انتاج مواد التجميل و مستحضرات العناية هو صناعة مزدهرة و تُدِرّ الكثير من الأموال على المنتجين …و النساء في هذا الزمن تفتنو فتنة عجيبة بهذي المواد …و صرنا ما نتخيلوش رواحنا نقدرو نعيشو بدون المئات من هذي المنتجات.. بل أصبحت من الضرورات اللي لا غنى عنها و تشبه في قيمتها الأكل ؛ و اللبس اللي يستر …

شكون تستغنى على الشامبوان في كل استحمام …

و شكون ما يغسلش فمو عدة مرات في اليوم بالمعجون …

شكون يقدر ما يتعطرش و ما يستعملش مزيل الرائحة في أيامنا هذي ..

 

و لكن هل تعرفي بلي هذي المُركَّبات تفتقد كليًّا لمعايير الأمان عند استعمالها …و المرعب هو انو المكونات الكيميائية لهذي المنتجات غير صحية و مسرطنة و حتى فيها “خطورة تعطيل و تقليل الإجراءات الإنجابية” …

 

لذلك دائما ألْقِ نظرة على الملصقات اللي على المنتجات التجميلية ..(شامبوهات …بلسم ..مرطبات ..كريمات للشعر..احمر الشفاه..ماسكارا …العطور …)لازم تفهمو المكونات حتى اذا كانت الكلمات طويلة و ما عندها حتى معنى بالنسبة ليك ..من الغباء الاعتماد على جهلنا و عدم قدرتنا على معرفة مصطلحات المكونات الكيميائية لتبرير انسياقنا الاعمى وراء الحملات الإعلامية في الجري و تَتَبُّع هذي السموم و الحصول عليها بأغلى الأثمان ..

شوفي المكونات غير الصحية اللي تلقايها غالبا في مستحضراتك الشخصية ..

 

_ الشامبوان و الجال دوش فيهم غالبا كبريتات لوريل الصوديوم Sodium Lauryl Sulfate (SLS) / Sodium Laureth Sulfate (SLES)  

_ منتجات الشعر يستعملو فيهم غالبا Sodium Lauryl Sulfate (SLS) / Sodium Laureth Sulfate (SLES) و  DEA (Diethanolamine), MEA (Monoethanolamide), TEA (Triethanolamine)

 

_يظهر في الكثير من مواد التجميل و حتى الديودورون و صولا الى العطور Parabène (Méthyl, Butyle, Ethyle, Propylée)

 

_ Phtalate de dibutyle (DBP)يظهر في الكثير من الماركات

 

واش هي المشاكل اللي تواجهيها باستعمالك لمستحضرات و مواد التجميل ..

 

معظم منتجات الجمال ليست مفحوصة او مدروسة و مواصفاتها مخالفة لما هو معلن عنه  (هذا في العالم المتقدم عندنا ما نهدروش )…و تستخدم في معظمها خلطات متغايرة و تركيبات مُنتَجة كيميائيا و هي غالبا غير معتمدة من طرف أي نوع من سلطات المواصفات و الضبط ..

 

• على الأقل ثلث مواد العناية الشخصية تحتوي في ابسط تقدير على منتج واحد مرتبط بالسرطان
• الزيوت المعدنية و البتروليوم هوما مكونات أساسية في معظم مواد التجميل و هوما أصلا من الوقود الاحفوري
• ما تخدعكش عبارة “عضوي” او “طبيعي” على المنتج …هدف المنتجين هو الخداع لجلب الزبائن لمنتوجاتهم على أساس انها عضوية و هي ليست كذلك ..المكونات الطبيعية لازم يكون معاها شهادة تثبت ذلك …اذا ما لقيتش الشهادة تمعني جيدا في قائمة المكونات …المنتجات الطبيعية لا تحتوي على مواد حافظة و ليس فيها عبارة Parabène (Méthyl, Butyle, Ethyle, Propylée) تعلّمي تقراي المكونات باش ما تنخدعيش بالمواد اللي يقولو أصحابها بانها “طبيعية”

 

 

احذري من واقي الشمس créme solaire

 

كاينة مخاوف حقيقية من واقيات الشمس بنوعيها …المعدنية و الكيميائية لانو الإحساس بالأمان مع استخدامها مزيف و وهمي …افضل طريقة للبقاء آمنة من الشمس هي في الابتعاد عنها ..لذلك تجنبي كليا الاستعمال اليومي لواقي الشمس حتى اذا كان طبيعي

 

 

• كوني حذرة مع لوشنات الجسم ….كريمات الوجه و الماكياج …معروف طبيا ان الجسم يمتص بدرجة كبيرة ما فوق الجلد …فكري دائما في البدائل الطبيعية

 

• انتبهي من مزيل الرائحة و معاجين الاسنان

 

حتى هذو اللي يعتبرو رئيسين في قوائم التسوق للمنزل هوما مصدر خطر …معظم لي ديودورون les  déodorants فيهم الالمنيوم اللي هو سام على الجهاز العصبي و يسببلو التهاب كما انها تقوم بسد المسام و ما تسمحش للجسم بتعديل حرارتو طبيعيا ..

 

معاجين الاسنان فيها البارابان  Parabène و  Dioxine اللي يستعمل “للتبييض” ..و كذلك فيها مستويات عالية من الفلوريد …..القلق متنامي من مستويات الفلوريد اللي نستهلكوها في المركبات الغذائية و معاجين الاسنان ….الفلوريد يقاوم التسوس و لكن الجرعات العالية منو تسبب التسمم ….فالبديل هو معجون بكربونات الصوديوم منزلي الصنع

 

• ابقاي حذرة مع مستحضرات العناية بالشعر

 

الشعرة صح عبارة عن عضو ميت و لكنها تقوم بالامتصاص تماما كيما الجلد …شحال المنتجات اللي نحطوها في شعرنا من اجل التجميل ….اكيد الرقم مرعب …(شامبوهات …بلسم …كريمات …جل …سيروم …الخ )

الشامبوهات و البلسم فيهم مكونات بترولية …مثبتات الشعر و الجال تستعمل formaldehyde و ال phthalatesو العطور الصناعية

 

مكون صبغة الشعر p-phenylenediamine هو مركب سام جدا ..و كذلك قطران الفحم اللي يستعمل لمحاربة القشرة ..الأفضل الالتزام بالملوِّنات الطبيعية كيما الحنا و مستخلص البابونج و غيرهم كبدائل طبيعية

 

الحل مع كل هذي المكونات غير الصحية بل و السامة هو تجنبها قدر المستطاع في الاستعمال اليومي ..(في بلادنا ما تنفع في والو و أسعارها نارية )…اللي تتوفرلو منتجات طبيعية هذا اختيار افضل …و لكن التسويق يعتمد عادة على الغش لذلك تقدري تميلي الى صنع كل منتجاتك التجميلية بنفسك في البيت تماما كيما كانو جداتنا اللي اليوم ارقى المنتجعات التجميلية العالمية تعتمد على إرثهم …كيما الحمام المغاربي و الكاسة …و الطفل لارجيل ..الخ …

 

الرجوع الى الأصل فضيلة … و سلامة

 

 

…شمس هنية

 

أحد أُسُس التَّدبير المنزلي لربَّة البيت هو إدارة التَّغذيَّة و حسن تسييرها بدايةً من قوائم التَّسوق و لوائح الوجبات و حفظ الأطعمة و تصريف البواقي و رعاية المخزون وصولا الى فنون الإقتصاد و حتى قواعد التقشُّف .

 

في عصرنا الحالي أصبح تميُّز المرأة يظهر بوضوح في معرفتها لأصول حفظ الأغذية و إتقانها لمبادئ تصريفها و طرق تقديمها ….

و مع مستلزمات هذا الزَّمن من سرعة و انشغال و توفُّر إمكانيات ماكانتش موجودة في أزمنة سابقة أصبح الإعتماد على تجميد الأغذية في الإقتصاد المنزلي ضرورة قصوى تقوم عليها مصالح كبرى في كل بيت ..

 

و رغم السجالات الدائرة باستمرار حول خطورة الأطعمة المُجَمَّدة على صحَّة الإنسان و الفَرضِيّات المتضاربة اللِّي تنصح باعتمادها و الأخرى اللِّي تحذّر منها و َجَب كَحَلّ وسط على كلّ سيّدة حريصة في إدارتها لمنزلها و مهتمة بصحّة أفراد أسرتها تعرف أساسيات تجميد الأطعمة اللّي ولاّت ضرورة لا غنى عنها في معظم البيوت …و الهدف هو تنظيم العملية بما يحفظ المصالح الإقتصادية و يضمن السّلامة الصحيّة للافراد الدّاخلين تحت رعاية كل سيدة …

 

هنا نقدملك هذا الدّليل الشّامل الي يوَرِّيلْك كيفاش تجمّدي كلّ المواد الغذائية في المنزل و يعلّمك على القواعد و الشّروط اللي تحمي بيها أفراد أسرتك من مخاطر هذي العملية :

 

 

أولا : قواعد التجميد :

 

_ جمّدي فقط السِّلع الطَّازجة و  ذات النَّوعية الجيِّدة .

_ عمليَّات التَّجميد نفذّيها بسرعة و في أقصى درجات النَّظافة و قبل ما تمسِّي الأطعمة اغسلي يدِّيك مليح .

_ الخضرة نظّفيها و اغسليها و قشّريها و إذا لزم الامر بلونشيها ( غلِّيها لثواني ) ؛ le blanchiment هو الي يمنع نشاط الأنزيمات اللي  تسبب تغيُّرات في اللَّون والرَّائحة، والنَّكهة و الملمس.

 

_ الطَّعام اللي تنحِّيلو التَّجميد عمرك ما تعاودي تجمّديه حتى المثلجات كي يذوبو ما ترجعيهمش للمجمدة .

_ بعدما تذوّبي الأطعمة و طيّبيها تقدري تحتفظي بيها فقط 24 ساعة ما تتجاوزيش هذي المدة .

_ تجميد الاطعمة يكون في درجة -25 باش ما تفقدش  خصائصها : اضبطي المجمدة على درجة -25 لمدة خمس سوايع قبل ما تحطّي المنتجات : هكا يتجمدو بسرعة و يحافظو على خصائصهم و ماتحطيش كميات كبيرة على مرة وحدة .

_ بعدما تجمد المنتجات كليا ب 24 ساعة ؛ تقدري تخزّنيهم في درجة -18 نقصي للمجمدة من -25 هبطيها حتى ل -18 …و لكن ليس أقل من هذي الدرجة لأنو تغيُّرات الحرارة تأثر على جودة المنتج.

_ ما تعاوديش تجمدي أطعمة اللي ذوبتيها جزئيا أو كليا ، لأنّو بعد التذويب تَطوُّر نُموّ الميكروبات يتسارع بقوَّة و كي تعاودي تجمّديه هذاك البرد يدمّر العناصر اللي تُبْطِئ نموّ البكتيريا ؛ بينما العناصر الضّارة ( البكتيريا ) تبقى نشيطة ، من أجل ذلك لازم نستهلكو المنتجات المذوَّبة في نفس اليوم اللي ذوّبناها فيه .

 

_ كلّما كانت المجمِّدة مليانة راح تحافظ على البرودة ، عَمّرِيها بقرع الجليد هكا في حالة العُطل أو انقطاع التيَّار الكهربائي  ما تتأثرش الاطعمة …

_ إذا دام الانقطاع أقل من ستّ ساعات ما تفتحيش المجمدة خلِّيها مغلوقة راح تبقى الأطعمة سليمة .

_ إذا دام الانقطاع  من ستّ الى عشر ساعات خلِّيها مغلوقة ماتفتيحاش و كي يرجع التيَّار شوفي الأطعمة اللِّي بداها الذوبان باش تستهلكوها .

_ إذا دام الإنقطاع أكثر من 12 ساعة كولو كل الاطعمة في الوجبة التَّالية و اغسلي المجمدة تاعك قبل ما تمشِّيها .

 

 

 

ثانيا : شروط التجميد

_ حاولي ما تجمّديش بكميات كبيرة على مرّة وحدة ، قدّما تجمد المأكولات بسرعة قدّما تحافظ على نوعيتها و جودتها .

_ قسّمي القطعة لحصص باش يسهل عليك تذويبها مبعد

_ استخدمي للتَّجميد العُلَب و الأكياس البلاستيكية ، العلب لازم يكونو في أقصى حالات النظافة باش تتجني الروائح عند الاستعمال مرة اخرى .

_ الأكياس فرّغي منها الهواء باش تتجنّبي الأكسدة اللِّي تغيّر من نوعيّة المنتوج .

_ ماتملايش الحاويات كليًّا لأنو الجليد يزيد من حجم المنتوج .

 

مدة الحفظ

 

_ السّمك :من 3 الى 5 اشهر .

_ الضان و العجل : من 6 الى 8 اشهر .

_ الخضر و الفواكه : من 8 الى 10 اشهر

_ الدجاج و البقري : 12 شهر .

 

1– تجميد الخضر

• كُلّ الخُضَر الطَّازجة خصوصا الموسميَّة ( الجلبانة ، لوبيا خضرا ..) تصلح جيِّدا للتَّجميد .
• خَيّري خُضرة المَزارع النَّاضجة و بنوعيَّة جيِّدة هكا تحافظي على القيمة الغذائيّة المطلوبة .
• من الضروري أنك تقومي ب ( Blanchir ) للخضار يعني : تحكمي 500 غ من الخضار ترميهم في قدرة تاع الما يغلي ( 5 لترات على الأقل ) بلا ملح ؛ خلِّيهم بضعة دقائق و مبعد برّديهم فورًا اِرميهم في وعاء فيه الما البارد أو الجليد قَطّريهم و نشّفيهم و حطِّيهم في منديل  ولا ورق ماص  papier absorbant.
• مهما كانت نوعيَّة الخضرة كبيرة أو صغيرة تقدري تعبِّيها في أكياس بلاستيكية غذائية .
• كُلّ الخُضَر يمكن حفظها لمدَّة 12 شهر بشرط تكون طازجة  و تاع موسمها إلا الطماطم تحتاج 6 اشهر فقط .
• باش تذوبي الجليد ( ديكونجلي ) من الخُضرة حطِّيها في المياه الحارة .

مدة تغلية (blanchiment)  الخضار :

_ الخرشوف مقطع منقي ، الباذنجان ، شوفلوغ : 3 دقايق .

_ الكرنب مفروم ، الجزر ، اللفت : من 4 الى 5 دقايق .

_لوبيا خضرا ، الفول ، البصلة الصغيرة و الفطر  champignons : دقيقتين .

_ الجلبانة ، السلق : دقيقة وحدة .

الطماطم ، الخيار ، الجريوات ، الفلفل ، القرعة ..هاذو ما يحتاجوش تبلونشيهم فقط قشريهم و قطّعيهم شرائح أو مكعبات و أحكِمي الإغلاق و اللَّف .

البطاطا ما تحبّش التَّجميد يروح طعمها و تذبل كذلك الخس.

 

2– تجميد الفواكه

لتجميد الفراولة و الكرز و التوت و حب الملوك اللي  تزيني بيهم الفطائر :

اغسلي الفاكية بالما البارد و حكِّيها و مبعد امسحيها مليح ….إذا كانو الحبات صغار رمّديهم مباشرة في السُّكر و حطِّيهم في صينية في المجمدة 24 ساعة و مبعد اجمعيهم في كيس تجميد …إذا كانو كبار غلِّيهم ثواني في الما المغلي و مبعد قطّعيهم و حطِّيهم في الكيس و كُبِّي عليهم السُّكر .

 

 

3– حفظ اللحوم

 

شحال الوقت اللي نقدرو نحتفظو باللحوم بلا ما تشكّل خطر على صحتنا ….إليكم بعض نصائح الخبراء :

 

في الثَّلاجة :

_ خزّني اللّحم في الجزء الأبرد من 0 الى 4 درجات .

_ ما تراكميش قطع اللحم فوق بعضها ..خلِّيها تتنفّس .

_ الوقت اللي تحطِّي اللحم في الثّلاجة قبل ما تجمّديه احترميه و ما تفوتيهش :

* البقري 6 ايام .

* العجل 4 ايام .

* الضان 5 ايام .

* الجاج يومين .

هذي هي الفترة اللي تحتملها هذي اللحوم في الثلاجة …اذا تجاوزت المدة لازم تجمّديها

 

ليزابا و المرقاز (زوائد الدجاج و النقانق) حاولي قدر الإمكان تجمّديهم طازجين مباشرة بعد الذَّبح أو الشِّراء .

 

الاعداد و التغليف :

 

كُلّما كانت اللُّحوم مدهّنة كلّما كانت مدة الحفظ أقل لأنو الشَّحمة راح تطلق زنختها  ….جمّدي اللُّحوم الهزيلة و اللي أَزَلتي عنها الشُّحوم ..وجّدي حصص تتناسب مع احتياجك لكلّ وجبة لأنو مش بإمكانك نعاودي تجمّدي اللحوم اللي ذوّبتي ..كما أنُّو مجموعة قطع صغيرة تتجمّد خير من قطعة واحدة كبيرة ..التَّغليف يجب أن يكون محكما مع التَّفريغ من الهواء .

 

• قطع اللحم الكبيرةو الشرائح ك: Steaks, côtelettes, filets, escalopes : هذو جمّدي القطع منفصلة و مبعد اجمعيهم في كيس تجميد بلاستيكي .
• اللحم المخصص للحساء و الشربة بعد التَّقطيع إلى قطع صغيرة جمّديهم منفصلين في صينية ثم اجمعيهم في كيس بلاستيكي مُحكم الغلق و خزّنيهم .
• المصارن اللي تستعمليهم للنقانق حطِّيهم لمدة 1 دقيقة واحدة في الما المغلي ..جمّديهم منفصلين و مبعد اجمعيهم في كيس بلاستيكي أو علبة تجميد مع الغلق الجيد
• الكبدة و الكلى و المخ يتجمّدو مباشرة بعد الذَّبح ..شمّخيهم ساعتين في الما البارد ..قطّريهم …قطّعيهم ..جمّديهم منفصلين في صينية ثم اجمعيهم في أكياس بلاستيكية مفرغة من الهواء و محكمة الغلق .
• اللحم المفروم هو الاخطر مطلقا في التعامل معاه عند التجميد لانو البكتيريا تتكاثر فيه بشكل جنوني لذلك ينبغي اتخاذ احتياطات مشددة و اخذ اقصى شروط النظافة ..تغسلي يديك و الاواني اللي تستعمليهم و الاماكن اللي تلمسيهم مليح بالصابون و تجنبي قدر الامكان لمس اللحم المفروم اللي راح تجمديه و اجتهدي تحطيه مباشرة في كيس التجميد و رققيه بالحلال تاع الخبز على شكل لوح  بسمك 1 سنتمتر قيل ما تحطيه في المجمدة

 

 

مدة الحفظ :

اللحوم اللي شريتيهم من عند الجزار ممكن يتجمدو مباشرة….اللحوم المذبوحة في المنزل تقدري تحطيها في الثلاجة بضعة ايام قبل التَّجميد …..و لكن كل اللُّحوم بدون استثناء إذا ازلتي الشُّحوم تقدر تبقى في المجمِّدة لغاية سنة كاملة .

 

شروط تجميد اللحوم  :

_ ما تجمديش بكمِّيات كبيرة على مرة وحدة ، هكا تقدري تحافظي على حالتهم الأصلية و قيمتهم الغذائية كلما كان التجميد أسرع .

_ قطّعي اللحم لحصص صغيرة ..هكذا يسهل عليك تذويبهم .

_ استعملي للتّجميد علب أو اكياس بلاستيك مخصصة للتَّجميد ..كل العلب لازم تكون في أقصى حالات التنظيف .

_ الاكياس فرغيهم تماما من الهواء باش تتجنبي التفاعلات السُّمِيَّة اللي تغير نوعية المنتج .

 

إزالة الجليد (تذويب اللحوم):

 

• القطع المُعَدَّة للحساء أو الشربة تقدري تستعمليهم مباشرة في الطَّبخ ….أو تذوبيهم  في الثَّلاًّجة 8 ساعات .
• الكبدة و الكلى و القلب و المخ ايضا للاستعمال مباشرة ….
• السكالوب و الفيلي و الستيك و الكوتليت خلِّيهم في الثلاجة لثماني ساعات .

 

كيفاش تذوبي الجليد من اللحم

 

التذويب البطيء للجليد من اللحم يضمن الحصول على نفس طعم اللحم الطازج الشرط أنُّو يكون في الثَّلاجة تحت درجة حرارة أقل من 4 درجات مئوية ….و بالتأكيد مش خارج الثلاجة تحت حرارة الغرفة أو قرب مصدر حرارة وين تتكاثر البكتيريا .

 

• ضعي اللحم اللي راح تذوبيه في وعاء داخل الثلاجة و غطِّيه بورق بلاستيكي باش تتجنبي التلوث مع الاطعمة الاخرى .
• اذا كنتي مستعجلة و تحبِّي تذوّبي اللّحم بسرعة كاينة ثلاث طرق و لكن لازم تعرفي أنو  اللحم راح ينتج سائل احمر و بالتّالي يفرغ من عصيرو اللّي يطبخ فيه ويتحوّل للملمس اللين ..و يصبح جاف و طعمو أقل جودة …
• اغسلي يديك جيدا قبل و أثناء و بعد لمس اللّحم ….نظّفي كذلك كل الأسطح و الأواني اللّي كانو على تماسّ مع اللّحم المُجَمَّد .

 

ذوبي في الميكرووند

و لكن الطريقة ممكن ما تكونش ناجحة تماما …الطَّعم ناقص و الطّياب  يكون في السطح فقط مش عميق .

 

ذوبي اللحم تحت الماء :

هذي هي الطريقة الأسرع ..حطِّي اللّحم في إناء و كُبِّي الما البارد على كل القِطع بحيث تتأكدي من غمرها جميعا …الما لازم يبقى بارد باش تتجنبي البكتيريا.

 

ذوبي اللحم بالطبخ

كي يكون اللّحم مفروم أو مقطّع قطع صغيرة للشّربة ديريه مباشرة يطيب و زيدي وقت الطياب أحسبي مدة ذوبان الجليد .

 

رغم ذلك للحصول على طعم أفضل من الأحسن ما تستعمليش هذي الطرق إلا في حال ماكانش عندك الوقت

 

4– تجميد الدواجن

 

بعدما تريّشي و تفرّغي و تشوّطي الدّواجن تاوعك و تنحّيلهم الراس و الرّجلين تقدري تخلِّيهم في الثلاجة من يوم إلى يومين فقط ثم لازم تجمّديهم …إذا كنتي راح تجمّدي الجاجة كاملة لفّيها في ورق بلاستيكي …و إذا كنتي راح تجمديها قطع حطّيهم منفصلين في  أكياس بلاستيكية ..بإمكانك تتبّليهم أو تحشيهم و لكن مدة الحفظ في المجمّدة تكون أقل قليلا .

 

مدة حفظ الدواجن في المجمدة …سنة كاملة .

 

5– تجميد السمك

فقط السَّمك الطَّازج المصطاد حديثًا هو اللي يمكن تجميده ..بعدما تنقِّيه تفرغِّيه و تغسليه و تنشّفيه مليح حتى من داخل ..نحِّيلو الراس و الحراشف و جمّديه …..الأسماك اللي توزن أكثر من 2 كلغ قطّعيها طراف و جمّديها منفصلة و مبعد اجمعيها في أكياس تجميد محكمة الإغلاق ..

 

مدة الحفظ في المجمدة 3 اشهر .

 

6– العجائن ، الخبز ، الكعك

 

_ يصلحو للتّجميد جيِّدًا …حطّيهم في أكياس بلاستيكية ….الفطائر ( Les tartes) من الأفضل كي تحبي تزَيّنيهم تخليهم الزينة أثناء التَّذويب أو قبل الطَّبخ .

_ عجائن الحلويَّات الجاهزة للطَّبخ ..يمكن تجميدها بدون مشكل تحت كل أشكالها ….كتلة عجين او مقرّصة في القالب تاعها ( المول )…انتبهي فقط لكمية الخميرة دوبليها لأنها راح تطلع بعد التَّذويب …حاولي ما تديريش السُّكر للعجائن قبل ما تجمّديهم …جمّدي العجينة وحدها و زينتها وحدها لأنو الفاكهة تأثر على نوع العجينة .

_ الخبز ، الكرواصون ، البريوش ، البسكويت … تتجمّد بشكل جيّد جدا …جمّديهم دافيين و هم  منفصلين في صينية و مبعد أجمعيهم في أكياس بلاستيكية ..الخبز الكبير قطعيه شرائح و جمّديه بنفس الطريقة .

_الحلويات الجافة يمكن تجميدها بدون صعوبة …جمّدي الزينة اللي تضيفيها لاحقا للقاتو وحدها لكن انتبهي مدة الحفظ مش نفسها بين الحلوى و الزينة تاعها LA GARNITURE.

_ الحلويات تاع الطَّبقات او الملفوفة roulée المغلفة بالغلاصاج glacage تاع السُّكر او بالشُّوكولا او بالكريمة ..الخ تتطلب بعض العناية : بعضها لازم تتجمد منفصلة و مكشوفة و بعد التّجميد تجمعيها في الأكياس .و تخزّنيها .

_ ماتحطِّيش الخبز في المجمِّدة ساخن جدًّا لأن الفرق في الحرارة يفسّد الطّلوع .

_ باش تذوّبي الخبز بسرعة ..خلِّيه في الثَّلاجة نصف ساعة ثم رجّعيه للفرن عشر دقايق .

_ مدة الحفظ في المجمدة …من شهر الى شهرين ( شهر واحد للباتيسري و العجين ) .

 

7– تجميد البيض و منتجات الحليب

رغم أنه يُنصَح بتجنُّبها قدر الإمكان …لكن هناك احتياطات يمكن أخذها ..

 

البيض

البيض هو المنتج الأكثر حساسيّة للبكتيريا و يُفضَّل تناوله طازجا …يمكن تجميده مخفوقا و لكن عند التذويب خطر تطوُّر المكروبات عالي جدا ..يُفضَّل عدم المخاطرة ..

 

فقط الحليب المبستر و المتجانس هو اللي يمكن تجميدو … ..

 

الكريمة الطازجة La crème fraiche .

اختاري الطَّازجة جدًّا و السَّميكة …اخفقيها قليلا قبل ما تنقليها للأكواب البلاستيكية ..غطِّيها …اختميها ….علّميها بالنوع والتاريخ وجمديها .

 

الزبدة ...

جمدي فقط الزبدة الطازجة اللينة ..غلفيهم في ورق الزبدة ..

 

الاجبان

 

…رغم أنُّو معظم الناس يعتبرو تجميد الأجبان غير عملي لأنها تفقد طعمها و نسيجها لكن يمكن اتباع النّصائح التّالية للحصول على نتائج افضل

• ماتكونجليش بكميّة أكبر من 500غ…قطّعيها شرائح …جمّديها مكعبات أو قطع صغار أو ابشريهاRAPPEÉ ..
• احمي قطع أو شرائح الجبن ما تعرضيهمش للهوا غلّفيهم في ورق ألمنيوم ثم في الأكياس البلاستيكية بعد تفريغها من الهواء .
• امسحي مليح سطح الجبن بمنشفة ورقيّة باش تتجنّبي السّواد النّاتج عن الرُّطوبة ..
• بردي الجبن في الثّلاجة قبل ما تجمّديه هذي ضمانة باش الجبن يحافظ على طعمو و قوامو

 

 

الغرويير و الشيدار :قطّعيهم مكعّبات صغيرة قبل ما تحطّيهم في كيس التّجميد …كي تبشريهم حتى الأجزاء الصُّلبة أو الجافّة كي تجمّدي كلّ 100غ وحدها راح تتحفظ جيِّدا و تعطي طعم مليح للغراتان و الحساء و الأومليت و السُّوفلي .

 

البارميزان : قطّعيه بالماندولين لشرائح رقيقة جدا باش تزيّني بيه الأطباق قبل ما تجمّديه …أو أبشرييه و حطِّيه في كيس بلاستيكي بكميّات قليلة باش تستعمليه في الغراتان او تزيّني المعكرونة و الروز ..

 

الكامومبير : تقدري تجمّديه قطعة كاملة في التغليف ديالو و تذوّبيه قبل الإستعمال أو تقطّعيه حسب الأفراد و تجمّديه بحفظ كل قطعة وحدها في ورق بلاستيكي ثمّ جمعها في أكياس …انتبهي إلى أنّها راح تستمر في التخمر ممّا يؤثر على الطعم استعمليها إذن في حشوة الكريب أو في صوص الكريمة ..

جبن الماعز :بنفس الطريقة قطع صغيرة مغلّفة و مجموعة في كيس بلاستيكي يستعمل في العجينة المورقة أو السلطات .

 

• الحدّ الأعلى لحفظ الأجبان هو شهرين …بعد الشهرين راح تنقص جودة الطعم .
• ذوبيه في الثلاجة 12 ساعة قبل الاستهلاك .

 

 

مدة الحفظ

لحليب المبستر            3 اشهر

الزبدة اللّينة المبسترة    8 اشهر

الكريمة الطازجة            3 اشهر

الأجبان                       2 اشهر

كريم ديسار                 2 اشهر

البيض                        6 اشهر

 

8– تجميد الاطباق المطبوخة

 

تقدري تطيّبي بعض الأطباق أو تجهّزيها بلا ما طيّبيها و تجمّديها هكا توفّري لنفسك بعض الوقت و تكوني دائما مستعدّة مهما كانت الظّروف ….فقط احترمي الشروط التالية :

 

-يمكن تجميد الاطباق المطبوخة من أجل تناولها لاحقا ..احذري أثناء الطّهو ماطيّبيهاش بزّاف باش ما تقدّميش أطباقك مفرطة الطّهو ..

-يوصى بعدم استعمال الكثير من المادة الدّسمة لأنُّو يصعب حفظها

-تجنّبي استعمال الروابط   les liaison بالفرينة أو الصوص أو التّوابل …يُفَضَّل إضافتهم عند التَّسخين ..

-بعدما طيّبي الطّبق تاعك خلِّيه يبرد تحت غطاء قبل ما تحطّيه في المجمّدة ..

-ماديريش التَّوابل قبل التَّجميد …لأنو التجميد يأثّر على الطّعم و المذاق و الرّائحة المعطّرة ..

-كي تعمّري العلبة اللّي راح تجمدّي فيها خلّي 1 سم فارغة لأنو الحجم راح يزيد

-بعد إزالة الجليد الطّبق تاعك لازم تسخّنيه لحدّ الغليان

-مدة التخزين في المجمدة للأطباق المطبوخة تقدر تصل الى 3 اشهر

 

9– تجميد طبق مطبوخ مُعَدّ من مكوِّنات سبق تجميدها ..

 

 

عندك لحم مفروم مُجَمَّد …حضَّرتِ بيه بوراك أو سوفلي أو خضار محشوَّة ..و حابة تزيدي تجمّدي هذا الطّبق ..هذي العملية ممكنة إذا احترمتي الشروط التالية..

• تكوني أولاً ذوّبتي اللّحم المفروم ( أو أي مادة مُجَمَّدة ) في الثَّلاجة باش تتجنّبي نموّ الكائنات الحيّة الدَّقيقة اللّي ممكن تسبّب تسمُّم غذائي …و لكن ما تخلِّيهاش في الثَّلاجة أكثر من يومين…
• بعد التَّذويب مباشرة تقومي بطهو الطَّبق تاعك لأنو الطَّبخ يقتل البكتيريا ..كي تعاودي تجمّديها لازم تحترمي تماما قواعد النَّظافة التَّامة في عمليّة التَّجميد ..
• لازم نسجلو بلٍّي عمليَّة التَّجميد راح تأثّر على القيمة الغذائية تاع الطَّبق و حتى نوعيَّة الطَّعم راح تختلف ..
• الخضار المجمَّدة تقدري تستعمليهم في تحضير الطَّبق اللِّي راح تجمّديه بلا ما تذوّبيهم ….هكا تنقّصي خطر التسمّم الغذائي

 

التذويب

 

-المشاوي …الدجاجة كاملة …المقبلات الباردة ….خلِّيها من 10 الى 20 ساعة في الثَّلاجة .

-اللحم أو الدجاج المحمص sautée أو بالصلصة ….تذوّبيها في القدرة مغلوقة أو الفرن

-كروكيت بانواعها المختلفة و السمك…مباشرة الى المقلاة ..

Hors-d’œuvreو حساء الدواجن و السمك ….من 10 الى 15 ساعات في الثلاجة ..

-كيش …بيتزا …(فطائر مزينة)tarte , tourte garnee تاغت و توغت قارني …من 8 الى 10 ساعات في الثلاجة او مباشرة في الفرن

-الخضار المطهوة …الشربة …المرقة… مباشرة في القدرة ..

 

…شمس هنية

 

…شمس ساطعة

 

…شمس ساطعة