موضوع فن الاكل موضوع مهم بزاف وخاصة كي يكون متعلق باطفالنا, لانو مع الطريقة السليمة و الاكل الصحي صحة أطفالنا راح تكون مليحة ونموهم الجسمي والعقلي راح يكون جيد
لهذا لازم على كل أم تعلم وليدها كيفاش ياكل, لكن للاسف الكثير من الامهات ما يهتموش بهذا الموضوع بزاف 
ومن هنا لازم  علينا نطرحوا هذا السؤال للأم ,كيفاش ياكل طفلك؟
هل ليملأ معدتو ام ليتغذى جسمو و يشبع حاسة الجوع في نفس الوقت ؟
هاذا المشكل غالبا ما يكون نتيجته السمنة عند الأطفال
اذ أنّ الطفل يأكل بسرعة فائقة في موعد الأكل و عادة ما يطلب المزيد لأنه لم يشبع
لماذا ؟
لأنّ امّه ما علماتوش انو وقت الأكل يمتد من 20د الى 25د و يكون المضغ من 15 مضغة الى 30 في حالة اللحم
طبعا راح تقولو هذا مبالغ فيه لكن المشكل هو حتى نتوما ما كانش عندكم هذا التدريب كي كنتو صغاو و من بينكم انا 
لكن الحمد لله مع الوقت قلت لما لا أتدرب و نشوف واش راني خاسرة مع الوقت اصبحت وجبتي تنتهي في 20د على الأقل و تكون الوجبة مشبعة و ساعات نحب نتمرد على هذا النظام و ناكل بسرعة و نتيجة ؟ نزيد نسقي و ناكل 
كيف تعوّدي ولادك على هذه الطريقة بلا ما يفيقولكم بلي راكم طولو في الوقت ؟
خاطش لوكان تقولولهم راح نديرو الأكل ليس اقل من 20د راح تحطوهم في حالة توتّر كبير و راح يصابوا بالملل و مع الوقت راح يتذمرو منو و يتمردو
اذا لعبة بسيطة و سهلة
راح تقوليلهم اليوم راح نلعبو لعبة التذوق حيث كل واحد فيكم يمضغ و يحاول يقولي واش راني مستعملة في هذا الطبق من مكونات
طبعا الاسئلة تكون على حسب السن مثلا اذا الطفل يعرف غير الخضر سقسيه على الخضر
اذا راه في سن يعرف البهارات سقسيه عليها
مرات حاولي تقوليلهم غمضو عينيكو و ديرو الأكل في فمكم و قولولي واش هي الطبخة
و مرات سقسيهم اذا يعرفو اسم الطبق
كل مرة حاجة حتى يتعود الجسم تاعهم انو قبل ما يكمل الطبسي يكون تعرف على كامل المكونات و الاذواق لي كلاهم
و هكذا مع الوقت يولي وليدك ياكل للتذوق و ليس لملأ المعدة فقط
حتى زوجك تقدري تعلميه هذه الطريقة حيث تسأليه جاتك بنينة ؟ واش رايك في المكونات ؟ هل حاجة ماذابيك نزيدها او نقصها ؟
كل هاته الأسئلة من جهة راح تتعلمي حاجات جدد في أولادك و في زوجك و من جهة راكي تعلميهم ياكلوا بذوق و ليس بطريقة تلقائية جعت لازم ناكل و السلام
اسئلة اخرى مليحة تسأليها قبل الأكل يعني قبل ما تسقي الطبسي اصلا
سقسي ولادك او زوجك شحال راكم جيعانين ؟ بزاف ولا شوية ولا ماشي جيعانين ؟
خاطش اولا من ناحية التبذير حرام علينا نسقو لواحد و يخلي طبسيه و نرموه
و من ناحية اخرى نحن قوم اذا اكلنا فلا نشبع يعني ممنوع تقولي لانسان بسيف كمل طبسيك و هو يكون شبعان
و من ناحية اخيرة الامر جد خطر اذا سيفتي على انسان ان ياكل و هو ماراهش جيعان
راح تقولي و الحل كيفاش نقول لوليدي معليش ما تاكلش و انا نوكلهم كامل في وقت واحد ؟
ساهلة ماهلة
كي يقولك وليدك مانيش جيعان قوليلو معليش اقعد معانا برك و اذا جعت كول و اذا ما جعتش اشرب ماء او عصير طبيعي فقط
الكثير من الناس تأتي شهيتهم كي يشوفو ناس آخرين ياكلو
اذا دون صراخ و دون شوشرة هذا حل بسيط
و اذا كان وليدك اكل قبل ما يفوتو 4 ساعات ديري في بالك انو وليدك غير محتاج الأكل
اذا حبسو طبيعة تاع جا وقت الفطور
الأكل موعده حينما يجوع الانسان و ليس حينما تقرّرين انتي انه حان وقت الأكل

…شمس ساطعة

الثقة بالنفس لازم تكون صِحيَّة و ضمن حدود مضبوطة ؛ اذا زادت أو نقصت على حد معين يوليلك مرض و تتطور حالتك للاسوأ.
باش تقوي ثقتك بنفسك لازم تحبسي المعتقدات والافكار السلبية لي متصورتها على روحك وتحاولي تغيّريها.
كيما كي تقولي على روحك مثلا “منقدرش ننجح” “مانيش فحلة” “مانيش باهية”……..الخ

و لكن هل هذا صحيح …و هل رايك في نفسك منصف و مافيهش تحامل على الحقيقة؟!

ماكانش إنسان خُلِق عبثا و القيمة الذاتية تستند لتفكيرك و رأي النَّاس يخصّهم و ما يلزمكش ..أما أنك تحطِّي روحك في هديك الخانة و تسببي لنفسك السجن في هذي الحالة فهذا خطأ قاتل و أكيد مشكل كبير يحتاج لحلّ و الوضع لازم يتغيّر الآن قبل فوات الأوان …يكفي أنك تكوني واعية للمسألة و ترغبي في التصحيح
و الحل بسيط ..تبّعي هذي الخطوات :

فقط راقبي هاديك الافكار و الظنون لي تحبَّط من قيمتك واكتبيها في ورقة او مفكرة وسقسي روحك وقتاش بديتي تفكري بهاذي الطريقة
و مبعدا اكتبي الأدلة لي تنفي أو تتحدى هاذي الافكار (يعني اكتبي لحوايج لي تحبيها في روحك والاشياء لي تشعري بلي راك مليحة فيها ,حوايج جيدة فيك مثلا “انا نعرف نطبخ””انا جيدة في…””انا نحب تدير…” )
اكتبي الحوايج الايجابية على روحك ,اي حاجة تخطر في بالك :ُّصفة مليحة فيك, حاجة كي ديريها تتفوقي فيها ؛ الحوايج الايجابية لي يقولوها الناس عليك…..الخ”
كي تحصلي على 5 حوايج ايجابية في روحك و كي كل مرة تلقاي حاجة تزيديها للقائمة راح يكون عندك تقدير اكبر لذاتك و راح تبداي تلاحظي قيمتك الحقيقية في عينيك
هاذي القائمة حطيها دائما في مكان تقدري تشوفيه ,هكا تبقاي تذكّري روحك بلي راكي (لا باس) وهذا الشئ يحببك في روحك ويزيد ثقتك بنفسك
لازم تبذلي جهد كبير وتتعبي في روحك حاجة ما تجي بالساهل و حاولي تغييري من تفكيرك لانو كلشي ينبع من عقلك الباطن؛ انتي وحدك لي تقدري تساعدي روحك (بعد الاعتماد على الله عز وجل والتوكل عليه), لازم تنهضي بهمتك وتحققي اهدافك مهما كانت الصعوبات وربي مش راح يضيعلك جهد وتعب كوني على يقيين ,فقط ادعييه وراح تشوفي العجب.
يقول البروفيسور ويليامز”قد تكون لديك قلَّة ثقة بنفسك الآن بسبب ما حدث عندما كنت في فترة النمو لكننا نستطيع ان نُطور طرقاً جديدة لرؤية أنفسنا في أي عمر”
كاينة طرق اخرى تساعدك في الشعور بشكل افضل تجاه نفسك:
* بناء علاقات ايجابية: اذا لقيتي ناس معيينين في حياتك يُحبطوك حاولي تقضي وقت أقل معاهم أو حاولي توصليلهم شعورك نحو أقوالهم و أفعالهم ,حوسي على علاقات مع ناس يكونوا ايجابيين ويقدروك اكثر, يقول شكسبير “لا تسمح لأي مخلوق أن يحبطك, لا فكريا ولا عاطفيا ولا عمليا لا تسمح لهم أن يأخذوك الى زاوية التعساء“
* كوني حنينة على روحك: البروفيسور ويليامز يقول “كن حنونا تجاه نفسك بمعنى ان تكون لطيفا مع نفسك في أوقات النقد الذاتي” ولا كيما نقولوا حنا ما تجلديش روحك وما تكلفيهاش أكثر ما تطيق
* فكّري وش راح تقولي لصاحبتك في وضع مماثل وحنا غالبا ما نقدموا نصيحة للآخرين اكثر من أنفسنا.
* و كيما تحرصي انك تحترمي آراء الاخرين واحتياجاتهم: توقعي نفس الشئ منهم بالمقابل
*  حاولي تتعلمي من واحد تعتقدي انو حازم و شخصيتو قوية و شوفي كيفاش تاخذي الحوايج الايجابية منو يقول بروفيسور ويليامز”لا يتعلق الامر بالتظاهر بانك شخص آخر ؛ بل بالتقاطِ تلميحات ونصائح من أُناس أنت تحترمهم وتُقدِّرهم والسماح لشخصك الحقيقي بالخروج”.
* قولي لا: الاشخاص لي ما عندهمش ثقة في رواحهم دائما يحسوا بلي لازم يقولوا “ايه” للناس لُخرين حتى كي يحبو يقولوا “لا لا ” وهذا خطر لانهم يولوا مُثقليين و مستائين و غاضبيين و مكتئبين : “في معظم الأحيان، قول “لا”, لا يُخِلُّ بالعلاقات” يقول البروفيسور ويليامز”يمكن أن يكون من المفيد الحفاظ على قول “لا” بطرق مختلفة حتى تصلهم الرسالة.”
*جربي الجديد: حنا كامل نحسوا بالقلق والتوتو ونخافوا نديروا حوايج جديدة ,بصح الناس لي عندهم ثقة برواحهم ما يخلوش هاذي المخاوف تمنعهم يجربوا الجديد و يواجهوا التحديات.
* ضعي لنفسك هدف مثلا : “نحفظ القران ,ننقص وزني, نقرا كتاب , نتعلم لغة اجنبية…..” تحقيق هدفك يؤدي لزيادة احترامك لذاتك ويعزز ثقتك في نفسك.
من المهم تتخذي قرار بلي من الان فصاعدا راح تكوني سعيدة,ماحدث قد حدث كلنا نرتكبوا الأخطاء , حبي نفسك وتقبّليها كيما هي ونادي بأعلى صوتك “أنا استحق أن أكون سغيدة”.
يقول ألبرت أنشتاين ” كلنا أذكياء,لكن اذا حكمت السمكة على نفسها من قدرتها على تسلُّق الأشجار ستعيش حياتها كلها وهي تعتقد أنها غبية “….مايعيبش السمكة انها ماتقدرش تتسلق الشجرة ..هذا طبيعي مش غباء

الغباء انك تحكمي على نفسك بانك انسانة فاشلة …فقط لانك مش كاملة

…شمس دافئة

كي يُحْتَضَرْ الحب و يَغِيبْ في العلاقات شكون يجي ينقذو
هاد اليومين لي فاتو عليا
شفت بزاف حالات تع مرضى يكونو يشوفو في اهاليهم
مبعد في لحظة يتوقف القلب تاعو
اول حاجة تخطر في بال اي طبيب
يمس النبض اذا ماكاش يبدا بالانعاش
لكن حاجة اخرى لفتت انتباهي
كنت في حافلة نقل الطلبة
و قاعدة من وراي فتاة منعرفهاش شخصيا
تهدر في الهاتف و تبكي الله اعلم مع من زوجها او خطيبها

هي  كان عندها مشكل في قلبها
ماكانش قاعد يتوقف كان قاعد يتقطع
قاعد يتقطع و هي تهدر على وش صبرت
كانت تحكي شحال تظلمت 
كانت باينة اول مرة تواجه فيها الخوف تاعها من شريكها و تقولو عملتلي و درتلي
كانت اول مرة تنفجر
مرانيش في الموقف باش نحكم شكون الظالم و شكون المظلوم
لكن لي وجعلي قلبي
كنت قاعدة نشوف في حاجة قاعدة تموت قدامي و انا معنديش في يدي القدرة على انعاشها
منقدرش نوض و نشد لحظات الصفاء و السعادة لي كانت بيناتهم و الحب و عهد الوفاء نضغط على قلبها لعلها ترجع للحياة و لا نديرلها حقنة ادرينالين ممكن تعاود تفتح عينيها كيما قبل
لانها خلاص
كل واحد منهم طعنها  من جهتو ؛ و هادا هو الحال لي وصل ليه اغلب الازواج لي وصلت علاقاتهم الى حدها الاخير
او اثنين في هاد الدنيا مش شرط من جنسين مختلفين
الحاجة الوحيدة لي تقدر تنقذ اي علاقة هي حقنة ادرينالين صغيرة قدامنا الكل و منستعملوهاش
هو الاعتذار
في اي علاقة ؛ طرف لازم يعتذر او يمد الحقنة و طرف يستجيب و يسامح
الاعتذار كيما حقنة الادرينالين
عجيب المفعول تاعو
ممكن انو يرجع علاقة تحتضر لصحتها
استعملوها و اعتذرو من اي شخص العلاقة بيناتكم في خطر.

…شمس ضياء

“انا نخلص وحدي بدراهمي واحد ما يخلص عليا”

اغلبية الجزائريات عندهم نوع من عزة النفس
تلقايها متحبش اي واحد يحن عليها
و لا يشفق عليها
و لا يشريلها كاش عفسة و لا يخلص عليها في مطعم
و تعتبرها اهانة ليها
انا ايضا من هادي الناس
هي حاجة مليحة و تخلي الوحدة منا تخدم غير علاجال متخليش روحها محتاجة لاي انسان
لكن هادي الحاجة عندها سلبياتها احيانا
مثال مع والديا ، كل ما حبو يشرولي كاش عفسة
انا بشفقة عليهم و على تعبهم علاجال هاداك الدورو نشوف في الحاجة لي رح يشروها فساد دراهم و نحاول نبين اني منحتاجهاش رغم اني باشد ااحاجة ليها
او في علاقتي مع خطيبي احيانا نتوصل اني نرفض هدايا ، اصلا هو عاد اكره سؤال عندو وش تحبي نجيبلك لانو علابالو مش راح نجابو عليه
و غالبا ما توصل لشجار
مفهمتش في البداية علاش يقلق هو من هاد الشيء
يخي الرجال ميحبوش المرأة لي تكلفهم بزاف
حتان اكتشفت حقيقة كانت غايبة عليا
قريتها في كتاب اسمو تصرفي كسيدة و فكري كرجل لستيف هارفي ، لي هو مستشار علاقات شهير جدا في الولايات المتحدة الامريكية
في اول جزء من الكتاب يحاول يشرح فيها طبيعة الرجل
و الهدف نتاعو في الحياة يتلخص في 3 اسئلة شكون انا و وش نخدم و شحال نكسب ، مهما تغير اصل او فصل الراجل افكارو في هادي الحياة تبقى اساسية فيه
و قبل ما يجاوب على هادي الاسىلة مش راح يحاول يعمل اي خطوة الى الامام سواء زواج ولا اطفال
و بلي الرجل يحس بالرجولة تاعو في قدرتو على اعالة الناس لي يحبهم
يعني كي زوجك ، خوك يشريلك عفسة و يحس انك فرحتي بيها راح يحس انو رجل
و الا شافك من النوع لي يحب يستقل ماليا و منسحقش الدورو تاعك لتم الرجولة تاعو تدفن حية
صح الاستقلال المالي للمرا مليح لكن مالازمش تحسس زوجها او خطيبها انها متحتاجلوش
و لا انها تقدر تعيش بلا بيه
يعني لا افراط و لا تفريط

…شمس ضياء