رواية كتبتها الكاتبة المصرية المنقبة “دعاء عبد الرحمن”
رواية قصيرة… عدد صفحاتها 127 صفحة برك… بصح هايلة بزاف …
الرواية تهدرعلى انحراف بنت عاقلة ومغمضة كي تدخل للجامعة …
يا هل ترى واش هو السبب اللي خلاها تولي كيما هاك ؟
الرواية بينت بللي البنت بطبيعتها تحتاج سند ليها من الرجال… بصح ماشي صنف الأب القاسي ولا الأخ الشكاك اللي يتبع الفتاة على غلطة وكي شغل هي مجرم متحصل على اطلاق سراح مشروط… ولازمو مراقبة دايما…
وبينت الرواية بللي الشباب كامل يحوسوا باش يفسدوا البنت وكي تفسد يملوا منها و يرموها ويبعدوا عليها… ويزيدوا يقولو عليها هاديك بنت ساهلة هي قبلت على روحها….
ومبعد يبداوا يحوسوا على بنت صعبة المنال باش تكون زوجة صالحة وأم لولادهم.
واش صرا لهاديك البنت بعد الانحراف ؟
اكتشفت ألاعيب هداك الشاب وبعدت عليه وتزوجت بشاب متدين …بصح مدة سبع شهر ولا كتر وماحستش بطعم السعادة ولا الحب مع هداك الزوج المتدين…حتى اكتشفت بللي هداك بسبب عدم توبتها وتعلقها بالشاب اللي عرفاتو قبل وخدعها …
زوجها المتدين شرى بيت بالمنطقة السكنية نفسها اللي كان يسكن فيها هداك الشاب اللي خدعها و غدر بيها ..ياهل ترى واش هي الحكمة الالهية من ورا هاد الأمر؟
وهل ربي حاب يكشفها ولا كاين أمر وحدوخر مانعرفوهش؟
للأسف ماغاديش نخبركم نخليكم أنتوما تكتشفوه بأنفسكم ….
الرواية حازت عدد اعجابات كبير وعدد قراء من كل الدول العربية ومن بينها الجزائر.
قصة هاد الرواية تصرا في أغلب البيوت العربية وحتى الجزائرية وعلا هداك ننصحكم باش تقراوها وتمدوها قاع للناس اللي تعرفوهم…
… شمس الهمة
