الملابس النّظاف علامة بارزة على نجاح المراة في الاهتمام بأفراد الأُسرة و توفير الرِّعاية اللَّازمة للحصول على الحدّ الكافي من المظهر الجميل و الشَّكل المحترم .

الغسيل في أيامنا هذي مابقاش عملية صعبة و مستنزِفة للوقت و الجهد ؛ هذي المَهمَّة تولَّاتْها الآلات الحديثة و المنتوجات التنظيفية عالية الجودة ؛ المسألة بقات معرفية بالدَّرجة الأولى : يعني تعرفي كيفاش تستخدمي الإمكانيات الكبيرة لي وفّراتهالنا تكنولوجيا هذا الزمن لتحقيق التميُّز و الإمساك بكل جوانب التَّسيير الحسن و المتابعة الجيِّدة لغسيل الملابس و الكتان ..

لتقديم أفضل خدمة غسيل بدون خسائر أو تخسار تِبّعي هذو المراحل في كل وجبة تستعملي فيها غسّالتك للحصول على أفضل النتائج :

تاكّدي أوَّلا من حاجة الملابس  للغسيل ؛ تجنّبي الغسيل العشوائي و اعرفي تحديدا وقتاش تغسلي كل قطعة و بعد كم لبسة؟ ؛ هذي تقنية مهمة ينبغي التمكُّن منها لتحقيق إنجازات اقتصادية و الحفاظ على جودة الملبوسات …إذا تأكدّتي من القطع لي حابة تغسليهم ابداي :

أولا : حددي نوعية الغسيل الموجهة لكل فئة قماش حسب تركيبها الصناعي من خلال تفاعلها مع الحرارة و المياه و محاليل التنظيف و ميّزي كلّ قطعة واش نوعية عناية الغسيل لي تقدّميهالها ؛ كاينة المنتوجات القطنية و الصناعية و الصوفية كل نوع تعامليه بشكل خاص

ابداي أولا بفصل الملابس لي ماتدخلش للغسّالة يعني فئة الغسيل المنفصل (لي تنغسل وحدها) او الغسيل باليد هذي حطّيها في كومة وحدها و انتبهي للملصقات في الملابس ضروري تتقني قراءتها إذا قالتلك بلّي القطعة تحتاج للغسيل الجاف فالأَوْلى أخذها للمحلات المختصة .

ثانيا : قومي بالفرز

افرزي كل لملابس لي راح تغسليها حسب اللّون (باش ماتفسخش الألوان و ترمي على بعضاها ):

• كفئة أولى ديري الأبيض و الفاتح و الرمادي الفاتح و الملابس المطبوعة على خلفية بيضاء في كومة
• و الملابس الملونة في جهة أخرى : الأسود ؛ الأحمر ؛ الأزرق البحري ؛ البني ؛ .الرمادي الداكن

ثالثا : زيدي افرزي

الفرز في المرة الثانية يكون للمجموعات لي فصلتيها سابقا حسب اللون : وزّعيها في مرحلة ثانية حسب الفئة الصناعية أو مادة التَّصنيع ..

• يعني تحكمي كومة الملابس البيضاء و الفاتحة و تنحي منها لمناشف و الشراشف (الدراوات و الفوطات)
• و الملابس الداكنة افصلي ال t-shirtsو jeans على الملابس الأخف وزنا كيما القنادر و القمصان و البلوزات
• كل فئة تنغسل وحدها .

كي تغسلي حسب النّوع الصِّناعي للمادّة تقدري تستعملي درجات الحرارة المناسبة للمياه و تتحكمي في دورات التجفيف الصحيحة باش تبقى الملابس ناعمة و على صفتها الاصليّة ماتوبرش و ماتنسلش و ماديرش ألياف

و لكن كي مايكونش كاين بزاف لحوايج باش تعمّري لمشينة حسب النوع الصناعي (الفرز الثاني) تقدري تغسلي حسب اللون فقط يعني تخلاَّي على الفرز حسب النوع و إنما فقط اختاري دورة الغسيل لي تناسب أنعم الملابس في الحِمل (الوجبة او الغسلة)

رابعا : ديري الصَّابون

استعملي كميّة المنظِّف لي تلقايها في توجيهات الاستعمال المكتوبة على العلبة او العبوة للمنتج اللي اخترتيه ؛ إذا كانت الملابس فيها بقع صعبة عالجيها و أزيليها قبل الغسيل : استعملي مزيل البقع أوالغسيل اليدوي و حطِّي الصَّابون في قجر الصابون في الغسّالة او في حجيرة الغسيل قبل ما تحطِّي الملابس باش تتجنبي بقايا الصابون على الكسوة .

خامسا : خيّري دورة الغسيل و حرارة الميّاه

كي ماتكونش الملابس موسّخة بزّاف الما البارد يلبِّي الاحتياجات و يجنّبك مشاكل الغسيل المعروفة و لكن الاستثناء هو في الملابس الداخلية القطنية و الدراوات اللي يحتاجو الماء الساخن لإزالة دهون الجسم ؛ أما بياضات السرير و المناشف هذو ديريلهم غسلة في أقصى درجات الحرارة على الأقل مرة كل 3 غسلات ؛ و التشلال دايما بالما البارد

أمَّا دورة الغسيل خيّريها حسب المادة الصناعية للقطع المغسولة (الوجبة المغسولة: قطن ؛صوف ؛صناعية ؛ناعم …. )

سادسا : زيدي اتأكدي مرة أخرى من القطع في المجموعة

مجدَّدا ديري فحص نهائي : أيّ بقع أزيليها ؛ فرّغي الجيوب ؛ تأكدّي من عدم وجود أوراق أو مناديل أو الصرف و الدراهم ؛ نحِّي كلّ الإكسسوارات كيما الأحزمة و قطع الزّينة ؛ أغلقي السحابات و الازرار باش ماتفسدش في الغسيل .

سابعا : حمّلي الغسّالة

حطِّي الكسوة في الآلة …عمرك ماتعمّريها كامل ؛ الملابس يحتاجو غرفة يتحرّكو فيها باش يدورو مع الماء لذلك ما تملايهاش…. دائما خلي شبر فارغ و إذا حبيتي تَحْمِي التَّركيب الصِّناعي للقطع المغسولة و تتجنّبي المظهر المغسول قلّبي لحوايج المخيّطة و المنسوجة و الشورتات و السراويل القصيرة و الجانب المزخرف و اغسليها مقلّبة (الداخل لبرا )

ثامنا : فرّغي المشينة

مباشرة كي تنهي الغسّالة و جبة الغسيل فرّغيها و نحِّي لحوايج باش مايتكسّروش ؛و لأنو قدّ ما تخلّيهم فيها مشمّخين تجي فيهم الرّيحة ؛ و حالًا أنشريهم يشيحو أو جوّزيهم للنّشافة تجفّفهم

تاسعا : حطِّي في النّشّافة

مع الاحتفاظ بالفرز حسب النوع و اللون ماتخلطيهمش و نشّفي لحوايج لخفاف مع بعض ؛ و خلي الثقيل مع بعض باش توازني حرارة او سرعة التجفيف المناسبة و تحمي الملابس و تحافظي على مظهرها .

عاشرا : أنشري و طبّقي

بمجرّد ماتكمّلي التّجفيف علّقي كل قطعة تشيح ثمّ طبّقيهم و اللي تحتاج للكيّ طبعا حدّديها.؛ ما تخليش يتراكمو في السلّة حتى للغسلة القادمة هذا يضيّع لك جهدك …مباشرة خبّيهم في أماكنهم تلقاوهم واجدين في كل لحظة ابتداء من الغد

الغسيل يصبح أسهل بكثير كي ماتخليهش يتراكم و تسيّريه بنظام بحصص صغيرة على المراحل الصحيحة ؛ قدّ ما يكون عملية مدروسة يمدّ نتائج قيّمة ؛ أمّا إذا خليتيه حالة طارئة للضَّرورات القصوى غالبًا راح يكون غير مُجْدي و مُكلِّف .

…شمس هنية

تركب سارة الحافلة أخيرا في طريق عودتها الى البيت بعد الإنتظار المُطوَّل تحت أشعة الشَّمس اللَّاذعة و تعتليها متعبةً من الأفكار الثقيلة و الخواطر الحزينة عن الفشل المتكرِّر في البحث عن العمل و السَّعي الخائب وراء كل الفرص الضائعة منها إلى غيرها من أولي الحظوظ و أصحاب التسهيلات و ذوي النصيب ؛ و تقف حانقةً في زاوية الحافلة و الغضب يتزايد في قلبها من الوقت الرديء و الرُّجولات الغائبة و هي تحدِّثُ نفسها عن الزَّمن الذِّي كان فيه الرِّجال يقفون من المقاعد لتجلس النساء و هاهم الآن لا يجدون سببا ليقوموا حتى لشيخٍ أو عجوز ؛ تقول ذلك في نفسها و هي تشاهد سيِّدة مُسِنَّةً قد أتعبتها الايام تلتفت يمينًا و يسارًا علَّها تجد مكانا خاليا تُلقي عليه جسدها الضئيل و تمنَّت في نفسها لو أن لها مقعدا فقط لتقوم لها منه ؛ ثمَّ تستمر الأفكار السيِّئة في التَّوارُد و تتذكَّر لوهلةٍ عامل المؤسَّسة الذِّي أمعن في التأكيد لها أنّ الوظائف المعلَنة التي جاءت لأجلها معروفٌ أصحابُها و مُنْتَهٍ أمرها و أنَّ الإعلان الذي قرأتْهُ إنما هو ذرٌّ للرَّماد في العيون و إجراءٌ روتينيٌّ لا غير.

 على ان سارة سمعت هذا الكلام مرارا في مُجمَل محاولاتها للعثور على عمل فهي لاتزال تُمنِّي نفسها أنَّ الحظَّ سيواتيها يوما ما بمنصب “لا صاحب له”  ربما فقط ليس اليوم ؛ و لكن هذا الإحباط سيُضافُ إلى قائمة الإحباطات الأخرى لتترسَّخَ عندها القناعة بأنَّ حلُمها سيبقى حلماً و أنَّ بلاءَ المحسوبيات في الوظائف قد عمَّ و أصحابُ الشَّهادات الحقيقيَّة مُحَيَّدون في هذا البلد مغيَّبون عن مواقع الكسب التِّي أفنَوا أعمارَهم في طلبها بالجِدِّ و الاجتهاد و الطُّرُق المستقيمة.

و تستمرُّ في الاسترسال الحزين و هي تذكر سنوات الدراسة و الجدّ و الشَّقاء و الضَّنك المرادفة فعليًّا لمعنى المعاناة في تحصيل العلامات عندما كانت تتعرَّض و مثيلاتُها للضُّغوط من أجلِ الْحصول على نقاطهنَّ المستحقَّة و يُطالَبْنَ بالإبتسامةِ العذبة و الكلمة الحلوة و العطر النفَّاذ و تَحَمُّلِ غلاظة الأساتذة و الصَّبرِ على تلميحاتهم السخيفة و نُكاتِهم السَّمِجة المُرافِقة دائما لكل سؤال علمي او استفسار أكاديمي ؛ و طبعا الأوفرُ حظًّا هي الأكثر جمالا و الألطف حديثا و التي تُتقن “إدارة علاقاتها” مع الجميع و كأننا في إحدى مسابقات الجمال (ما لم تكن سارة منافِسَةً فيه بمظهرها المتحفِّظ و أسلوبها الرَّسمي) ؛ثم تتساءل مستدركةً :” كنتُ أظن أنَّ الأمر سينتهي في الجامعة و أنها سنوات قليلة و “صبر ساعة” فرفعت ُالتَّحدي بقوَّة المجالد و ألزَمْتُ نفسي التَّرفُّعَ و التَّعفُّف و صددتُ عنهم و وطئتُ بقدمي رغباتهم و صَوْلاتهم …و لكن و بعد سنتين من التَّخرُّج بات الأمر ساحقا لهمَّتي مدمِّرا لطاقتي مهينا لعزَّتي قد أعياني فيه طلبُ رزقي …”.

ثمَّ تستطرد : “و ليْتَني كُفِيْتُ هذا الأمرَ كلَّه بالزَّوج و الولد ؛ فواللهِ لاحاجة لي في عملٍ خارجَ البيت إذا استقرَّ قراري على قائم يكفيني و مُحِبٍّ يُؤويني و ولدٍ يفديني…” ؛  ثم تنهَّدت بحسرة عندما ذكرت إعراض الخُطَّاب و انصراف الرَّاغبين و عادت لتتساءل مجددا و قد استولى عليها فقدان الثقة و نقص تقدير الذَّات : “ألسْتُ جميلةً؟ كنت أظنُّ أنِّي كذلك ؛و كيف أكون جميلة و أنا لا أُعْجِبُ النَّاس ؟ لَيتَهم انتبهوا إلى مُورِّثاتي الجينيَّة (و كانت خرِّيجة علوم احياء) أليستِ العيون الخضراء امتيازًا؟ و البَشرة الزُّهرية طلبًا؟ و الشَّعر البندقيُّ الغزير هدفا عزيزًا و القوام ُالنحيفُ… و الجسدُ الْمُتَّسِقُ… لتعود الى الفكرة الأولى : ” أليسَت هذه المواصفات صفقة؟ لماذا يُعْرضُ عنِّي الْخُطَّابُ إذًا ؟..و الخاطب الأخير الذي لم يعد ..” لينقطع هنا حبل فكرها براكبةٍ أخرى بجانبها تصرخ فيها : “ابتعدي عنِّي ؛ أنت تُضايقينني ..”.

..سارة المُستفزَّةُ أصلاً من الدُّنيا ؛ المُستَنْفَرَةُ حرفيًّا من الضَّغط المستمِر عليها تنفجر فيها : “و هل الحافلة ملك أبيك؟ و هل الاكتظاظ عليك وحدك؟ أم علينا ان نوسِّع لفخامتِكِ المكان ؟ ؛ و إذا كان مقامك أعلى فلماذا تركت ِالطائرةَ و جئتِ هنا تزاحمين الرِّعاع ؟…”.

و هنا تزعق الرَّاكبةُ بالصُّراخ المَحمومِ و الكلام القبيح و الصَّوت العالي المذموم ؛ سارة الفتاة “المتربية” عندما استعادت إدراكها لوهلة و سيطر عليها العقل و المنطق عَلِمَتْ أنَّها في حافلة تعج بالغثِّ و السمين و الرجال و النساء و الكبير و الصغير و المليح و القبيح ؛ و أنَّ أَيَّ شابَّةٍ لائقةٍ عليها أن لا ترفعَ الصَّوت و أن لا تخوضَ معركةً على الملأ و أن تتجاهل كل صنوف الإزعاج و الأذى؛ فالتزمت مجدَّدا بالصَّمت و انسحبت في هدوء لعلَّ أن تصمت الحمقاء.

و اقتربت محطتها و توقَّفت الحافلة فنَفَرت للنُّزول مسرعةً فارَّةً بما بقي من كرامتها  ؛ و تركت لها الجمل بما حمل فربَّما أمكَنَها أن تجد المتَّسع و يكفيها المحل.

أمسكت الفكَّة و وضعتها في يد قاطع تذاكر الحافلة و صُدِمَت عندما بدأ هو أيضا بالصراخ عليها و إهانَتِها و أَلْجَمَهَا الذُّهول لفعله المنحرف و سلوكه الظالم.

اقراي الجزء الثاني من هنا 

…شمس هنية

الاطباء يقولو انو الصوم ليس خطر على الجنين 

في الحقيقة انا كنت في الاول نقول هاذو مهابل ولا كيفاش انا نهار صمت قريب مت تعرفي احنا نساء نزيدو شوية فيها كي يزلق الواحد نقولو مات 

لكن من بعد فهمت قصدهم هو صح الصيام ما يضرش لكن لي يضر هو الانسان كيما قلتي من قبل يعني هي المراة لي غير يأذن طيح على الماكلة ضربة وحدة من بعد تنضر و هذا هو لي يسبب مشكل

و كاين ايضا المراة لي تاكل بزاف و ما تشربش الماء و تقول انا كليت بزاف كيفاش دخت و ما قدرتش نكمل اليوم

للأسف بزاف ناس ما علابالهمش انو الماكلة بدون ماء ما عندو كيفاش يستفيد بيها الجسم يعني اذا كليتي حاجة لازم كمية من الماء تكون كاينة في الجسم باش تهضمها المعدة و الجسم يستفيد منها

لكن بقولي هذا لا يعني ان المراة تاكل و تشرب في نفس الوقت هذا خطأ خاطش كي تشرب خاصة و هي حامل معروف ان معدتها مرخية و الانزيمات تتعطل بشكل نسبي و تزيد الماء يعني راح تنقص من تركيز الانزيمات و بهذا تنضر و يصرالها غازات كبيرة لي تضرها مع الحمل

لذلك ننصح كل وحدة كي يأذن الآذان اوّل حاجة ديريها هي ديري في فمك قرصة ملح ثم تشربي كاس محلول فيه ملعقة عسل ما تنسايش تشهدي و تدعي راه دعاء الصايم مليح 

المهم بعدها تاكل 7 حبات تمر و تصلي و تقعد و تشرب حتى 4 كاس ماء لكن ماشي ضربة وحدة كل واحد 15د بينهم

بعدها كي تكملهم و يفوت 15د على آخر كاس تحكم الشربة و تاكل نصف واش موالفة تاكل في رمضان بدون حمل

و تقعد شوية 15د و تاكل الباقي

بعدها ب 30د تاكل حاجات مثل خضر مفورة طبعا معروف على الحامل من الاحسن تبتعد على السلطة الخضرة و الخضار الغير مطهوة راني شرحت انو مكاش انزيمات و المعدة مرخية مراحش تطحنهم مليح و تنضري

و اذا حابة تتأكدي كولي اليوم سلطة خضرة وراح تشوفي كيفاش تخرج حاشاكم و حاشى قدركم كيما راهي مع الفضلات لأنو المعدة ما ترحيهاش طبعا راني نهدر مع الحامل

حسنا بعد ما تاكلي خضر اقعدي 30د او 1 سا من الاحسن و كولي الطبق الرئيسي

طبعا لاحظتي كل هذا الوقت ماتشربيش الماء حتى يفوت على موعد كامل واش كليتي على الاقل 2سا و من الاحسن انتي حامل 4سا و بعدها اشربي كمية تاع الماء حتى تلحقي ل 2سا قبل السحور

اتسحري من الاحسن  بفلان وخلاص المهم حاجة فيها حليب و سكر و نشاء و تمر 7 حبات و اذا حبيتي فاكهة

كل هذا قبل 1سا من الامساك و بعدها قبل الامساك ب 15د اشربي قدر من الماء

هذا البرنامج مستحيل راح تجوعي او تعطشي او دوخي الا اذا كان عندك انيميا

معلومة للحوامل او النساء كامل كاين بزاف لي ماعلابالهمش انو كي تاكل حاجة مصدر للحديد مالازمش تاكل معاها في نفس الوقت مادة مصدر للكالسيوم

و هذا هو سبب نقص الحديد عند الكثير من الناس خاطش ما يعرفوش هذه المعلومة

مثلا تشرب حبوب الحديد مع كاس حليب

نقولك صديقتي ما درنا والو كلي رميتي هذاك الكاشي في المهملات

و معلومة اخرى الحديد بدون مثبّت لي هو فيتامين سي ما درنا والو

يعني كي تاكلي حديد لازم تشربي مثلا عصير ليمون او تاكلي فلفل حلو او كيوي و الا مكاش حاجة راح تساعدو على الثبات في الجسم و يخرج مع الفضلات اكرم الله وجهكن

…شمس ساطعة

كامل عندنا اوقات نكونوا فيها مفتقرين للثقة بأنفسنا او ما نحسوش بالرضا على رواحنا
بصح كي تولي قلة ثقتنا برواحنا مشكلة طويلة الأمد هنا المشكل لانو راح يكون عندها تأثير ضار على صحتنا العقلية وعلى حياتنا بسبب كون فقدان الثقة بالنفس علامة على سوء تقدير للذات
واش هو تقدير الذات والثقة بالنفس :
احترام الذات هو راينا الايجابي في انفسنا (تقديرنا لانفسنا).
و الثقة بالنفس هي انعكاس هذا التقدير في حياتنا و أمام الآخرين.
العلاقة لي نعيشوها مع رواحنا تأثر مباشرة على شكلنا في الحياة وعلى اسلوبنا في التعامل مع الاخرين ,احترام الذات والثقة بالنفس هما اساس صحيح لهذه العلاقة.
كي يكون عندنا احترام ذات صحي نولوا نحسو بلي كلشي فينا و في حياتنا ايجابي عموما (يعني ماكانش نقص) وهذا امر مليح يخلينا قادريين نتعاملوا مع تغيرات الحياة صعودا او هبوطا بشكل افضل.
كي يكون تقديرنا لانفسنا منخفض أوقليل نوليو نشوفو لحياتنا وانفسنا بسلبية وهذا يقلل من قدرتنا على مواجهة تحديات الحياة وصعوباتها.
ومع هذا التفكير كاين سؤال مهم بزاف لازم نطرحوه ولي هوا :واش هيا الحوايج لي تسبب قلة ثقتنا برواحنا؟
هذا الامر يبدا معانا من الصغر (مرحلة الطفولة) الاباء ,الاخوة ,المعلميين ,الاصدقاء,… وحتى وسائل الاعلام هذو كامل يبعثولنا رسائل ايجابية او سلبية على انفسنا ؛ بصح لسبب ما الرسائل السلبية أو الرسائل لي تقلك راكي ماشي مليحة كفاية هي لي راح تترسخ في ذهنك .
أكيد صعيبة عليك تعيشي في ظل نظرة الناس الآخرين ولا توقعاتك نتي لروحك وتلقاي الواقع شئ آخر.
التجارب السلبية مثل مشاعر الانتقاد أو الشعور بالذنب أو اللوم أو التعرض للاعتداء أو الإساءة جميع هاذي الاشياء تحبطك وتحط من تقديرك لذاتك وبالتالي من ثقتك بنفسك.
و ضغوطات وصعوبات الحياة مثل الامراض,الاحداث المفجعة والمؤلمة,اعاقات,فشل في شئ ما دراسة زواج او علاقة هاذي الحوايج ثانيك يكون عندها تاثيير سلبي عليك وعلى تقديرك لذاتك
و اهم شي شخصيتك هي لي تلعب دور كبير في حالة سوء تقييم الذات ,بعض الناس يكونوا اكثر عرضة للافكار السلبية من غيرهم في حين ان البعض الاخر يديروا معايير عالية لرواحهم وما يحطوش مع هاذي السلبيات اي “شخصيتهم قوية”
و حتى الظروف المحيطة بيك ليها دور مهم جدا في بناء ثقتك بنفسك.
هاذو الحوايج كلهم يبداو يأثروا عليك من الداخل ونتي تبداي تعكسيهم على شكل سلوكيات
كيفاش يؤثر انخفاض تقدير الذات علينا؟
كي يكون عندك قلة ثقة بنفسك أو قلة تقدير لذاتك تولي تخبي روحك بعيد على المواقف والاحداث الاجتماعية وتتوقفي على محاولة تجربة اي حاجة جديدة في حياتك او فعل يكون فيه تحدي ليك
يقول كريس ويليامز وهو استاذ في الطب النفسي في جامعة غلاسكو “على المدى القصير تجنُّبُ التَّحديَّات والمواقف الصعبة تجعلك أكثر أماناً وعلى المدى الطويل يؤدي الى نتائج عكسية لانه يعزز شكوكك ومخاوفك الكامنة وهذا يعلمك قاعدة غير مفيدة وهي أن الطريقة الوحيدة للتعامل هي تجنب الاشياء”
العيش مع قلة تقدير للذات يضر بصحتك النفسية ويزيد من فرص القلق والاكتئاب
وهذا يخليك تطوري عادات سيئة كوسيلة باش تتأقلمي مع وضعك…كانعزالك على المجتمع مثلا او استسلامك لحالة عدوان يقع عليك او اهمال شكلك و الاساءة لنفسك في التغذية و الراحة العمل …و غيرها كثير من صور تدني تقييم الذات

ماهو  الحل ؟

الحل هو اننا نعززوا أو نقووا ثقتنا بأنفسنا ومنحبسوش عند فكرة “منقدروش”, او “منعرفوش”,ولا “صعيبة عليا”…

أعظم الكيانات لي يعتمد عليها الانسان باه يواجه أحداث الحياة بصعابها وتحدياتها بعد أعتمادو علي ربي هي ثقتو في قدراتو ونفسو وكل ما كان الانسان عندو الثقة في امكانياتو وطاقاتو كلما ثبت امام رياح الواقع وكلما تيقن أنو أقوى من الحياة .

…شمس دافئة

90 بالمية من المسلمين يعانيو من مشكلة انهم مايقدروش ينوضو لصلاة الفجر
في الصيف بكري بزاف و في الشتاء يا عيني البرد و الثلج و زيد شيطان يزينلك النومة
لكن فكري معايا في الاول
هل بزاف على ربي سبحانه و تعالى لي خلقك و صورك احسن تصوير و لي مدلك بيت و و و باش تتدفاي انك تنوضي 10 دقايق قيس ما تصلي و تعاودي ترقدي ؟
حسيتي بالذنب صح ؟ انا ثاني لانو ربي سبحانه على قد ما نشكروه ما نكفيوش حق شكرو
فخلينا نديرو خطوات بيبي داداش و نحاول نحافظو على صلاة الفجر
الحاجة الاولى : ترقدي بكري
يعني الاخير تاعك 10 ولا 11 تع الليل
كي يلحق هاداك الوقت لازم تقفلي النت و التلفاز و الكتاب و موقع زخرفة و تروحي ترقدي
لكن قبل لازم تضبطي المنبه على وقت صلاة الفجر تماااماااا
هنا هو السر لانك لو ضبطتيه قبل
تقولي باش نتوضى و لا باش نصلي قيام قبل الفجر
راح تقولي نزيد نرقد شوية. يا بنتي داومي على الفجر قبل
هو في الحقيقة الشيطان ماشي نتي .. لكن هكا و لا هكا راح الفجر
تمام ؟ درت هادي الخطوة
جيد ، اصبري ما ترقديش
ديري الحاجة الثانية قبل
و لي هي اذكار ما قبل النوم
هكا باش ترقدي و تنوضي و الشيطان بعيد عليك 
تلقايهم في كتاب الاذكار
و الا ننصحك بتطبيق اسمو اذكاري تلقايه في متجر جوجل رح يساعدك بطريقة رائعة
خلاص رقدتي بعافية
يجي وقت الاستيقاظ
لازم تحطي في راسك اول ما تحلي عينك
او نص عينك ما يهمش
لازم ديري كي الغريق لي يتمسك باول قشة يشوفها
حالة طوارئ ، كون ما نوضش رح نفشل في التحدي
برك تحلي عينك قولي اعوذ بالله من الشيطان الرجيم اصبحنا و اصبح الملك لله
علاش ؟ لانو الرسول عليه الصلاة و السلام قالنا بني ادم كي ينام الشيطان يعقد على قافية الراس تاعك ثلاث عقد
تخيلي راكي مربوطة و اتزم تفكي روحك
العقدة الاولى تتحل كي تقولي اصبحنا و اصبح الملك لله و تستعيذي
و الثانية كي تروحي تتوضاي
علابالي الماء بارد ، متخافيش ربي مش رح يخليك
هادوك العقد لي بقاو راح تحسي بخمول و كسل
و راح نهارك يجوز و هو مفيهش بركة هاي 8 هاي 12 هاي 16 هاو العشاء
حسيتوها من قبل صح ؟ فكرتي في الفجر ؟
و طبعا الا تنحاو العقد رح تحوزي نهارك سبحان الله بنشاط و حيوية و كلك صحة
صباح النشاط

…شمس ضياء