مقادير  الجينواز:

4 بيضات 

كأس  الا  ربع  سكر ( 3/4)

كأس فرينة

كاكاو

منكه  بأي   ذوق

 

طريقة  التحضير:

 

 

 

نخلطها   جيدا   حتى  يتاعف  ويبيض  الخليط

 

 

غربلي الفرينة   فوق  الخليط   بالتدريج   ونخلط  برفق  واللي  حبت  الرولي   بالشيكولاطة   ننزع  ملعقتين  من  الفرينة  ونقوم  بتعويضها  بملعقتين  كاكاو

 

 

 

ملاحظة : صغيرة   لي تخاف  من  الجينواز  تنشفلها   او اخافت  من  الفرن   تضيف  رشة  من  الخميرة  تغطي  العيوب

نضع  الخليط  في  السنيوة   والى  الفرن  لي نكونو مسخنينو  ونحطوه  على  حرارة  180 درجة

التزيين :

نخفق   كيلة  غبرة  الشانتيي  مع  كيلة  ماء  بارد  مع   مغرف  كبيرة  سكر  رطب  ومغرف  كبيرة  كاكاو

لما  تبرد الجينواز   نشربها  بعصير  برتقال  طبيعي  ونحشيها  ونزينها  بالكريمة وكل  وحدة  وتزيينها   وشهية  طيبة

 

 

… شمس حبيبة

 

 

الطفل يحب كلمة لا

طبعا الكثير من الامهات عندهم مشكل انو ولادها سواءا كانوا اطفال أو مراهقيين ما يسمعوش لهدرتها و ما يديروش و اش تطلب غير اذا عيّطت ….. عاودت ألف مرة …. ربما حتى تضرب في بعض المرات

اليوم جبتلكم تحدي جديد و هايل راح ماشي يكون شيء اكاديمي, و انما راح يكون جد ممتع و راح يعاونك انو وليدك الصغير أو وليدك الكبير يسمع الهدرة و كلمتك تولي مسموعة بطريقة مختلفة عن الماضي

راح يولي كاين احترام متبادل بينك و بين ولادك

راح كي يخلاص النهار ما تقوليش اووووووووووف مزيا رقدو باش نريّح

خاطش يومك راح يكون فيه اقل ضغوطات من الايام السابقة

تقدري تلحقي انك تتوحشيهم و هوما راقدين ماشي تتمناي الليل يزيد يطوّل

هيا نشوفو الطريقة الصحيحة لجعل الطفل صغير او مراهق مطيع و متعاون

طبعا الطاعة هي انو الواحد يدير حاجة مكانش حاب يديرها أو ما يديرش حاجة كان حاب يديرها طاعة لشخص كبير عليه ,يعني شخص عندو رصيد كبير عندنا من الثقة اتجاههم

يعني طبيعي شخص لا يطيع شخص ما عندوش ثقة فيه لأنه يا امّا لم يكسب ثقة الطفل بعد, يا امّا كسبها و ضيّعها لسبب ما كأن يكذب عليه او يعده بشيء ولا يلبيه له مثلا ,أو نطيع شخص يخلصنا من موقف صعب لا نستطيع الخروج منه

يعني الطفل يستطيع الاطاعة عندما يكون في مأزق مثلا و طبعا مرّات لا يلجأ للآباء لذلك الطاعة عند الطفل تستطيع ان تكون للوالدين او لشخص غريب بكل سهولة 

أمّا التعاون فهو ليس كالطاعة ابدا لأنّ التعاون هو اخذ و عطاء يعني شخص يتفق مع شخص على عمل شيء ما و يكون الشخص موافق على فعله طبعا يقبل الاسلوب و الوقت و وووو بالتفاهم و الحوار في ذلك و في الاخير يقوم به بناءاََ على ما أٌتٌفِقْ عليه

و هنا تكمن مشكلة الأمّهات, كيف ؟

الأم دائما تطلب من اولادها الانصياع ,يعني الرضوخ لأوامرها مهما كان الطفل رافض, مهما كان غير راغب بذلك ,مهما كان الطفل منزعج من ذلك ,هنا تصبح الطاعة .. طاعة عمياء

لذلك لازم تعرفي أنو طفل راح تكون حياته احسن بكثيييييير لو كان متعاون و ليس منصاع

هناك طرق كثيرة تجعل طفل متعاون معاك ,مثلا الأطفال من 5 سنوات فما تحت يحبو أسلوب الأسئلة يعني كان تشوفي الألعاب في لرض

تقوليلو هاذو الالعاب وين بلاصتهم ؟

راح يقولك في علبة الألعاب ,قوليلو برافو شحال شاطر وليدي

ياااااااااا انا راني حايرة كيفاش عرفت بلي بلاصتهم تم ؟

خير من كي تدخلي وتلقاي الألعاب في الارض تبداي تعيطي و تقوليلو حطهم في علبة الألعاب والا راني ندير و نعمل و نصنع ووووو

مثال آخر :

اذا كان وليدك يتفرج التلفزيون و انتي حاباتو ينوض روحي ليه و قوليلو بقاو 5 دقايق على نهاية وقت التلفاز ,تحب نفكرك كي يخلاصو ولا انت تعرف وحدك وقتاش يخلاص يا شاطر

طبعا انتي تكوني وريتيلو في ساعة الحائط ولا في ساعة يدو وقتاش يخلاص الوقت و يكون يعرف واش معناها 5 دقايق

الامور مرتبطة مع بعضاها

اذا حبيتي الأمر يجوز بسهولة أكبر

قوليلو كي يخلاصو 5د و طفي التلفاز تجي نوجدو كيف كيف الطابلة واش تحب تحط هذه المرة الطباسة ولا الخبز ؟

راح تفكيرو يروح للاجابة على سؤالك و يثبت معلومة أنو التلفاز راح يطفى راح يطفى ضرك لازم نخمم في واش ندير

اقراي الجزء الثاني من هنا 

…شمس ساطعة

بشرتنا  -مهما كان عمرها -تحتاج لعناية خاصَّة على الأقلّ مرَّة كلّ فصل لمنع و معالجة مشاكل البشرة كالحبوب و الرُّؤوس السوداء و الرُّؤوس البيضاء و لفح الشمس والجروح و الآثار و ترهل البشرة .

التَّنظيف المنتظم مفيد جدًّا و كافي لتحقيق العناية ؛ و هو في الحقيقة وقت استرخاء محبوب و غالي “حرفيا” لانو مكلف كي نديروه عند اخصائيَّة التَّجميل ؛ الآن تقدري تديريه في دارك بكلّ أريحيَّة و بدون تكاليف فقط بمكوِّنات من مطبخك و تحصلي على استنارة صحية لوجهك ؛ التَّنظيف يخلِّي الدَّم يدور مليح في الوجه و ينحِّي الشَّوائب تاع الجلد من الأعماق ؛ الإيجابي في التَّنظيف المنزلي زيادةً على كَوْنو متيسّر وفي متناول اليد هو قدرتو على التخصُّص حسب نوع البشرة و حساسيَّاتها مع إمكانية الحصول عليه في أي وقت .

باش تحصلي على البشرة النَّاعمة الضَّاوية نقدّملك هذي الطريقة السَّهلة لتنظيف البشرة طبيعيًّا و ماتحتاجيش كامل تروحي للاخصَّائية فقط تبّعي الخطوات التالية :

المرحلة الأولى : حمَّام بُخاري للوجه

الحمَّام البخاري ينفع البشرة بعدة طرق و مايكلّفك والو : يحسّن الدَّورة الدَّموية ؛ يرطّب البشرة الجافة ؛ يطهَّر بعمق المسام المغلوقة و يحلّ الرؤوس السوداء …

كيفاش ديري حمام بخاري للوجه؟:

1- التَّطهير : اغسلي وجهك بمطهِّر تع الحليب و الماء الفاتر أو احكمي قطنة اغمسيها في الحليب بحرارة الغرفة و نظّفي بيها وجهك مليح في حركات دائرية.

2– صبِّي حوالي لتر من الماء في قدرة و ديريه فوق النار يغلي ..نحِّي الوعاء من النَّار حطِّيه على الطَّاولة أو البوتاجي أو أيّ مكان آمن و خلِّي يهدا الغليان .

3– احكمي كمشة تاع الأعشاب العطرية (خضراء أو مجففة) ارميها في هذا الما السخون

• خزامى او نعناع اذا كانت البشرة دهنية
• بابونج للبشرة الحساسة
• النّعناع للبشرة الجافة .

     بعدما تحطِّي الأعشاب أضيفي كذلك عود عرق سوس راهو متعدِّد المنافع : يفتح المسام و ينظّف البشرة من كل نوع

و من أجل الإسترخاء و الرِّيحة الطيّبة زيدي ارمي كمشة تاع براعم ورود أو أزهار البرتقال .

4- ديري وجهك فوق الوعاء بمسافة حوالي 20سم و ديري بالمنشفة خيمة فوق راسك و فوق الوعاء .

5– خلِّي وجهك يتعرّض للبخار من 5-10 دقائق ؛ إذا ماكانتش بشرتك مرتاحة توقّفي بالخف خصوصا إذا كنتي تعاني من الحساسيَّة أو الحبوب

6– امسحي وجهك بمنشفة جافّة .

ثانيا : أزيلي النقاط السوداء

احكمي 2 مناديل ورقية دوّريهم على السَّبَّابتين تاوعك و اضغطي برفق على الحبَّة باش تخرّجيها ؛ كي تديري الحمام البخاري يتفتحو المسام و يولِّيو الحبوب السَّوداء يخرجو بسهولة و مع الأعشاب العطرية و خصائصها المُطهِّرة راح تتجنّبي الإلتهابات و بالتَّالي ماتخافيش من هذيك الحبوب الكبيرة الحمرا .

ثالثا : ديري تقشير

في هذي المرحلة راح يكون من السُّهولة أنّو مكوِّنات التَّقشير تدخل للبشرة و مع التَّقشير راح تكمّلي تحضير الجلد لاستقبال قناع التجميل :

• خلّطي الملح أو السُّكر مع زيت الزِّيتون و عصير اللّيمون : ديريه على وجهك ودلّكيه في حركات خفيفة دائرية لعدّة دقائق و خلِّيه في وجهك حتَّان يولِّي نصف جاف ؛ و مبعد شلّلي بالما الدافي ؛ التَّقشير ينحِّي كامل الخلايا الميتة .
• كاين عشرات وصفات التقشير الاخرى لي ممكن تجربيها

رابعا : ديري قناع للوجه

بشرتك الآن تحرّرت من كلّ الشَّوائب تقدري ديرلها قناع منزلي راح تمتصّ بسهولة كلّ المواد الفعَّالة اللِّي فيه :

اختاري القناع اللِّي يناسب بشرتك (و تأكدي بلي بشرتك راح تعشقو) ديريه على وجهك 10 – 12 دقيقة و شلّلي ؛ راح تلقاي البشرة الرّطبة النَّاعمة لأنك بالقناع أمَّنتي لها التَّرطيب و التَّغذية و الحماية و الإنتعاش و الإضاءة .

القناع ضروري بعد التَّقشير لأنُّو كي ديري تقشير تكوني جبدتي الحماية الطَّبيعية نتاع الجلد ؛ يسمّى لازم نتي توفّريلها الحماية لأنَّها الآن أكثر حساسيّة و عُرضة للعوامل الخارجيّة ….هايليك وصفة لقناع منزلي مفيد :

في إناء هرّسي موزة زيديلها مغيرفة مايونيز و مغرف عسل و شويّة عصير ليمون ؛ ديريها على وجهك 10 – 12 دقيقة و مبعد شلّلي باش تحصلي على النُّعومة و اللَّمعان ؛ الموز و العسل هوما في الأصل مرطِّبين طبيعيَّين زيديلهم فقط المكوِّنات لي تناسب نوع بشرتك .

دلّلي بشرتك و اعتني بجمالك بدون ماتثقّلي على جيبك و بما أنو البشرة تتغيّر فصليًّا حاولي تحصلي على التَّنظيف العميق مرة كلّ فصل على الأقلّ ؛ و لكن إذا كنتي تعاني من مشاكل كبيرة متعلّقة بالبشرة كيما الحبوب و الخلل الهرموني ؛ الاكزيما ؛ َّالضرر النَّاتج عن الشمس …يُفضَّل دائما استشارة طبيب مختصّ أو روحي لأخصَّائيَّة تجميل تكون تحت إشراف طبيب جلديّة بحيث تكون المنتجات و الأجهزة المستعملة في تقديم العناية و التَّطهير على درجة من المهنيَّة الطبيَّة ..

 

 

…شمس هنية

 

القفزة التِّكنولوجية تاع عصر الغسَّالات الأوتوماتيكية أنتجت بزاف خيارات متعلّقة بعمليّة الغسيل ؛ و طرحت تساؤلات جديدة مرتبطة بالمفاهيم و العوامل لي تخصّ  تأثير الغسيل على شكل الملابس و طول عمر الأقمشة و نوعيّة الخدمة و تقليل التّكاليف و الإقتصاد في الفواتير من خلال القرارات المعرفيّة المتَّخذة بشأن حرارة المياه و دورة الغسيل .

كلّ يوم تكوني راح تغسلي لحوايج لازمك تديري 3 اختيارات ضروريّة قبل ما تبداي تشغّلي الغسالة

• الاختيار الأول يخص “كمية الغسيل” : يعني شحال تحطّي حوايج في الغسالة و بالتاّلي كميّة الماء اللّازم للعمليّة
• الاختيار الثّاني يتعلّق ب “حرارة المياه” لمختلف عمليات الغسيل (تصبان و تشلال) .
• الاختيار الثّالث مُوجَّه “لدورة الغسيل” المناسبة لنوعيّة لحوايج لي راح تغسليهم .

أولا : كمية الغسيل 

 

 

هنا الاختيار بسيط و لكنو مُهِم و يتعلّق أساسًا ب”سِعة أنبوب الغسالة” وين تحطّي لحوايج و تتمّ عمليّات الغسيل  لانو قدّ مايكون الأنبوب كبير قدّ ما تقدري تحطّي فيه حوايج تغسليهم في كل مرّة ؛ و سعة الأنبوب تعني عدد الكيلوغرامات تاع الملابس الجافة لي تقدري تحطّيهم في الغسّالة ..إجمالا 1 كلغ يساوي تقريبا كسوة كاملة يعني (سروال و قميص و ملابس داخلية و تقاشر )…المشينة لي سعتها كبيرة تخلّيك تغسلي مرات أقل (ترفد بزّاف) و بالتّالي فواتير كهرباء اقل و كذلك التّأثير على البيئة.

 

 

 

 

سعة أنبوب الغسّالة أو حجم الغسلة يبدا من 5كلغ حتى 12كلغ…و لكن تذكّري الكبير مش دايما هو المليح لأنو المشينة تخدم مليح كي تملايها و لكن مش بالمبالغة في التحميل ؛ لذلك احصلي على مشينة ماتقعديش تعاني باش تملايها …يعني ما تغسليش بيها و هي نسبيا فارغة و ثاني ماتعمريهاش فوق الحد …يعني اختيار سعة الغسّالة تاعك يكون حسب أفراد اسرتك ..إليك هذا الدليل le guide:

 

• الأعزب أو زوجان بدون أطفال سعة أنبوب الغسّالة 5كلغ
• زوجان مع طفلين سعة أنبوب الغسّالة 6كلغ
• زوجان مع أربعة أطفال فأكثر سعة أنبوب الغسالة 6كلغ+

في المجمل لازم دائما ترجعي لكتيِّب الإرشادات تاع غسّالتك للحصول على المعلومات الدقيقة . .

 

 

ثانيا : حرارة المياه

 

الإختيار الصَّحيح للحرارة لي تغسلي بيها الملابس مُهم باش تحميهم من التّكسال و الفسيخ و التّكسار الدليل  le guide لي تعتمدي عليه هو الملصقات اللي في الملابس ؛ هذو يوجّهوك مليح بخصوص نوعيّة الغسلة و درجة حرارة الميّاه ؛ أحد مفاتيح الغسيل الصّحيح هي الفرز الجيِّد للملابس و غسيل الحوايج المتشابهة مع بعض .

كانت دائما كاينة نظريّة بلِّي الغسيل المليح لازملو الما السخون و لكن الحقيقة أنّو نوعيّة المواد المصنوع منها القشّ هي اللي تحدّد حرارة المياه …كاينة بزّاف الأقمشة الصِّناعية اللي تتضرّر من الما الحار ….إليك القاعدة الصحيحة :

• الماء البارد : هو الأفضل للألوان الدّاكنة و الأقمشة الحسّاسة و هو الإختيار الأمثَل لكلّ الملابس الخفيفة المسجّرة (المنقطة أو الي فيها وردات ..الخ) و كذلك زيّ العمل ؛ مهما كانت نوعية القماش الماء البارد مايضُرّش الكتَّان المغسول و يحافظ على جودة النّوعية
• الما الدَّافي : مناسب جدًا للأقمشة الصناعية SYNTHETIQUE و أقمشة الضّغط الدائم (نوع من القماش الصناعي) خيّري الما الدّافي لكلّ الملابس الملوّنة لي تكون موسّخة خفيف بالبقع و الزّيت .
• الما السخون : مناسب للأقمشة القطنيّة و البيضاء خصوصًا لي تتلبس قريب للجسم كيما الملابس الدّاخلية و التّقاشر و أغطية السّرير ؛ و كلّ الغسيل لي موسّخ خفيف و النّظافة فيه أهم من حماية اللّون كيما جينز للعمل ؛ زيّ الميكانيكي ؛ قنادر دار ؛ ملابس لعب للأطفال …هذو تحتاجيلهم الما السخون باش تنحّي البقع .
• مهما كانت حرارة الما اللّي اخترتيها للغسلة الّتشلال يكون بالما البارد …أولا باش توفّري في الطّاقة و ما تخسريش الدّراهم على تكاليف الخدمة و ثانيا لأنك ماتحتاجيش الما السخون في الّتشلال .

 

ثالثا : اختيار الدورة

كي تخيّري دورة الغسيل المناسبة في الغسيل و التصبان تساعدي الملابس باش يخرجو نظاف و يحافظو على أفضل مظهر ليهم ؛ ماكانش أسماء ثابتة لدورات الغسيل في كل الآلات ؛ كل موديل يسمي اسم مختلف ؛ انتي اعتمدي تقديرك أو اقراي كتيِّب غسّالتك باش تخيّري الدّورة المناسبة ؛ هاذو دورات مشتركة لبعض الغسالات الشهيرة :

 

 

• الحسّاسة delicat ؛ الغسيل باليد ؛ الصُّوف :

 

 

هذو التَّسميات متشابهة و تقدري تعتمديهم كفئة واحدة استعمليهم للحوايج الحسّاسة و الرّقيقة ؛ دورات الغسيل الأخرى ممكن تتلفهم ؛ هذي الدَّورة عندها خاصيَّة السُّرعات الدُّنيا في الخلط و الدَّعك أثناء الغسيل و السُّرعة الدُّنيا في الدَّوران ؛ دورة السُّرعات الدُّنيا والغسلة القصيرة تخلِّيك تتجنّبي الملابس يتكسّلو او يتقطّعو .

 

 

• الغسيل السريع RAPIDE :

هذي الدورة من المفروض مانستخدموهاش لملابسنا و لكن للحالات الطارئة دائما عندنا مئزر متاشي أو قميص فيه العرق باش يتغسل وحدو ؛ هذي الدَّورة تستخدم مدَّة الغسل الأقصر و سرعة التَّدوير الأعلى و سرعة التَّجفيف الأقصى ..تجنّبيها للملابس الخفيفة ولاَّ الحوايج الحسَّاسة …ردِّي بالك تعتمديها دائما .

 

 

• دورة الأقمشة الصِّناعية SYNTHETIQUE ؛ مراقبة التجعد ؛ الملابس اليومية ؛ الألوان الداكنة :

هذو الدَّورات الأربعة تسميّات مختلفة لنفس المفعول ؛ يناسبو كلّ الأقمشة الصِّناعيّة أو المختلطة و ملابس الضغط الدائم و كلّ الأقمشة الملوّنة ؛ تُستعمَل فيهم السُّرعة الوسطى للغسيل مع سرعات تدوير دنيا و فترات راحة لتجنُّب التّكسار (التجعدات ؛ طيات الملابس) .

 

 

• العادي NORMAL :

هذي الدَّورة هي للقطنيّات و الأقمشة المختلطة اللّي فيها وسخ متوسِّط و توفّق بين عامل سرعة الغسيل العالية و سرعة الدَّوران القصوى ؛ هكذا يكون الغسيل قويّ على الملابس .

 

 

• الخفيف leger :

اعتمدي دورة الغسيل الخفيف للأقمشة المتينة مثل المناشف و الفوطات و سراول الجينز ؛ هي تناسب كذلك الحوايج الموسّخين خفيف ؛ هذي الدَّورة توفّر فترة غسيل طويلة مع سرعة عالية للخلط و سرعة دوران قصوى باش تنحِّي قدر المستطاع الرُّطوبة من الملابس .

 

 

• السميك :

كاينة غسّالات عندهم دورة الغسيل السّميك للحوايج الخشان كيما الزّوَر و البطَّانيَّات و اللّحاف و الزّربية و الوسايد ؛ هذي الدَّورة تبدا بفترة تشماخ (نقع) باش الما و الصابون يتخلّلو لحوايج كليًا ؛ و مع مفعول الغسيل السَّريع و الدَّوران المتوسِّط تبقى الآلة في حالة التوازن.

 

 

• بياضات المنزل LINGE DE MAISON ؛ DRAPS :

تُستعمَل لكلّ الملابس و القطع العريضة من الأقمشة ؛ كي تعتمدي هذي الغسلة لحوايج الكبيرة ماتديرش كتلة وحدة أو دير كرة يعني ماكانش تشابك .

 

 

• الأبيض :

في أغلب الآلات دورة الغسيل الأبيض مُصمَّمة لتبييض لحوايج البيضا ؛ هذي الدورة تنظّملك الوقت المناسب لإدراج سائل كلور التبييض (كيما الجافيل) في مسار الغسيل ؛ دورة الغسيل الأبيض عندها سرعة غسيل عالية و كذلك سرعة الدوران .

 

 

• دورة البخار :

 

كاينة آلات غسيل عالية المستوى فيها الغسيل بالبخار ؛ هذي الدّورة ماتغسلش الملابس و إنَّما تُستَعمل لإزالة التَّجعُّدات منها بسرعة و للحصول على الإنتعاش و الإحساس بالنظافة للملابس و لكنَّها لا تقدِّم تنظيفًا عميقًا.

 

 

• الشطف و الدوران (التعصير) :

هذي الدورة ماديريلهاش الصَّابون و ماتقدّمش تنظيف عميق و إنما تشلّل و تعصر البلل من القماش ؛ تقدري ديريها للحوايج اللي يفسخو ولّا كي تكوني حابّة نشلّلي برك .

 

 

• تحديدات الضَّبط النِّهائيَّة :
• مستوى الاتساخ : كاينة آلات غسيل عندها مستويات ضبط للوسخ ؛ إذا خيّرتي وسخ قليل يكون وقت الخلط صغير ؛ و كلّما تزيد درجة الاتِّساخ يزيد وقت الغسيل .
• سرعة الدَّوران النِّهائية : إذا كانت غسّالتك عندها سرعة دوران نهائيّة لي تقدري تبدّليها خيّري سرعة الدَّوران الدُّنيا للأقمشة الحسّاسة باش تنقّصي التَّجعُّدات و التَّشابك و التَّلف تاع المنسوجات ؛ سرعات الدَّوران النِّهائيَّة العليا تخرّج الما مليح و تنقّص وقت التّنشاف و تساعد في الحصول على دورة تجفيف سريعة

من أجل كلّ ذلك أعرفي آلتك مليح باش تعاونيها و تحافظي على سلامتها و هي تعاونك بالحصول على أقصى درجات النظافة ….و المثاليّة .

 

 

…شمس هنية