السلام خواتاتي
اليوم حبيت نحكو و نتناقشو على ظاهرة جد خطيرة في عصرنا هذا و لي هي
الشاشات التفاعلية و السلبية للأطفال الأقل من 3 سنوات
التلفاز، الديفيدي، الطابلات، الهاتف السمارت فون، الكمبيوتر
la télévision, la tablette, et d’autres écrans
حسب الاحصائيات كاين 47% تاع أطفال أقل من 3 سنوات يستعملوا هذه الأنواع من الشاشات بصفة زائدة عن الحد تصل الى أكثر من 5 ساعات في اليوم
نهدرو على كيفاش ولاو هاذ الأنواع من الشاشات وسيلة نهضة و تشارك و تبادل
راح نهدرو أيضا على أضرارها في حالة ما كان استعمالها يفوق الطبيعي و العادي عند الأطفال أقل من سن 3 سنوات
الفكرة الأولى
التلفاز أم الجميع هههههه يعني كلّنا نتفق على أنو كانو يحطونا قدّامها بزاف باش نبقاو ساكتين و ما نقباحوش صح ؟
لكن في الحقيقة الأطفال لازم يكون تفاعل معاهم
يعني انّك تحطيه أمام تلفاز فيه أشخاص ما يتفاعلوش معاه فهذا خطأ
الطفل يحتاج من يضحك معه من يعانقه من يقولو راك غالط أو برافو راك صح
يشجعو أو يطلب منو التوقف عن فعل أمر ما
الفكرة الثانية
الطابلات، كاين بزاف أمهات تقولك أنا وليدي باش يتعلم نشريلو طابلات
هكذا يتعلم الخضر و الفواكه و الأشكال و الفصول الأربعة و الشتاء و الصيف و الشمس وووووو
عفوا لكن الطفل اذا لم يمسك في يده شكل مربع و ان لم يحّس بالبرد و تلمس الأشعة الشمس بشرته
فهذا يعني أنه لن يتعلّم ذلك بالضغط على الزر مرّتين
الفكرة الثالثة
التلفاز، هو وسيلة نوعا ما مراقبة من طرف الأولياء، يعني الطفل يتفرج على حاجة أنتي راكي تشوفي فيها و في أي لحظة تقدري تتحكمي في زمام الأمور
عكس استعمال الشاشات الأخرى كالهاتف أو الطابلات او الكمبيوتر هنا الطفل وحده و لن تستطيعي كل مرة تقوليلو هات نشوف واش راك تشوف راح يكره منّك
خلينا نكونو على اتّفاق انو نقولو دون السن 3 سنوات او التحدث في هذا الموضوع
هذا لا يعني بلي رانا نقولو 0% تلفاز او شاشات
نحن نتحدث على وقتاش يكون مليح استعمال هذه الشاشات و وقتاش يكون ماشي مليح استعمالها فقط
الكثير من الأولياء يمنعون كليّا التلفاز أو الشاشات على أطفالهم هذه حرّيتهم الشخصية
لكن انك تخلي وليدها طول اليوم أمام التلفاز فهذا ماشي حريّتها هذه جريمة
يعني أنك تكوني مشغولة على وليدك لمدة 15د أو 30د هذا لا يعني أنو ممنوع تحطيه أمام برنامج تثقيفي تكوني واثقة من المعلومات لي يحطها و طبعا الطفل يكون أكبر من 3 سنوات
بالعكس يقدر التلفاز يكون وسيلة تثقيفية في نفس الوقت وسيلة تلهّي بيها وليدك مابيد ما تكمّلي شغالك
فقط انتبهي للوقت و خاصة انتبهي أن لا يكون الطفل يطلب التلفاز لأكثر من الوقت المسموح له
وإلاّ راح يولي ادمان
الفكرة الرابعة
الطابلات، بعد 3 سنوات اذا كان ولا بد عليك يستعمل وليدك الطابلات
على الأقل رافقيه ما تعطيهالوش و تروحي
تيليشارجيلو ألعاب و علميه كيفاش يلعبهم و طول الوقت أهدري معاه و تقعديش ساكتة و تتفرجي فيه
قوليلو مثلا واش هذا
يقولك أرنب
قوليلو واش يكون ارنب
لازم يكون يعرف بلي الارنب حيوان و يحب ياكل الجزر
و يكون يعرف الجزر كيفاش داير
يعني في سن 3 الطفل تكون عندو ثقافة كافية باش تروحي تعطيلو الطابلات
ماشي تعلميه الجزر كيفاش داير في الطابلات
ممممم حا تقوليلي الأرنب نجيبهولو هههههه
اوكي معليش الارنب على الأقل تكوني وريتيهولو في كتاب او في صورة بشكله الحقيقي
خاطرش في الألعاب راح يستعملو ارنب مرسوم و يقدر يكون شكل ديالو ماشي قريب بزاف للحقيقي و بهذا راح ياخذ فكرة خاطئة على شكل الأرنب
الفكرة الخامسة
الموجات، ربما بزاف الأولياء ما ينتبهوش لموضوع الموجات les Ondes تاع الهاتف أو تاع الويفي WiFi
طبعا بما أنو الطفل قبل نمو دماغه بشكل صحيح
على الأقل تجنبي تعريضه لهذه الموجات
مثلا اذا حابة وليدك يهدر مع باباه في الهاتف ديريلو مكبّر الصوت في عوض تحطيلو الهاتف في وذنو و تعرضي دماغه الى الموجات مباشرة
بالنسبة للويفي في الطابلات اذا كان راح يستعملها حطي مخدة فوق رجليه و حطي الطابلات فوقها هكذا رجليه مراحش يتعرضو للموجات مباشرة
الفكرة السادسة
العينين، بالنسبة لهذا الجزء من الجزء الجد مهم كغيره من أعضاء الجسم راح يكونو هوماوسيلة ربط دائمة بين التلفاز و الطابلات و الدماغ
لذلك لازم نهدرو عليهم
طبعا كي وليدك يستعمل الطابلات او يتفرج التلفاز راح يرمّش بزاف و هذا راح يخلي العين تستعمل بزاف الدموع و هذا قد يسبب في كبره مشكل جفاف العين
و المخاذا تلقى بزاف الضوء راح يكون مشكل في النوم، خاطش الساعة البيولوجية للجسم راح تتخرب اذا مديتيلها معلومة خطأ
يعني اذا تلقى المخ ضوء بزاف يحساب بلي رانا في الصباح حتى و لو تطفي الضوء في غرفة وليدك راح يستغرق وقت حتى المخ تلحقو معلومة انو خلاص النهار و جا الليل
يعني على الأقل وليدك مالازمش يتلقى ضوء كثير 2 ساعة قبل موعد النوم باش توجدي المخ تاعو أنو راه الليل
الفكرة السابعة
الطفل يعشق نظرة أمه، ههههه نعم
وليدك يحب بزاف النظرة ديالك
و يظل يتبع فيها و يشوف عن طريقها واش هي اهتماماتك، واش تحبي و واش تكرهي
يعني اذا شاف بلي أنتي تحبي بزاف التلفاز او الهاتف تاعك راح يتبعك و يدير كيما أنتي
لذلك حاولي تعطيه ثقافة استعمال الأشياء
أنو صح نقدرو نحب نستعملو حاجة
لكن ماش طول اليوم و طول الوقت
الفكرة الثامنة
من البطل ؟ الطفل دايما يحب يكون هو بطل والديه
على كثرة ما يسمع والديه يهدرو و يحبوه يكون طفل مثالي
لذلك بعض الأطفال يتوجهو لألعاب الفيديو باش و يخيرو ألعاب تاع بطولة
باش يشبّعو عندهم هذاك الجانب تاع “أنا بطل”
لذلك من الأحسن تورولهم طريقة أخرى يقدر يشبّع بطولته
مثلا سجليه في رياضة ما كالكاراتيه أو الجيدو
ههههه ما نقولكش كرة القدم خاطش أنا نكره نشوف انسان يظل يجري مور شيء اسمه كرة ههههه
يعني ملخص هذه الفكرة أنو مرّات ماشي الشاشة هي أصل المشكلة ربما المشكل هو أنو الوالدين ماراهمش يشجعو وليدهم بزاف يعني ما يورولوش قيمتو الحقيقية
لذلك يروح للألعاب لي يقولولو “برافو أنت البطل “
الفكرة التاسعة
ماذا لو الطفل أبدا لا يستعمل الشاشات ؟
ديري في بالك بلي اذا وليدك ما يشوفش التلفاز أو ما يستعملش الطابلات ماراكي حارماتو من والو
نمو الدماغ تاعو بالشاشات أو بغيرها راح يتطوّر و ماراح يعيقه ذلك في حتى حاجة
الفكرة العاشرة
كيف و متى تكون الشاشات مسموحة ؟
تقدري تفهمي وليدك أنو هذه الطابلات مثلا هي وسيلة ترفيه مثلها مثل عدّة وسائل مسموحة له
في وقت معيّن من اليوم و بطريقة معيّنة
يعني لازم تفهميه أنو ماشي وقت ما حب هو و كل ما حب
يقدر يطلب منّك لكن تفهميه أنو انتي لي تقرّري اذا كان وقت مناسب لذلك أم ليس كذلك
و طبعا ما ننساوش اختيار الألعاب بطلبه لكن بموافقتك
يعني يقدر يوريلك لعبة اذا انتي شفتيها غير مناسبة لسنّه قوليلو مزال باش تلحق للسن المسموح للعب هذه اللعبة
دايما اقراي على اللعبة تعرفي لواش من شريحة مديورة و واش من سن
في الأخير
ماراناش حالين الموضوع باش نقولو أرمو الطابلات ههههههههههههه
رانا هنا باش نتناقشو على طريقة الاستعمال الصحيحة للطابلات و كل الشاشات الأخرى
صح ؟
