الاهتمام بالشعر هو نسبيا عملية سهلة اذا تبعتي التقنيات المناسبة ..

الشعر يتكون اساسا من البروتينات …لذلك الحصول على نظام غذائي و اسلوب
حياة صحي ضروري للعناية بشعرك الجميل ..كاينة كذلك بعض النصائح الاضافية
للاهتمام بالشعر اللي تقدري تطبقيهم في المنزل باش تحافظي على روعة شعرك
..

واش ديري ؟!

اولا اغسلي شعرك بعناية باستعمال شامبوان ذو نوعية جيدة ..لكن الغسيل
المتكرر للشعر يعرضو للجفاف و يحرمو من زيوتو الطبيعية و بالتالي يتحول
الى التلف …اذن اغسلي شعرك على الاكثر كل يومين …بعض الاشخاص مالازمش
يغسلو شعرهم اكثر من مرتين في الاسبوع ..

_ جربي انواع شامبوان اللي مافيهاش الكبريتات …او البارابان
…السولفات هي مكون اللي يدير الرغوة ..و البرابان هو من المواد الحافظة
اللي تسبب التهابات ومشاكل في العينين مع الاستعمال المطول …هذي
المكونات الكيميائية مش مليحة للاستعمال الشخصي و لا للبيئة …استعملي
من الافضل مكونات بعناصر منظفة طبيعية ..

_ خيري شامبوان اللي يتوافق مع نوعية شعرك …ماتعتمديش على الحظ …شوفي
اللي يوالمك خير ..

*الشعر المجعد يحتاج بدون شك لشامبوان مملس او مضاد للتجعد
*الشعر الناعم او الزيتي يحتاج لشامبوان خفيف مخصص للاستعمال شبه اليومي .
*الشعر الملون يحتاج لشامبوان غني بالاحماض الامينية و المعادن لاصلاحو ..
*الشعر الجاف يحتاج لشامبوان فيه الغليسيرين و الكولاجين باش يساعدو على الترطيب .

ثانيا ..استعملي البلسم حسب نوعية شعرك و طولو و حالتو ..القاعدة العامة
استعملي البلسم بعد كل شامبوان …لكن الشعر التالف او الملون ممكن يحتاج
عناية و اهتمام اكبر ..

#ديري علاجات soins مرة في الاسبوع ..استعملي منتوج تجاري او اختاري وصفات
منزلية الصنع ..

تبعي نصائح العناية بالشعر حسب نوعو

*بالنسبة للشعر الرقيق و الرقيق جدا ..جربي علاجات بزيت نباتي قبل ما
تستعملي الشامبوان …ديري زيت الخزامى او زيت شجرة الشاي مثلا …حطي
الزيت بصباعتيك على شعرك قبل ماديري الشامبوان ….اغسلي بالشامبوان شللي
وديري البلسم ..خليه يتفاعل دقيقة وحدة و شللي ..

*الشعر المتوسط الى السميك ..استعملي مرطب بعناصر ترطيب طبيعية
…ماتحطيش بزاف البلسم ؛ديريه على كل الشعر خليه يتفاعل من 2 الى 3 دقائق

_ كوني حذرة كي تستعملي منتجات اللي فيها بزاف البروتينات …ممكن يتلفو
شعرك و يضروه و يرجعوه ضعيف …صحيح انو البروتينات ضمانة للشعر الجميل و
لكن ما تسيئيش استخدامها ..

_ الامصال les serums المضادة للتجاعيد تقدري تستخدميهم لتخفيف التجعدات غير
المرغوبة او لتلطيف الشعر المتمرد …ما تكثريش من استعمالهم يكفيك مرة
وحدة في الاسبوع بعد الشامبوان باش مايوليش شعرك باهت و مسطح ..

_ امشطي شعرك بالمعقول ماشي 100مرة في اليوم ماتنفعكش ديرلك برك القشرة
و التقصف و الالتهابات …4 مرات في اليوم يكفيو ..

_ خلي شعرك ينشف طبيعيا …بعدما تخرجي من الدوش اعصريه بسرعة بالسربيتة
…اضغطي عليه بالشوية باستعمال المنشفة …ماتحكيش باش ما تضعفش بصيلات
الشعر و يولي باهت …ثم امشطي شعرك غير بالعقل مدة قليلة باش تتخلصي من
العقد و خليه ينشف في الهواء ..

_ حاولي ما تستعمليش مجفف الشعر …الشعر الصحي مايحبش الحرارة تتسببلو
بالضرر …اذا لزم الامر استعملي السشوار مرة وحدة في الاسبوع و نقصي
سرعة الهواء ..

_ قصي بانتظام اطراف الشعر …هذي احسن طريقة باش تتخلصي من الشعر
المتقصف ..باستعمال مقص الشعر قصي شعرك حوالي نصف سنتيمتر من فوق التقصف
مرة كل 6 الى 8 اسابيع …هكذا عمرك مايكون عندك تقصفات و يكون شعرك في
اجمل حالاتو اذا خليتي قص الاطراف اولوية بالنسبة ليك …

_لوني شعرك بعناية ..ماتكثريش …و اذا قدرتي تجنبي الصبغة تماما ..باش
مايعانيش شعرك من الجفاف او التكسر او التلف….أما إذا كان لازم تلوني شعرك خلي استراحات بين الصبغات باش تعطيه فرصة يتنفس و يرتاح..

_ سرحي شعرك بشكل طبيعي …باش تخففي الضرر تجنبي التسريحات الدائمة
..الكريباج …التمليس… التجعيد …سحب اللون …او الصبغ المتكرر قد
ماتقدري ..
اذا كان عندك عرس نهار الخميس و لازم تديري تمليس ماعليهش و لكن مش كل
يوم ….باش ماتعرضيش شعرك للتلف ..

_ ما تستعمليش اربطة مطاطية باش تحكمي شعرك قادرة تسببلك تساقط او يصيرلك
التهابات في الفروة …ماديريش التسريحات اللي تجبد الشعر بزاف …ذيل
الحصان او الشينيون المشدودين يضرو البصيلات و الجذور تاع الشعر ..

… شمس هنية

المبيض هو جزء من الجهاز التناسلي عند المراة …عددو 2 مبايض موجودين
على جانبي الرحم …

    شكلو بيضوي و حجمو يتغير حسب السن لكن اجمالا حجمو
حوالي 5*2*1 سم …قد حبة زيتون كبيرة …و بعد انقطاع الدورة الشهرية
يحصل لو ضمور و يصغر شوية …

    الطفلة المولودة حديثا يكون عندها من 1 الى 2 مليون بويضة و لكن هذا
الرقم ينقص تماما عند البلوغ حتى يوصل لحوالي 300 بويضة …

   كل شهر تخرج بويضة وحدة بالتناوب بين المبيضين …يعني هذا الشهر المبيض
اليمين هو اللي دورو ينتج بويضة و الشهر اللي بعدو للمبيض اليسار …

   كي تخرج البويضة من المبيض تلتقطها قناة فالوب و توصلها للرحم …اذا حصل
تخصيب يتكون جنين و يحدث الحمل …لو ما حدثش تخصيب نفقد البويضة و تخرج
مع الدورة الشهرية …

   و لكن للأسف المبيض كيما اي عضو اخر من الجسم معرض انو خلاياه تصاب
بالجنون و تبدا تنقسم و تتكاثر بشكل خارج عن السيطرة و تتحول لخلايا
سرطانية قادرة تشكل اورام و تنتشر من المبيض الى باقي اجزاء الجسم مثل
الامعاء …المثانة …الغدد اللمفاوية …الرشة …الكبد …

   و  ما يصاحبش ظهور سرطان المبيض اعراض مميزة او واضحة …اعراضو
كلها غامضة وغير محددة تشبه لاعراض اي مشاكل في الجهاز الهضمي مثلا
…مثل:

*ألم في البطن او الحوض ..

*انتفاخات او غازات .

*الاحساس بالامتلاء و الشبع بسرعة رغم تناول كميات قليلة من الاكل .

*عسر هضم و ميل للقيء .

*امساك او اسهال .

*زيادة عدد مرات التبول او الاحساس المستمر بالرغبة في التبول .

*تعب و ارهاق و فقدان للوزن .

*في المراحل المتقدمة من المرض ممكن تحس المريضة بكتلة في الحوض او البطن

   الاعراض هذه مش معناتها الاصابة بسرطان المبيض..لكن ضروري دائما تسمعي
لجسمك و ماتتجاهليش ابدا وجود حاجة غير طبيعية او غير مستجيبة للعلاج
الطبيعي و انك محتاجة تروحي لطبيب متخصص ..

   السبب المباشر لسرطان المبيض غير معروف مثل معظم انواع السرطان ..لكن
كاينة بعض العوامل اللي ممكن تزيد او تنقص احتمالات الاصابة …و حتى هذي
العوامل مش معروف علاش تزيد او تنقص فرص المرض …..

    خطر الاصابة بسرطان المبيض يزيد مع التقدم في السن ..كما انو اكثر
الحالات اللي يتم تشخيصها تكون تجاوزت  65 سنة من العمر و نادرا ما تظهر
حالات عند الاقل من 40 عاما
خطر الاصابة يزيد في حالات السمنة و يقل:

*عند تعاطي حبوب منع الحمل
او
*عمليات استئصال الرحم
او
*ربط قنوات فالوب كوسيلة لمنع الحمل

   واثبتت دراسات وجود علاقة بين سرطان المبيض و عدد مرات التبويض يعني عدد
المرات اللي خرجت فيها البويضة من المبيض على مدار حياة الانثى… كلما
تزيد عدد مرات التبويض كلما يزيد احتمال الاصابة بسرطان المبيض يعني انو
احتمالية الاصابة تزيد عند الاناث اللي بدا عندهم التبويض مبكرا اي بلغوا
بكري …و عند اللي تاخر عليهم انقطاع الطمث… او اي سيدة ما تعرضتش
للحمل و الارضاع الطبيعي اللي اثناءهم تتوقف عملية التبويض

    كما انو بين  15 و 20 % من الحالات المصابة تظهر عندهم عوامل وراثية يعني
تاريخ عائلي للاصابة بسرطان المبيض او اي سرطانات اخرى مثل سرطان الثدي و
الرحم و القولون او طفرات في بعض الجينات …يعني لو في عايلتك من ناحية
الاب او الام حالات اصابة بسرطان الثدي او المبض حاولي تتوجهي للطبيب
المتخصص باش يعرف عن نسب تعرضك للاصابة و تقدري تاخذي قرارات في مصلحة
صحتك و حياتك …

وحدة من اشهر التجارب كانت تجربة انجلينا جولي اللي فقدت والدتها و جدتها
و خالتها بسبب السرطان و اثبت فحص بسيط ليها انو احتمالية اصابتها بسرطان
الثدي اكثر من 80% ..و بسرطان المبيض اكثر من 50% فخضعت لعمليات جراحية
وقائية لاستئصال الثدي و المبيضين و قناة فالوب قبل ظهور اي اعراض لاي
سرطان …

للوصول للتشخيص الصحيح يتم اجراء بعض الفحوصات مثل:

*الاشعة المقطعية للتاكد من وجود كتلة في المبيض و تحديد مكانها …لكن
مانقدروش نعرفو من خلالها نوعها او التاكد من كونها سرطانية او لا
 
*تحاليل عينات من الدم لفحص مستوى مواد اسمها دلالات الاورام و اللي ممكن
تثبت تاكيد او نفي التشخيص
 
*منظار البطن و منظار القولون اللي ممكن يحددو اماكن انتشار الخلايا
السرطانية خارج المبيض ..

    لكن الحاجة الوحيدة اللي تاكد الاصابة و وجود الخلايا السرطانية و تحدد
نوعها هو استئصال الورم عن طريق الجراحة و اخذ عينة منو لفحصها …

   نوع العلاج يحدده الطبيب المتخصص حسب بعض العوامل مثل نوع السرطان و مدى
انتشارو و الحالة الصحية العامة للمريضة …

   و تشمل خيارات العلاج الجراحة …حيث يمكن يتم استئصال مبيض واحد او
الاثنين او قنوات فالوب او الرحم او اجزاء من الجهاز الهضمي او الجهاز
البولي …و كل هذا يحددو الجراح المتخصص ..

   ممكن يضاف العلاج الكيمياوي و هو عبارة عن مجموعة من العقاقير هدفها قتل
الخلايا اللي تنقسم بسرعة كبيرة و اللي منها الخلايا السرطانية لكن منها
ايضا خلايا الشعر و الخلايا المبطنة للجهاز الهضمي و للاسف العلاج
الكيمياوي ما يعرفش يقرق بيناتهم و بين الخلايا السرطانية فيقتلهم كلهم و
هذا هو سبب تساقط الشعر و القيء اللي يصيب المرضى اللي يتعالجو باستخدام
العلاج الكيمياوي ..

   كاينة 1 من كل 75 انثى راح تصاب بسرطان المبيض في مرحلة من حياتها…

  الوعي و الثقافة الصحية يقدرو يقلصو حجم الضرر و يحافظو على نمط حياة
سليم و وقاية استباقية في حالة الشك او وجود الاعراض او الطفرات الوراثية

… بائعة أزهار

   في بالك شحال من  قرار تاخذيه يوميا بخصوص ماكلتك؟

ارواحي نحسبوها …

واش تاكلي …  و وقتاش …. و وين …
تاكلي بزاف ولا باش تسكتي برك الجوع …
تسخني الماكلة ولا مايهمش …
شوية تكفيك …  تزيدي شوية …  ولا شبعتي …
تزيدي مغيرفة ولا يفسد الريجيم …

ممكن تكوني من الناس اللي يجاوبو على هذي الاسئلة و ياخذو القرارات بكامل
ارادتهم و تعتبري نفسك متحكمة مليح و تبني قراراتك بالاستناد لرغباتك و
شهيتك و حالتك المزاجية ..او وفقا لمعلوماتك و مبادئك في الحياة على
الصحة و التغذية … و الا بالنظر لظروفك الاقتصادية و الموجود في الثلاجة
و الباقي من الشهرية ….و ربما تعتمدي على ساعات اليوم و مواعيد النوم
…..

     لكن ماهي العوامل الخارجية اللي تقدر تخليك تاخذي قرارات و ترجعي فيها و
تفكري مرة اخرى و تاخذي قرارات اخرى بلا ما تحسي بلي راهي تتحكم فيك و في
ماكلتك ….كيما الثقافة و السلوك السائد في بيئتك مثلا ..

   في الاستطلاعات كي يسقسيو الناس في فرنسا ….وقتاش تتوقف على الاكل ؟
كانت الاجابات كالتالي…
_ كي نشبع ..
_ كي الماكلة طعمها ما يعودش عاجبني ..
بينما اجابات الناس في الماريكان على نفس السؤال كانت …
_كي نخلص الصحن ..
_ كي يكمل برنامج التلفزيون اللي نتفرج عليه و انا نتعشى ..

كيما راهم غيرك مسيطرين على واش راهم عينيك يشوفو نفس الشي بالنسبة لشهيتك ..

   في دراسة اصدرتها شركة غوغل اللي كانت توفر ماء و مشروبات غازية فيها
سعرات حرارية عالية لموظفيها طول وقت العمل …ظهر انو لما بعدو هذي
المشروبات من على الرفوف القريبة من ايادي الموظفين و عينيهم و تحطت على
رفوف بعيدة …و حطو في الرفوف القريبة زجاجات ماء فقط ….

  زاد شرب الموظفين للماء بنسبة 47% و قل استهلاكهم للمشروبات الغازية بنسبة 7% في
اسابيع قليلة ..

     وحسب بعض الدراسات الناس يطلبو طبق تحلية اضافي بعد الاكل بفرصة اكبر
باربع اضعاف اذا كان الموظف اللي يقدملهم الماكلة يعاني من زيادة الوزن
…

    وفي دراسة تعملت على 40 طفل ظهر بلي يحسو بطعم الاكل الذ بكثير كي
يتقدملهم مع الوجبات العاب بشخصيات الرسوم المتحركة اللي يحبوها ..

   في المتوسط كل شخص ياخذ 20 قرار يوميا بخصوص ماكلتو …بزاف من هذي
القرارات خارج على سيطرتو و ارادتو …

لكن نصيحة حاولي تخلي شوية من هذيالقرارات اللي تحت سيطرتك

على الاقل لمصلحة صحتك….

…شمس هنية