كاين مقشرات النّاس كامل تعرفها و معروفة بالفوائد تاعها
لذلك خليك من لي تتباع و معمرة بالمواد الكيميائية و الكحول

يعني من الاحسن تبعي الطبيعي

في بعض المرات نحبو نديرو شوية تغيير هكا البشرة تاعنا متوالفش على نفس الحاجة ،
أو انّ المقشر لي تستعملي فيه ماشي موجه لهاديك المشكلة لي عندك
لأنو وحدة عندها بشرة دهنية ، الأخرى بشرتها حساسة ، ثالثة عندها بثور حابة تنقص من آثارها

انا هنا رح نلملك مجموعة طويلة عريضة من المقشرات و نقولك كل وحدة وش تستعمل
خلينا نمشوا بقاعدة

كاين التقشير بالحبيبات و لا بالحك ، يعني لازم يا يكون فيه حبيبات و لا فيه حاجة تخليه ينشف هكذا تقدري تحكيه
النقطة الثانية ، عملية الحك قادرة ضر بالبشرة تاعك ، اذن لازملنا مادة دهنية نضيفوها للمقشر تاعنا
يعني اي زيت

ملاحظة : استعمال جميع المقشرات .. أي مقشر مهما كان … مرة في الأسبوع
المقشر الأول : رح نقولو عليه أبسط و أنفع المقشرات

ملعقتين من زيت الزيتون مع ملعقة سكر
نخلطوهم
طبعا السكر مش رح يذوب

أفضل استعمال لهذا المقشر رح يكون على الشفاه ، انا منحبش نستعملو على الوجه حيث زيت الزيتون ثقيل شوي على البشرة و يصعب ازلتو من بعد ، و رح يتسبب في اسمرار من بعد
انا هاذي ملاحظاتي بالنسبة لبشرة الموجه

المقشر الثاني و لي رح يكون مقشر للجسم ، مش للوجه
ملعقة قهوة مع 2 ملعقة من زيت الزيتون

الحبيبات للي رح نستعملها ، حبيبات القهوة بعد استعمالها ، البعض يسموها التلوة
لماذا القهوة ، لأنها تحتوي على الكافيين و الكافيين رح ينشط الخلايا و يخليها تتجدد
هذا المقشر يستعمل للسيلوليت و الناس لي عندهم الخطوط البيضاء تع السمنة

ملاحظة : الا كانت الخطوط بنفسجية عليك بمراجعة طبيب
شخصيا نحب هذا المقشر بزاف لللجسم تاعي لأنو نحسو ينحي كل الشوائب
و حتى من الشعر لي تحت الجلد يخرجو

المقشر الثالث
هذا المقشر قنبلة نووية من بين المقشرات هههه ، يرجع لبشرة 10 سنين للوراء ، رح تشوفو كيفاش البشرة تاعكم ولات نقية و نظيفة و زيد مغذية مليح مليح
كي تشوفو المكونات تفهمو
ربع حبة خيار
ثلاث أرباع كأس من السكر
2 ملعقة كبيرة من زيت جوز الهند
قطرات من زيت النعناع ( اختياري )
الكيفية : حبة الخيار خليها بالقشر تاعها لأن القشرة فيها فائذة
تغسل جيييدا ، و نرحيها في الخلاط ، نزيد عليها زيت جوز الهند و زيت النعناع
نخلط مليح ، ممبعد نزيد السكر
تبانلكم الكمية كبيرة
طبعا ، لأنكم تقدرو تخدموه و تخبيوه في الثلاجة

… تسنيم

 جبت نحكيلكم على وحد الموقف لي اكيد الكل مرو بيه في مرحلة عمرية ما
نرقد ببشرة كيما تع البيبي ، نوض صباح نلقى روحي منقطة كي الخنفساء… .

نعم نعم … نهدر على الحبوب  

سواء كان المزمن و لا يخرج بشكل مفاجئ في أهم أيام حياتنا … و كأنو هاذيك الحبة تحب تشاركنا هاديك اللحظات

و المشكلة تعرف و ين تخرج … فوق الأنف كي المهرج .. بين الحاجبين آآآآه يا جانيتو …… و في الذقن تخرجك كيما العجوز الشريرة … ولا تختار موقع استراتيجي في الخد … تتفرج على كلش
لا و تزيد تلعب فيها من متابعين العريفي … تطبق في “ضع بصمتك ” عااامم كامل و لا البقعة متحبش تروح
زينوناتي نحبكم تعرفوا بلي كاين ناس تشكيلة البشرة تاعهم خاصة الدهنية و لا عندهم شوية هرمونات زايدة … هاديك حاجة عادية سايسي بشوية برك
بصح انا في هاد الموضوع رح نهدر على الأخطاء تقدر تكون بريئة … نديروها كلنا … و حنا ماعلابالناش بلي رح تتسبب لنا في حبوب.

المشكلة الأولى :
التغذية: خاصة الحلويات و السكريا
اصبري نكون معاك صريحة أكثر
خايفتني نقولها … ايه الشيكولا .. شوكولا ..تشوكلات …. هي المسبب الأول … تطيحي عليها هادي ميلكا هادي شوكولا نوار هادي شوكولا غوز مبعد تقولي هادا منين جاني
خليني نعمم شوية .. كاينة قاعدة تقولك .. صحة البشرة من صحة الأمعاء .. حطي هاد الحاجة في راسك
يعني كثريلي شوية من الماكلة الصحية و نقصي من المعلبات و المواد الحافظة لي كاينة في الماكلة شوية فاكهة على شوية خضر و تشوفي البشرة تاعك كيفاه تولي

المشكلة الثانية: تخلي الحبوب تطلعلك … هوما حوايج بزاف بصح انا رح نلخصها في حاجة وحدة
هي البكتيريا … كل وحدة منا البشرة تاعها عندها تركيب و عدد معين من البكتيريا .. تحميها من استوطان بكتيريا اخرى
و هادا الشي رح يخلينا نستنتجو زوج نقاط
النقطة الأولي : التنظيف الزايد و المعمق و المفرط رح يخلي البشرة تاعك من جهة تحس بالجفاف ، تفرز دهون أكثر و بالتالي يظهرو حبوب … و الحاجة الثانية رح تتعرى ، يعني ماكانش البكتيريا لي رح تحميها … اذن رح تخلي بكتيريا أخرى تستوطن عليها و رح تخرجلك حبوب
النقطة الثانية اي حاجة تلامس الوجه تاعك ، فيها نوع من البكتيريا رح تسببلك بحبوب
أبسط مثال : أنتي في الحارج ، طلعتي للحافلة .. حكمتي في هادوك لي يحكمو فيهم . حكك شوية وجهك . هااااااه ارواح نمسحك كامل …..يخرجو حبوب … اصبري حكتني عيني … روحتي بيها حمرا

أمثلة أخرى:
المخدة
الخيمار
اصبري نقولك حاجة .. التيليفون .. انعم ايه …. أكثر شي يقيس الخد تاعك … و نهار كامل و نتي تمسيه بيديك …. فكرتي نهار تعقميه ؟
ادوات المكياح
المكياج .. على قد ما يكون ثقيل .. على قد ما يغلق على المسام … ميخليش البشرة تاعك تتنفس … يخرجوا حبوب …

المشكلة الثالثة :
كاين حاجة مهمة أغلبية البنات ميعرفوهاش … هي الفيتامين B12
الحبوب تعشق و تموت في هاد الفيتامين
يعني الا كنتي تشربي فيه دواء و خرجولك حبوب .. عادي
لكن مش مريضة ، كيفاش يؤثر عليا هاد الفيتامين
الشامبوان : انعم ايه.. كاين لي في المركبات تاعهم تلقايهم يقولك او لالا شوامبو ا لا فيتامين بي دوز بوغ لا صونتي دي شوفو …. لا لا لا بلاكي يكلخولك
لا شعرك يتعدل و زيد وجهك يتندب
و مادامنا حكينا على الشعر … خليني نفكركم بلي الشعر المزيت كي تطيح الدهون تاعو على البشرة تاعنا رح تؤدي لظهور دهون
اذن هاد الحوايج الخفيفة لي حنا ما نعطوهاش اهمية ، تخرّجّلنا حبوب … تفكروا البكتيريا ، الأكل و خاصة الفيتامينات
سلام

… تسنيم

السمنة أو نقص الوزن مشكلتو ماشي الأك فقط

…..و انما السبب لي يدفعك تاكلي 

يعنيالحالة النفسية

     و علابيها الدراسات تع درك الكل يأكدوا بلي أمراض الوزن كلها تخبي حالة نفسية يعاني منها الشخص
كي نقول حالة نفسية مش معنتها راكي مهبولة  
نقصد بيها خوف ، قلق stress
و حبيت نربط هاد الموضوع مع المشاكل تع الكولون و الأمعاء الدقيقة

و خيرت COLON IRRITABLE لأن كاين ناس ياسر يعانيو من هاد المشكل و العلاج تاعو يعتمد على العادات الغذائية

لماذا؟
لأنه عضو حساس لتقلبات المزاج و للعادات الغذائية
نجيو كيفاه يجي ، يعني أعراض تاعو ؟
آلام في البطن ، امساك ولا اسهال و لا مرة امساك مرة اسهال ، الرغبة في الذهاب الى الحمام بسررررععععة
انتفاخ في البطن و تحسي عندك غازات
الآلام عادة تكون في مناطق محددة تولي القعدة تقلق

وش هي الأسباب تاعو ؟
الأكل … خاصة التخلاط في الماكلة هادا حلو هادا مالح و في كل وقت
القلق و المشاكل و التقلبات المزاجية و التخمام بزاف … طيشييي علييييك جاية غير فلاطاي برك
تشربي بزاف المشروبات الغازية و القازوز ،،، بطلو الكوكا و بيبسي
الدورة الشهرية ، يقلك بلي الهرمونات هي لي رح تعمل هاديك الحاجة ، خاصة في وقت لي تجي تلقاي السطر يزيد و لاحظو كي يكون عندكم الدورة يكون عندكم اسهال
و لا قادر تكونو استعملتو كاش دواء ءمن بين الأعراض الجانبية تاعو يقلق الكولون تاعكم
اما في الماكلة ، الناس لي يعانيو من هاد الحاجة رح نقصولهم الألبان ، السكريات و الفواكه الحمضية كيما البرتقال
بصح نحب نطمنك حبوباتي بلي هاد المرض ماهوش خطير بزاف على الجسم كيما la maladie de crohn لي يقدر طبيب يخربط بيناتهم ، كرون قادر يدير السرطان ، بصح الكوليت ماديرش سرطان ، تفاهمنا ؟

لكن الخطر لي قادرة تسببو في حالة أنكم ما قمتوش برواحيكم
هو ارتفاع الضغط على مستوى البطن ، مما يؤثر على الضغط على مستوى الصدر
و هنا رح نلاحظو ظهور أمراض قلبية
كانت كاينة حالة تعاني من هاد المشكلة لفترة طويلة ممبعد صرالها انتفاخ للقلب و لا كبر الحجم تاعو … معلاباليش بالعربية بالضبط بصح CARDIOMEGALIE
الحلول … عادة منمدوش دواء غير في الحالات القاسية جدا … و الدواء رح يكون ملين

3 أمور : 

-1- تبدلي العادات الغذائية تاعك الى كل ماهو غني بالالياف .. يعني ميعديش عليك نهاؤ متاكليش سلطة و لا اي نوع من الخضر لكن لازم تبتعدي على الحوامض كيما البرتقال و المشروبات الغازية ممنوع
-2-  لازم تشربي الماء … بزاف الماء … مش أقل من 2 لتر … اعتبري نفسك مريضة و الدواء هو لي رح يساعدك
هادا كان للوقاية
الآن راكي تعاني من الآلام و خصك علاج

 2 حلول شوفي لي ساعدك
لازم تعرفي بلي الألم المصدر تاعو احتباس الغازات
فكري معايا الرضع وش نمدولهم
تيزانة تع البسباس
ولا ما يعرف في الشرق الأوسط اليانسون

تروحي عند عمي العشاب و تقوليلي مدلي زريعة البسباس … اشري المغلفة ميكونش قايسها الهواء
ديري قيس ملعقة صغيرة في كاس ماء و خليها تغلي … شوية منها تمد مفعول
لكن … ما ديريهاش صباح و انتي خارجة في النهار
لأنها عبارة عن مصفاة … تصفي الجهاز الهضمي و البولي … تخرج كلش اكرمكم الله .. انا نحب نديرها في الليل و الصباح ميبقى والو

الحاجة الثانية رح نستعمل النخالة ولا تتباع تحت اسم SON DE BLé
ديري منها ملعقة في علبة ياغورت و تتناوليها قبل الأكل
فكرة النخالة انها غنية بالالياف و الياغورت عندو خمائر خاصة تساعد الجهاز الهضمي
ان شاء الله يكون عجبكم الموضوع
اي أسئلة انا حاضرة باذن الله

…  تَسْنِيمْ

مولات هاد الرواية الكاتبة المصرية المنقبة والدكتورة البيطرية “حنان لاشين”

هدية لكل شاب حاب يشمت ببنت رفضت الزواج منه بلا سبة رغم أنو صاحب خلق ودين وبخدمتو “لا للشماتة طبعا مجرد مزاح”

رواية تهدر على قصة فتاة حابة الكمال في الزوج المستقبلي وقاعدة تحلم أحلام وردية وعايشة في خيال ماكانش منو قاع.. تكتشف مبعد بللي حتى واحد فينا ماهو كامل….

ماشي كل بنت عانس معناه ماتقدملها حتى واحد ولا ناقصها شبوب ولا حاجة خرى…كاين أسباب بزاف للعنوسة منها الأحلام الوردية الي تكون البنت عايشة فيها وبالتالي تولي تحوس على الكمال وفارس الأحلام اللي يشبه للقصص الرومانسية االي تقراها البنت في الروايت الخيالية… وعلى هداك ترفع البنت بزاف سقف الأماني والتوقعات…

ولا تحوس باش تتزوج عن حب من أول نظرة بسبة تاع المسلسلات الهدامة اللي شوهت تفكير بناتنا …متناسيين بللي الحب ثمرة نقطفوها وهو نتيجة ماشي مقدمة والخلط بين الإعجاب والحب …

فالإعجاب هو مقدمة لبداية مجهولة وما يعتبرش حب ..والحب تاع الصح يجي نتيجة سنوات ومواقف حلوة ومرة يعيشوها الزوجين مع بعض ويكتشفوا رواحهم صح ….

هاد الرواية بالذات هديتها لوحد المرا لقيتها بمعرض الكتاب قربت مني وقالت لي حابة نسقسيك على رواية تصلح لابنتها المراهقة تجبدها بيها للقراءة.

وتسيطر على أوهامها وتعيد أفكارها المضطربة للواقع…

الرواية حازت اعجابات بزاف وعدد قراءها بالملايين ….

إذا فاتتكم هذه الرواية راه فاتكم بزاف…

… شمس الهمة

هي رواية للكاتبة المصرية “رقية طه”…

هذه الراوية غيرت حياة ناس بزاف وماكانش بنت ولاشاب قراها وماتغيرش للأحسن…

رواية تعلمك معنى الحلال والسعادة اللي يعيشها اللي يتبع أوامر ربي وتساعدك باش تقرب من ربي بطريقة رائعة وأسلوب أكتر من رائع

فى الحلال تعني تتعرفوا كتر على دينكم

فى الحلال تعني تتعلموا واش معنى #حلال

يعني تعيشوا حياتكم صح ماشي برك هدرة فى روايات

الشخصيات اللي فى الرواية يعلموك أنك لو عشت صح غادي تلقى الشخص المناسب ليك واللي يكون بطبيعة الحال عايش صح هوولا هي تاني ويتقوا ربي فى كامل تصرفاتهم…

الرواية هدية ورسالة من ربي تقولك أنت راك تمشي صح…

من وجهة نظري هي نوع من أنواع الراويات الدينية الإسلامية الرومانسية عجبتني بزاف وجزاها الله عنا خيرا “رقية طه” .

الرواية أكتر رواية مشهورة بين الشباب ولبنات تأثر فيك حتى تبكيك وتضحكك حتى تبكي من الضحك تاني…

هذه الرواية هي اللي قلتلكم عليها في ملخص رواية الرجل ذو اللحية السوداء وهي اللي غيرت قريبتي وخلاتها تلبس الحجاب وحتى غيرت ستة من صحابات ختي طالبات الطب وخلاتهم يلبسوا الجلباب …

هذه الرواية وصلت وين داتها دار نشر ونشرتها بلا ما تستأذن الكاتبة اللي كتبتها وباعوها بمبالغ خيالية وربحوا فيها…

أمانة قراوها ومدوها لكامل الناس اللي تعرفوهم…

… شمس الهمّة