^^ ما تتخلعوش الوقت لي رانا فيه لازم نعرفو نديرو كلش
المهم انا جربت التمليس للحائط بالرمل و الاسمنت يعني التحراش و الحمد لله صدقت معايا الوصفة
و حبيت نفيد بيها الاخوات باش تعرفي انو ماشي لازم تجيبي الماصو باش يخدملك في دارك تقدري ديري وحدك صوالحك
فقط نبهكم في البداية راح تجيك صعيبة
لماذا ؟
خاطش كيما اي مجال لازم التطبيقات الكثيرة باش تتعودي على الامر
لكن انا لقيت حل شباب
لي هو استعمال تجربتي في الطبخ في عملية البناء
^^ غريب الامر صح ؟
المهم الاشياء لي ساعدتني في التمليس لي خذيتها من تجربتي في الطبخ هي :
1- التغربيل : استعملت الغربال في الرمل و الاسمنت و هذا ما ساعدني على تهوية المادتين و جعلهما سهلة الانسجام مع بعضهما
2- خلط المواد الجافة قبل السوائل : خلطي مليح الرمل و الاسمنت و هي ناشفة قبل اضافة الماء
3- اضافة الماء بشوية حتى ولو عندك المقادير مضبوطة : معروف انو كل ماركة تاع اسمنت و كيفاش دايرة لذلك من الاحسن تضيفي الماء بالشوية حتى تتحصلي على العجينة اللازمة يعني البغلي اللازم
الوصفة :
2 كيلات تاع رملة
+
1 كيلة اسمنت
+
الماء حسب النتيجة المرغوب فيها
صيار او غربال باش تتخلصي من الحجر لي في الرملة
مملّسة لي يستعملها البناء باش يحرش
تنبيه : بعد انهاء العملية خلي الحيط ينشف على الاقل 3 ايام قبل فعل اي شيء و كل يوم رشيه بالماء باش ما يتشققش