الطَّرز هذا النَّشاط الإسترخائي الجميل اللِّي يتناسب مع قعدة تلفزيون أو جلسة استماعية تجي بعد نهار طويل من العمل في البيت أو في الخارج و تمارسو الكثير من السَّيِّدات كَهِواية و فنّ يتطلّب الدِّقة ؛ أغلبيّتنا حصلنا عليه كَمَوروث اجتماعي من الأمَّهات و الجدَّات و نسبة كبيرة منَّا عندها تجارب مُضحِكة من طفولتها و هي تتعلّم الطّرز مع الصَّديقات و الأخوات تحت الإشراف الصَّارم و التَّركيز الحازم …أمَّا البقيَّة اللِّي ما حظاوش بهذا الذُّخر من الذِّكريات نقّدملكم هذا الملف اللِّي يوضّح أساسيَّات الطَّرز اليدوي البسيطة و يشرح الفكرة و المبدأ اللِّي يختصرو هذا الفنّ كاملا باش تنطلقي مبعد في صياغة مشاريع إبداعية تجمّلي بيها ديكورات بيتك أو تنشئي لنفسك نشاط اقتصادي تساهمي بيه في توفير بعض المتطلّبات لهذا الزَّمن الغالي .
الطَّرز هو كي تجبدي خيط في ابرة و تحسبي باش تكوني دقيقة و مع وجود العديد من التِّقنيات تاع الطرز الحرفي و فنون الزَّخرفة تولِّي الحوايج المحيطة بينا أجمل وتمدّ البهجة العتيقة لبيوتنا تاع أيام زمان قبل منتجات الآلة الباردة كي نخدمو بيدينا الغرزة اللي تحوّل قطعة قماش بسيطة لمشروع فنِّي : (نابات ؛ مخاد ؛ دراوات ؛ قنادر …الخ) .
تقنيات الطرز المختلفة
التقنية اللي تحظى بالامتياز عند المبتدئات هي الطَّرز اليدوي التَّقليدي اللي تجي تحتها أكثر من عشر أصناف مختلفة من الغرزات ؛ المبتدئات يتعلمو بالغرزة الأساسية : “غرزة التقاطع point de croix ” اللي تنخدم بالصَّف من اليسار الى اليمين و تتكون من خطّين متقاطعين لي لازم دائما يكونو في نفس الارتفاع و نفس الطول ؛ هذي الغرزة هايلة كي تحبِّي تطرزي صدور القنادر و الطراشن و المناديل و النابات .
ثانيا كي تتمكّني من غرزة التَّقاطع انتقلي للغرز الأساسية الأخرى : غرزة الأمام ؛ غرزة الظهر ؛ غرزة الباسي بلا ؛ غرزة العقدة …كي تتقني أساسيات الطَّرز تقدري تبداي حتَّى التَّلوين بالابرة اللي هو تقنيَّة معقَّدة تجي من الدُّول الأسيوية
الطرز بالمكينة :
ممكن للمبتدئات و هو الحلّ الأمثل للرَّاغبات في السُّرعة يحقّق لهم مشاريع بالطَّارزة الإلكترونية مع برمجيَّات محدَّدة ؛ كاينة ماكنات متخصِّصة و لكن إذا ماقدرتيش تستثمري فيها الماكنات العاديَّة توفّر غرزة الطَّرز الأماميَّة و تدير أشكال هايلة .
الطرز بالتّكَّة (الشريط) :
هذي التِّقنيَّة صعبة على المبتدئات صعوبتها في أنّك تطرزي بالشّريط ماشي خيط قطن ؛ الغرزات نفسهم تاع الطَّرز التَّقليدي و لكن الشّريط أخشن بكثير و الخدمة تكون دقيقة و تخدميه إمَّا مسطَّح أو ملفوف على حساب واش تحبِّي تخرّجي و بهذا الفنّ تمدِّي بُعد آخر لإبداعاتك في الطَّرز .
واش تحتاجي باش تبداي الطَّرز اليدوي؟ :
باش تبداي تتعلّمي الطَّرز تحتاجي للأدوات التَّالية :
طارة التَّطريز : و اللِّي هي عبارة عن حلقة مكوَّنة من جزئين تحطِّي القماش بيناتهم و تشدِّيه مليح باش يولِّي الطَّرز ساهل و تقدري تسيطري على المساحات الصّغيرة تلقاي فيها نوعيَّات من الخشب أو البلاستيك .
مقصّ صغير حاد : مع أطرافو الماضية و المدبّبة تقدري تقطّعي الخيوط لهذا هو ضروري جدًّا للطَّرز .
قطعة القماش : هذي من اختيارك : كتان او قماش قطني ؛ الفينة الكانفا canevas هي دائمًا المخيّرة ماتكون مطلوقة و خطوطها واسعة ماتكون ضيّقة ؛ مليحة لغرزة الحساب ؛ للمبتدئين “كتَّان عايدة” هو الأفضل
خيط الطَّرز : متوفّر و رخيص و نلقاو منُّو ألوان بالأطنان ؛ خيط dmc هو الأفضل و تقدري تستخدميه وحدو حصريا هو خيط ناعم مصنوع 100% من القطن المصري الأساسي المَجدُول و هذا الخيط هو الأكثر طلبا و الأوسع انتشارًا في العالم بفضل خصائصه تاع قوَّة اللَّون اللي ما يفسخش و حالة الفتل ؛ يتوفر في مئات الألوان احصلي على تشكيلة منوَّعة صغيرة من الألوان .
خيوط القطن او البوليستير أفضل من خيط الحرير و فرّقي بين خيط الطَّرز باليد و خيط الطَّرز بالمكينة .
إبرة الطَّرز :عندها عين أكبر من عين الإبرة العادية شوفي اللِّي توافق حجم الخيط نتاعك و تقدري تشري مجموعة بقياسات مختلفة ؛ الإبر اللِّي عندهم الرَّاس مدبب هايلين لغرزة التَّقاطع و كاينين يباري اللي ديري بيهم الحرج في الطَّرز .
قلم و ورقة التَّتبُّع papier calque : هذو تهزِّي بيهم الرَّشمة و هوما أفضل عون ليك باش ترفدي الموتيفة و تحطِّيها على الكتَّان .
الحرج : مع الطَّرز و في بعض الأفكار تحتاجي أحيانًا تحرجي مشروعك لذلك دائما خلِّي تحت يدك عيِّنة تاع حرج
علبة عدة الخياطة : باش تلمِّي حوايجك و تنظّمي خدمتك خلِّي دائما تحت يدك علبة بلاستيكية شفَّافة رتّبي فيها أغراضك .
في المرحلة التالية انتقلي لمعرفة و اتقان الغرزات المختلفة للطرز اليدوي اللي هوما الغرزات الأساسية للطَّرز :غرزة passé plat ؛ غرزة الحساب ؛ غرزة الامام le point avant ؛ غرزة الظّهر le point arrière؛ غزة السَّاتان (النخلة) ؛ غرزة السَّاق ؛ غرزة العقدة .
…شمس هنية
